#طوبى "جنة طوبى"
#جمان_فريد
#الجزء_السابع_والستين"مقاومه"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار
عن شَدَّاد بْن أَوْسٍ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ قال : ( سَيِّدُ الِاسْتِغْفَارِ أَنْ تَقُولَ : اللَّهُمَّ أَنْتَ رَبِّي لَا إِلَهَ إِلَّا أَنْتَ خَلَقْتَنِي وَأَنَا عَبْدُكَ وَأَنَا عَلَى عَهْدِكَ وَوَعْدِكَ مَا اسْتَطَعْتُ ، أَعُوذُ بِكَ مِنْ شَرِّ مَا صَنَعْتُ ، أَبُوءُ لَكَ بِنِعْمَتِكَ عَلَيَّ وَأَبُوءُ لَكَ بِذَنْبِي فَاغْفِرْ لِي فَإِنَّهُ لَا يَغْفِرُ الذُّنُوبَ إِلَّا أَنْتَ ) ، قَالَ : ( وَمَنْ قَالَهَا مِنْ النَّهَارِ مُوقِنًا بِهَا فَمَاتَ مِنْ يَوْمِهِ قَبْلَ أَنْ يُمْسِيَ فَهُوَ مِنْ أَهْلِ الْجَنَّةِ ، وَمَنْ قَالَهَا مِنْ اللَّيْلِ وَهُوَ مُوقِنٌ بِهَا فَمَاتَ قَبْلَ أَنْ يُصْبِحَ فَهُوَ مِنْ أَهْلِ الْجَنَّةِ ) رواه البخاري
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃إِعتذارات العَالم أَجمَع لن تكفي ،خيبَة إنسان خُذل من شخصه المفضل🍃
__________________________________________
ويطل صباح ربيعي أخر
صباح عادي لأغلب اهل شارع القهوة
ماعدا زوز
نسرين اللي كانت حاسه روحها ولت انسانه جديده
كأنها كانت ميته والروح انبعتث فيها من جديد
ممكن لتوا نسرين ماحستش بشعور الحب اتجاه ربيع
بس شعور الراحه اللي قاعد يغمرها توا حيجيب الحب بعدين لامحاله
جهزت نفسها بش تمشي للمدرسه..وصت امها على يحيى
وطلعت مع بنت خوها سدرة من الحوش..
ركبوا السيارة وتحركت بيها متوجهه لمدرسة بنت خوها بعدين للمدرسه اللي تخدم فيها..
🍃وهو كان في حوشه..
يوتي في فطوره وهو يغني..
نك لغ الزمن..ايلان ايوتيان..
ويدندن فيها وهو يرقص ويحط في الحاجات في سفرة فطوره..
لين كمل..
وكيف جي بيفطر..
شبح للفطور وضحك ضحكته المميزة بعدين قال..
تصدق ماعنديش فيك نيه..شن معناها هادي ترا!!؟
ضحك تاني..بعدين ناض وقعد يرجع في حاجات الفطور لمكانها وهو يغني..
نك لغ الزمن...آيلان ايوتيان...
🍃🍃🍃🍃🍃
وفي حوش لطفي الواعر..
فطروا آلاء واريج وطلعوا للجامعه...
ومطيره وفردوس بعد مافطروا غرفه وطوبى..
ضموا الحوش كله..
وبدوا يوتوا في حاجات البسيسه بش يديروها في المطبخ الخارجي...
طعام"قمح"...قصب..حلبه..اكليل..كمون..حمص جاف..فول مدشش جاف...
الى جانب..المكسرات..وقشور البرتقال الجافه...
وبدوا بالتحميس وصفيه جتهم تعاون فيهم...
🍃وبعيد عنهم..
في الحوش..تحديدا دار المعيشه اللي كانوا مفتوحات رواشنها بش تخشلها الشمس..
كان غرفه متكيه وهي شاده تليفونها تتفرج ع فيديوهات محتواها يحكي عن الحمل والانجاب ومايخصهم..
وطوبى حداها تتكلم بالتليفون..
طوبى؛والله صعب جدا الاسبوع هدا كله مانقدرش نجي..
"باهي مش مشكله تو نتصرفوا.."
طوبى:عارفتكم تهنوني ابله زينب..
"بإذن الله نكونوا عند حسن الظن..المهم كان في حاجه مهمه هلبه نجيك للحوش"
طوبى:إيه أكيد تفضلي في أي وقت..
"هيا مانعطلش عليك"
طوبى: استني شويه ابله زينب بنسألك ع حاجه..
"تفضلي استاذة"
خدت نفس وقالت .
نبي نسألك ع عبايتك وجلابيبك منين تاخدي فيهم؟
"ناخد فيهم من******** في شارع******* زبطتيه؟"
طوبى بإبتسامه؛ايه نزبطه..صحيتي ابله زينب.
"سلمك استاذة..تبي مني حاجه تانيه؟"
وهي مبتسمه قالت..لاصحيتي بارك الله فيك..السلام عليكم.
"وعليكم السلام"
نزلت طوبى التليفون وسكرت عليها..بعدين اتصلت بآلاء اللي ع طول ردت عليها..
"ايوه بيبو"
طوبى:هلا حبيبتي وينك توا؟
"كيف خشيت للكليه'
طوبى:باهي تمام..كلمتك توا بش بنقولك بنحيرك في مشوار بعد تكملي محاضراتك..
"وين ياقلبي"
طوبى:لمحل ****** في ****** نبيك تشوفي بضاعتهم واسعارهم باهي..
"حاضر ياقلبي بعد نكمل محاضراتي نمشيلهم طول"
طوبى:سلمها ياربي..هي مانعطلش عليك سلام..
"سلام "
🍃وسكرت آلاء من خالتها..وكيف جت بتنزل من السيارة جاها اتصال من خالها..
ردت طول..
الاء بإبتسامه؛خالو عاش من سمع صوتك..
ضحك بعدين قال..
"كنت مسافر حبيبتي امس بس روحت"
الاء:اها..الحمد لله ع السلامه..
"الله يسلمك..شن الامور شن الأخبار"
الاء:الحمد لله كله تمام..
"تمام تمام..فيها كيف نتلاقوا اليوم"
الاء؛اليوم صعب خالو خليها غدوة باهي..
"غدوة غدوة مافيش مشكله نبيك تجيني الشقه تمام"
الاء:ان شاء الله خالو..
"نتلاقوا..تشاو"
هي بضحكه قالت؛تشاوات..
وسكرت منه..بعدين نزلت من السيارة..سكرتها كويس وتوجهت للقاعه اللي فيها محاضرتها..
🍃🍃🍃🍃🍃
وفي شارع الفيلا متاع الجالي..
طلع بالسيارة من بوابتها بش بيمشي لعمله..
وهو يمرر في نظره ع الطريق لفت انتباهه زحمه قدام فيلا وا من الجيران..
استغربلها..وولى عنده فضول يعرف سبب هالزحمه..
مشي بالسيارة ناحيتهم..
درس حداهم ونزل مرش السيارة وقال..
السلام عليكم...
شبحوله وردوا..
وعليكم السلام..
الجالي:خير ان شاء الله!؟
راجل الجارة جميله قال.. منقزين في حوش جارنا عبد المولى..
الجالي عقد حواحبه وقال:لالا!...شن واخدين؟
الجار اللي انسرق حوشه؛خانبين المربوعه الخارجيه باللي فيها والكوجينه الخارجيه واخدين منها الثلاجه وبمبله الغاز..
الجالي بأسف:لاحول ولاقوة الا بالله..بلغتوا؟
:ايه بلغت قريب يوصلوا..
الجالي هز راسه بعدين قال:حتى في شارع حوش العيله صار نفس الشي..
:قالوا في عصابه افارقه تخنب في الحياش منتشرين في اكثر من منطقه..
الجالي:أفارقه!؟
:ايه..
راجل جميله قال:مش اكيد كلام ناس واشاعات..
الجالي:كله وارد ماتستبعد شي..
هو رد عليه يقول:ع العموم اني تونشوف الكاميرات عندي..
:ايه صح انت عندك كاميرات راحت عن بالي الحاجه هادي..
:راجو لين تجي الشرطه..
راجل جميله؛صح مزبوط خلي لين يجوا الشرطه..
الجالي:ان شاء الله يديروا حل..هي السلام عليكم..
كلهم ردوا عليه بأصوات متقطعه..
وعليكم السلام..
وهو رقى مرش الباب وتحرك طول...
🍃🍃🍃🍃🍃
الساعه 11:15صباحا..
في مدرسة البنات للتعليم الأساسي.
وقت الاستراحه..
كانت مروة مع صاحباتها تراقب في راما اللي قاعده مع اسماء ومجموعتها..
شويه شافت راما ناضت مع زوز بنات ومشوا لمقصف المدرسه..
واسماء ماشيه بروحها جهة مكان معشب في المدرسه..
وقعمزت ع الارض..
مروة؛شويه وجايتكم..
ومشت من حدا صحباتها اللي قعدوا معاها بعيونهم..
لين شافوا واقفه ع اسماء..
وحده منهم قالت؛عارفتها مش حتهني روحها ..
:تجيب لروحها في المشاكل في جرة راما شن دخلها بيها ان شاء الله تنحرق لا هي اامها لابوها...
🍃اسماء ناضت وقفت وهي تشوف لمروة برفعة حاجب وتقول؛خير حبيبتي شن تبي؟
مروة بحده؛علاش ماتخليش راما في حالها؟
ضحكت بتهمن وقالت؛نعم!!؟
مروة:خلي راما في حالها ماتجريهاش لطريقك..
بحده ردت عليها تقول:طريق شن حبيبتي شن تشوفي فيا قدامك!؟
مروة ؛انتي ادرى بروحك راما مش زيك ماتخليهاش تمشي في طريق مش ليها..
بضحكه ساخره قالت:ومازال تقولي طريق!...شوفي ياحلوة اني ماضربت حد ع يده بش يصاحبني تمام..وبعدين يامحترمه تلميحاتك عيب وغلط وكانك متربيه صح ماتقوليشي شن شفتيني دايره بش تقولي هكي!
مروة بإبتسامه متهكمه؛أسألي غيري يقولك...المهم لأخر مرة نقولك خلي راما في حالها لأني المرة الجايه بنخلي ابله نجاح تتفاهم معاك..
ومشت وخلتها..
واسماء تبع فيها بعيونها اللي نظراتهم كلها غضب..
بعدين ولت قعمزت وهي تقول بوعيد..
باهي يامروة باهي...انتي اللي بديتي..
🍃وين ولت مروة لصاحباتها بدوا يسألوا فيها..
:علاش مشتيلها؟
مروة قعدت ساكته وهي مضايقه..
:معدله عليك ولامعبراتك اللي دوري في مصلحتها!؟ تو لما تعاودلها اسما تشوفي شن ديرلك..
:طلعيها من راسك يامروة وفوتيها معاش تدخلي..
مروة وهي تشوف لراما كيف ماشيه بإتجاه اسماء قالت..
هادي اخر مرة بعدها صدقوني خلاص معاش بندخل فيها بكل..
🍃ومن مدرسة البنات للتعليم الاساسي..
لمدرسة البنين للتعليم المتوسط..
كان محمد واقف مع صديقه وولد شارعه وفي واحد تاني واقف معاهم...
صديق محمد؛عمي فاتح كوشه ليه مده وماشاء الله زبابينها كل يوم في الزايد الولد اللي يخدم عنده معاش يقدر يشد بروحه يوم كامل قال بندير زوز واحد يشد الصبح والثاني بعد الظهر..شن رايك..
:لاكوشه لا..فوت الموضوع اني نبي محل مواد غذائيه ولامحل ملابس.
هز راسه وقال:ع راحتك..ع العموم رقمك عندي كان حصلتلك زي ماتبي تو نكلمك..
:تم..ومد يده وصافحه وهو يقول..منور..
:تسلم..
ومشي زميلهم..محمد بعد ماكان يشبحله رجع شاف لصاحبه وقال..وينها كوشة عمك؟
؛تي هديكا اللي مرات نوقف عليها وحني مروحين بش ناخد خبزة للحوش..
محمد رفع حواجبه وقال؛تفكرتها قريبه مش بعيده.
؛ايه..
محمد؛باهي في المرواح بتمشيلها؟
:ايه خالتك زهويه من الفجر توصي فيا الغدي فاصوليا جيب خبزة وانت مروح..
محمد وين تجي سيرة يحس بألم يخفي فيه ورا ابتسامه غصب..
قال لصاحبه؛تمام..تعالى..
وحاوط كتاف صاحبه ومشوا مع بعض وهما يهدرزوا..
🍃🍃🍃🍃🍃
"قتلك ياحسنا طبعه صعب وانتي ملاحظتيه من قبل"
حسناء ودموعها في عيونها؛ايه بس مش للدرجه هادي..
اميمه؛خليك حقانيه انتي استفزتيه ولا؟ هو من قبل شرط عليك امور معينه انتي وافقتي عليهاعلاش توا تعارضي فيه وتقولي مش قاري فيا فاتحه!؟
حسناء بضيق؛نرفزني يا اميمه..
اميمه؛تمام عندك حق تزعلي منه..بس انتي لمتيه مرة وهو اعتذر ولا علاش تقعدي تفكري فيه بالقصه كل شويه!؟
حسناء؛نتغلى اميمه ومن حقي نبي نحس ان نادم ع الحركه اللي دارها ومعاش يعاودها نبيه يقولهالي بكلام حلو نبي نكون زيي زي هالبنات اللي ينخطبوا ويقولوا الخطوبه احلى مرحله..
تنهدت اميمه بضيق وقالت؛حسنا بالله ماتوجعي قلبي وتحسسيني بالذنب..خوي وتعرفيه واعتقد لما جاك هني وتكلمتوا عرفتي طبعه وطريقة تفكيره من توا نقولك لو عابيه ع روحك بتغيريه بالطريقه هادي مش حيتغير..
تعاملي معاه صح ماتقلديش غيرك شن يديروا ياحسنا مش كل الرجاله زي بعض..
غيرت حسناء عيونها عنها ومسحت دمعه هربت
