#طوبى "جنة طوبى"
#جمان_فريد
#الجزء_السادس_والستين"إنتفاضة الأقحوان2"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#تاج_الذكر
لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸
🚫تنويه🚫
الرجاء التركيز ع سياق الاحداث..والتركيز ع التواريخ والمرور الزمني قصير او طويل....
☕☕☕☕☕☕☕☕☕☕☕☕☕☕☕☕☕
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 "نحنُ الأحق بقلبٍ ضاحك
لا سامحَ الله كل من أبكانا"🍃
___________________________________________
في حوش محمد شنيبه..
تحديدا الصاله..
كانوا مقعمزات نسرين ومغليه وخديجه جايتهم ومعاها راما اللي في جنبها ولد خالته في شنطته لاهيه بيه...
كانوا يهدرزوا في هدرزة عاديه وهما يشربوا في القهوة..
لعند ماخش عليهم الجالي وهو يقول..
السلام عليكم..
شبحوله وردوا..
وعليكم السلام..
هو لما جو عيونه ع ولد نسرين ابتسم ومشي قعمز جنبه وقال..
كيف حالكم..
كلهم بأصوات متقطعه..
الحمد لله..
مغليه بشي من تهكم:كيف حالك انت وهديكا الللا اللي ماتبيش دير تليفون لعمتها تنشد عليها حيه ولاميته!؟..
نسرين مطت شواربها بملل..
وخديجه تراجي في رده..
هو شاف لأمه وقال:والله يام وسامحيني فيها مفروض ماتسأليشي سؤال زي هدا!؟؟
عقدت حواجبها وقالت:كيف!؟
الجالي بشي من العصبيه:معقوله يام راجل اختها ينحبس وماتمشولهمش!؟ حطيتوني معاهم في موقف زي الزفت..
ع خشة نضال اللي سمع كلامه وقال:قوللهم بالله قول..اقسم بالله بديت وين نشوف عمي لطفي نتحشم واني نسلم عليه بارك الله فيها اريج اللي لتوا لاتكلمت ولاعاتبت..
الجالي:طوبى حتى هي ماتكلمتش لكن باينه في وجهها..
مغليه وهي تمرر في نظرها عليهم بإبتسامة سخريه:
ياسلام ياسلام..ولادي يهزبوا فيا ع خاطر نساوينهم!..
نضال شبح للجالي وقال؛تفضل هي..
الجالي:يام ارجوك ماتحوريش الموضوع..الحركه غلط ومش مزبوطه بكل لافي حقنا ولافي حقك..
نسرين:والله نفس الكلام قلته قبل..
خديجه تسمع وساكته وهي تمرر في نظرها بيناتهم..
مغليه بمكابره:اني مانبيش نشوف خليقة اللي ينقاللها اميمه.
الجالي:شن دخلك بيها يام! ماشيه لحوشها انتي!؟
نضال بضيق؛والله ماهي حجه يام غير حطيتونا في موقف وبديروا بينا وبينهم حساسيات وحني عيلة وحده.
اليوم تلاقيت اني ومرتك في المصحه وين جيت سلمت عليها قلبت وجهها عليا وماردتش ووالله عندها حق..
وجه الجالي تغير لونه لما سمع خوه شن قال وقعد يشوفله بضيق واضح في عيونه..
امه شبحتله وقالت؛معناها اشبح شن قالتلك مرتك ياجالي!؟
شبحلها وقال؛نهائي..طوبى وتعرفيها يام...
مغليه رفعت حاجبها وقالت؛تو نكلمها ..
هو فنص وقال؛لا..لاتكلميها لاتكلمك كان بديري مشاكل يام المراة حامل ومش ناقصه..
كلهم اندهشوا لما سمعوا شن قال..
خديجه؛طوبى حامل!؟
الجالي وهو عاقد حواجبه بضيق؛ايه مانبي حد يكلمها ولايفوت من ركنها بالله عليكم...وغدوة يام اختها بتطلع من المصحه لازم قبل الناس تكونوا غادي..كلكم..الكلام عليك حتى انتي ياخديجه..
رفعت حواجبها ونزلتهم وهي تقول:ماعنديش مشكله..
نضال وهو يشوف لأمه؛هاه شني يام؟.
على مضض وافقت مغليه وهي تقول؛باهي باهي..لكن نبي نعرف امتى عرفتوا بالحمل؟
الجالي؛شن امتى عرفنا هادي!؟ شن الفايده منه السؤال هدا يام المهم اني قلت توا وتم..
وناض وقف وهو يقول؛غدوة متغدي هني..
نسرين؛مروح؟
الجالي:ايه..تصبحوا ع خير..
ومشي طلع من حداهم..
مغليه وهي متعجبه في حاله؛ريتوا ريتوا..!
نضال قلب عيونه بملل وقال:طالع للقهوة..
ومشي طلع وخلاهم حتى هو..
مغليه؛هدا اللي تقولوا عليه مش طايقها!؟
نسرين:انتي اللي قلتي يام.
خديجه وهي تفكر ؛؛زعمه قداش ليها حامل؟
ابتسمت مغليه وقالت؛صح
طايرتلي منها لكن فرحت لما طلعت حامل..
نسرين بإبتسامه:حتى اني..
خديجه تنهدت وقعدت ساكته..
ويخش عليهم محمد المهدي وهو يقول..
حناي بوي قال جايب جماعه يتعشوا هني..
مغليه؛نوضي حركوا ارواحكم هيا..
نسرين؛ربي يهديه مفروض تكلم بكري..
خديجه؛خلاص نوضي واسكتي..
وناضوا هما الزوز ومشوا طلعوا من قدام محمد..
هو بعد ماطلعوا مشي لجداه..
وقعمز جنبها..حاوطها وباس راسها..
وراما تشوفلهم بإبتسامه..
مغليه شبحتله بطرف عينها بنظرة زعل.
محمد بإبتسامه؛مايبقاش قلبك اسود ياجميل..
مغليه:مكثر هلبه يامحمد راك..
محمد؛اسف ياعيوني سامحيني انتي تعرفي حالي حطيلي اعذار..
خداته في حضنها وقالت..اني حناك ولدي نحبك وقلبي عليك راك عندي اغلى من بوك..
محمد:ربي يطول في عمرك ومايحرمني منك..
وراما تشوفله بنظرات مختلفه هالمرة....بعيده عن نظرات راما البريئة متاع زمان...
🍃🍃🍃🍃
"متغيره هلبه من لما تصاحبت هي والبنات الجدد"
صفاء؛شن اللي تغير فيها؟
مروة بضيق؛صراحه البنات ان شاء الله ربي يسامحني مش ولابد نشبح فيهم المرواح يتبعوا فيهم السيارات..
تاله؛قصدك اسما وجماعتها..
صفاء:حتى انتي يافصعونه تعرفيها؟
تاله:المدرسه كلها تعرفهم..صايعات..
مروة فنصت فيها وقالت؛وطي صوتك..
صفاء؛كان هكي حذري راما منهم مش تقعدي تتفرجي وخلاص..
مروة بحزن:قتلك راما متغيره معاي هلبه وولت تتهرب مني تعرفي اليوم جتهم الفصل وقعدت واقفه نراجي فيها فم الباب..شافتني راهو وطلعت من قدامي هي واسما ولاعبرتني..
صفاء؛انتي حاولي معاها اخر مرة ماعدلتش عليك خلاص فوتيها..
بحزن قالت؛واجعتني صحبتنا واجعتني كيف كانت وكيف تغيرت خايفه عليها يا صفاء..
صفاء بضيق:ربي يهديها وخلاص..
مروة بحزن؛ان شاء الله...
🍃🍃🍃🍃
وفي حوش جيرانهم..
تحديدا في دار الحاج علي..
حسين:اني مانبيش عمي يعرف ..
علي:وحتى اني مانبيكش تقوله لين نشوفوا شن يدير الراجل اللي مشيناله..
حسين بحيره؛كان نعرف من اللي حاقد عليه لهالدرجه!..
علي قعد ساكت وهويفكر..
حسين؛االحق ياجدي وماندرقش عليك الوضع مايطمنش..
شبحله علي شويه بعدين قال وهو يهز في راسه..
إن شاء الله خير..إن شاء الله خير..
🍃وبعيد عنهم بشويه..
في دار عبد المطلب..
كان مقعمز ع السرير..وجنبه اميمه تمرن في يده اليسار وهي تقول..تحس فيها احسن من قبل..
عبد المطلب بشي من الصعوبه في النطق؛ايه..
نزلت اميمه يده وقالت؛-القدام حتتحسن اكثر من قبل..
عبد المطلب:امتى..نسيب..الكرسي..
اميمه؛قريب..وتبدا بالقيلات..
عبد المطلب؛امتى..نمشي..عادي؟
اميمه؛مازال تبي وقت اكثر..
تنهد وقال:مليت..
اميمه؛تبي تطلع؟
عبد المطلب؛نبي....نمشي..لترهونه...نشوف..الرزق..شن صاير..فيه..
ضحكت اميمه..
هو فهم علاش ضحكت وانحرج..
هدت ضحكت وشبحتله وهي شاده ضحكتها..
هو شبحها كيف شاده ضحكتها قال:الله غالب..يجري..في الدم..
انفلتت ضحكتها..
وهو غلباته ضحكته..
شبحتله وشافاته كيف يضحك..خفت ضحكتها وقالت..
تعرف ضحكتك حلوة وكنت حارمني منها..
غص وجهه بملامح الضحكه وغير عيونه عنها..
هي شدت دموعها وطبطب ع ركبته وقالت؛خلاص اني بنمشي لحوش عمي لطفي معاش تبي شي..
شبحلها وقال:عمك..شن حاله؟
هزت راسها وقالت؛يقاوم وربي يعينه..
هز راسه وقال:يارب..
هي ناضت وقالت؛شويه ويجيك حسين..تصبح ع خير..
هو قال؛خير..
مشت اميمه وطلعت من حداه لدار جدها..
دقت ع الباب وقالت..حسين اني طلعت..
جاها صوته من داخل وهو يقول..
"تمام تمام"..
بعدها مشت لدارها..
لبست حجاب..ومشت بتطلع وهي تقول بصوت عالي..
ماشيه لحوش ماما..
جاها صوت امها وهي في دارها تقول..
"باهي باهي"..
ومشت اميمه لبست في رجليها وتوجهت لحوش عمها لطفي..
🍃وفي حوش لطفي..
تحديدا دار البنات..
كانوا اريج والاء مقعمزات ع بوكس
دونات وفي ايديها مقات نسكافيه كبار..
ياكلوا ويشربوا ولاهيات في الفيس..
وطوبى مقعمزه حداهم ع سرير غرفه وهي سرحانه...
محبوسه في اللي صار معاها..واللي يبي عمر بش تقدر تتجاوزه..
لتوا مرات تحس روحها في كابوس من بشاعة الشعور اللي تحس بيه..
كل مرة تخطر عليها حاجه..كل مرة تتفكر حاجه تقهرها وتحرق قلبها..
اخر حاجه خطرت عليها في هاللحظه...
يوم حفلة نجاح..
كيف خلتها نجاة تمكيجها والكلام اللي دار بيهم ونظرات نجاه ليها..
قداش استخفوا بيها..قداش اهانوها..
استغلوا طيبة قلبها وحسن اخلاقها ونيتها ابشع استغلال..
في فقلبها حرقه..فصدرها قهره..
نار وتبي تبردها ولوشويه..
غيرت عيونها لبنات اختها وشافتهم كيف ياكلوا في الدونات..
اطالت النظر وهي تفكر..
وفي لحظه نزلت من السرير ومشت خدت تليفونها من ع الزيانه.
ومشت طلعت من الدار للكوجينه..
خشتلها..وجت للثلاجه..
فتحتها وطلعت بوكس الدونات التاني..
بعد ماسكرت الثلاجه..
حطاته ع الطاوله..فتحاته..
رفعت تليفونها..وخشت ع الكاميرا..
وخدتله لقطة حلوة..
بعدين دارتلها اضافات..
رموز تعبيريه ع هيئة قلوب حمر..
وكلمة زوجي..حبي..باللغة الانجليزيه..
بعد التعديل..
خشت ع الفيس..وقبل لتنزلها منشور..
دارت خاصيه الجميع بإستثناء..وضغطت ع اسم اكاونت الجالي..
يعني الكل يقدر يشوف المنشور هدا ماعدا الجالي..
وقعدت اخر حاجه تكتبها فوق الصورة..
(قرة عيني مامخلي شي في خاطري)
وختمت الكلام برمز تعبيري ضاحك وجنبه قلب احمر..
ونزلت المنشور...
حطت التليفون ع تركينه وغطت البوكس ورداته للثلاجه..
بعدين مشت دارت لروحها كوب يانسون وحلاته بالعسل..
وقعمزت ع الكرسي وخدت تليفونها وخشت ع الفيس..
بدت تشرب في اليانسون وهي تتفرج ع التعليقات..
وع وجهها ابتسامه مكر..
كانوا صحابتها يعلقوا في تعليقات حلوة عليها هي وراجلها..
واكثر تعليق لفت انتباهها لوحده من صاحباتها قالت..
(اللهم جلجل رجالنا)..
طوبى بوجع قالت؛الله لايكثر من امثاله...
🍃وهالتعليق..
قراته نجاه وهي بتموت من الغيظ..
لاحظتها صابرين اللي كانت مقعمزه حداها في الدار..
صابرين؛خيره عيونك كلهم شر شن شفتي؟!
نجاة بغيظ؛هديكا الغبيه طوبى..شوفي شن منزله..
ومدتلها التليفون..
خداته صابرين وشافت المنشور بعدين قالت..
شكله شافها توكه ولوحها في الكناسه..
نجاه:ومرات شافتها وهو لحسلها عقلها بكلمتين وسكتها بالدونات فرخه هبله انخدعت في مستوى ذكائها طلع مافيش ذكاء من اصله..
صابرين؛مرات تكون ذكيه لكن حباته وولت هبله بعدين..
نجاه فهمت عليها وجبدت التليفون وهي تقول..
والله والله..ماني مخليتهم لين نقربعها بيناتهم..
صابرين وهي تشوفلها بقلق قالت..
"ياخوفي تتقربع فوق راسك بروحك"
🍃وطوبى..
بعد ماشربت اليانسون..
غسلت الطاسه..ومشت طلعت للجنان..
قعمزت تحت شجرة الياسمين..
وحطت السماعات في وذانها..
بعدين حطت ع الراديو في تليفونها وشغلتها..
وتلقى سورة آل عمران كيف باديه بصوت احمد العجمي..
غمضت عيونها واتكت ع ظهر الكرسي وهي تسمع بقلبها المكسور اللي يبي جبره يجي من ربه وطبه يكون بكلامه...
🌿فهالوقت جت اميمه..
خشت لدار المعيشه لقت فردوس راقده..
بعدين مشت لدار البنات لقت اريج وآلاء..
قعمزت هدرزت عليهم شويه بعدين سألتهم عن طوبى..
اريج؛تقريبا في الكوجينه..
اميمه:اه..ماخشيتش الكوجينه..
اريج:بالله شوفيها اميمه خيرها مش ع بعضها اليوم بكل..
آلاء؛شديتها اكثر من مرة تبكي..
اريج بضيق؛زعمها حقه الوحم يدير هكي؟
اميمه وهي متفاجئه؛وحم!؟
آلاء:ايه طلعت حامل قداش ليها وماتبيش تقول..
اريج؛مش هي راجلها قاللها ماتقوليش لين يثبت خايف من العين وعنده الحق..
اميمه وهي قلقه؛تو نمشي نشوفها..
وناضت ومشت طلعت من حداهم..
اريج بضيق؛ان شاء الله تقدر تخليها تحكي..
🍃خشت اميمه للكوجينه مالقتهاش..
لكن شافت باب الكوجينه الخارجي مفتوح..
عرفتها برا..
مشت طلعت برا ..وقعدت دور بعيونها..
لقتها مقعمزه ع كرسي تحت شجرة الياسمين..
مشتلها وهي تشوف لوضعها..
وين وصلت فيها كلمتها..
طوبى..طوبى..
ماسمعتهاش..
ربتت ع كتفها وهي تقول..
طوبى..
فتحت طوبى عيونها وشبحتلها..
نظره عيونها كانت نظرة غريبه اميمه..
نظرة زعل ممزوجه بالعتاب..
حولت طوبى السماعات وقالت؛ياأهلا..
اميمه بإستغراب:شن جوك؟
ناضت طوبى وهي تشوفلها قالت بتهكم..
شن جوي؟! مانحكليكش اصفى من جو الربيع اللي حني فيه..
اميمه زاد استغرابها وهي تقول..
خيرك تتكلمي هكي طوبى؟!
طوبى:جواب سؤالك لاهدا مكانه ولاهدا وقته..غدوة بإذن الله لما نمشي معاك المستشفى نجاوبك عليه..
اميمه توترت وضايقت وقالتلها؛لاطوبى توا بتقولي شن في..
طوبى؛توا اني مش قادره ندوي مانبي حد يسمع..
وبنظرة كلها حزن وبنبرة حزينه كملت تقول..اصلا ماعنديش حيل..تصبحي ع خير.
ومشت من حداها وخشت داخل..
وخلت اميمه في دوامه ومش فاهمه شي..
🍃وزي ماطوبى ماقدرتش ترقد غمضه...اميمه هرب عنها النوم وهي تفكر في كلام طوبى طول الليل..
🍃🍃🍃🍃
وجي تاني يوم..
وبدايته كانت عاديه ع كل افراد عيلة الواعر..
بس في من كانوا يظاهروا ان حالتهم عاديه..
زي طوبى..وفردوس..واميمه..
🍃طوبى:مش ماشيه لاللمدرسه ولا الكليه عندي مشوار مع اميمه..
فردوس؛باهي ردي بالك ع روحك وكان ماحصلتيش من يروح بيك كلمي اريج تجيك..
طوبى:حاضر..
فردوس:شقفة السيارة هادي كيف بديري فيها؟
طوبى:تو نتصرف..سلام توا..
فردوس شدتها وقالت:تعالي..قربتها ليها وباست راسها..
ابتسمت طوبى وعيونها دمعوا..وخدت يد اختها وباستها..
بعدين مشت بسرعه..
ومجرد مادرقت من قدام فردوس..
خشت للكوجينه وقعدت تبكي..
بكت براحتها وطلعت ببكاها شويه من حسرتها ع اختها اللي قاعده تعيش قهرة عمرها في أول عمرها...
🍃طلعت طوبى من الحوش ومشت طول لسيارة اميمه وهي تتجنب النظر لحوش شنيبه..
وصلت في سيارة اميمه ركبتها..
طوبى:صباح الخير..
شبحتلها اميمه شويه بعدين قالت؛صباح الخير..
وغيرت عيونها القدام وتحركت طول...
🍃🍃🍃🍃🍃
وفي مدرسة البنات للتعليم الاساسي اللي دير فيها نجاح..
كانت راما بنت خوها في الفصل مقعمزة في جنب صاحبتها الجديده "اسماء"
اسماء هادي بنت جت جديده لمدرسه مع بداية الفصل التاني..
فاشلة في دراستها ومعاوده الصف السابع مرتين..
شكلها..طريقة كلامها..وحركاتها مش لبنت ف عمرها نهائي وخلطت عليها راما وبدت تتأثر بيها هلبه..
اسما:ولد خالك وانتي اولى بيه من غيرك ياغبيه مش عارفه كيف طرف زي هدا تخليه يمشي لوحده تانيه..
راما؛تعرفي حتى اني استغربت في روحي لما بديت نركز عليه شفته قداش يهبل حركاته وبصارته وضحكته ياسومه لين حسيت روحي بندوخ امس..
اسما بضحكه:سحتي يابنتي..
ابتسمت راما بخجل..
اسما:المهم ياهبله اول حاجه ديرها اهتمي بروحك خليه يشوفك انثى..
راما بإستفهام:كيف!؟
اسما؛تو نقولك..اول حاجه حواجبك..شوفيهم كيف لاصقات في بعض نظفيهم..
راما؛قصدك نقيهم!؟ لالا حرام..
اسماء:ماقلنش نقيهم قلنا نظفي..اسمعي جاي تبي محمد يشوفلك لازم تمشي ع اللي بنقولك عليه ماتبيش فوتي خلاص..وقلبت وجهها عنها
راما:تي لايابارده ماديريش هكي..به خلاص قوليلي كيف نظفهم..
شبحتلها وقالت؛ايوه من الاول خليك مطيعه واسمعي الكلام..
🍃وبعيد عنهم..
لكن في مدرسه كذلك..
كانت للبنين التعليم الاساسي ..
محمد ولد خديجه كان مقعمز فوق السور وصحابه لوطا يراجو فيه ينقز..
لوح الشنطه ونقز وهو يقول..
وين بيها ليوم..
واحد منهم؛لقهوة في ******* مش عاديه..
محمد؛عليا اني المرة هادي...
:هي اسمع امتى نديروا ضربتنا التانيه؟
محمد؛انسى توا لين الشارع ينسى بعدين نتفاهموا..
🍃وكمل طريقه مع صحابه اللي يبعدوا عنه في العمر وتعلم منهم كل شي يخليه منحرف بإمتياز..
🍃🍃🍃🍃🍃
وصلوا طوبى واميمه للمستشفى..
وبعد مانزلوا للسيارة مشوا للمكان اللي تلاقوا فيه قبل هكي...
اول ماوصلوله..
قعمزوا ع مقعد مع بعض..
وطوبى طول خشت في الموضوع وقالت..
هو سؤال واحد..كنتي تعرفي بعلاقة الجالي ونجاه؟
تنهدت اميمه بضيق وقالت:ايه..
طوبى بألم:ياريتك كذبتي وقلتي لا ولانحسك استغفلتيني زيهم..
اميمه بإنفعال:لالا طوبى ردي بالك تفكري هكي..طوبى الموضوع ماكانش زي ماانتي فكرتي..ماكانش في عندي دليل مانقدرش نثبت شي..والحاجه هادي كبيره هلبه ياطوبى لو طلعتها صدقيني حيديروا المستحيل بش يطلعوني كذابه ونفتري..شفتي شن دارو فيا انتي سمعتي شن قالوا عني ياطوبى..هدا كله لأني واجهتهم باللي شفته وعرفته..
طوبى ودموعها ينزلوا؛لوجيتي وكلمتيني اني فتحتيلي عيوني ورتيني اللي اني مابيتش نشوفه ياأميمه كنت عرفت نتصرف..انتي تعرفيني كويس مش متهورة..
اميمه بإنفعال وحزن؛مافيش مراة تعرف ان راجلها يخون فيها ويقعد عقلها في راسها ياطوبى..
طوبى بنبرة باكيه:وشن تشوفي فيا ندير توا!؟
اميمه قعدت تشوفلها شويه بعدين قالت؛انتي كيف عرفتي؟
ابتسمت ابتسامة ألم وقالت بنبرة مخنوقه..
شفتهم بعيوني..
حست اميمه بشي وجعها بقوة..
طوبى وهي تبكي:ااه يااميمه لوكنتي تكلمتي من الاول ماكنتش توجعت لهالدرجه..لما تكتشفي انك كنتي مضحكه مستغفله الميه تمشي من تحتك وانتي ماتندري على شي..
توجعك روحك ياأميمه وتوجعك اكثر واكثر لما تعرفي انك عطيتيهم فرصه بديروا فيك هكي..
اميمه بألم؛والله ياطوبى ماقدرت والله صعب..انتي نفسك لما صارت معاي مشاكل مابتيش تتدخلي لنفس السبب حتى لما جيتي تنصحي فيا ماكنتيش تبيني نطلب الطلاق كنتي تبيني نعطيه فرصه تانيه انتي خلتيني ناخد عنك فكره انك مستعده تتنازلي عن كل شي المهم مايخربش زواجك..
طوبى بصدمه؛معقوله يااميمه!؟ معقوله هادي فكرتك عني اني نتنازل ع كرامتي ونرضى لروحي الاهانه هادي!؟
اميمه مسحت دموعها وهي تقول؛باهي قوليلي مش رضيتي تقعدي معاه بعد ماعرفتي انه مريض رضيتي وقبلتي ولا..قبلتي انهم غشوك وضحكوا عليك..
طوبى بإنفعال:مش هكي..مش هكي..اني ماقدرتش نسيبه بسبب مرض..لو فرضت انه جاه بعد ماتزوجته نخليه!؟ قوليلي ديريها انتي !؟..
سكتت اميمه وغيرت عيونها عنها وهي مضايقه ودموعها ينزلوا غصبا عنه..
طوبى بدموع؛ماننكرش ان ماليه نزلوا من عيني بعدها بس كنت نشوف فيه هو مظلوم وضحيه لو تخليت عليه مرات تزيد تتأزم حالته ويدمر مرة وحده..
ابتسمت بسخريه وهي تقول..ماكنتش نعرف إني أني اللي كنت ضحيه ومظلومه ومسكينه ومضحوك عليا
ونزلت عيونها وقعدت تبكي بصمت
اميمه شبحتلها بحزن وقالت:آسفه
طوبى بنبرة باكيه؛ماتتأسفيش يااميمه انتي ماغلطتيش عندك حق..اني اني اللي عطيتكم كلكم عني فكره غلط..تعاملت بحسن نيه وتسامح..تغاضيت ومشيت وفوتت وتحملت في روحي بش مانشوفش كسرة جديده في عيون بوي..
ولما درت هكي عطيتهم الضي الاخضر بش يتمادوا ويديروا فيا مايبوا..
اميمه بحزن؛هو اللي مايستاهلش وحده زيك والله حرام فيه وفي هالعيله الواطيه..
طوبى:طلعوا ناس مدرقين ورا شكالهم وفلوسهم ومكانتهم من برا ناس الخير يقشع من وجوهم قشع ومن داخل فيهم شر وتجبر وكبر لايوصف
اميمه:من اول ايامي معاهم شفته هدا كله..
طوبى بحسرة:واني كنت عميه...
اميمه وهي تشوفلها بحزن قالت؛كيف كشفتيهم؟
طوبى بألم؛ااه يااميمه لين نموت ماننسى يوم امس..
في حوشي..في دار نومي ع سريري..
حطت اميمه يدها ع قلبها اللي تحسابه بيوقف من صدمتها..
طوبى وهي تشوفلها والدموع مغرقات عيونها..
كنت نبي حد يجبرني نشوف اللي كنت نهرب منه حد يفتحلي عيوني غصب عني ويقولي شوفي
افهمي..اللي تفكري فيه صح مش وسواس مش وهم..وياريتك انتي اللي درتي هكي ياأميمه..
وسكتت لما تفكرت الحلم....
اميمه نزلت يدها وغمضت عيونها بشده وهي تقول..
الله ينتقم منهم كلهم..
شبحتلها طوبى وقالت:اميمه..
فتحت عيونها وشبحتلها بنظرات كلها ألم..
طوبى رشفت ومسحت دموعها بعدين قالت..
نبيك تحكيلي كيف عرفتي بعلاقتهم..احكي بالتفصيل وماتنسي شي...
اميمه هزت راسها..وبدت تحكيلها...
🍃🍃🍃🍃🍃
الساعه 11:00صباحا
"مدرس قدام المصحه نراجي فيهم"
هدا حسين يكلم في خطيبته..
"مسكينه توجع خايفتها تندري ع اللي صار لراجلها لاقدر الله تصيرلهم حاجه تانيه هي وصغارها"
حسين تنهد وقال؛يستر الله..حني نحاولوا ندرقوا الموضوع الفترة هادي لعل وعسى تصير حاجه ويطلع قريب..
"يارب عن قريب ان شاء الله"
شاف عمته طالعه وهي شاده شنطه بيد وبيدها التانيه شاده غرفه تساعد فيها ع المشي..
نزل من السيارة طول ومشالهم وهو يقول..
خلاص طلعوا توا بعدين نهدرزوا..
"تمام سلملي عليهم..سلام"
هو قال:سلام..
سكر ووصل في عمته خدي منها الشنطه وقال..
مش مفروض طلعت بكروسه..
غرفه؛لاعادي نقدر نمشي..
حسين:خليكم هني لين نقرب السيارة..
ومشي طول لسيارته..
ومطيره وغرفه قعدوا واقفات يراجوا فيه..
هو حط الشنطه في الكوفني..
بعدين ركب شغل السيارة وقربلهم..
ركبت مطيره غرفه للسياره من الخلف وسكرت الباب..
بعدين مشت ركبت جنب حسين..
وحسين تحرك طول..
حسين؛حمد لله ع سلامتك..
غرفه:الله يسلمك..قولي حسين ماشفتش عبد الرؤوف بكل؟
حسين؛لاشفته وهدرزنا..
غرفه بلهفه؛شن حاله؟
حسين؛طمني بالك حاله واموره تمام وراهو قالك ردي بالك ع روحك وماتخافيش مش مطول ان شاء الله..
غرفه وعيونها اللي مدرقهم الخمار يدمعوا قالت..
بالله عليك حق ماتمشيش فيا ولا؟
حسين؛لا والله ياغرفه..ماتخمميش ياغرفه كلنا نجروا ورا موضوعه حني صحابه ومعارفه وبعون الله يطلع قريب..
مطيره وغرفه بأصوات متقطعه..
"يارب..اللهم آمين يارب العالمين"
🍃🍃🍃🍃
"مانبيهمش يمسوه يا***** قسما بربي لو مسوا منه شعره نقلبها ع روسكم"
:اسكندر هدي اني تو نشوف الموضوع ولو صار ولقيتهم دايرين فيه شي تو نتصرف..
اسكندر بإنفعال؛نبي نشوفه ولا غدوة لازم..
:ان شاء الله ان شاء الله..انت راجي مني تليفون يارب..
هو قال؛عندك يومين مافيش بعدهم مايوصلني شي عن الراجل بنهد طول..
:ياراجل كلمه عطيتك كلمه وانت عارف كلمتي..
هز راسه وهو معصب ويفكر في وضع صاحبه بعد ماوصلاته اخبار انه تعرض للضرب والتعنيف في السجن..
وفعلا هدا اللي صار..
🍃🍃🍃🍃
ومن الصاحب اللي مش راضي في صاحبه السوء..
للصديقه اللي مش راضيه لصديقتها المشي في طريق السوء مع رفاق السوء..
مروة اللي خدت راما ع جنب في الاستراحه بس تسألها عن اللي مغيرها ناحيتها الفترة الأخيره..
راما؛وعلاش تبيني نقعد لاصقه فيكم ؟
مروة:شن لاصقه فيكم هادي!؟ من امتى حني هكي راما؟
راما؛اسمعي مروة انتي عندك بنات فصلك وصاحباتك واني عندي بنات فصلي وصاحباتي مش ضروري نقعدوا ديما مع بعض..
مروة برفعة حواجب تهكما:صاحباتك قصدك اسما وقروبها!؟.
راما ضيقت عيونها وقالت؛خلاص مروة الاستراحه بتم وانتي ضيعلي في وقتي ع دوة فاضيه..
سلام..
ومشت وخلتها...
مروة قعدت معاها بعيونها وهي تشوفها بحزن ويأس..
بعدين مشت ولت لصاحباتها..
:شن قالتلك؟
مروة بضيق؛اسما وجماعتها خدوا عقلها خلاص..
:خسارتها راما البنيه كويسه كان قعدت معاهم ضيع..
مروة بحزن؛ماعندي مانديرلها كان هي ماتبيش من ينصحها
مانقدر نغصبها ع شي..
:حرشي فيها عمتها..
:شن تحرش عمتها متاعك! تخش في مشاكل ومعمعه فوتي مروة اللي عليك درتيه..
مروة تنهدت وقالت:هو هدا..
🍃🍃🍃🍃🍃
وقدام مدرسه تانيه..
كانت نسرين طالعه بسيارتها...
وهي طالعه شافت حاجه خلتها تبتسم..
وطول الطريق وهي تشوف لهالحاجه من المرايه وابتسامتها ع وجهها..
لين درست قدام "سوبر ماركت" بتاخد منه حاجات لولدها..
نزلت ومشت خشت داخل..
ودرست وراها الحاجه..او السيارة اللي كانت تبع فيها من لما طلعت من المدرسه..
ونزل منها صاحبها وخش وراها..
☘هي داخل..
كانت واخده سله وباديه تاخد في الحاجات وتحط فيها..
وهو دور عليها لين لقاها استغل زحمة المكان وقعد يتبع فيها..
نسرين حست بيه لأن هادي ماكانتش المرة الأولى..
تعودت عليه يكون وراها وين ماتمشي..وكانت تراجي فيه يتجرأ ويدير خطوه القدام..
وهو كان متردد ومخوفاته شويه ردة فعلها..
مش حيتحمل رفضها ليه..هو اكثر حاجه تأثر فيه الرفض..
☘قعدت تمشي وتشوف في الحاجات..
وهي حاسه ان وراها بمسافه بسيطه..
وبحركه مفاجئه..
لفت...
وتشده بالثابت زي مايقولوا..
هو انفجع وبان عليه..
قعد جامد في مكانه يشبحلها وخلاص..
اما هي شبحتله بنظرات استغراب مصطنعه بعدين مشت وخلاته..
وين فاتت من جنبه هو غمض عيونه بإحراج واسف وقال..
ستوبيدو..
بعدبن فتح عيونه ولف وقعد يدور عليها لقاها واقفه ع الكاصه بتخلص..
لف صبعه السبابه وحطه في فمه..بعدين حوله ومشالها..
وقف جنبها بمسافه بسيطه..
سمع الشاب قال..86دينار ياأبله..
حط يده في جيبه ومش عارف قداش طلع منه وحطهم للشاب..
هو ونسرين اتفاجئوا..
وربيع قال بإبتسامه؛بحبح بالباقي..
عقدت نسرين حواجبها وقال:معليشي هدا شني!؟
ربيع:عطيني من وقتك خمسه دقايق..
هي شبحتله من فوق لتحت..
بعدين حطت الكيسه اللي فيها الحاجات اللي خدتهم ع الكاصه ومشت طلعت..
هو اتفاجئ في ردة فعلها ومشي لحقها وهو يقول..
غير شويه استني والله نيتي صافيه..
والشاب يشبحلهم وهو رافع حواجبه بتعجب..
🍃برا..
لحق عليها ربيع ووقف قدامها وهو يقول..
ربيع؛نسرين بالله عليك ماتفهمنيش غلط قصدي شريف ونيتي صافيه ونبي نخش الحوش من بابه لكن لازم نعرف رأيك قبل..
نسرين؛الاصول ياولد جيرانا انك تبعت ماليك يفتحوا الموضوع بعدين اني نقول رأيي فيه..
ربيع؛ok..ماعنديش مشكله..اصلا اني نتمنى..لكن انتي عطيني حاجه نتكا عليها ارجوك اني اكره ماعندي الرفض يعني لو رفضتيني نفسيتي تتعب ونخش في اكتئاب ..
نسرين شبحتله بريبه..
ضحك وقال:نبصر عليك..هوصح نتعقد من الرفض لكن ماتوصل للمرض مش اول وحده ترفضيني..
رفعت حواجبها تعجبا..
ربيع بإستسلام وعجز:والله مانعرف ندوي وعارف روحي بنطفشك قبل لنبعت امي..بس بالله حاولي تتفهميني وتعطيني فرصه..صدقيني حنسيك اللي عدا عليك بسرعه ولا كأنك عشتيه..
هي سكتت شويه بعدين قالت؛ابعت ماليك قبل بعدين يصير خير..
ومشت وخلاته..
هو طول ولي يجري للسوبر ماركت..
🍃وهي وصلت لسيارتها وركبتها وع وجهها ابتسامه خفيفه..
شغلتها وكيف جت بتتحرك..
يدق عليها ربيع روشن باب المقعد اللي جنبها..
شبحتله بإستغراب ونزلاته..
هو بضحكه مميزة حطلها الكيسه متاع الحاجات داخل وقاللها بإبتسامه؛هادي مني ليحيى باشا..
ماقدرتش تشد ابتسامتها غيرت عيونها عنه وتحركت طول..
وهو لحق السيارة بعيونه وهو يقول بإبتسامه حلوة بالمرة..
بتضحكلك الدنيا ياربيع...
🍃🍃🍃🍃🍃
وفي طريق تانيه..
كانت اريج تسوق وفي جنبها طوبى..
طوبى طول الطريق ساكته ولانطقت بكلمه..
تتفكر في اللي حكاته اميمه وحاسه بمرار كبير...
اكثر شي وجعها في الحديث اللي صار بينهم..
لما سألت طوبى اميمه..
《كلهم يعرفوا ؟》
واميمه ردت..
《تلاته متأكده انهم مايعرفوش امه وبوه والمهدي..اما الباقي مليون في الميه عارفين》
غيرت طوبى عيونها لأريج..
تفكرت يوم اللي صارت مشكله بينها وبين نضال لأنها خدمت من وراه ودرقت عليه..
هي وقتها تغيرت نظرتها تجاه نضال تماما وولى سعره بسعر خوه وعيلته..لكن خافت ع اريج اللي قلبها معلق بيه..
ردت شبحت القدام..
وهي تتفكر في هلبه مواقف صارت قدامها او كلام سمعاته كان يدل على انهم عارفين..
مواقف خديجه وكرهها الواضح لنجاة..
تعامل نسرين السطحي مع نجاة..
نفور نضال منها وعدم تقبله ليها اللي كان واضح من نظراته..
بس اللي خلاها تستبعد مغليه تعاملها العادي مع نجاة واللي كان مبينلها انها تعزها هلبه لو كانت فعلا عارفه ماكانتش عاملت نجاه بهالحميميه..
قطعت عليها اريج تفكيرها لما قالت..
اريج؛الحمد لله اليوم مافيش عياده نبي نرقد..
طوبى؛علاش؟
اريج؛الدكتورة منيه عندها مناسبه..
طوبى هزت راسها وهي ساكته...
اريج؛سيارة الجالي..
طوبى شافتها وهي خاشه للشارع بدون ماتعلق..
وصلت اريج وخشت للشارع...
وطوبى تشوف لسيارة الجالي اللي كانت ماشيه قدامهم لين مشي بيها لقدام حوشهم ودرس..
بس المفاجأه..
اللي كانت لطوبى وكأنها فرضه مهداة..
هو ان نجاه وصلت في نفس الوقت وهي جايه من الجهة التانيه للشارع..
درست اريج قدام باب حوش جدها..
وطوبى تشوف في الجالي كيف نزل..وبعدين نجاة نزلت..
ابتسمت ابتسامه فيها شي من المكر..
بعدين نزلت من السيارة...
واريج نزلت معاها..
☘نجاه كانت تسكر في باب السياره وهي تشوف للجالي بنظرات غل..
وهو كان يدير في روحه مايشوفش فيها..
شبح جهة حوش الواعر..
جو عيونه في عيون طوبى.
اللي رسمت ع وجهها ابتسامه واسعه لما شافاته..
بعدين رفعت يدها واشرتله يجي..
ونجاة تشوفلهم بنظرات غيظ..
هو ابتسم ع جنب ومشالها...
ونجاه بعيونها معاهم..
طوبى شبحتلها بنفس الابتسامه ورفعت يدها وحيتها..
نجاه غصبا قهرا ردت التحيه بحركة الراس وهي تحاول ترسم ابتسامه ع وجهها...
☘وصل فيهم الجالي وقال..
شن جو اريج..
اريج بإبتسامه؛تمام الحمد لله شن جوك انت.
الجالي:تمام..جي لطوبى وقال..شن جو حبيبي..
اريج تحشمت ومشت سبقتهم..
فتحت الباب وخشت
وطوبى حطت يدها ع ذراع الجالي وقالت بإبتسامه..
نبيك شويه..
ومشت معاه وخشوا للحوش..
دخلاته طوبى هو الاول..وخشت هي..
وسكرت الباب وكانت عارفه ان نجاة قاعده تشبحلهم من غير ماتشوفلها..
🍃ونجاه وهي مقهورة ومنغاضه..
مشت طول لحوش شنيبه فتحت الباب وخشت وسكراته وراها بقوة.
☘وهدا كله كان ع عيون فراس اللي معاش فهم ولااستوعب شي..
🍃طوبى بعد ماسكرت الباب وقفت عليه وهي تشوف لأريج كيف خشت داخل..
غيرت عيونها للجالي وتبدلت ابتسامتها الواسعه لملامح كره قويه..
هو قربلها وقال بإبتسامه جانبيه؛تهبل غيرتك..
بدت ع وجهها ملامح الازدراء بعدين قالت..
اسمع جاي..
رفع حواجبه وقال بضحكه؛نعم..
طوبى بحده؛اليوم نبي شنطة اللابتوب متاعي وشيتاتي وحاجاتي متاع القرايه كلهم موجودات في المرسم..
الجالي:شن رايك تروحي معاي وتاخديهم بروحك؟
غمضت عيونها بنفاد صبر..
هو ضحك وقال؛خلاص خلاص بعدين نجيبهم..
فتحت عيونها وقالت؛السيارة اللي برا معاش نبيها..
الجالي:علاش قلبي تبي نجيبلك غيرها!؟
طوبى بكره؛لو كانت روحي عندك منك انت معاش ناخدها..
رفع حاجبه وعض ع شاربه بعدين بله وقال؛تمام تمام..اللي تبيه نديره..المهم ترضي..
طوبى ضيقت عيونها وقالت؛ماتعيشش روحك في وهم اني ممكن نقبل ع روحي نكمل حياتي مع واحد زيك انت..فيق يابابا فيق..
ابتسم وهو يشوفلها بنظرات اعجاب بعدين قال وهو اشر ع بطنها وقال..سلم عيون بابا اللي حيقعد رابطك بيا لين تموتي ياعمري..لاخلاص..لافكاك..
قعدت تشبحله بنظرات قرف..
بعدين لفت للباب وفتحاته وهي مدرقه وراه..
هو ضحك نص ضحكه بعدين مشالها وقال..نشوفك بعدين حبيبي..وجي بيقرب منها بش يقبل جبينها..
هي دفاته بيدها دفه خفيفه وكان بادي ع وجهها ملامح الاشمئزاز..
حس بشي وجعه في العمق..بس تظاهر بالبرود وقال..
سلام ياقلبي..
ومشي طلع..وهي سكرت وراه الباب..
حطت يدها ع فمها لما حست بالغثيان..
بعدين نزلتها ومشت خشت داخل..
🍃🍃🍃🍃🍃
في المستشفى العام..
كانت في الحجره الخاصه بقسمهم..
تاخد في بيانات مريضه بش تحطها في قائمه العمليات اللي حتندار الاسبوع القادم..
كانت تحاول ع قد ماتقدر تركز في شغلها..
اللي صار مع طوبى قهرها وحسسها بالذنب حسسها انها شاركت معاهم في خيانتها وكانت سبب في الوجع اللي تحس بيه طوبى توا..
كملت تسجيل بيانات المريضه وقالت للمرضه الموجوده معاها..
اسحبيلها الدم وارفعي العينه للمعمل طول..
الممرضه؛-حاضر..هي تعالي..
مشتلها المريضه..
واميمه قعمزت وسرحت وبتفكيرها..
وماركزت ع الغلطه الكبيره اللي قاعده ترتكب فيها الممرضه..
هي انها سحبت الدم للمريضه وهي واقفه..
والمريضه لما انسحب منها الدم حس بدوخه..
الممرضه خافت وقالت؛خيرك دختي!؟ عادي عادب تصير..
وسحبتلها كرسي قعمزتها عليه..
بس المريضه ماوعتش وقاعده دايخه..
ع خشة وسام ومعاه امل..
امل وهي تشوف للمريضه:خيرها!..
وسام ركز مع المريضه..
الممرضه بخوف:مش عارفه سحبتلها دم داخت..
امل وهي تشوف للون المريض كيف انخطف..
جتها وقعدت توعي فيها وهي تضرب ع خدودها؛هييه تسمعي فيا..
استاقظت اميمه ولما شافتها انفجعت وناضت وهي تقول؛شن في!..
طلع وسام يجري..
وهي جت للمريضه وقالت؛واكله ياهدى قبل لتجي..
المريضه مش قادره ترد بتخش في عالم تاني..
خش يجري وسام ومعاه ممرضه جايبه كانيولا التغديه..
خدت الممرضه يد المريضه وحطتها الكانيولا..
ووسام يقول؛تسمعي فيا ياابله..
والمريضه خلاص حتفقد الوعي..
اميمه وهي تضرب فيها ع وجهها..
لاياهدى..اصحي معاي..هدى..هدى..
ووسام خدي كيس التغذيه وقعد يضغط عليه بالقوة..
امل:شوفي وجهها!!
اميمه وهي تحاول تغلب خوفها بش تسيطر ع الوضع:امل شديها من راسها بسرعه..
مشت امل تلقت المريضه من الخلف..
في نفس الوقت اللي رفعتلها فيه اميمه رجليها فوق..
ووسام قاعد يضغط ع كيس التغديه..
والناس برا التمت في الممر وهما يتفرجوا..
ع جية خالد اللي كان مستغرب في الزحمه خش عليهم وشاف اللي صار..
اميمه:هدى تسمعي فيا!..
رجع اللون لوجه المريضه وبدت تستعيد في وعيها..
هزت راسها استجابة لأميمه..
امل؛كويسه توا؟
المريضه بصوت يدوب طالع:ايه ..
تنفست اميمه براحه..
وشويه وخشوا بباريلا..
ورفعوا اميمه وامل والممرضه المريضه عليها..
وطلعوها لحجرة..
خالدبعد ماطلعوها قال..
شن صار؟!
وسام؛كانوا يسبحولها في دم وداخت..
خالد:من اللي سحبلها الدم..
التفتت اميمه بتشوف للممرضه اللي سحبت الدم مالقتش الا مكانها استغربت..
خالد بحده:من اللي سحبلها الدم؟
امل:اخلاص دكتور..
خالد؛العينه وين؟
اميمه بشي من الارتباك:قلتلها ترفعها للمعمل..
هو هز راسه ومشي طول من حداهم..
وسام شاف لأميمه وقال:شن قصتها المريضه هادي؟
كانت اجابه بمصطلح طبي يعني اسم العمليه..
وسام؛تفكرتها كانت هني من الاسبوع اللي فات..
امل:اخلاص خيرها تسلحبت تسلحيب وهي طالعه!؟
اميمه عقدت حواجبها وقالت؛بكري قلت سحبت العينه ونزلت المعمل..خل نمشي نشوفها..
ومشت طلعت من حداهم..
امل؛اخلاص ملبزة والاخت هادي درق عليها..
وسام؛باهي يازقايطيه تعالي معاي نشوفوا المريضه شن صار فيها..
ومشي طلع وهي وراه...
🍃🍃🍃🍃🍃
"شن حالك توا"
غرفه بملامح وجه باهته؛الحمد لله ع كل حال..
طوبى؛تو يطلع منها ويروحلك قريب ان شاء الله..
غرفه من قلبها:يارب..تعرفي نخمم في نبيله اكيد انشغلت ماحد دورها ولاكلمها..
طوبى؛امس في الليل خشتلي ع الماسنجر تسأل..
غرفه بتساؤل:ايه!
طوبى؛قلتلها غرفه تعبت شويه ورقدت في المصحه وعبد الرؤوف لاهي بيها..
غرفه بضيق؛وشن قالتلك؟
طوبى:طمنتها ماكملتش معاها المحادثه الا وهي مطمنه..
غرفه بحزن؛خايفه ياطوبى خايفه هلبه..
طوبى:ان شاء الله ماهناك كان الخير..استودعيه ربي
قولي اللهم اني استودعك زوجي وانت لاتضيع ودائعك..
غرفه غمضت عيونها ودعت من قلبها..
"اللهم اني استودعتك زوجي وانت لاتضيع ودائعك"
🍃🍃🍃🍃🍃
وفي حوش شنيبه..
بعد الغدي..
طلبت نجاه من نسرين تكلمها ع انفراد..
نسرين سكرت الكوجينه عليهم وقالت..
خير ان شاء الله؟!..
نجاه ربعت ايديها وقالت..
عندك علم باللي بيني وبين الجالي..
رفعت حاجبها وقالت..
ايه..
نجاة:اني وخوك خلاص معاش في بينا مية وملح ونبي نطلق منه قوليله نجاة تبي الطلاق في اسرع وقت بش تشوف حياتها..
نسرين:احسنلك صدقيني خير ماقاعده هكي ومعليشي يعني زي العشيقه..
نجاه ضيقت عيونها وقالت؛نسرين ياريت ماتغلطيش خوك تزوجني زواج شرعي يعني اني مرته زيي زي طوبى..
نسرين؛لا مانكش زيها..انتي اخترتي تكوني في الظلام وبالدرقه وهي مرته علنا ورسميا والناس كلها شاهده مافيش مقارنه بينك وبينها..وبعدين ماتزعليش مني ازعلي من نفسك اللي حطيتي روحك في هالموقف..مراة زيك انتي الف راجل يتمناها وماناقصها شي علاش ترضى لروحها وضع زي هدا..
شدت نجاة دموعها بالسيف وقالت:واهوا بنصلح غلطتي..وصليله كلامي وقوليلها يعجل..
ونزلت ايديها ومشت بتطلع من الكوجينه..
بس نسرين وقفتها لما قالت..
نجاه ردي بالك تتهوري وديري شي يخسرك صغارك..
شبحتله شويه بنظرات حاده..بعدين فتحت الباب وطلعت من حداها..
مشت طول خشت الصاله..
خدت شنطتها وطلعت لباب الحوش وهي تقول من تحت سنونها بغضب..
تونوريكم ياعيلة كلا.ب...
وطلعت من الحوش...
🍃والجالي متكي في المربوعه وهو سرحان..
يتفكر في حركات طوبى وتصرفاتها وكلامها وع وجهه باديه ابتسامة اعجاب خفيفه..
بعدين قال في نفسه..
"والله ماواخدك مني كان الموت"
🍃🍃🍃🍃🍃
وبعد الغدي في حوش الواعر..
كلهم خشوا رقدوا..
وهادي اول مرة ترقد فيهم بعد 24ساعه واصلتهم وهي فايقه...
تعب اليوم اللي فات ولى عليها وجسمها معاش قدر يقاوم وخلاها تستسلم للنوم بش ترتاح شويه من التفكير..
وهدا كان حال غرفه حتى هي..
ماقعد حد فايق في الحوش كان مطيره وخوها لطفي..
مطيره؛الله يعطيهم مايرفعهم كان خانب من هداكا الوقت علاش ماشدوشي وقتها!؟
لطفي:الدوة هادي مش لعبد الرؤوف يامطيرة الراجل واضح واني عارفه كويس..
مطيره؛مش قصدي اللي فهمته يالطفي اني نحكي ع المصايب اللي توا خطرلهم انه خانب..
تنهد لطفي بضيق وقعد ساكت..
مطيره؛خلاص انت اتكا شويه وريح روحك..خليها ع الله وخيي..
لطفي:ونعم بالله..
مطيره:اتكا اتكا..
هو استجابلها وحط راسه ع المخده وحاول يرقد..
اما هي ناضت من حداه وهي تقول..كان تبي ضبح عليا.. ومشت طلعت لدار المعيشه بش تقيل حتى هي..
وخلاته ع انفراد مع همومه اللي ماتبيش تكمل...
🍃🍃🍃🍃🍃
واقف يشوف في ورقة تحليل الدم قال..
خالد؛المريضه دمها كويس..
اميمه توترت..
شبحلها وقال؛اخلاص وين..
اميمه بضيق؛الغلطه غلطتي دكتور اني ماكنتش مركزة معاها..
خالد؛اخلاص ممرضه ياأميمه ممرضه يعني هادي اساسيات شغلها ماتبيش عليها رقيب بس طبقهم...اميمه اخر مرة ديريها وتحاولي تساعدي حد غلط..الغلط عندنا حني بكارثه يااميمه..
اميمه نزلت عيونها بضيق وحكت جبينها من الارتباك..
خالد؛تعرفي ياأميمه علاش مانبيش نعطيك تزكيه لأنك لتوا مش عارفه تولي طبيبه..ولاعارفه شن معنى هالكلمه..لتوا ماتستحقيش تكوني جراحه يااميمه..الجراح بالذات لازم يكون شخص بارد مرن يقدر يخدم تحت الضغط جدي للغايه في الخدمه مايسمحش بالغلط لأن مهنتنا تخصصنا حني بالذات مايقبلش غلط..اميمه راجعي نفسك وشوفي روحك اذا تقدري تكملي في التخصص هدا...فكري كويس..
ومشي وخلاها محبطه للغايه..
تلاقت عليها اليوم من جميع النواحي لين حست روحها ولت مخنوقه ومش قادرة تتنفس..
هربت بدموعها لخارج المستشفى..
ومشت قعمزت في مكان بعيد عن المبني..
وبدت تبكي بروحها بصمت...
🍃🍃🍃🍃🍃
وبعيد عنها..
في مطار معتيقه..
من باب الواصلين..
يطلع عمر وهو يجر شناطيه معاه..
كان يبان وضعه احسن من قبل..
بس مازالت سمات التكبر والعجرفه غالبه عليه..
طلع من المطار ووقف تاكسي..
حط شناطيه في الكوفني بعدين ركب وعطي للسواق عنوان المنطقه اللي فيها شارع القهوة..
🍃وفي هالاثناء قرب موعد صلاة العصر..
فاقت طوبى وفيقت الكل معاها..
ولما فاقوا لقوا لطفي طالع للجامع..
☘صلوا العصر..
بعدين دارو دورة الحوش وبدوا يجهزوا في الضيافه استعدادا لاستقبال الجيران اللي اكيد سمعوا بطلعة غرفه..
🍃🍃🍃🍃
واقفه ع المرايه..
وهي تتفرج ع مقطع يوتيوب فيه وحده تعلم في المتابعات كيف ينظفوا حواجبهم..
وهي شاده الملقاط وتقلد فيها..
فجأه دق الباب..
هي خافت دست الملقاط ونزلت التليفون..
وينفتح الباب وتخش امها..
خديجه:بنمشي لحوش الواعر تمشي معاي؟
راما وهي تحاول تخفي ارتباكها:لالا عندي قرايه..
خديجه هزت راسها وطلعت وسكرت الباب..
هي قعدت تشبح للباب للحظات..
بعدين طلعت الملقاط من جيبها وولت للي كانت دير فيه..
🍃🍃🍃🍃🍃
"هما جايين لغرفه مش جاييني ماعنديش جهد نجامل حد النوم في عيوني"
فردوس؛خلاص خلوها ترقد وانتم اطلعوا قدامي..
طلعوا اريج وآلاء وهما يوزعوا في المهام ع بعض..
فردوس بعد ماطلعوا قالت لطوبى..
تبي نديرلك حاجه؟
طوبى وهي مغمضه عيونها:لالا..
فردوس هزت راسها وهي تشوفلها بحسرة ومشت طلعت وسكرت الباب..
🍃وبدوا الجيران يخشوا عليهم..
وهالمرة جو مغليه وخديجه ونسرين..
مطيره تعاملت معاهم بسطحيه..
اما صفيه ولاكأنها تشوف فيهم..
لكن فردوس ماكانتش متحمله شوفتهم كانت تبي تنفجر فيهم وتفضحهم قدام الكل..
بس تمالكت نفسها بقوة..
اما اريج..لعيون حبيب قلبها وراجلها تعاملت معاهم كويس..
نسرين؛اريج وين طوبى؟
اريج؛راقده الوحم متعبها..
مغليه:تطلع تخلينا نشوفوها نباركولها ع الحمل ع الاقل..
خديجه بصمت كانت تمرر في نظرها عليهم ومن داخل تغلي غلي..
اريج؛حاضر تو نمشي نوضها..
وناضت ومشت من حداهم..
وخلت مغليه تهز في رجلها بعصبيه..
~~~~~~
اريج؛بيبو..بيبو..طوبى..
طوبى وهي مغمضه عيونها:اممم..
اريج؛عمتي والبنات جو نوضي سلمي عليهم.
طوبى:من عمتك؟
اريج؛ عمتي مغليه نوضي صحصحي ياهمي..
طوبى:مش ناضيه..
اريج؛طوبى خير بلاك نوضي اطلعي خير مايحرجوا منك..
طوبى:طز..وتقلبت ع الجنب التاني وعطتها بالظهر..
اريج وهي متعجبه؛معقوله الحمل يدير هكي!؟
طوبى:اطلعي اريج بنرقد..
مشت اريج طلعت وهي مستغربه في حال خالتها..
وشدت روحها في الكوجينه معاس بت تطلع بس مايسألوهاش عنها..
وقعدوا مغليه وخديجه طول ماهما مقعمزات متجهمات قليلات الكلام..
عكس نسرين اللي كانت دخل في روحها عادي..
ع خشة اميمه بعد ماروحت من المستشفى..
فاتتهم كلهم ومشت تسلم ع باقي الجيران..
مغليه؛هيا نوضوا..
خديجه ناضت وامها ناضت بعدها..
مغليه بصوت مسموع للجميع؛ان شاء الله ربي يفرج ع راجلك ويفرحك بطلعته باغرفه..
غرفه؛امين بارب..صحيتي خالتي مغليه..
مغليه للجميع؛تصبحوا ع خير..
ومشت طلعت...
وخديجه لاسلام ولا كلام لحقتها طول..
🍃برا..
مغليه بغضب:ريتيهم؟!
خديجه؛ولاكنتك الموصون االلي مابنش تتنازل وتطلع تسلم علينا..
مغليه:هادي تبي اعادة ضبط مصنع..
وفتحت الباب وطلعوا مع بعض..
ووراهم نسرين ومعاها فايزة..
نسرين؛خلاص نتلاقوا الخميس هدا تمام..
فايزة؛تمام..
نسرين؛وبالله شوفيلي طوبى خيرها..
فايزة؛من الحمل راهو كلنا مرينا بالحاله هادي..
نسرين ابتسمت مجامله وقالت:مرات..خلاص نتلاقوا..سلام..
فايزة؛سلام..
ومشت نسرين طلعت..
وفايزة ولت خشت داخل...
🍃🍃🍃🍃🍃
ماشيه بتهد ع المربوعه ...
وين خشتلها..لقت عمر مقعمز مع خوته..
بغضب: ومازال ليك عين تخش الحوش انت يارزيل..!
عمر بضجر:يام صلي ع النبي وفويتني بالله عليك..
مغليه بغضب:نفوت عينك ياحي.وان..خود شناطيك وانتلف برا..
الجالي:يام خلاص..
قاطعاته وقالت:انت تسكت مانبيش نسمع صوت..
انخطف لونه وبلع ريقه بخوف وماقدرش يتكلم..
مغليه؛قتلك نوض اطلع هني ماتقعدليش..
هو عصب ع الآخر..مشي خدي شناطيه...وقبل ليطلع خبط الباب بيده بقوة ومشي طلع..
مغليه؛مصح وجهك ياتافه ياقرد..
🍃وهو فات من قدام خديجه ونسرين اللي كانوا يشبحوله بعدم رضا..
هو طلع من الحوش لشقته طول..
🍃وامه بعد ماطلع التفتت لخوه..
مغليه:ست الحسن مابتش تطلع تسلم علينا ياباش مهندس..
الجالي:عندها الحق..
مغليه بصدمه؛-تدوي من جدك انت!؟
الجالي:ايه يام من جدي..مادام انتم درتوا رواحكم برانيه ومشيتوا اخر الناس توقعوها ردة الفعل هادي يام..
مغليه؛خيرك دعوتك انت شن جاك!..
ناض ومشي لأمه وهو يقول بحده..
المراة حامل ونفسيتها تاعبه اخطوها..
ومشي من قدامها وطلع من الحوش ع عيون خواته..
لحقاته نسرين...
اما خديجه جتها امها وقالت؛شفتي ع خاطر العيل كيف تغير! مالا بعد تجيبه كيف بيولي!؟
خديجه قعدت ساكته وهي تفكر...
🍃برا..
نسرين؛جالي..استنى..
وقف وقال؛شني انتي التانيه..
نسرين وقفت قدامه وقالت؛نجاة اليوم قالتلي قولي لخوك يطلقني بسرعه..
الجالي؛قوليلها قالك الجالي غدوة تعالي للشركه وخودي كلمتك..
ومشي طلع من الحوش...
نسرين بضيق:شن لمك عليها من الاول بس..
🍃ونجاة..
قاعده في شقتها..حابسه روحها في دارها ع سريرها وهي تبكي ومقهوره والغيظ ماليها....
وصغارها قاعدين لخالتهم صابرين تساعد فيهم في واجباتهم وراده بالها من معاذ الصغير..
ومرة مرة تراقب في تليفونها وتراجي في اتصال من
مختار...
🍃🍃🍃🍃🍃
قاعد الوقت عشيه..
خشت سيارة عبير لشارع القهوة..
وهي دور في التارقي بعيونها
لين شافاته واقف يهدرز مع المهدي وربيع قدام مطحن الزعيم..
نزلت من السيارة وهي تشوفله..
ربيع اللي شافها من اول مانزلت قال..
تارقي في طرف خيالي من بكري عيونه عليك..
عبد القيوم والمهدي مع بعض..
"شن الكلام اللي تقول فيه هدا...تحشم "
ربيع بضحكه؛والله ماعاكستها اللي واقفه فم باب حوش الواعر وتشبحله..
الزوز التفتوا وشبحولها..
عبد القيوم طول غير عيونه عنها وبان عليه الارتباك..
ربيع بخبث؛شكلك عارفها..
المهدي شبحله..
عبد القيوم وهو يغير في الموضوع:شن صار في قصة سرقة حوش الجعفري..
ابتسم ربيع ع جنب..
والمهدي:لتوا مافيش جديد..
🍃وعبير خشت للحوش بالسيف بعد مافتحتلها اريج..
شافت للقهوة لقت نضال واقفه قدامها يشوفلها بإبتسامه..
ردتله الابتسامه وسكرت الباب..
🍃🍃🍃🍃🍃
وفي الشارع اللي يجي خلف شارع القهوة..
كان محمد ولد خديجه قدام واحد من المحلات مع صحابه يخططوا للسرقه الجديده اللي حينفذوها بعد ما تهدا دوشة السرقه الاولى..
محمد وهو يدخن؛المرة هادي مش في حوش من حياش الجيران..
؛مالا وين المصرف المركزي!؟؟
محمد:ياخفيف..في الشارع نفسه لواحد ماحد مدوره..
:مني؟
محمد جبد نفس دخان ولوحه بعدين قال..
"العامل النيجيري بلال"
...يتبع....
