# طوبى "شارع القهوة"
#جمان_فريد
#الجزء_الخامس_والعشرين"محفور فالقلب غلاك"
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
☕☕☕☕☕☕☕☕☕☕☕☕☕☕☕☕☕
"خطي ع الجلسة متاع الصاله"
خطت اميمه ع وحده من الحاجات المكتوبه في قائمة طويل تخص عرس يوسف..
اللي يديرها اوهما يديروها يخطوا عليها..
اميمه:قعدوا القطع متاع الممرات بس..
صفيه:ساهلات هادو..
يوسف:اخر شي للحوش ولا؟
اميمه شافت القائمه وقالت:اممم..
صفيه:بعد نكملوا حاجات الحوش نخشوا ع دبش الكسوة..
اميمه:شن امورك تمام يوسف ؟
يوسف:لالا الحمد لله ربك ساترها..
صفيه:وان شاء الله ديما مستورة معاك ولدي..
فجأة..
سمعوا صوت دق قوي ع باب الحوش.
يوسف ضيق عيونه وقعد يسمع..
صفيه:هذا بابنا..
اميمه بقلق:من اللي يطق هكي !؟
صفية:إن شاء الله خير..
ناض يوسف وهو يقول:خل نمشي نشوف..
ومشي طلع من حداهم وهما يتبعوا فيهم بعيونهم..
☘وفي حوش عمهم..
كانت طوبى في وسط الحوش مقعمزة تكتب في واجباتها..
وسدرة حداها تحضر في الدرس..
وفي الدار غرفه راقده..
وبوها في داره مقعمز يقرا في القرآن..
...في وسط الحوش....
طوبى:سدرة ترا شوفيلي المسأله هادي..
سدرة شبحت للكتاب وخداته..
طوبى:التمرين رقم سته..
سدرة قعدت تقرا فيه بعدين قالت:تعالي.
"عمي لطفي"
الزوز سمعوا الصوت وقالت وحده فيهم.
سدرة:يوسف..علت صوتها شويه وهي تقول..بوي...يابوي..اطلع ليوسف ينادي فيك..بعدين شبحت لطوبى وقالت؛ركزي معاي..
طوبى قعد تشبح للتمرين وهي تقول:باهي..
ع طلعة لطفي من الحوش..
مشي طول جهة الباب الفاصل..
لقي يوسف واقف قدامه..
لطفي:نعم..
يوسف بتوتر:تعالى معاي..
لطفي بقلق:جدك صايرتله حاجه؟!
يوسف:لالا مش جدي...غير تعالى ياعمي..
مشي يوسف ولطفي وراه والقلق مسيطر عليه.
لين وصلوا للحوش..
خشوا داخل..
لقوا مطيرة واقفه في جهة والشامس في جهة..
والحاج علي مقعمز ع كرسي وهو سرحان..
فهم لطفي ان خلاص المدرق بان...
وجه مطيرة يقول هكي..
لطفي:السلام عليكم.
شبحله بوه ..
وهما ردوا عليه:وعليكم السلام..
يوسف:اهو جبته عمي ياعمتي..
علي:هي تكلمي..
مطيرة شبحت للشامس بحده وهو يشوفلها بنظرات خوف عليها...
مطيرة:عمري جيت شكيتكلم ولاقلتلكم تعالوا حزوا بيني وبينه.
علي:لا ولامرة..ماعندك علاش تشكي واخده راجل الله يبارك عليه حاطك في عيونه ومش منقص عليك شي..
لطفي قعد يشبح لبوه بضيق..
مطيرة ابتسمت تهكما وقالت:حتى اني كنت نقول هكي..
وكنت نقول يستاهل الشامس ضحي ع خاطره بالذريه يامطيرة...وكنت كل مايجي خاطري يكون عندي عيل نقول الشامس غانيني عن كل شي..ضحكت وقالت..المفاجأة وين ان هو اللي طلع قاعد معاي ع عيبي..
يوسف استغرب كلامها..
مطيرة:طلعت اني العقيمه مش هو وهو كاذب عليا وقالي العكس..
انصدم يوسف..
مطيرة بضحكه:مش هكي وبس..طلع واخد عليا ليه 11سنه وعنده صغار..
يوسف شبح للشامس بصدمه...
والشامس يشوفلها بحزن..
مطيرة وهي تضحك:هادي اقوى منهم كلهم..مرته التانيه عرفني عليها ع اساس انها اخت صاحبه وخلاني تصاحبت اني وياها لينا خمسة سنين تخش عليا وتطلع ع اساس انها صاحبتي واخت صاحبه واني حبيتها وخشت قلبي لدرجة اني جيت بنخطبها لجارنا الدكتور إياد..وهي مراة متزوجه..ومش اي مراة متزوجه لا...ضرتي..
يوسف قعد يشبح للشامس بحقد وقال:شن اللي تقولي فيه عمتي ياعمي الشامس..
علي:يوسف...
سكت يوسف ومازال يشوفله بنفس النظرات..
هي ركزت ان يوسف بس اللي حمق اما بوها وخوها حتى ملامح المفاجأة مش باديه ع وجوههم..
مطيرة:بوي...لطفي...سمعتوني شن قلت!!؟
بوها شبحلها..
ولطفي يهرب بعيونه عنها..
مطيرة بإستغراب شديد؛شن ماعندكم ماتقولوا!!؟ولامش ماتبوش تهزبوه قدامي..خلاص تو نطلع لكن لازم يعرف اني خلاص معاش مازال نرضى بيه ومش حنتنازل عن الطلاق..
جت بتطلع شدها لطفي من ذراعها..
شبحتله..
لطفي بضيق شديد:خليك..
قعدت تشبحله وهي ساكته ملامح وجهه يقولوا شي هي ماتبيش تصدقه...
علي:علاش تبي تطلقي..
التفتت شبحت لبوها بصدمه...
والشامس يشوفلها بنفس نظرات الحزن والخوف..
رمشت عيونها بسرعه بعدين عقدت حواجبها وقالت:راك تقولي انك عارف؟
علي:ايه عارف كل شي..
مطيرة انصعقت وهي تشوف لبوها مش قادره تصدق..
علي:في شن غلط الراجل قوليلي..انه حاول يحافظ عليك ع قد مايقدر!..انه خدي هو العيب وخلا الناس تشوفه عقيم!؟
لما جاني نهار عرف اللي فيك كان يبكي وقالي ياعمي مطيرة نعرفها كان تعلم تطلب الطلاق ماترضا حد يشاركها فيا..
وحتى اني نعرفك كويس..مش حترضي تقعدي معاه ولاحترضي تجي عليك ضرة..قالي ياعمي اني بنقول العيب مني..ماوافقتاش في الاول بس هو صر عليا هدا كله بش مايخسركش..خوك لطفي شاهد وعارف كل شي..
لطفي:حتى حني خفنا عليك تعرفي..تحبي الصغار هلبه يامطيرة كنا متوقعين لو عرفتي ان المشكله فيك انتي تصيرلك حاجه...
علي تنهد وقال:حتى في زواجه تاني جاني وخدي اذني واني عطيته الاذن بعد عرفت انها تسكن في مدينه اخرى بعيد عنك..وكل شي داره من هداكا اليوم لليوم بش يحافظ عليك بس..انتي لو حطيتي روحك مكانه تفهميه..
"وأني يابوي"
قعدوا يشبحولها وهي تتكلم بنبرة مكسورة:اني مافكر فيا حد!؟ مافي حد حط روحه مكاني..مافي حد جرب يفكر في الشعور اللي نحس بيه توا..كنت زي الهبله المضحوك عليها..غافله مانندري ع شي..كلكم..كلكم لعبتوا بيا وضحكتوا عليا...ياااه يامطيرة..وانتي اللي تحاسبي روحك فطينه وماتفوتك حاجه..طلعتي هبله ودوريشه ينضحك عليك بكلمتين..
🥀اميمه كانت في دارها تسمع في كلام عمتها وهي تبكي حاسه بيها وفاهمه اللي تمر بيه..
وامها حداها كانت موجوعه ع حماتها وفي نفس الوقت مصدومه في اللي صار معاها..
مطيرة:اني اكثر من قهرني انت يابوي..كيف هنت عليك..كيف هانت عليك مطيرة بنتك الوحيده اللي ماترضى فيها دقة الشوكه..هاك رضيت فيا الاهانه يابوي..
علي بعصبيه؛ماتقوليش هكي..
لطفي شبح لبوه بخوف..
علي:اني بوك فاهمه شن معناها بوك..معناها همي كله مصلحتك مانفكر كان فيها..اني مش دايملك ولاخوتك يقدروا يديروا اللي يديره راجلك..اللي يعامل فيك تقول بنته مش مرته..راجل زي هدا مستحيل نفرط فيه نأمنه ع بنتي واني مرتاح..واني عارفك قلبك كبير ومع الوقت حتى تقربي صغاره ليك ويحبوك ويعاملوك زي امهم ويقعدولك سند..
مطيرة بإنفعال:لا..لا والف لا..والله لو تقتلوني معاد نوليله خلاص..
"معاش نقدر نعيش مع راجل طاح من عيني"
مشت طلعت من الحوش وهي تقول:لاوالله مانوليله..
وخوها لحقها بسرعه...
هي وصلت في الباب الفاصل وخشت حوش خوها.
وهي تقول:والله معاد يكسبني..والله..
وخشت للحوش..
وتلقوها بنات خوها.
سدرة وهي مفجوعه:خيرك عمتي..
لطفي وهو بيخش قال:مطيرة..
التفتت عليه وقالت:لطفي برا...ماتخشش امشي..مش طايقه نشوف وجهك..
طوبى بخوف:خيرها عمتي يابابا!..
مطيرة بصوت عالي وقهر:برا...
لطفي لف ومشي وهي كاره روحه...
سدرة :خيرك ياعمتي شن جاك شن في!!؟
حطت مطيرة يدها ع وسط راسها وغمضت عيونها بشده وهي تقول:وووك عليا ووك عليا...
سدرة وهي بتموت من الخوف:عمتي خيرك..
مطيرة حست بشي يرقى من تحت لفوق لين وصل راسها..
وماهي الالحظه وطاحت مغمى عليها بين ايدين بنات خوها..
سدرة بهلع:عمتي عمتي..حي عليا عمتي حي..
وطوبى ناضت بأعلى صوتها وهي تبكي:بابا..
جاهم لطفي خش يجري شافها طايحه بين ايديهم قال بفجعه..
"مطيرة!"
☘☘☘☘☘
فهالوقت..
كانت الدكتور اياد جاي لحوش لطفي بش يعطيه فلوس اللي طلب يجمعهم لطفي من الجيران بش يشروا بيه اضاحي للناس المستحقه من سكان الشارع..
هو دق الباب من هني طلع لطفي من هني..
كان ناوي يسخن سيارتك..
بس لما شافه قال بلهفه؛جابك ربي يادكتور خش شوف اختي مطيره المراة طاحت من طولها ومعاش ناضت..
هز اياد راسه وقال:لحظه بس..
ومشي يجري لحوشه...
وماهي الا دقايق وجي يجري بالسماعات وجهاز القياس..
لطفي:تفضل..
خش هو واياد..
لطفي قال بصوت عالي:جبت معاي الدكتور اياد..
سدرة وطوبى ناضوا خدوا وشاحات من ع الشماعه لبسوهم..
طوبى؛خشوا بابا...
وخشوا اياد ولطفي...
~~~~~~~
حول السماعه وفك الجهاز وقال وملامح وجهه كانت يبان عليها القلق برغم انه حواجبه كانت معقودة:الضغط مرتفع عندها لازم ترفعوها مستشفى...
سدرة بخوف:دكتور قول اللي عندك بالله عليك..
اياد:من فيكم اسعفها ووكلها كصبر مرحي..
طوبى:اني..
اياد؛كيف عرفتي ان ضغطها راقي..
طوبى:زي بابا مرة هكي صارله ووجهه ولى احمر هلبه..
سدرة:قصدك عمتي جاها الضغط..
اياد هز راسه بأسف وقال:ارفعوها للمستشفى بش تتأكدوا اكثر..وكويس اللي درتيه ياطوبى..
طوبى بشي من الراحه: الحمد لله.
لطفي:بري بسرعه ولعي السيارة ياطوبى المفاتيح ع المدخل.
طوبى:حاضر..ومشت تجي خدت المفاتيح وطلعت برا للحوش للسيارة..
ركبتها وشغلتها..
بعدين نزلت..
وشويه وطلع بوهة قايم مطيرة في غمره..
ع طلعة الشامس من الحوش شافهم..
جاهم يجري..
الشامس:خيرها مطيرة..
لطفي وهو متنرفز:زيد غادي..
وركب السيارة وسدرة ركبت جنب عمتها وضمتها وقعدت تقرا عليها..
اما طوبى خشت وهي مستغربه في بوها كيف كلم الشامس..
اياد كذلك انتبه وحس ان في شي مرر نظره عليهم وقال؛ان شاء الله لاباس عليها .
شده الشامس وقاله:خيرها!؟
اياد:ضغطها مرتفع..
الشامس حس قلبه وكأنه انعصر عصر..قال:ماتعرفش وين رافعينها..
اياد:لاوالله مش عارف..نستأذن..
طلقه وهو يهز في راسه..
واياد مشي ...
اما طوبى اللي كانت تشوف للشامس بحزن سكرت الباب وهي تقول..
"زعمه شن صاير بين عمتي وراجلها..ياربي معقوله عمتي وراجلها تعاركوا!!؟"
ومشت خشت داخل وهي مازال تفكر في اللي صار وخايفه..
🌻🌻🌻🌻🌻🌻
خش عليها لقاها ترقد فيهم..
قعمز ع السرير وقاللها:معاش مشيتي لفايزة..
نسرين شبحتله شويه بعدين قالت:لانمشي شبه يوميا..
حامد:امتى؟
نسرين؛بعد مانروح من العمل نخطم عليها بعدين نمشي لحوش بوي..
حامد:باهي اني مش قتلك لما تبي تمشي قولي نبي نشوف البنات نكسب اجر مسح راس يتيم مش عارف عليا ديما تحبي تحرمني اني ندير الخير..
نسرين في نفسها"انت غير صل قبل":برا الايتام الاجر غادي بالشبردق..
شبحلها بإمتعاض..
وهي تشبحله بإبتسامه مستفزة..
ناض من مكانه وخدي جاكيته ومشي طلع من حداها..
هي بقرف:حقير..
🌻🌻🌻🌻🌻
"نهاره اسود!"
لطفي:بالشويه يابنتي توا اني حكيتلك القصه كلها نبيك تتفهمي .
سدرة:لامعليشي بوي اني في الحاجه هادي مانتفاهمش..انت سامحني يعني..كيف رضيتها اختك معقوله!! ولاجدي صدمتي فيه صدمه كبيره...تي عمتي مطيرة ضي عيونه هكي يدير فيها!؟
سكت لطفي وهو مضايق ..
سدرة نزلوا دموعها وهي تقول:ياروحي عليها ياروحي عمرها كله عاشاته كذب في كذب..انتم تعرفوا شن درتوا فيها قتلتوها من داخل شن مايصير فيها بسببكم وفي رقبتكم..
لطفي بضيق:ماتزدينيش ع مابيا يابنتي..
سكتت سدرة بعدين خشت للمصحه وهي تبكي..
☘☘☘☘
وطبعا الحاج علي عرف باللي صار لبنته..
انوجع عليها هلبه..بس ماحسش بالندم..لانه مازال شايف ان اللي داره مع بنته كله دوافعه حبه ليها...
☘☘☘☘
قعدت مطيرة ليلة في المصحه..
واليوم اللي بعده طلعت منها..
وكانت طول الوقت ساكته ورافضه تتكلم مع اي حد..
في الحوش..
كانت طوبى مجهزتلها الدار قبل لتمشي للمدرسه كيف ماوصتها سدرة..
دخلتها سدرة الدار ورقدتها وغطتها وطلعت من حداها..
مشت طول للكوجينه وين مافي شكارة دوا الضغظ...
قعدت تشوفلها بنظرة الم..
تنهدت بحرقه وخدتها وحطتها في الثلاجه..
🌻🌻🌻🌻🌻
"خيرك ميمو اليوم مش ع بعضك"
اميمه ابتسمت مجامله وقالت:مافي شي دلوش غير نفكر في تجهيزات عرس خوي...
داليا:اسمعي كانت تبي تاخد رايي في شي اني حاضرة..
نعطيك عناوين محلات وصالات واحسن معامل اكل ..
اميمه بإبتسامه:تمام..بنسألك وين نلقوا فساتين سهرة كبار قنينات وبأسعار معقوله..
داليا بإبتسامه:نعرف زوز..كيف جت بتتكلم رن تليفونها شافت المتصل لقاته امها:عن اذنك ميمو..
اميمه هزت راسها وهي مبتسمه..
تباعدت داليا..
واميمه انقلبت ملامح وجهها للحزن..
شويه جاها اسامه قعمز جنبها بمسافه وقال:بس بس كناري..
شبحتله وضحكت بإنزعاج وهي تقول:قتلك معاش تقولها..
اسامه بضحكه:في فرق بين الكناري وتويتي راهو..
اميمه بضحكه:ضحكتني وماعندي نيه في ضحك..
اسامه:واضح انك مش ع بعضك اليوم
شبحتله شويه بعدين قالت:توا انتم الرجاله كلكم انانيين!؟
اسامه فاجئه السؤال وتعجب منه..
وهي استاقظت لروحها شن سألت غمضت عيونها وفتحتهم وقالت وهي تضحك بإحراج:انسى انسى..اسفه..
ع جية داليا قعمزت هي تقول:بكل ماما ماتحبش تعب روحها ودور..
قلبت اميمه وجهها لداليا وفرحت لانها جت وانقذتها من الموقف اللي حطت روحها فيه..
وقعدوا يهدرزوا هما الزوز واسامه يشوف لأميمه بإبتسامه..
🌻🌻🌻🌻🌻
في شارع القهوة .
طلع اياد من حوشه بيمشي لعمله..
شاف سيارة عاليه سودا فاتت من قدامه قعد يشوفلها لين لقاها وقفت قدام حوش الواعر..
وقتها المهدي كان في سيارته يتكلم بالتليفون..
شاف للسيارة..
اللي نزل منها الفاندي.
قعد يشبحله المهدي بحده...
واياد بغيرة..
دق الباب..
فتحت سدرة..
شافها المهدي كيف تستقبل فيه بإبتسامه وهي تكلم فيه..
وهو ضحك واشبح شن قاللها بش ضحكت...
بعدين خش للحوش وهو اللي سكر الباب..
المهدي غمض عيونه وهو يحاول يهدي نفسه..
بعد التليفون عن وذنه شويه وهو يقول..
صبر جميل والله المستعان..
بعدين فتح عيونه ورجع كمل مكالمته وهو يغلي..
اما اياد فركب سيارة وهو مضايق..
وتوجه لمكان عمله..
⚘⚘⚘⚘⚘⚘
مقعمزين ع الطاوله قدام الكوجينه..
وقدامهم فناجين قهوة وصونيه فيها حلو..
سدرة:يعني الوحده في من تقدر تأمن كان ماامنتش في اقرب الناس ليها قولي..
راجلها بوها خوها!
الفاندي مسح ع لحيته وقال:شوفي حبي هو الموضوع يعني تشوفيله من اكثر من تركينه..هو حني متفقين هو غالط..بس كان قصده خير..
سدرة:اما خير هدا..
الفاندي:واضح انه يحبها..
سدرة:عليك حب تعرفوه انتم الرجاله ديروا اللي مايندار في المراة بعدين تقولوا من الحب..عطيه سحيقة الحب اللي هكي..
فنص الفاندي بخوف مصطنع وبضحكه قال:اني مش هكي والله ماليش علاقه بيهم هادم بكل..
سدرة:امم..ياخوفي من المفاجآت اللي داسهالي..
الفاندي بضحكه:وحق المعظم اني كتاب مفتوح قدامك...تعرفي عيبي مانتنازلش عن حاجتي..ولا الناس اللي نحبهم لو نقتل ع خاطرهم حتى القتل..
سدرة:عيب تعتبره هدا؟
الفاندي:ايه لأنها في الاخير تجي ع راسي..حط يده ع راسه وهو يشوفلها برفعة حاجبه اليسار وابتسامه مضحكه ع وجهه..
سدرة:طيح سعد الفلفل..احمد ربي اللي جت ع راسك يومها بش حظيت بيا يابابا..من قدك..
الفاندي قعد يضحك..
سدرة:قالك عيب ومتعبني..قول ميزة قول جياب الحظ الباهي...
الفاندي عقد حواجبه بإستغراب وهو يضحك:جياب الحظ الباهي!
سدرة:خيرك انت اليوم! شكلك ندمت ومعاش عاجباتك!؟
الفاندي:ايه نادم وهلبه اللي ماعرفتكش من صغرك..
سدرة ابتسمت..
الفاندي بحب:سبحان من خلاه محفور في قلبي غلاك..
فجأة دق باب الحوش..
سدرة:هادي فايزة..
ناضت ومشت للباب والفاندي معاها بعيونه لين وصلت في الباب..وفتحاته..
يسمع فيها كيف ترحب بصاحبتها بعدين دخلتها ومشوا الزوز للطاوله..
فايزة وهي متحشمه؛السلام عليكم..
الفاندي بدون مايشوفلها:وعليكم السلام..
سدرة ع الكرسي اللي مقابل الفاندي قالتلها:قعمزي فيزة..
مشت فايزة قعمزت..
وسدرة قعمزت قريبه ع راجلها..
الفاندي:كيف حالك اختي فايزة..
فايزة:الحمد لله..
الفاندي:كيف حال البنات امورهم تمام؟
فايزة:الحمد لله كل شي تمام..
الفاندي هز راسه وقال:الحمد لله الحمد لله..اختي فايزة كلمتني السدرة عن مشاكل الورث اللي عندك يعني مع خوتك واهل راجلك الله يرحمه..
فايزة بحزن:الله يرحمه..
الفاندي:شوفي اني عندي واحد نعرفه خوه محامي كبير وداهيه زي مايقولوا..يجيبلك حقك بإذن الله..
فايزة بإحراج:قالتلي سدرة..بس يعني اني حاليا ماعنديش من وين ندفعله اتعابه..
الفاندي:عيب يافايزة..راهو عيب فايزة..
ضحكت سدرة..
الفاندي:راك وخية المدام..وبعد عام ان شاء الله بتولي بنت شارعنا..مادوريش الامور هادي بكل..
فايزة:لامعليشي صعب ..هلبه هكي.
الفاندي شبح لسدرة وقال:تفاهمي مع صاحبتك..
سدرة:عارفه روحي بنلف عليها بكف...
فايزة ضحكت بإحراج وقالت:والله ماعارفه شن نقوللكم مش عارفه..
الفاندي:ماتقولي شي خلي الموضوع علي الله وبعدين علينا..
هزت راسها وقعدت ساكته ومن داخل كانت منحرجه هلبه..
الفاندي:حاجه تانيه قالتلي عليها السدرة..راهو هي تهدرزلي في كل شي مادرق في شي عليا..
ضحكت سدرة وقالت:راجلي شن بندرق عليك..
ضحكت فايزة..
وهو ابتسم وقال:حكتلي انك ناويه هكي تفتحي مشروع بعد تحصلي الورث..مشروع مزين ولا؟
فايزة شبحت لسدرة وقالت:ايه..
الفاندي:القضيه مرات طول على ماتربحيها وهدا معروف..هذا علاش فكرت في حاجه..اني عندي في الشارع اللي جاي ع اليمين..وقعد ياشر بيده..محل خديته وقبل بنديره ورشه بس ماصارش لقيت مكان احسن..وقلت نأجره وخلاص..والحق مكانه يمشي معاه يكون مزين..ومانبيش فيه غير 50جني في الشهر بس..
تفاجئت فايزة وقالت:50بس!؟
الفاندي:خمسين كبدايه وبعد تمشي امورك فيه نزيدوا..
فايزة بإمتنان:والله ماعارفه شن نقول بجديات..ربي يقبل اللي دير فيه كله يارب ويفتح عليك دنيا وآخرة..
ابتسم هو وقال:اللي تحبهم المدام قدرهم عندي كبير راهو..
سدرة قعدت تشبحله بإبتسامه حلوة..
فايزة بإبتسامه؛ربي ماجمعش بيكم الا وعارفكم تستاهلوا بعض.
قعدوا يشبحوا لبعض بإبتسامه..
وهي تشوفلهم وهي مبتسمه بحب..
"شاميه"
سدرة وهي متفاجئه؛عمتي!
مطيرة جاته وهي تقول:شن حالك ياشاميه..
ناض الفاندي وهو يضحك صافحها وقال:الحمد لله..شن حالك انتي عمتي...
مطيرة؛بخير بخير ولله الحمد...
طلقت يده وقعمزت وهي تقول؛نوضوا ديرولنا فطور..
سدرة وهي فرحانه اللي شافت عمتها كويسه:حاضر..هي نوضي شراده..
ناضت فايزة وهي مستغربه في وجود مطيرة وقالت؛شن حالك عمتي.
مطيرة يدوب ابتسمت وقالت:الحمد لله بنتي شن حال بنياتك..
فايزة:الحمد لله...
بعدين مشت خشت مع سدرة للكوجينه..
ومطيرة قعدت تهدرز هي والفاندي برا..
وسدرة داخل حكت لفايزة اللي صار لعمتها..
فايزة بصدمه:حي عليا ياناري عليها...!
سدرة:والله قاهرتني قهر كان نلقى نشد راجلها نعطيه طريحة نفش غلي فيه..وتعرفي شن اللي يحرق الدم اكثر جدي اللي عارف من البدايه وبررله تصرفاته..
فايزة:لاحول ولاقوة الا بالله...اني اكثر شي وجعني لما عرفت روحها ان هي اللي ماتجيبش في صغار مش هو..تعرفي اني لو مكانها راهو متت..
سدرة:وحتى هي قريب ماتت ارتفع عليها الضغط فجأة كان مش من طوبى اللي وكلتها الكسبر المرحي راهو لاقدر الله راحت فيها..
اني من الخلعه تفلوشت..لكن هي مشت تجري طول جاباته وقعدت تفتح في فمها وتصب فيه..
فايزة:لاطوبى ماشاء الله تعرف تتصرف في كل الظروف..
"هيا وين الفطور"
سدرة:هيا عمتي هيا...
🍀🍀🍀🍀🍀
وتمر الأيام...
ومطيرة بدت تستعد في عافيتها النفسيه قبل الصحيه..
وكانت تحاول تتأقلم مع وضعها الجديد ومع مرضها ..
ولالطفي ولابوها جو جيهتها..
ولاالشامس رجع جاهم مرة تانيه بطلب من علي الواعر اللي قاله خليها تهدا شويه بعدين تعالى نتفاهموا..
☘ومن جهة تانيه..
انقرت فاتحة عواطف ومراد....
وكانت عواطف بطير من فرحتها ونجاح فرحانه لفرحتها
اما امهم ماكانتش راضيه نهائي ومش مقتنعه وهالشي كان باين ع وجهها حتى قدام الجيران....
وفعلا..دارت عواطف اللي قالت عليه..
وجابت نوبه قعدت تخبط في الشارع قريب ساعتين..
والشارع كله انقلب قلب معاها..
•••مغليه؛حسيت عزوزتك مش فرحانه..
خديجه:مش عاجبها ماتبيش قتلك قبل..
مغليه:خلي البنيه تشوف نصيبها عمرها يجري وبالك تفتح نصيب اختها وتلحقها وتفتكي من دوشتهم..
خديجه:يارب..
مغليه:ايه تعالي جاي شن قصة خطوبة عمر من بنت *****
قالوا طالعه منك؟
خديجه فنصت وقالت:وانتي شن قلتي!؟
مغليه:شن بنقول لما قالوا طلعت منك قلتلهم ايه في حاجة زي هادي بس ماصارش شي رسمي..
خديجه بإبتسامه:نجيها ميمتي اللي فاهمه ع بنتها..
مغليه:لشن تبي توصلي..
خديجه؛نبي نردها لهديكا الجربه..
مغليه:مش هكي عاد..كان وصلت الدوة لعيلة البنت!؟
خديجه:وقتها نقولوا اشاعات الناس طلع فيها..
امها مطت شواربها بملل وقعدت ترشف من قهوتها..
خديجه ضحكت بعدين قالت:ايه طاهر والبرنسيسه امتى يروحوا من شهر العسل..
مغليه:نهار 8شهر الحج وبيجونا هني طول..
خديجه:الحق يام مش خاشلي راس الجناح اللي دارهوله بوي هني..
مغليه:زيه زي خوته بنتي هدا حوش بوه..
خديجه:اني مش ع طاهر اني ع مرته مابتش تنزلي من زور..
مغليه:قاعده خير من مرت المهدي بألف مرة..تخيلي وهي فشهر العسل تتصل تسأل عليا وتسأل على عزوزتها..وهديكا اللي فوق مني ليها ثلاته ايام مانزلت وقالت..كيف حالك ياعمتي..
خديجه:اني الفترة هادي بنخليها في حالها لعيون وخيي لكن بعدين تو نعرف شن نديرلها...
☘☘☘☘☘☘☘
واقفه في الكافتيريا بتطلب قهوة..
جاها واحد من الموظفين وقال:شن جو فايزة..
فايزة بجديه:الحمدلله..
قعد يشبحلها بنظرات خبيثه بعدين زاد قرب منها..
هي بعدت عنه..
هو قاللها؛خيرك!!؟ شن حلال على ع غيرنا وحرام علينا..
هي انصدمت وقالت:وسخ!
ولفت ومشت بسرعة وطلعت..
وحست ان العيون كلها عليها..
هي ليها مدة ملاحظه ان زميلاتها متغيرات عليها..
وفي نظرات مش مزبوطه تلاحقها من زملائها الشباب..
بس كانت تحساب روحها تتوهم..
وين قربت من المكتب..
وقفت في الباب وهي تشوف لزميلاتها كيف ملتمات ع طاولة وحده فيهم ويدووا عليها..
:اللي عندها راجل ترد بالها منه ارمله وعندها بنات وماوراها حد تو بتقعد تجري في جرة اي راجل..
:ربي يكفينا شرهم النوعيه هادي...
فايزة وهي تسمع كانت حاسه بسكاكين تضرب فيها..
بس لأول مرة تواجه وماتهربش ولاتنهار برغم منها من داخل كانت تتقطع..
فايزة:راكم ولايا..
التفتوا وشبحولها وهما مصدومات..
فايزة:ولايا زيي زيكم بالزبط..مفروض وين تسمعوا حد يحكي ع عرضي تسكتوه مش انتم اللي تدووا عليا وتاكلوا لحمي..لكن وتوا ارواحكم كيف ماحكيتوا في عرضي وافتريتوا عليا حيجيكم من يشوه عرضكم ويحكي عليكم..
وحسبي الله ونعم الوكيل..
ومشت بسرعه بإتجاه حجرة المدير..
لين وصلت فيها..
خشت عليها وطلبت تقدم استقالتها..
هو تفاجئ وقعد يسأل عن الاسباب..
وهي قالت ان ظروفها معاش تسمع تخدم بعيده عن مكان سكنها..
حاول فيها هلبه بس هي اصرت..قبل استقالتلها وقال..
:في حالة احتجتي اي حاجه تليفون المدام عندك..
فايزة ابتسمت وقالت:بارك الله فيك ..
ولفت ومشت طلعت من حداه..
وتوجهت طول للمكتب خشتله وقعدت تلم في حاجاتها..
وحده من زميلاتها قالت..
؛فايزة راك فهمتينا غلط..
:الدوة مش عليك يافايزة..
وفايزة مشغوله باللي دير فيه ومش معبرتهم..
:فايزة..
لبست شنطتها ورفعت الصندوق اللي فيه حاجاتها ومشت طلعت وهي تقول..
"حسبي الله ونعم الوكيل"
هما لحقوها وقعدوا يشبحولها..
وهي ماشيه..
قابلوها باقي زملائها زميلاتها وعيونهم عليها ومنهم اللي تحرش بيها..
وهي تمشي بقوة وثقه مصطنعات ومن داخل كانت مكسورة كسر..
وقعدت ع هالحال لين طلعت من المبنى ووصلت في سيارتها..
حطت الصندوق في السيارة..
وركبت السيارة وتحركت..
وبدي يجي بين عيونها كلام الناس..
في الاول عنها هي والجالي..
وبعدين تحرش راجل صاحبتها بيها..
واخرها اللي صار في مكان عملها والدوة اللي سمعتها..
《 :اللي عندها راجل ترد بالها منه ارمله وعندها بنات وماوراها حد تو بتقعد تجري في جرة اي راجل..
:ربي يكفينا شرهم النوعيه هادي...》
معاش قدرت تقاوم..
انهارت بالبكي..قعدت تسوق وهي تبكي..
لين اضطرت انها توقف السيارة..
بكت وبكت وبكت..لين طلعت كل اللي في داخلها...
بعدين هدت شويه وقعدت تمسح في دموعها وتقول..
"حسبي الله ونعم الوكيل"
وشغلت سيارتها وكملت طريقها....
🌻🌻🌻🌻🌻🌻🌻
الساعه 5:00عصرا..
كانوا ملتمات سدرة وعائشه ونسرين ومطيرة واميمه وصفيه وفردوس في حوش سدرة اللي قاعده فيه فايزة..
كانوا مقعمزات في الصاله يهدرزوا...
ووزعوا البنات الصغار لدار تانيه بش مايسمعوش في شن يحكوا..
بس...
الاء:اني لما نكبر بناخد راجل غني وعنده فلوس بش مانتعاركش معاه ولما نقوله نبي حاجه يجيبها عادي..
طوبى:قصدي هكي انتي بتعيشي سعيده..
الاء؛خير من عيشة بابا وماما وعيشتنا معاهم..
اريج قعدت ساكته وهي مضايقه..
وطوبى تنهدت وقعدت تشبح لبنات فايزة وهما يتفرجوا ع الرسوم..
•••في الصاله•••
فردوس:باهي عمتي يعني بنسألك سؤال هكي..يعني اللي داره هو لو دوري وراه حتلقي انه من حبه ليك هو دار هكي ولا؟
ابتسمت مطيرة تهكما وقالت:من حبه لروحه وراحته دار هكي..هو فكر في نفسه..كذب عليا بش يخليني معاه لأنه هو مش قادر يعيش من غيري..ومش وتزوج ودار صغار وعيش المراة التانيه في الظلام بعدين جابها لحوشي وخلاني نصاحبها..بش هو يرتاح...لافكر فيا ولافكر فيها حتى هي..
لافكر فيا اني كيف يبان منظري واني هلبه وغافله ومانندري ع حاجه ولافكر في احساسي وين نعرف..ولافكر فيها حتى هي وشعورها وقت اللي حسسها اني خير منها وجبرها جبر دير شي ماتبيشي..اني بعد اللي عشته تأكدت ان الراجل مخلوق اناني همه كله في درجه الاولى راحته ومصلحته وبس..حتى لما يحبوا انانيين..هكي يتعاملوا وكأن الكون هدا كله تحت امرهم..
كلهم كانوا يسمعوا في كلامها ويفكروا فيه..جي ع جرح كل وحده فيهم..
ماعدا زوز...
فردوس اللي كانت تشوف ان مصطفى مش هكي بكل..وانه كان ديما يفضل فيها ع نفسه..
وفايزة..
اللي عاشت مع راجل كانت عنده اهم من نفسه...
صفيه:تو الصبايا يسمعوك ومعاش يتزوجوا واللي عندها راجل تكرهه..
سمعوها يدوب ضحكوا..
مطيرة قالت بإبتسامه:لالا راهم يفهموني غلط..تزوجوا..وعيشوا مع رجالتكم بما يرضي الله..
لكن ردوا بالكم تعطوا راجل امانكم كله..
ردوا بالكم تعطوا راجل ثقة تامه ...
بش وين يجي نهار تصير حاجه ماتجيكش الصدمه قويه..
واهم حاجه..
ردوا بالكم تعطوا راجل القلب كله..خل شويه ليك انتي بش تلقي بشن تكملي حياتي كان خلاك...
تأثروا هلبه بكلامها اللي كان حقيقي جدا بالنسبه ليهم..
بس فايزة قالت ودموعها في عيونها:احمد ماكانش زيهم ياعمتي احمد عطيته اماني كله وثقتي وكان قدهم..وعطيته قلبي خداه كله وهو خداته الموت..مافرقنا كان الموت..
كلهم قعدوا يشبحولها بحزن..
ومطيرة بأبتسامه حزن قالت:هدا علاش سيب دنيا بكري بكري..لأنها مش مكانه..
فايزة قعدت تبكي بصمت وتمسح في دموعها..
وهما يشبحولها بنفس نظرات الحزن..
حبت سدرة تغير الجو قالت:باهي والشاميه ياعمتي شن رايك فيه حسك خوفتيني!؟
مطيرة:لا الشاميه هداكا بروحه حلو لين يقهقر..
ضحكوا..
وفايزة ضحكت معاهم من بين دموعها..
سدرة بضحكه:مافهمتش باهي ولامش باهي!؟
مطيرة:ياودي باهي باهي غير ديرولنا عرس..
ضحكوا..
وسدرة قالت بضحكه:لاانتم توا خلوكم مع عرس يوسف .
اميمه بضحكه:بعد العيد الكبيرة عاد..
مطيرة:خلاص قريب...وقعدت تصفق وهي تقول..
وهدا عرس وسيفه قالوا..والعقبه للي مازالو..
هيا صفقوا صفقوا..
قعدوا يصفقوا ويغنوا معاها..
البنات الصغار سمعوهم وطلعوا وقعدوا بين اللي ترقص واللي تصفق...
وفايزة تتفرج عليهم وهي مبتسمه..
نسوا همها واللي صار معاها اليوم في الخدمه....
🌻وفي حوش لطفي..
كانت غرفه دور في الجنان وهي ماله ع الاخر..
شويه سمعت الباب الفاصل دق..
مشت وفتحاته طول..
وبدي قلبها يرف رفان او ماشافت اللي واقف قدامه .
حسين:غرفة شن جو..
غرفه وهي مبتسمه بفرح:تمام..عاش من شافك..
حسين:تعيشي..شن مافي حد في حوشكم؟
غرفه:ايه كلهم مشوا لحوش سدرة اللي قاعده فيه فايزة..
حسين بشي من التردد في السؤال:حتى طوبى
تغيرت ملامح ابتسامتها وقالت:هي اولهم ماعندهاش الروح الطلوع نغفلوا عنها شويه نلقوا طالعه..مرة تهدرز ع مهند ولد الدكتور ..مرة ع نضال ولد شنيبه مرة مع خوه الجالي معاش تنشد بكل .
حسين حس بالنار تحرق في كل جزء فيه..هز راسه وقال بغضب مكتوم:تمام..
ومشي..
وهي سكرت الباب وقالت بنرفزة؛وهو ماعنده كان طوبى..طوبى..سحقيتها..
ومشت خشت للحوش...
وطلع حسين وهو واخد كرسي..وقعمز قدام حوشهم وهو يراقب في الشارع..
واللي يخطم كان يسلم عليه بشي من الرهبه..
عارفينه كلهم من يكون ويتبع لمنو..
وكانت باينه فيه من ملامحمه وتصرفاته غصب عنه...
شويه وشاف عمته وفردوس ومعاهم امه وخواته اميمه وسدرة طالعات من حوش سدرة..
بدون طوبى وبنات اخته..
وين وصلوا فيه سلموا عليه..
مطيرة:خيرك مقعمز هني .
حسين وهو عاقد حواجبه:هكي كساد..طوبى وين؟
اميمه:قعدت مع الصغار شدوا فيها..
حسين:الدنيا ليل مفروض روحت..
سدرة بحده:مادخلكش فيها..
ومشت من حداهم..
واختها لحقتها..
صفيه:انت ماتشعفش..
حسين وهو يحاول يتمالك اعصابه:خشي يام وماطلعنيش عن طوري..
مطيره خافت يفلتوا اعصابه في الشارع قالت:خلاص خشوا ..
صفيه خشت وهي تشوفله بحده..
ووراها اميمه وهي خايفه من عصبيه حسين اللي خلتها تحس احساس مش مريح...
مطيرة:هدي اعصابك خيرك...
حسين:مافي شي عمتي خليني بروحي شويه معليشي..
تنهدت مطيرة ومشت لحوش لطفي..
وهو قعد فم الباب يراجي طوبى امتى تروح..
شويه وخش للحوش للحظات وبيرجع بطلع..
🌻فهالوقت...
طلعوا طوبى واريج والاء من حوش فايزة..
وهما يهدرزوا..ولما قربوا يوصلوا للحوش..
شافوا مهند جاي وفي يده حاجه..لما شافهم جاهم بيها طول..
مهند:شن جو..
الثلاته قالوا تمام..
مهند:تاكلوا حلقوهم..
اريج وطوبى:يس..ايه..
الاء:يعع مانحباش..
مهند:انتي شن تحبي خاطري نعرف..
اريج خدت من الحلقوم وهي تقول:تحب آلاء بس..
قلبت عيونها..
مهند بضحكه:صدقتي فيها.
ع طلعة حسين من الحوش..
لما شافهم خطر عليه كلام غرفه.
وبدون تفكر مشالهم وهو يقول:خير ياغالي شن في..
هما شبحوله يإستغراب..
حسين:حبيبي انت هني في ليبيا مش في سوريا راهو..
طوبى:علاش شن دار من غلط!؟
حسين:انتي تسكري فمك وتخشي داخل.
مهند:معليشي انت كيف تفكر هادم طفلات راهو وعندي زي خواتي الصغار بالزبط..
حسين:لا مش زي خواتك وتوكل..وانتم خشوا داخل..
خافوا منه اريج والاء ومشوا خشوا للحوش..
وطوبى قعدت..
حسين:الكلام مش عليك..
قعدت تشبحله بعناد..
حسين:قتلك خشي ماطلعيش جنوني..
مهند:تي خيرك انت متخلف..
ويجبد حسين مهند ويضربه ومهند قعد يضرب فيه..
وطوبى هني خافت وخشت تجري..
لقوها سدرة ومطيرة قبل بيطلعولها..
طوبى ودموعها ينزلوا:حسين هدا نكرهه نكرهه معاش نبيه يكلمني معاش دخله بيا..
سدرة:ضربك؟
طوبى:لالا هونا برا يضرب في مهند ولد الدكتور وهو مادار شي..
كلهم شهقوا بصدمه ومطيره قالت:غبارة!؟
برا...
طلعوا الجيران وحزوا عن بعضهم..
حسين وواحد من ولاد نجمه شاده:نوريك مرة تانيه كان لقيتك معاودها..
مهند والجالي شاده:تي برا طير واحد متخلف..
الجالي:خلاص اسكت وفوته..
حسين: شن تقوله انت!؟
شبح الجالي لحسين بنظرة حاده بعدين غير عيونه عنه وقال:برا مهند لحوشكم..
مهند قعد يساوي في حوايجه ومشي لحوشهم..
والجالي التفت لحسين وقال:كان الرتبه والنجوم اللي علقتهم ع كتافك يخلوك تتجبر ع ناس وولاد شارعك برا نقعهم واشرب ميتهم..
حسين:تو نوريك الرتبه والنجوم شن يديرولك..
الجالي وصل في الباب التفت وقال:اعلى مافي خيلك اركبه..
وخش لحوشهم وخبط الباب بقوة..
وحسين لف ومشي لحوشهم وهو يقول:حول حولوا.
وين وصل فيه وخش داخل لقي جده قدامه..
علي الواعر:يسلم فمه ولد شنيبه قالك اللي مفروض تسمعه من زمان..اسمع جاي لو سمعت ان صارت في حاجه معاش نبي نشوفك في شارع القهوة كله..وبعدين جيبلي حتى اني يوريني..
ولف ومشي وهو يخبط بعكوزه ع الارض..
بعد ما خش داخل..
حسين من غيظه ونار الغيرة اللي والعه في قلبه خبط الحيط بقبضة يده بقوة لين انجرحت ونزفت...
☘☘☘☘☘☘☘☘☘☘☘☘
وفي مكان بعيد..
بر...
ونار...وريحة خبزة جمر..
وليل ونجوم واضحه..
اللي لابس العربي..واللي لابس..البازان والشاش ومغطي بيه نص وجهه..
؛عبدو قول ايش تسموا فيها خبزة الجمر انتم..
ضحك وقال:التجله نمضال..وقعد يقسم فيها عليهم..
واحد تاني قاله:تو لبسكم هذى شن تسموا فيه..
عبداالقيوم:البازان..
:كان فيه عندك منه واجد جيب خل نجربوه وناخدوا صورة مع بعضنا هنا ونزلوها ع الفيس..
:ايش دوته هالفيس اللي ديما تحكوا عنه..
عبد القيوم:مش شورك ياغالي مش شورك انت شورك الشرموله والشاهي اللي قريب يعدي فيها..
:بنعدي نجيب الشاهي ورادلك ونو نوريك ..
قعدوا يضحكوا..
بعدين قعمزوا مع بعض كلوا شرموله وعدوها بالشهر الاخضر والهدرزة السمحه..
بعدين اذن العشاء في هاتف واحد فيهم..
ناضوا توضوا..
وصلوا في الهواء الطلق..
وصلى بيهم اكبرهم سنا..
وبعد كملوا صلاة .
قعمزوا حدا بعض وبدت بينهم مباراة اقتباسات شعريه...
:كثر الكلام مغير جر عيوب
يجبد مواجع مالهمش الزام
زي من يرقع في قديم التوب
يساوي كتافه يقصرن الكمام..
هما قالوا:سلمت..
واحد قال لواحد تاني:عندك..
:لاتعجبك روحك وتقول هاني صنديد..
ليام اذا دارو يذوبوا الحجر والحديد..
وعن فعل الشر ابعد بعيد..
وطاعة الله خليها كل يوم تزيد...
هما:سلمت سلمت..
اللي جنبه قال..
وين ماتحط رويحتك تلقاها..
الدنيا تجارب والزمان الدروس..
عز النفس ماهو ورثه جاها..
وعلو القدر ماهوش كثر فلوس..
عبد القيوم:الله عليك الله..
:عندك ياتارقي..
ابتسم وقعد يمسح ع لحيته بعدين قال..
مامن مواجع خاطري شايلها..
ومامن ديار عمار غابوا هلها
مامن ديار خوالي..
ومامن اعزاز راحو اليوم جوالي..
لوكان نحكي عام تعرف حالي..
اتبدل دموعك دم ماتحملها..
مامن دموع بدايد..
ومامن مواجع كاميه بالزايد..
وفي وسط قلبي بايته الغدايد
لاجار لاصاحب ايشيل عللها..
:لاجار لاصاحب يشيل عللها..سلمت..
والباقي قالوله؛سلمت سلمت.
:الا عبد القيوم بننشدك؟
عبد القيوم؛قول..
:مش عارف ليش وين نسمعك تشاوخ ولانشاوخ معاك وانا نبحت فيك..نسمع كيف نبرة الحزن في كلامك..وعيونك يبان فيهن حزن حتى وانت تضحك..ياترى اللي شفتيه صحيح ولااوهام مني...
ابتسم عبد القيوم ونزل راسه لوطا وهو يخطط بعود كاسره من شجرة للعيد..
:كان ماتبي تقول عادي..معذور..
شبحله وقال:لاعادي مافي مايدرق..ياسيدي انا عشت حياة عاشوها كيف ناس واجده وكل واحد وكيف تأثر فيه معيشته اللي هكي..
باتي توفى وانا مازلت ماوعيت ع الدنيا..بقولي ع حسب ماسمعت..كان عمري سنتين ثلاثه..فهالحدود..
جدتي مسكت في امي وخلتها تعيش معاها اجدت جدي اللي هو بات امي واجد وخوالي وهم تحشموا منها وخلوها معاها..
كانت تحبها واجد كيف بنتها..وقعدنا عايشين مع بعضنا لعند ماطقيت 11عام..امي مرضت واجد..مذكر انها كانت تكح واجد وتنفس بالسيف بس كانت درق وماتبين لحد ..كان عندها مرض في رواياها..ماخلوا وين عدوا بيها..بس كيف مايقولوا بعد مافات الاوان..
توفت...تنهد وقالت..وقعدت انا مع جدتي..ربتني وكبرتني وعلمتني..والعمات يحنن والخالات..والعمام والخوال وين مايطلعوا عويلهم ياخدوني معاهم..
ابتسم وقال..كانوا كيف ماتقولوا..يحاولوا يعوضوني ع اللي ناس..بس كذب عليكم..مافيش مايعوض الوالدين..
وين نقعد بروحي نفكر فيهم واجد ونقول..
كان امي يالاي توا نحكيلها تحكيلي تعاركني كان حوست تدعيلي كان عديت لقرايتي..وتغنيلي وين مانخش عليها..
كان باتي فوق راسي يعلم ويوري وينصح ويربي ونرافقه وين مايعدي...
قديش جي في خاطري نادي ياباتي يايمي...
في حاجه هكي كيف الفراغ الكبير جو..
وحط يده ع صدره..ماقدر حد يملاه...هضا ليش ع قد مانعرف في حياتي من ناس نحس روحي وحيد..
:يااه ياعبد القيوم..ياشايل وكامد..
عبد القيوم مرر نظره حواليه وقال؛مافي حد فهالدنيا ماعنده وجاع داسها عن الخلق..ومايحكي بيها كان للخالق وهضا عين الصح...
:صدقت..
تنهد عبد القيوم وقال:هي خل نغيروا هالجو الكئيب اسمعوا..
هما بأصوات متقطعه نسمعوا..
بعيد ع العين والعقل فيك يفكر.
غيابك مكدر خاطري وامعكر..
بعيد وغالي..
ياصوت في وذني مداوي حالي..
ياطيف مافارق اوهام خيالي...
جميل منظره بالذات وين يحكر..
ياقدر ياواخد كل مافي بالي..
يانبض في قلبي قوي يسطر..
موحال يالغلا الحياة تزهالي..
وانت بعيد وخاطري متكدر...
هما صاحوا وقعدوا يقولوا..
"الله الله الله عليك الله"
وهو يضحك ويشوفلهم...
وبعد كم ساعه..
رقدوا رفاقته...
وهو قعد حدا النار..
يرسم بالعود ع التراب في رسمه كل ماتتوضح معالمها تكبر ابتسامته...
لين كملها..
حط رسغ يده اللي فيها العود تحت ذقنه وقعد يقول..
بعد سته سبع سنين كم يولي عمرك!؟..ياغبي انت عارفه كم عمرها تو في الاصل!؟..ماتبيلها ذكاء..واضحه في حدود 12 سنه..باهي كان زدنا عليهن سبع سنين..يولن 19..
ياااه يارب الكون..زعم كيف تريح..عادي كان تغير فيها كل شي ولايتغير فيها طبعا البريء...رفع عيونه فوق وقال...
يارب وصلني ليها..دلني ع الطريق اللي ترفع ليها واجعلها من قسمي ونصيبي..
ونزل عيونه ورجع شاف لعيونها اللي راسمهم..
ابتسم ع جنب وحواجبه معقودات...
🌻🌻🌻🌻🌻🌻
وفي طرابلس..
في يوم تاني...
"بسم الله"
خشت وخشوا بعدها صاحباتها وقعدوا يشوفوا في المكان كيف ولى بعد ماتوضب واندارله ديكور حلو.
فايزة ودموعها في عيونها؛مش عارفه شن نقوللكم يابنات..
نسرين بإبتسامه:عجبك؟
فايزة؛يهبل ..
عائشه:ربي يجعله آية الرزق..
سدرة؛يارب..
فايزة ودموعها في عيونها؛لو عندي خوات ماظنيش دارو معاي اللي درتوه انتم..
سدرة:وحني شنو حبيبتي مش خوات..
نسرين؛جاوبي يافالحه..
فايزة بضحكه وهي تمسح في دموعها؛خوات خوات..
نسرين:والخوات ماياخدوش من بعضهم فلوس لهدا اني اول وحده بنجيك بديريلي كل شي بلوشي..
عائشه؛غير نقرشي..
سدرة:تدفعي زيك زي غيرك..
نسرين؛انتم اسكتوا خلوا فايزة تتكلم..
فايزة؛من بدايتها لازم نبدا بجديات فلوسك يخشوا قبلك..
نسرين:خزي عافنه..
ضحكوا البنات..
شويه رن تليفون سدرة..
شبحولها..
فتحت الخط وردت..
سدرة؛ايوه........تمام الحمد لله.......اي معاها توا خشينا نشوفوا المزين..........ايه.........ابتسمت سدرة وقالت...حق!!......يبشرك بالخير ياوجه الخير انت.....تمام تمام....سلام..
سكرت وقالت بضحكه:فايزة ربحتي قضيتك قدام خوك وحقك كله حيوصلك قريب..
فايزة حطت ايديها ع صدرها وقالت بفرح:الحمد لله ياربي الحمد لله..
عائشه حضنتها وقالت:مش قتلك ربك مايخلي حد..
وسدرة ونسرين يشوفولهم بإبتسامة فرح والدموع معبيه العيون...
☘☘☘☘☘☘
طلعوا هو وياها من المصرف..
مراد:عمري ماننسالك اللي درتيه حبيبتي طول عمري..
عواطف:شن تقول حني واحد والحوش اللي بتبنيه لينا حني الزوز.
ابتسم وفتحلها باب السيارة وقالت:تفضلي ياوردة عمري..
ابتسمت بخجل وركبت..
وهو مشي ركب السيارة وقال:الاغنيه اللي بنفتح الراديو عليها توا اهداء مني ليك..
ابتسمت وهي تراجي..
فتح الراديو..
بياع القلوب باعني...حبيتوا ليه خدعني..
فنص عيونه وقال:هدا شنو..برا ياراجل نكد عليك..
قعدت تضحك..
مراد:خل نشوفوا القناة التانيه..
وحط عليها...
غرامك مزيف ..ضميرك عدم..
طفى الراديو وقال:بلاش منه بكل...خل نغنيلك اني وخلاص..
غير عليا رن ماعندكش مشكله..
قعدت تضحك عواطف..وهو شغل السيارة وقعد يغنيلها فيها..
ويزيد يطير فيها فوق فوق بالجناحات اللي ركبهولها..
وياويلك من يوم يجيك ياعواطف ينقصوا فيه هالجناحات...
#محفور_فالقلب_غلاك
#طوبى
...يتبع...
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
