(مش مسامحه أي وحده تقرا وماتتفاعلش)
#طوبى "أقحوان وفلة وياسمينه"
#جمان_فريد
#الجزء_الخامس_والأربعين"اهرجو3"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫🚫ملاحظه🚫🚫
اي تعليق عنصري حيتم حظر صاحبه..
اي تعليق فيه سخريه ع ثقافه الطوارق حيتم حظر صاحبه
واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم
نتمنى تكونوا قريتوا هالملاحظه كويس..وشكرا ع تعاونكم مسبق🌸
☕☕☕☕☕☕☕☕☕☕☕☕☕☕☕☕☕
فتح الباب..
شبح للفيرندا...
بانت عليه دار الجالي من الفيرندا..
فاضيه...
خش داخل حط اللوحات ع الأرض..
ومشي لباب الفيرندا سكره..
وين شاف للمرش متاعه لقاه من النوعيه اللي ماتبين شي من داخل لكن من برا تبين كل شي..
حط ايديه في نصه وقعد يمرر في نظره عليه لين شاف اليد اللي تنزل السيرانتي..
ابتسم وقال:كويس بكل..
وجاها شدها ويلف فيها لين نزل السيرانتي وظلمت الدنيا..
التفت وقعد يتحرك في الظلام لين وصل في الحيط..
قعد يتلمس فيه لين وصل للمفتاح..فتح الضي..
مرر نظره ع الدار وهو يفكر بعدين قال:تبي فرشة صغيره هنا..
طاوله وكرسي غادي...
الدفايه هنا..
يتكلم وهو يأشر ع الأماكن..
هز راسه وقال:بإذن الله مايكمل الاسبوع هضا الا وانا وداير كل شي..
تنهد بعدين مشي طلع من الدار وسكرها...
☘وفي حوش جيرانه..
كانت المنظومه قالبه الدنيا..
والعرايس حواليهم ماليهم يهدرزوا عليهم ويسألوا عن احوالهم..
أميمه:اطمني ماما الحمد لله مرتاحه هلبه..
صفيه بإبتسامه:الحمد لله...
سدرة:مافي حد ضايقك هني ماسمعتي من حد كلام ضايقك ولاشفتي حركه وجعاتك؟
ضحكت طوبى وقالت:لاسديرة ياقلبي اطمني ع الآخر كان يلقوا هما والجالي مايخلوني نمشي ع الوطا..
مطيرة بإبتسامه:ان شاء الله دوم هكي..ربي يهنيكم ويسعدكم دوم انتي وبنية عمك..
كلهم قالوا:آمين..
بعدين فردوس قالت:مش نفس المزينه دارتلكم المكياج؟
سدرة:طوبى دارت بروحها..
طوبى وهي تضحك بتعجب:كيف عرفتي!؟
سدرة:واضح اصلا مكياجك نزبطه..
طوبى بضحكه:صح اني درته لكن المزينه لبستني..
فردوس:تعرف تلبس..
مطيرة:ايه..
ع جية مغليه وهي مبتسمه؛تفضلوا تريحوا ياعيله ماتقعدوش واقفين هكي..
مطيرة؛هانا ماشيين بنقعمزوا في مكاناتنا..هيا يابنات..
طوبى:غير شويه بس..غرفه علاش ماجتش..
سدرة:عمة راجلها تعبانه قاعدين عندهم توا..
طوبى بأسف:إن شاء الله لاباس عليها..
سدرة:تجيك نهار تاني ان شاء الله..
طوبى هزت راسها وقالت:إن شاءالله..
مطيرة:هيا بنات..
ومشت وهما لحقوها وقعدت اريج حدا طوبى وصفيه خدت مغليه ع تركينه..
صفيه:اميمه امانه عندك يامغليه حطيها مكان نسرين وخديجه بالله عليك هي راس هالبنيه اللي عندي..
مغليه بضحكه تعجب:عليك مهبوله ياصفيه راك توصي فيا ع بنيتي..وبعدين شن تشبحي فينا ياكبدي غولة!!؟
صفيه؛مش القصد يامغليه..اني مشغوله ع بنتي بس..
مغليه ابتسمت وقالت؛ماتخافيش زي ماانتم ماليها حني ماليها وحتعيش بيناتنا زي الأميره..
ابتسمت صفيه بقلق وقالت:تسلمي يارب..
☘اريج:وقداش بتقعدوا غادي؟
طوبى:اسبوعين هو قبل يبي شهر بس اني قتله يخليهم اسبوعين ع خاطر القرايه..
اريج؛ياريتك سمعتي كلامي ووقفتي قيدك..
طوبى:كان وقفته مش ضامنه كان مازال نقدر نولي خل نكمل توا ونرتاح..
اريج:براحتك..هي مالانخليك توا..باي..
ومشت بسرعه لمكانها وقعمزت بش يفرقوا عليها الضيافه..
وطوبى قعدت تشبحلها وهي تضحك..
بعدين غيرت عيونها عنها جو في عيون سالمين..
كانت تشوفلها بنظرة حزن ولما شافتلها طوبى ابتسمت بحزن..
هي ردتها مجامله بعدين غيرت عيونها عنها وهي مضايقه..
تحب سالمين هلبه..بس نظرات الحزن اللي تشبحلها بيهم ديما يضايقوا فيها لأنهم يذكروا فيها بأمها..
☘☘☘☘☘
"ردي بالك ع خواتك بنتي"
صفاء:حاضر ماما..
فايزة:في امان الله..
وقعدت فايزة واقفه في الباب تشوف في بناتها كيف نازلات من الدروج..
بعد مادرقوا عن عيونها..
خشت داخل ومشت وقفت في الروشن..
شويه وشافتهم ماشيات يقصوا في الطريق..
☘ومحمد المهدي وهو واقف برا مع عمه نضال وصحابه..
شافهم..وقعدوا عيونه عليهم..
وين شبحهم قصوا الطريق وبيوصلوا في الحوش..
انسحب من جنب الشباب ومشالهم طول..
وصل فيهم وقال:شن جو..
صفاء ومروة:تمام..
هو طلع المفتاح وفتح الباب ووخر عنه..
وهما خشوا..
قعد مركز مع مروة كيف مازال ماتلبسش في حجاب تنرفز منها..
سكر الباب وهو مضايق ومشي ولى للشباب..
☘وامهم بعد اطمنت عليهم خشوا..
سكرت الروشن ومشت لأمها في الدار شافتها لقتها غارقه في النوم..
مشت طلعت للصاله وقعمزت فيها وقعدت تتفرج ع التلفزيون..
☘☘☘☘☘
"اهلا اهلا بالغزالات"
صفاء بإبتسامه:اهلا بيك خالتي نسرين شن حالك..
نسرين:الحمد لله شن جوك انتي وشن دايرة مع الثانوي..
صفاء:عادي مافيش فرق بينه وبين الاعدادي..
نسرين:فرق الاجواء والذكريات الحلوة انشدي امك تو تقولك..
صفاء:ديما تحكيلي عنكم وعن ايامكم صعب نعيش زيها في وقتنا هدا نحس في فرق كبير..
ابتسمت نسرين بحسرة وقالت:عندك حق..هي خشوا داخل خشوا..
خدت من صفاء عبايتها ووشاحها بش تعلقهم..
والبنات مشوا خشوا للصاله..
مروة:محلاها طوبى تجنن..
صفاء بإبتسامه:ايه فضيعه وحتى اميمه طالعه حلوة هلبه..
ومشولهم..
طوبى بفرحه:جيتوا!..
صفاء بضحكه:جينا..
ومشوا يسلموا عليهم..
☘مطيرة:فايزة بعتت بناتها..
سدرة شبحتلهم وابتسمت...
ومن جهة تانيه في نفس المكان..
كانت نجاة مازال راعشه من الموقف اللي صار وفي نفس الوقت دمها كان يغلي غلي من خديجه تبي تردلها اللي داراته كله ومش عارفه كيف قريب تهبل
عيونها ع طوبى وهي تهدرز والابتسامه مافارقتش وجهها..
تقول في نفسها
علاش هي في العلن واني في السر!؟
حنقعد ديما هكي منهانه وماعنديش قيمه وعايشه خايفه..والامان والراحه والقدر ليها هي بس!
وتزيد تغير من طوبى..وتحقد ع طوبى..
وتراجي بفارغ الصبر امتى السحر ياخد مفعوله معاها..
شويه..
ومشت نسرين للمنظومه وشغلت اغنيه ليبيه شعبيه ناشطه..
والدنيا شاشت معاها وناضوا يرقصوا
وطوبى واميمه يتفرجوا..
ناضوا اريج والاء رقصوا حتى هما..
وناضت صفاء...وكانت ملفته هلبه كبرت خلاص وولت صبيه العين عليها..
ونجاح تشبحلها وهي تقول في نفسها..
"شكله حتى هي عرسها قريب نحضروه"..وابتسمت بتهكم..
شويه ناضت نجاة..
حولت البشت وقعدت بالقفطان..
وخشت في النص وبدت ترقص..
وكلهم يتفرجوا عليها..
رقيصها كان حلو..وهي طالعه حلوة..
هلبه قعدوا يتحسروا عليها ويقولوا راجلها خلاها صغيره..
وناس وتانيه قعدت تقول..
"مش كان ردها واحد من خوته خير"
وخديجه واقفه تشوفلها وهي مبتسمه بتصنع ومن داخل تسحن عليها..
ماعطلتش هلبه في الرقيص..
وقفت ومشت وقفت في النص بين كراسي اميمه وطوبى..
وخديجه ونسرين ومغليه عيونهم عليها..
نجاة بضحكه وهي داهشه:قداش ليا مارقصتش هكي.
شبحولها الزوز وابتسموا مجامله..
نجاة بإبتسامه:حتى هو فرح سليفي عمر ربي يحفظه قالك ان اني سبب الفرحه اللي عايشينها توا؟
طوبى قعدت تشبحلها بريبه..
واميمه وهي مبتسمه مجامله قالت:ايه..بارك الله فيك
نجاة:تسلمي..بس عاد راجلك مانسانيش من الهديه..ومدت يدها ورتها الخاتم وقالت..هذا هديه منه..
خديجه شبجت لأمها واختها لقتهم يشبحولها بقلق..
اميمه ماتندريش ع قصة الخاتم واستغربت كيف عمر ماقالش ع حاجه زي هادي..بس دارت روحها عاديه وقالت..تستاهلي كل خير..
نجاه وهي مبتسمه:شكرا..بعدين شافت الحديده وقالت..اما الحديده هادي جتني من حد عزيز وغالي..
"الله يرحمه"
نزلت نجاة يدها وشبحت لطوبى وهي عاقده حواجبها وقالت:من هو؟
طوبى:راجلك..مش هو اللي جابهالك؟
اميمه قعدت تشوف في طوبى كيف تكلم في نجاة وحستها ماتقبلتهاش..
نجاة شبحت لطوبى شويه بعدين ابتسمت وقالت:ايه الله يرحمه..
ع جية خديجه وهي تقول:هي نوضوا عرايس بش ترقصوا شويه..
اميمه وطوبى باصوات متقطعه:تمام..باهي..
وساعدتهم خديجه ينوضوا ونزلتهم..
ونجاة واقفه تشبحلهم بحده..
☘☘☘☘☘
مقعمز في داره..
النوم اللي كان يبي يرقده فجأة طار وقعد مكسد..
طلع من الشنطه كراسه كبيرة متاع خط..
خدي بيرو من الشنطه ..
وبدي يكتب فيها..
مش كتابه عاديه..
لا...
عبد القيوم من اكثر من 5سنوات ولت عنده موهبه جديده لقت اعجاب وتشجيع المحيطين بيه...
خطاط...
كان يكتب بكل انواع الخطوط ...
فنان في الكوفي وخط النسخ...
اول حاجه كتبها في طرابلس...كانت جملة..
"شارع القهوة"
كمل كتيبتها وقعد يتفرج عليها وهو مبتسم..
شويه..
ووصلت لمسامعه اغنيه جايه من الحوش اللي جنبهم قعد يسمعلها..
