#طوبى "شارع القهوة"
#جمان_فريد
#المقدمه
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها ..
وصلوا على الحبيب🌼
بسم الله توكلت ع الله...اللهم اجعل كل حرف فيها شاهد لي لاعلي..واجعلني انفع ولاأضر...
☕☕☕☕☕☕☕☕☕☕☕☕☕☕☕☕☕
كان ياماكان.....
وفي زمان بعيد...
كل شي فيه ليه بنه...حتى الهوا فيه كان اصفى وانقى...
كانت القلوب مليانه..مغلفها الحن...وع بعضها ولبعضها...
سنه ألف وتسعميه وسته وتسعين..
في نصك ياشهر تنين...
في عز الشتي....وفي ايام رمضان الحلوة ....
وياه ع ايام رمضان زمان كيف كانت..كنا نشموا في ريحته قبل يجي ...
وياسلام عليه لما يخش باعت معاه ربي كل الخير...
وماينوصفش جوه في طرابلس اللي معالمها كلها تتغير لما يخش...
زي ماصاير لشارع القهوة....
شارع القهوة!؟
ايه شارع القهوة....الشارع اللي يتنفسوا الناس معاه ريحة القهوة...
اللي تجي من مطاحن عيت شنيبه وعيت الواعر..
اللي زباين عليهم بالطوابير ماتكمل حلاوة لياليك يارمضان الا بقهوتهم...
وكل مطحن يدير في القهوة خير من الثاني لين مرات الناس تحتار من وين تاخد...
من مطحن الزعيم....ولامطحن جنه...!؟
وبعيد عن الزحمه اللي قدام المطاحن الزوز بمسافه..
كان مفتوح سنفاز العم صبري الخويلدي...
في رمضان مع السفنز يبيع في العسله والزلابيه...
اللي لطفي الواعر واقف عليه بش ياخد منه...
لطفي بإبتسامه؛خلاص معاش مازال شي ع المغرب ساعه بس..
صبري وهي يوتيله في طلبه؛ان شاء الله ربي يسامحني معاش نتحمل في الجوع بالذات الايام الاخيره..
لطفي:الايام الاخيره صقع هلبه..
صبري:صح...هي تفضل..
خدي لطفي كيسة العسله والزلابيه والكاغط اللي في السفنز بالدحي وهو يقول؛عطيك الصحه ياصبري هي السلام عليكم..
صبري:وعليكم السلام..
مشي لطفي متوجه لحوشه واللي يفوت حداه يسلم عليه وهو يرد في السلام عليهم..
لين وصل في حوشه وهو يشوف في المطحنه اللي واقفين فيها ولاد خوه يوسف ومعاه حسين يبيعوا...
بعدين شبح للباب وفتحه وخش..
وسكره وراه برجله...
ومشي طول بإتجاه الكوجينه..
شم ريحته عجباته وقال؛مطيرة هني مطيره..
طلعت مطيره من الكوجينه وهي تضحك؛ايه ياغالي مطيره هني ودارتلك كفته طرابلسيه..
وقربت منه وخدت منه الحاجات وهو يقول:تي شن حالك شن حالك ياستهم..
مطيره بضحكه؛الحمد لله في خيار الخير ياسيدهم..
ع طلعة مراة...
جميله الوجه والروح...الطيبه في وجهها باينه غير شوفتها بالنسبه ليه ترد الروح...مرته ورده...
اللي قالت يإبتسامه؛الله ع السفينزات...جيبي مطيره جيبي..
مطيره؛شن جيبي مطيره جيبي بتاكليهم توا!؟
وردة؛نشم ريحتهم..
شبحت مطيره لخوها وقالت:اشبح هي..!..
لطفي بضحكه:عطيها تشم عطيها...
مدتلها السفنز وقالت؛شمي ياحنه..
خدت وردة السفنز وهي تضحك قالت:سلمك جياب..وخشت بيه داخل..
مطيره:خش وخي خش..
حول من رجليه وقال:شن حال الشامس..
مطيره:الحمد لله في حوش عبدالمطلب يسلم ع بوي..
وخشوا الزوز للكوجينه..
هدرزوا شويه...بعدين طلع من حداهم ومشي لوسط الحوش
اللي كان دافي والكانون في وسطه محطوط عليه براد شاهي..
لكن كان مظلم...فتح الضي ماباش ينفتح...
"راجي بوي اللمبه محروقه"
لطفي :اها..
وقعد يلحق فيها بعيونه وهي تقيم الكرسي حطاته تحت مكان اللمبه وخدت اللمبه مدتهالها وقالت:وانت كبير قدر بوي ترا شدها شويه..
قدملها وشد اللمبه..
وهي قعدت تفك في المحروقه...
وهو يشوفلها....
بنته...اقرب بناته لقلبه..واكبرهم قيمه عنده...اللي سماها اكثر اسم يحبه...سدرة المنتهى...
بعد لحظات من النظر ليها قاللها...
لطفي:قريتي قرايتك..
سدرة بعد فكت اللمبه:ايه بوي من اول ماروحت ماخلتنيش امي نخش كوجينه
لطفي:اني قلتلها معاش تشغليها خلي فردوس تتحرك انتي عندك قرايه..
ضحكت وعطاته اللمبه المحروقه وهو مد الصحيحه ويسمع فيها تقول؛لكن مشيت للمطحن بوي وخدمت شويه..
لطفي:تو نقول ليوسف معاش يخليك تخشي غادي..
هي ركبت اللمبه..ونزلت ومشت بتفتح الضي وهي تقول:مايقدرش..
فتحت الضي..
خشت عليهم اختها الكبيره فردوس:الله ينور عليك ياسديره..
وانطرحت ع الفراش وتغطت بالبطانيه..
لطفي؛علاش طلعتي من الكوجينه..
فردوس:عمتي ماخلتني ندير شي..
جاهم صوت مطيره من الكوجينه
"صايمه وتكذبي ياكذابه"
ضحكت..
حرك لطفي راسه يمين ويسار وطلع من حداهم..
سدرة بعد مابوها طلع مشت خدت مخده وحدفتها ع فردوس وهي تقول؛بايرة..ومشت طلعت..
فردوس بضحكه:الله مخده! صحيتي سدرة..وحطتها تحت راسها ورقدت...
🌻وسدرة خشت للكوجينه وهي تقول..
سدرة؛ندير معاكم حاجه
وردة؛وتي صفرة البسيسة وديري عصير لوز..
مطيره؛وبالله فترشي عليها شاميه البسيسه..
سدرة؛حاضر .
وردة:ايه حقه سدره سلم بنتي قبل لتبدي فيها..
ومشت خدت صونيه فخار مغطيه وقالت..ارفعيها لحوش عمك محمد..
قلب سدرة دق بقوة..ووجهها احمر..
وعمتها وهي طلع في الكفته تشوفلها بإبتسامه..
سدرة:حاضر خل نلبس شاربتي..
ومشت طلعت من حداهم وهي في قمة الخجل...
🌱🌱🌱🌱🌱
"جالي ياجالي"
هادي مغليه واقفه تحت الدروج تنادي في ولدها الاوسط الجالي..
ونزل الجاي من فوق وكل تلات درجات بدرجه..
لين جي منقز قدامها..
مغليه؛يوم من الايام بتتكسرلي ونقعد نعاني فيك..
جالي؛مايصيرلي شي.
مغليه؛اهدا واعقل سلم ولدي..
جالي:باهي يام شن تبي..
مدتله مغليه صونيه مغطيه وقالت؛ارفعها لحوش عمك صبري..
خدت الصونيه وقال؛حاضر...ومشي
طلع برا شاف خوه الكبير...المهدي...مطبس ع السيارة اللي فاتحها من القدام ويشوف ويشوف فيها ..
الجالي؛خيرها..
المهدي وهو مطبس ع السيارة؛نشوف فيها...
الجالي وصل في الباب فتحه لقي قدامه سدره..
الجالي بصوت عالي؛اووو سدرة ..
المهدي فيسع قام راسه انخبط في غطا السيارة..
سدرة بإبتسامه؛شن جو..
الجالي بإبتسامه؛مليح..خشي خشي..
ومشي..
وسدرة خشت...
شافت السيارة ولاحظت شويه من المهدي باين عليها..
وهو مدرق عنها وشاد راسه..
هي بخجل:معليشي تنادي خالتي مغليه..
طلعلها وقال بدون مايشوفلها؛مافيش السلام عليكم..
هي ابتسمت وقالت؛السلام عليكم..
ابتسم ع جنب..
لاحظت انه شاد راسه قالت؛خيره راسك؟
المهدي نزل يده وقال؛حاجه بسيطه..بري خشي خيرك متحشمه اول مرة تجيه الحوش!؟
ضحكت بخجل ومشت وهو غير عيونه وابتسامته ع وجهه ورجع يشوف في السيارة..
وصلت سدرة في الباب الدخلاني ودقت عليه وهي تقول؛خالتي مغليه...
شويه وجتها خديجه اخت المهدي يدوب ابتسمت وهي تقول:اهلا سدرة..
سدرة؛اهلين بيك..تفضلي..
خدت خديجه الصونيه وفتحت وقعدت تشوف..
دارت حركة بشفايفها كأن مش عاجبها..
رفعت سدرة حاجبها وقالت؛جبنالك حاجه ماتحبيهاش!؟
شبحتلها وقالت؛لالا تسلم ايديكم .
ع طلعة مغليه ابتسمت وهي تقول؛سديره بنتي..
سدرة بإبتسامه؛خالتي كيف حالك..
مغليه:الحمدلله...كيف حال امك وخواتك اليوم..
سدرة؛الحمد لله...
خديجه؛جابت هدا...
شبحتلها سدره من فوق لتحت..
مغليه:توا كيف جيت بنبعت الجالي بعد يروح من حوش صبري..راجي شويه..
وخشت مغليه وخشت بعدها خديجه..
وسدره تشبحلها بإزدراء..
ع طلعة نسرين؛سوسو جيتي..
سدرة:شكلك كنتي متنخه..
نسرين بضحكه؛والله ع النوم طول من اول ماروحت..
سدرة؛عارفاتك تنباله زي فردوس..اسمعي الليله بتجوني راهو..
نسرين؛اكيد دورك انتي كلنا عارفين..
ع طلعة مغليه؛هي تفضلي سديرة..
خدت سدرة طاجين وقالت؛عطيك الصحة خالتي..هي بالسلامه..
مغليه؛سلمي ع العويله..
سدرة؛يوصل..
ومشت ونسرين معاها..
نسرين؛امتى بتطلعوا للسوق رمضان بيتم..
سدرة؛ليلة تمانيه وعشرين لما الدنيا ترخص..
نسرين؛حتى اني هكي نفكر..
فاتوا من حدا المهدي ..
نسرين شبحت لسدره ع جنب وهي مبتسمه بخبث.
وسدرة تشبح القدام ووجها احمر..
والمهدي كان مقعمز في السيارة يقرا في قرآن..
حس بيها طالعه بس كان مركز مع القرآن أكثر..
وصلتها نسرين في الباب؛هي تشاويتو توا..
سدرة؛نتلاقوا..
ومشت بطريقها للحوش..وقلبها يفر فران..
وخشت طول ومشت للكوجينه توتي في السفره..
مطيره وهي تشوف في الطاجين اللي بعتاته مغليه فيه من كل شي..
بوريك وبيتزا ومبطن وفطيره..
قالت بإزدراء؛مافيش صنه ومتأكده بعد ناكله مش حنلقى بنه..
وردة بضحكه؛مهما دير مسكينه ماكلتها مافيهاش بنه مش عارفه علاش..
مطيره؛ماهو النيه تخش في كل شي يامريت خوي وهادي نيتها اسود من شعري..ومسحت بيدها ع شعرها..
سدرة وهي تصب في عصر اللوز قالت بقرف؛شعره عمتي تو يطيح في الماكله..
مطيره؛طيح سعدك هداكا شعرك انتي مش شعري اني..
وردة بضحكه؛علاش طيحيلها في سعدها..
مطيره؛ماتخافيش مايطيحش سدرة قل شي عندها ديما واقف الله يبارك..
سدره؛الله يبارك عليا الله يبارك..
ووردة تضحك..
شويه خشت طفله صغير عمرها ست سنوات..
كانت اصغر بنات وردة ولطفي...
غرفه:هيا عاد مازال البسيسه..
مطيره؛مازال يابقرة مازال وانتي موليه زي فوسي حوش عبدالمطلب..
سدرة؛عمتي جايه تعطينا عين وتروح..
مطيره؛نعطيك طريحه ونقصه هاللسان..
وسدرة تضحك..
وردة بضحكه؛مازال شويه ماما بري تفرجي مع بابا لين يأذن المغرب..
غرفه بضجر؛باهي..
ومشت طلعت من حداهم..
مطيرة؛اسمعي شديلها مش باهي ليها السمن فهالعمر..
وردة،نحاول والله نحاول لكن بوها بكل مخربها عليا..
مطيره؛تو نكلمها..
سدرة غطت السفرة بشنتروا كبير..ورفعتها وهي تقول:ياكريم..ومشت طلعت بيها..
وردة؛عطل راجلك..زعمه شده عبدالمطلب ع الفطور..
مطيره بضحكه؛عبد المطلب!..مازال الشمس زرقت من مغربها!؟
ضحكت وردة وقعدت ساكته...
🌱وفي حوش عبدالمطلب اللي كان مجاور حوش خوه لطفي ..
كان واقف في الباب يسقد فالشامس راجل مطيره:كان قعدت فطرت معانا ياراجل...
يقول فيها من غير نيه..
رد عليه الشامس بإبتسامه وهو يقول:مرة تانيه ان شاءالله...هي السلام عليكم..ومشي...
عبدالمطلب؛وعليكم السلام...
وخش داخل وتوجه طول لوسط الحوش..
لقي مرته صفيه تفرش في المفرش وهي تقول؛والله عيب مفروض شديته ع الفطور..
عبدالمطلب:كلمته يامراة كلمته هو مايبيش..
"عزومه مرخيه"
عبدالمطلب؛مرخية شني يابوي شن تبيني نكتفه بش يقعد!؟
قعمز الحاج علي الواعر وهو ينزل في كمامه وقال؛لا كتفنا حني بس..
شدت صفيه ضحكتها ومشت من حداهم..
وعبد المطلب سكت ماقدرش يرد ع بوه..
ع خشة يوسف وحسين وهما يقولوا:السلام عليكم..
ردوا عليهم السلام وعبدالمطلب قال؛عطاكم عمكم اليوميه..
قعمزوا حداهم ويوسف قال:ايه..
ع خشة بنت صغيره من عمر غرفه بنت لطفي ومشت قعمزت حدا جدها...
عبدالمطلب؛اسمعي يابنت من غير لبز زايد ع ماكله ياكولي باهي يانوضي..
البنت كشت في جدها..
علي؛خليك في حالك ياعبدالمطلب ومادخلكش بيها..
والولاد يشبحوا لبوهم بضيق..
وعبدالمطلب في نفسه يقول "عندك حق مش انت اللي تصرف"..
ع جية صفيه بالسفرة ناض يوسف خداها وحطها ع المفرش..
وصفيه قعمزت حداهم...
وفي الحوش اللي مجاورهم..
قعمزوا كلهم مع بعض ع السفرة ..
مطيره وراجلها ولطفي وورده والبنات سدرة وفردوس وغرفه اللي كانت تبي تاكل بأي طريقه بس خايفه من سدرة...
وقدام بمسافه في حوش محمد..
خديجه؛قعمزوا انت وياه خير مانادي المهدي...
تكلم في خوتها الصغار اللي جو ع روس بعض...
عمر ونضال اللي مش مهنين رواحهم. ويبوا ياكلوا قبل الآذان..
ع جية محمد قعمز وهو يقول؛وين الباقي!؟
خديجه؛جايين يابوي...
خش المهدي وهو حاط المنشف ع كتفه وقعمز حدا بوه..
وعمر ونضال لما شافوه ولوا زي الثماتيل..
محمد؛ريتك تلود ع السيارة صارتلها حاجه!؟
المهدي؛لالا مافيها شي نشوف فيها غدوة عندي مشوار لزليطن..
محمد؛ع خاطر بيعة الارض؟
المهدي؛ايه بعدين نهدرزوا ...
محمد هز راسه وقعد ساكت..
شويه وخشوا مغليه و الجالي ووراهم نسرين..
وقعمزوا كلهم مع بعض..
ع سفرة فيها..
بسيسة بالزيت..وتمر..وحليب..وعصير رمان للي مايشربش في الحليب وسفنز بالدحي...
نفسها سفرة حوش لطفي الواعر غير العصير كان عصير لوز..
وهالسفرة كانت ناقصه الحليب في حوش عبدالمطلب ماهو غالي ومعاه السفنز لأنه حاجه زايده ع قولته...وفي مكانه محطوط مية وبس..
اما في الحوش اللي بعد حوشهم بزوز حياش...
في حوش السنفاز صبري...
كانت السفره مشكله...
حليب وتمر وعسلة وزلابيه وسفنز وعصر...
وع السفرة مقعمزين...
صبري ومرته مشتده وبنتهم فايزة..
ماكانتش بنتهم الوحيده في غيرها تلاته ولاد كبار وكلهم متزوجين وبحياشهم..
فايزة؛الله يابوي ع سفنزك الله عطيك الصحه..
صبري بضحكه؛صحتين واربعه عوافي..
مشتده؛هي بسرعه نوضي ارفعي السفرة خل نصلوا بعدين نوتوا العشي..
فايزة؛خل نتهنى بسفنزتي النهارات!؟
ناضت امها وهي تقول؛نوضي منوض نوضي..
ومشت من حداهم..
وهي معاها بعيونها بعدين شبحت لبوها وقالت بصوت منخفض؛بوي!..
صبري؛نعم..
فايزة؛علاش ماخديتش ع امي..
عض ع شاربه تخويفا وهو يضحك..
وفايزة مطرمه شواربها بإستياء...
"بتنوضي ولانجيك"
فزت فيسع من الخوف ورفعت السفره ومشت تجري..
وبوها يضحك عليها...
☘مقابل حوش صبري السنفاز..
حوش الشيخ جويده الهادي....
هو شيخ دين صح..بس اغلب تصرفاته ابعد مايكون ع الدين..
قاعد عايش بعقلية قديمه هلبه بايده من ايام العصمنلي "العثمانين"..
يعني زي وحده من العادات اللي قاعد ماشي بيها...
انه لازم ياكل هو وولاده قبل..
بعدين مرته عتيقه وبنتها عائشه..
هما صح حلو صيامهم مع بعض..
بس وين يجو يحطوا العشي...
يتعشى هو والولاد قبل ويقعدوا عائشه وامها يتفرجوا عليهم ويخدموهم لين يشبعوا...بعدين يقعمزوا يكملوا بعدهم..
#ايه حقيقه..في ناس كانت ماشية بهالعادات ومتمسكه بيها...
بعدوا ماتعشوا عائشه وامها خشوا للكوجينه بش يغسلوا الماعين..
عائشه:امي قلتي لبوي اليوم بنمشي لحوش عمي لطفي..
عتيقه:ايه قتله وقال باهي عارفتيه اني مدا بيه نقعدوا مواصلين حوشين حوش شنيبه وحوش الواعر..
ابتسمت عائشه بفرح وقالت؛مالا خل نكمل بسرعه ونقص البسبوسه وبعدين نصلي ونمشي..
ابتسمت امها وهي تشوف في حماسها وفرحتها بالطلعه...
كملت عائشه كل شي بسرعه البرق...
وطلعت من الكوجينه...توضت وصلت...
بعدين طلعت الجلابيه والشاربه حددتهم وعلقتهم..
ووتت كتاب الجبر وكراسه وحطتهم في الشنطه...
🌻زي مادارت فايزة...
بس فايزة بعد كملت طلعت من دارها تتسحب ومشت لدار المعيشه لقت امها راقده..مشت بسرعه لدار النوع..
ووقفت قدام المرايه..
وخدت الكريمه والبودرة وبدت تحط ع وجهها..
بعدين خدت الكحل وكحلت...وحطت شويه روج...
عجبها منظرها...بعدين شبحت للمكياج..لماته كله وحطاته في جيب سروالها وقالت:خل نجرب ع نسرين..
ساوت شعرها اللي كانت دايراته ذيل حصان..
وطلعت تجري لدارها...وخدت شطنتها..ومنها للكوجينه خدت طاجين الباسطي معاه كيسة عسله وزلابيه..
ومشت بسرعه طلعت من الحوش...
🌱🌱🌱🌱🌱
"مهدي عطلت راهو"..
هادي نسرين واقف فم باب دار المهدي وتراجي فيه بيعطيها حاجه..
شويه وفتح الباب وطلع وهو يقول؛معاش تعطي..ضربها ع راسها وهو يقول..معاش..تعيطي..
هي شدت راسها ووحده من عيونها مغمضات وهي تقول؛باهي...
مدلها ظرف متاع رساله وقال وهو عاقد حواجبه؛خودي..
خداته وقالت؛باهي ماتبي مني شي تاني..
المهدي؛شي تاني زي شنو؟!
نسرين؛نوصللها سلام كلام هكي...
ميل راسه ع جنب مرتين وهو يشوفلها برفعة حاجب..
هي ضحكت وقالت؛هاني ماشيه. ومشت للدروج ونزلت وهي تجري...
وصلت لوطا وفاتت من حدا الصاله اللي فيها امها واختها يهدرزوا..
خديجه؛ريتي هديكا نجمه كيف ردت علينا حصتها قالت معاش ناكلوا فيه اللي يسمع يقول ياكلوا في الكافيار والسوشي!..
مغليه بتهكم:طيح سعدها ومازلها لاقياته في قرارها اللي بعتناه هالشلافطيه الجعانه..
خديجه؛حني اللي طيبين هلبه يام وحده زيها مفروض ماردلينهاش بكل..
مغليه؛خلي يعدي رمضان ع خير وتو تشوفي شن ندير فيها...
🌱🌱🌱🌱
طلعت فايزة من الحوش ...
ومشت بطريقها لحوش لطفي الواعر...
وهي ماشيه شافها ولد جارهم اسمه "أحمد"..
حاط عينه عليها ويبيها بجديات..بس مضايقه تحرر فايزة والتفتح اللي هي عايشه بيه...
فايزة تعرف انه يبيها بس كانت تتجاهل فيه..
قعدت تمشي..وهو يمشي بطريقه للدكان متاعهم ويشوفلها..
وين وصل في الدكان قال بصوت مسموع؛كان غير ربي يهديك وتتحجبي...
هي سرعت مشيتها ومابتش تهتم لكلام..
وهو تنهد من قلبه...بعدين فتح الدكان وخش...
وين قربت توصل لحوش الواعر تلاقت مع عائشه..
فايزة؛عويشه..
عائشه وقفت جنبها وقالت؛شراده شن هدا!؟
فايزة؛بالله عويشه اسكتي الليله بس..
حركت عائشه راسها يمين ويسار وقالت؛ربي يهديك..
وصلوا الزوز في حوش الواعر..
لقوا نسرين كيف وقفت في الباب..
نسرين؛حي شن جبتوا معاكم..
فايزة؛باسطي...
عائشه رفعت الطاجين وقالت؛بسبوسه..
فايزة؛وانتي جايه تهزي هكي!؟
نسرين بغرور مصطنع:اني جايبه معاي مااحلى من الباسطي والبسوسه..
فهموا عليها وضحكوا...
فجأة باب الحوش انفتح وطلع لطفي..
هما تحشموا وقالوا باصوات متقطعه؛كيف حالك عمي لطفي..
لطفي بإبتسامه؛الحمد لله...خشوا بناتي خشوا...
ووسعلهم..
وهما خشوا داخل وهو سكر الباب وتوجه لحوش خوه...
لاقتهم سدرة في الجنان وهي طالعه من باب اللي يرفع للمطحن..
سدرة وهي تشوف للبس فايزة والمكياج قالت تهكما:الوي ياليلى علوي!
ضحكوا نسرين وعيشه..
فايزة؛فكيني منك سدرة..
سدرة؛ماتبي كان جريده خضرا تو ندرس عليه عمي صبري..
قلبت فايزة عيونها..
نسرين؛عندكم حد؟
سدرة وهي تشوف شن جايبين في ايديهم؛عمتي مطيره..شن جايبين في ايديكم..
عائشه بإبتسامه؛درتلك بسبوسه .
سدرة؛صاحبتي انتي والله صاحبتي..
فايزة؛درت باسطي يهبل منفج تنفيجه ماصارتش..
سدره؛بري غادي انتي..
فايزة؛خزي..
سدرة؛وانتي ياسمحه جايه تصفقي بإيديك..!؟
رفعت نسرين حاجبها وهي مبتسمه ابتسامه ثقه وطلعت من جيبها الرساله وطلعتها بالشويه وهي تشوف لسدرة..
فجأة سدرة انطفت ووجهها ولى احمر وقلبها قعد يدق بقوة..
ابتسمت بخجل وقالت؛هاتي..
مدتهولها..خدتها سدرتها وحطتها في جيب الكبوط متاعها وقالت؛هي خشوا..
عائشه؛فاتت البسبوسه..
فايزة؛ولا عبرت الباسطي..
سدره وهي متحشمه؛ريحي روحك انتي وياها..
بدوا نسرين وفايزة يغنوا..
صلح صلوحي..نبيه بروحي..فوق العمارة لابس نظارة..
وعائشه تضحك..
سدرة وهي شادة ضحكتها:خشوا خير مانبدا فيكم..
ضحكوا وخشوا كلهم وهي خشت وراهم وع وجهها ابتسامه خجوله..
كلهم قعدوا مع بعض في الكوجينه..
وتوا القهوة وحطوا من الحلو اللي جابوه ومعاه عسله وزلابيه وتوجهوا لدار سدرة....
قبلها سلموا ع مطيره ووردة اللي كانوا في دار المعيشه..
وخشوا للدار...
مطيرة؛ياوخيتي غلطة مختار كبيره ياوردة وياريته حتى جي واستسمح من بوه حتى اتصال لا..
وردة بحزن:متحشم من اللي داره يامطيره..
مطيره:اللي يتحشم مايديرش هكي في بوه اني مانقولش في الكلام هدا لخوي بش مانغلظش قلبه لكن ولدك هدا عاق بمعنى الكلمه..
وردة بضيق؛بالله ماتزيدها عليا ياوخيتي..راني ام وهو ولدي الوحيد وقلبي متقطع عليه وهو متغرب وبعيد عليا لانعرف كيف عايش لاكيف ياكل ويشرب...هادي تاني رمضان مايحضراش معانا...تاني رمضان..وبدت تبكي وهي تقول..ياريت لطفي خلاه يهاجر وماسكرش راسه هو اللي خلاه يدير هكي هو..
مطيره؛ماهو هي هي ياوردة كان هاجر معاش تشوفيه..
وردة؛كان هاجر يجيني زيارة لكن بعد اللي صار معاش يجي بكل..وزادت في البكي..
صبتلها مطيره ميه وهي تقول؛صلي ع النبي ياوردة خلاص..تو كان يجي لطفي يشوفك هكي تصير مشكله..
ومدلها طاسه الميه..
خدتها وردة وهي تقول؛اللهم صل على محمد..وشربت منها...
ومطيره تشوفلها وهي خايفه عليها تصيرلها حاجه من الحزن ع فراق ولدها مختار......
🌻🌻🌻🌻🌻🌻🌻🌻🌻🌻🌻🌻🌻🌻🌻🌻🌻
المهدي مواليد 1974....يقرا في كلية العلوم قسم احصاء..
سدرة وعائشه وفايزة ونسرين...مواليد 1979...شهادة ثانويه..
فردوس مواليد 1978 مسيبه قرايتها من الاعدادي..
غرفه مواليد 1990..
يوسف 1979 ....
حسين والجالي مواليد 1984...
عمر مواليد 1989..
نضال1990....
خديجه مواليد 1977...خريجة لغة عربيه...
هادي مواليد اهم الشخصيات فالروايه والباقي تعرفوهم خلال سرد الروايه بإذن الله اللي حتبدا ان شاء الله الأسبوع القادم....
