#طوبى "جنة طوبى"
#جمان_فريد
#الجزء_السابع_والستين"مقاومه"
《أحداث هذه الرواية تبدأ من سنه 1996 وتنتهي سنة 2022 ومعظمها حقيقيه》
لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها
وصلوا على الحبيب🌼
#الإستغفار
عن شَدَّاد بْن أَوْسٍ رَضِيَ اللَّهُ عَنْهُ عَنْ النَّبِيِّ صَلَّى اللَّهُ عَلَيْهِ وَسَلَّمَ قال : ( سَيِّدُ الِاسْتِغْفَارِ أَنْ تَقُولَ : اللَّهُمَّ أَنْتَ رَبِّي لَا إِلَهَ إِلَّا أَنْتَ خَلَقْتَنِي وَأَنَا عَبْدُكَ وَأَنَا عَلَى عَهْدِكَ وَوَعْدِكَ مَا اسْتَطَعْتُ ، أَعُوذُ بِكَ مِنْ شَرِّ مَا صَنَعْتُ ، أَبُوءُ لَكَ بِنِعْمَتِكَ عَلَيَّ وَأَبُوءُ لَكَ بِذَنْبِي فَاغْفِرْ لِي فَإِنَّهُ لَا يَغْفِرُ الذُّنُوبَ إِلَّا أَنْتَ ) ، قَالَ : ( وَمَنْ قَالَهَا مِنْ النَّهَارِ مُوقِنًا بِهَا فَمَاتَ مِنْ يَوْمِهِ قَبْلَ أَنْ يُمْسِيَ فَهُوَ مِنْ أَهْلِ الْجَنَّةِ ، وَمَنْ قَالَهَا مِنْ اللَّيْلِ وَهُوَ مُوقِنٌ بِهَا فَمَاتَ قَبْلَ أَنْ يُصْبِحَ فَهُوَ مِنْ أَهْلِ الْجَنَّةِ ) رواه البخاري
🌿🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 غادرتني نفسي الّتي كُنت أعرفها بالأمس، كانت لحظة واحدة هي الفيصل، لم أعد أنا، أخرجت ما بجعبتي من أسرار وبعثرتها في السّماء، أخبرتُ الله بكلّ شيء، طلبت منه أن يشفي جرح قلبي، ويجعلني قويّة لأتحمّل ما أنزله بي من قضاء.🍃
حنان لاشين
___________________________________________
مقعمز في حجرة فاضيه يستنى في صديقه اللي جاي يزوره ويطمن عليه..
ينفتح باب الحجره ويخش صديقه ومعاه واحد شاد ذراعه..
طلقه ومشي طلع..
وناض لصاحبه ومشاله خداه بالأحضان..
اسكندر:عبروف..
عبد الرؤوف بإبتسامه؛اسكندر الكبير..ولانقولك يا..
وخر وحط يده ع فمه وهو يقول:نجبدلك لسانك!
قعد يضحك عبد الرؤوف..
واسكندر بدت تبان ع وجهه ملامح الصدمه الغضب لما ركز في وجه صاحبه..بعد يده عن فمه وشد ذقنه وهو يتفحص في اثار الضرب الواضحه..
نزله عبد الرؤوف يده وقال؛خفيف ع الماشي..
اسكندر بغضب؛والله مافايته هكي..
عبد الرؤوف؛صارت مرة وحده بس..
اسكندر وهو معصب؛باهي تعالي قعمز واحكيلي..
مشوا قعمزوا وعبد الرؤوف يقول؛بعد ماجابوني من المقر لهني في نفس الليله طلعوني وغطولي عيوني ورفعوني لمكان وطاحوا فيا في ضرب واني تجيني الضربه وتلحقها اختها ومش عارف من وين ولامن اللي يضرب..
واسكندر يسمعله وغضبه يزيد..
عبد الرؤوف:لكن لاحظتهم يضربوا بعقل مش وين مايجي..
اسكندر بإستغراب؛علاش؟
عبد الرؤوف وهو يفكر:مش عارف بالزبط..بس اللي وصلتله ان اللي دار فيا هكي يبي يوصل لحاجه يبي مني حاجه..
اسكندر:حتى اني فكرت ف الحاجه هادي..باهي ماجي في بالك حد.
شبح عبد الرؤوف لصاحبه لحظات وهو ساكت بعدين حرك راسه بالنفي وقال؛لا..
اسكندر حس ان يكذب عليه لغرض ما بنفسه لهدا ماباش يصر عليه..
غير عبد الرؤوف الموضوع طول وهو يقول:تلاقيت انت وحسين؟
اسكندر:امس كنت معاه في حوش نساباتك..
عبد الرؤوف:الامور تمام؟
اسكندر:تمام التمام ماتخممش..حتى فلوس المحلات خديتهم وعطيتهم لحسين يوصلهم لعيالك..
عبد الرؤوف؛قدر اسكندر بارك الله فيك..
اسكندر:عيب ياراجل مش بيناتنا الدوة هادي رانا خوت..
عبد الرؤوف بإبتسامه؛واكثر..
هز اسكندر راسه وهو مبتسم بعدين قال؛امتى تبي اختك وراجلها يعرفوا..راجلها لو خش في الموضوع متأكد حيدير حل..
عبد الرؤوف؛هما بيقعدوا برا اسبوعين..واهو فات اسبوع وماصارلنا شي خل يفوت التاني ويروحوا بعدين يصير خير..
اسكندر رفع حواجبه ونزلهم وهو يقول..
ع راحتك..
🍃🍃🍃🍃🍃
واخته في هالوقت..
كانت في سويسرا مع راجلها..
في المركز اللي قاعده فيه سدره..
واقفين ع الشباك متاع الحجره اللي راقده فيها وهما يشبحولها بألم..
نبيله ودموعها ينزلوا؛توجع القلب مش مصدقه اني قاعده نشوف فيها وهي ف هالحاله..ليها شهور راقده الرقده هادي مش حاسه بشي ولاتندري ع شي..
المحجوب بحزن؛غيبوبه..
مسحت دموعها وقالت؛ قولي الحق محجوب في أمل تنوض منها؟
المحجوب:الامل في الله يانبيله في نظرنا حني الامل ضعيف لكن على ربك مافي شي مستحيل..
نبيله؛تعرف لو بعد هدا كله لاقدر الله يصيبها المكروه خواتها وبوهم الله اعلم شن يصير فيهم..
المحجوب؛الله لايقدر..اني الحق كلام الدكاترة هني خلاني متأمل..قالوا انهم دارولها اختبارات بينت انها قاعده تستجيب للتأثيرات الخارجيه اي كلام تسمعه يخص حياتها وذكرياتها قاعد يحفز في دماغها ويزيد في نشاطه..
نبيله بملامح استبشار:شكله يوسف يهدرز عليها هلبه..
المحجوب بضحكه؛مايبطلش يروح من الخدمه يجيها طول..
نبيله؛سبحان ربي اللي ياخد ويعطي في نفس الوقت..
عوضها بيوسف اللي سيب كل شي ع خاطرها بش يقعد معاها..
المحجوب هز راسه وهو مبتسم..
نبيله بضحكه؛استاحشت المبروك..
المججوب:ايااه عاد..مش قلنا نغاروا..
قعدت نبيله تضحك..
وهو يتأمل فيها بإبتسامه حب...
🍃🍃🍃🍃🍃
وفي اللي فاقد وجود السند من البشر في حياته..
مش لأن اقرب الناس تخلوا عنه بالعكس..اقرب الناس ليه يفدوه بأرواحهم لو حكم الأمر..
بل لأن هو مايبيش يشوف الناس اللي يحبهم يتوجعوا ع خاطره..
النوعيه هادي من البشر تلقوهم مستعدين يحملوا جبال من الهموم برواحهم ولايتحملوا يشوفوا نظرة وجع في عيون حد يحبوه بسببهم...
🍃وهادي طوبى..
اللي قاعده تقاوم وتحاول ماتحسس حتى جنينها اللي ساكن فيها بالاوجاع والاحزان اللي قاعده تمر بيها..
مقعمزه في الكليه بعد ماكملت امتحانها حاطه في وذانها السماعات وتسمع في القرآن بصوت القارئ المفضل عندها..
احمد العجمي..
كانت خاشعه تسمع في الايات بقلبها وعقلها...
ايات السورة هادي عجيبه...لما يقراها المهموم والمحزون يحس ان الله عز وجل يخاطب فيه مباشره..
¤ولئن أذقنا الإنسان منا رحمة ثم نزعناها منه إنه ليؤس كفور¤
مرينا بيها المواقف هادي..مرينا بالابتلاءات اللي خلتنا بعد ماعشنا في نعمه وراحه وتعرضنا لأول امتحان في حياتنا..
يأسنا..قنطنا من الرحمه..كفرنا بالنعمه..سخطنا ع القدر..
وطوبى خافت تكون من الناس هادي..
وتجيها الايه اللي بعدها..
¤ولئن أذقناه نعماء بعد ضراء مسته ليقولن ذهب السيئات عني إنه لفرح فخور¤
وحتى هالحاله مرينا بيها بعد يرفع علينا ربي المصيبه ويبدل حالنا من الشده للرخاء نفرحوا ونقولوا غمه وانزاحت وننسوا نقولوا الحمد لله الذي اذهب عنا الحزن...جحود ونكران.
وحتى النوعيه هادي من الناس خافت طوبى تكون منهم..
وحني البشر اغلبنا بين الساخط والجاحد بس من اللي يسلم ويكون في دائرة الاستثناء؟
وتجي الآيه اللي بعدها بالجواب اللي خلا طوبى تحس بشعور غريب لكن كان حلو بالمرة..
¤إلا الذين صبروا وعملوا الصالحات أولئك لهم مغفرة وأجر كبير¤
الايه هادي خشت لقلبها ودارت فيه تأثير عجيب.
شعور ان ربي يخاطب فيها هي شخصيا خلاها تحس ان معاها وقريب عليها وساندها..
ويقوللها...صبرك واستقامتك واعمالك الصالحه دارت حوالين قلبك حاجز يمنعه يكون جاحد اوساخط...
مخليك ديما صابرة ومحتسبه ومسلمه ومستسلمه للقضاء ومستعينه بالله عليه...
وحيكون اخر صبرك واحتسابك غفران عظيم واجر كبير..
اصبري..اصبري واحتسبي الدنيا عمرها ماكانت دار راحه ونعيم...
لقت دموعها تلقائيا قاعده تنزل..
مسحتها وهي تقول بهمس.
لاإله إلا الله...
وقعدت تسمع في باقي السورة اللي كل آيه فيها قاعده تعلم فيها درس وتخفف عنها وتقويها في نفس الوقت..
بس اكثر الايات اللي ركزت عليهم في السورة.
وتكرر موضوعهم اربعه مرات كانوا يتكلموا عن الاستغفار...
الأولى..كانت الآيه رقم تلاته...
¤وأن استغفروا ربكم ثم توبوا إليه يمتعكم متاعا حسنا إلى أجل مسمى ويؤت كل ذي فضل فضله¤
الثانيه...كانت الآيه رقم اثنان وخمسين
¤وياقوم استغفروا ربكم ثم توبوا إليه يرسل السماء عليكم مدرارا ويزدكم قوة إلى قوتكم ¤
الثالثه...الآيه رقم واحد وستين..
¤فأستغفروه ثم توبوا إليه إن ربي قريب مجيب¤
والرابعه..الآيه تسعين
¤استغفروا ربكم ثم توبوا إليه إن ربي رحيم ودود¤
طوبى لما ركزت ع الآيات هادي بقلبها لأول مرة..
فهمت ان الاستغفار هو ذخيره كل العبادات اللي تكون اسلحه للانسان المؤمن بش يقاوم بيها شدائد الحياة وامتحاناتها الصعبه..
ذخيره للدعاء..والذكر..وللصلاه...وحتى قراية القرآن وتدبره والعمل بيه...
الاستغفار يزيل اكبر عائق بين الدعاء والاستجابه..
بين الذكر والالتزام بيه..بين الصلاة والخشوع فيها..
بين القرآن ومصاحبته وترك هجرانه..
بينك وبين الحياة الطيبه..
بينك وبين رزقك..
بينك وبين الهدايه...
بينك وبين حب الله ليك..
اكبر عائق اللي هو الذنوب...
☘هني طوبى حست ان السورة عطتها اهم مفتاح لكل الابواب المسكرة....
انختمت السورة بأخر آيه فيها بصوت احمد العجمي..
آية اختصرت كل شي..
¤ولله غيب السماوات والأرض وإليه يرجع الأمر كله فأعبده وتوكل عليه وماربك بغافل عما تعملون¤
ومعاش سمعت بعدها شي لأن السورة تمت..
لكنها قعدت سرحانه وتفكر في اخر آيه هلبه...
ويقطع عليها سرحانها صوت وحده من صاحباتها وهي تقول..
بيبو...
شبحتلها طوبى ورسمت ع وجهها ابتسامة مجامله وقالت:جاوبتي؟
قعمزت جنبها وقالت؛عكيت شويه انتي شن درتي في امتحانك..
طوبى:الحمد لله جاوبت..
تنهدت البنت وقالت؛عبير اليوم ماعندها شي؟
طوبى؛لاامتحان لامحاضرات..
؛اممم..بيبو..
طوبى:حسيت في فمك كلام قولي..
هي ضحكت بعدين قالت:ايه صح..بنسألك قبل شن صار بين عبير وجاركم؟
طوبى؛ماصار شي كل حد في حاله..
:قصدك مايصيرش منهم؟
طوبى:ايه..
:وعبير شني..حسيتها عاجبها الموضوع وتبيه..
طوبى:اهو تحاول تتقبل كم يوم وتنسى..
:يعني خلاص مافيش امل..
طوبى:لاخلاص.. بعدين ضيقت عيونها وقالت..لكن علاش تسألي؟
:ياستي تتفكري فيه ولدي عمي اللي جاني قبل للكليه..
طوبى بإنتباه:ايه خيره؟
:عاجباته ويبيها رسمي..
طوبى بضحكه فرح؛بالله! تي حني نحسابوه ليك انتي وقتها!
هي بضحكه؛لالا زي خوي بالزبط يومها لما جاني عطاني حاجه نوصلها لخوي وشوره ياحنه شافها وعجباته..تلاقينا بعدها بفتره في حوش جدي سألني عليها..بعدين برا برا برا..تلاقينا في حوشهم وقالي صاحبتك عاجبتني وسألت عليها ونبيها رسمي افتحي معاها الموضوع وين جيت بنفتحه معاها لقيت قصة التارقي انفتحت مرة تانيه سكتت ماقدرتش نحكي وهو قعدت نتهرب منه ماقدرتش نقوله بش ماينكسرش خاطره قدامي مانحبش نكسر بخاطر حد..بس بعدين قلت خل نسأل اليوم ونتأكد كان مافيش امل بكل نقوله والله غالب خير مايقعد معلق هكي..
طوبى؛باهي اللي سألتي قبل وماتصرفتيش من راسك اليوم اتصلي بيها وقوليلها..
:كيف قصدك بتقول باهي طول محلها نست جاركم؟!
طوبى؛انتي لو تقوليلها ع ولد عمك تفقد الذاكرة بكل نبصملك بالعشرة عبير ونعرفها..
:كيف قصدك بتنساه بولد عمي لالا طوبى مانرضهاش فيه.
طوبى:بلاعبط..تو اني نفكر هكي!؟ ياهبله عبير مشاعرها اتجاه ولد جيرانا عاديه مشاعر اعجاب وفيسع يمشوا اني اللي نعرفها..
؛كيف كانت تقول نحبه!؟
طوبى:هي تحساب روحها تحبه..وهو مجرد اعجاب لاأكثر..انتي اسمعي مني وكلميها جسي نبضها وشوفيها كان لقيتي مايشجعك تفتحي موضوع ولد عمك طول افتحيه معاها..
؛هكي تقولي!؟
طوبى:ايه ماتتردديش وان شاء الله يصير منهم..
:ان شاء الله..ان شاء الله خير..
تنهدت بعدين قالت..شن جو الببو..
ابتسمت وهي تقول؛الحمد لله..مرضيه من قبل ماتجي مش متعبتني بكل..
:نتخيل فيها تجي زيك غير محنطشه وزغنونه..
ضحكت طوبى وقلبها يدق بشوق وهي تتخيل فيها..
ودقات قلب طوبى الغير معتاده تسمع فيهم جنه وياريت دقات القلب هادي تفهمها وتعرف قداش امها مشتاقتلها وتراجي في جيتها بفارغ الصبر رغم كل الظروف بش تحلي بوجودها مر الحياة...
🍃🍃🍃🍃🍃
الساعه 12:30قبل الظهر..
وقت انصراف الطالبات من المدرسه..
بعد زواج نجاح...سجلت راما في باص يرفعها للمدرسه ويروح بيها..
وهالباص كانت معاها فيه زميلتها اسماء وصاحباتها..
هالباص جي بش يروح بيهم..
خش الغفير وخبرهم انه جي..
هما طول مشوا طلعوا..
طلعتهم كانت مع جية صفاء بش تروح هي وخواتها..
شافت راما طالعه مع اسماء وركزت ع وشاحها اللي كانت موخراته من القدام وشعرها باين..
هدا غير مكياج العيون اللي كان واضح لأي حد يشوفه..
طلعوا مروة وتاله لقوها تشوفلهم..
مروة بضيق؛شفتي؟
صفاء شبحتلها وقالت؛عادي ديروا مكياج في المدرسه!؟
مروة:اكيد لا..داروه توا قبل ليطلعوا..
صفاء بصدمه؛نهاري حني اللي نقروا في الثانوي مادرناه هالعبيتر!..
مروة وهي مضايقه؛بري صفاء بري..
ومشت صفاء مع خواتها وبدت تنصح وتحذر من تصرفات اسماء وصاحباتها مهما كانوا خواتها متربيات تربيه حسنه مافي شي يضمن انهم ماينجروش ورا الغلط ويديروه وهي صاحبة تجربه ياما تعلمت منها..
🍃بس راما مافيش من يراقب تصرفاتها او يدور وراها..
عواطف من يوم اللي صار بينها وبين خوها ع خاطرها خدت عهد ع روحها معاش تدخل فيها..
ونجاح تزوجت وانشغلت بحياتها...
واشرف مش ديما موجود...
والام في وادي والاب في وادي..ولافي خالة دور..ولاخوال معدلين..
وهكي تهيئتلها كل الاسباب اللي تخليها طيح في الغلط وتنجر للإنحراف...
🍃وهما مروحات في الباص كانوا مقعمزات في الخلف.
وفي سيارة لاحقتهم صاحبها ليه علاقه بأسماء..
مرة مرة يتلفتوا ويشبحوا فيه..
وهو يبعتلها في الرسائل..وهي توري لراما..
راما وهي مصدومه؛حي عليك شن الكلام هدا!؟
اسماء بضحكه؛صايع لكن يهبل..امس سجلتله المكالمه متاعه اسمعي صوته كيف يتكلم..
وحطتلها التليفون في وذنها..
وقعدت راما تسمع في محتوى المكالمه اللي انقال فيه كلام يكاد يكون اباحي..
بس كان ينقال بلحن حلو واسلوب جذاب بش يبان لطيف وتختفي قباحته..
بعدت اسماء التليفون وقالت؛يجنن ولا؟
راما وهي مشتته؛ايه..لكن كيف عادي عندك يقول كلام زي هدا!؟
اسماء؛عادي كلام بس وبعدين هدا حبيبي ياهبله هكي يكون الكلام بين اي زوز يحبوا بعض كله رومانسيه..
راما سكتت وهي تفكر فكلامها..
واسماء تكتب في رساله ترد بيها ع اللي تكلم فيه..
لما خلاص قربت راما توصل..
مسحت مكياج عيونها ولبست وشاحها كويس..
اسماء؛تلحلحي اها..
راما بضحكه؛باهي..باي..
ونزلت من الباص..
مشي الباص..وهي مشت بتخش..
شافت محمد واقف ع صاحبه يهدرز معاه..
تنهدت وهي مبتسمه بإعجاب بعدين مشت خشت للحوش..
🍃🍃🍃🍃
وفي مكان بعيد طرابلس بمسافه لاباس بيها..
وسط طبيعه حلوة كلها خضراء..
عشب..شجر..النوار الاصفر في كل جهه..
والخيمه متاعهم منصوبه..
والشوايه حداها..
بعد كملوا تجهيزات المكان..
جاب محمود الخروف متاع الزردة بش بيذ.ب.حوه
لكن اللي هدا وخر ودف مهمه الذب.ح للتاني..
عبد القيوم؛بلابيل ماتصلحوا لحاجه..
جيبه يامحمود جيبه..
وخدي عبد القيوم المواس وقعد يسن فالمواس
ومحمود قربله الخروف
وهما واقفين حداهم يشوفولهم
ربيع:وحش ياعبدو
نضال؛علاش الكذب مانعرفش نذ..بح الحق
عمر:ولااني..
عبد القيوم وهو يسن في المواس؛وانت ياسي مهدي!؟
المهدي وهو حاط ايديه في جيوبه؛اني راجل مريض قلب مانتحملش شوفة الد..م
ضحكوا..
عبد القيوم برفعة حاجب:حلال بعد نذ.بحه نصبغ وجهك بد.مه..
نضال بضحكه؛مغولي..
عمر بإبتسامه؛كان الجالي هني راهو هو اللي ذب.ح ديما عابيين عليه هو في الحاجه هادي..
ربيع قعد يراقب في ردة فعل عبد القيوم..
وعبد القيوم لوح الشيته اللي كان يسن عليها حداه وقال؛اقرب يامحمود..
محمود قربله الخروف.. عبد القيوم طبس ونزله لوطا وشده محمود كويس..
وقال عبد القيوم للخروف قبل ليذ..بحه..عرب واجده متمنيهم مكانك..وذ..بحه
وربيع فهم قصده وقعد يضحك..
نضال:شكلك من جماعة العلم الاسود..
وقف ع حيله وقال؛تعال عاوني خير مانلحقك بيه..
ضحك نضال وجاه وقعد يعاون فيه هو ومحمود..
عبد القيوم؛هيا شباب كل يشقى بمهمته..
ربيع؛تمام افندم...
ومشي المهدي استلم الشوايه...
وربيع مشي يوتي في تتبيلة الشوا..
وعمر بيبدا تطييب المكرونه ع الحطب..
🍃🍃🍃🍃🍃
الساعه 1:30ظهرا..
روحت اريج بأمها ومطيرة وصفيه وكان معاهم معتز من السوق وهما واخدين كل مايبوا من بضاعة "البسيسه"
ع جية حسين اللي كان عند اسكندر...
خشوا فردوس ومطيره للحوش..
لقوا اميمه وغرفه مقعمزات يتفرجوا ع مسلسل في التلفزيون..
غرفه؛هاه شريتوا كل شي..
قعمزت فردوس ومدت رجليها هي تشوف لعمتها بربع عين وتقول؛بعد مارجلينا طاحوا..
مطيره؛المهم خدينا حاجه باهيه..
وهما يمرروا في عيونهم عليهم ويضحكوا..
🍃برا..
حدا الكوجينه..
صفيه؛باهي الحمد لله المهم كويس ومافيه شي..
حسين وهو مقعمز؛الحمد لله..بالله يام قبل لتخشيلهم داخل ديريلي حاجه ناكلها ميت جوع..
صفيه؛باهي باهي..ومشت خشت داخل..
وخلت حسين سرح بتفكيره في حال نسيب عمه..
شويه سمع سيارة درست قدام الباب..
شبحله..
شويه وفتحاته الاء...بعدين ولت لسيارتها..
خشت بيها داخل..ورجعت نزلت سكرت الباب..
وطوبى نزلت من السيارة وفي يدها كياس مشت خشت بيهم داخل..
والاء بعد ولت للسيارة نزلت منها حاجات حتى هي ومشت خشت للحوش..
هو تنهد بضيق..ورجع سرح بتفكيره مرة تانيه..
لين قطعت عليه خطيبته وهي تتصل..
طلع التليفون من جيبه..وين شافها هي المتصله..
فتح الخط ورد..
حسين؛ايوه؟
"ياهلا..شن الاخبار"
حسين؛ماشيه انتي شن جوك
"تمام الحمد لله..شن حال عمي وعمتي وباقي العيله"
حسين؛كلهم كويسين الحمد لله..
"اميمه اجازة اليوم سعدودها.."
حسين؛بعدين جايك بنروح بيك..
"شكله خوي اتصل بيك"
حسين؛ايه قالي عنده طلعه برا طرابلس..
🍃🍃🍃
داخل..
طوبى:قداش بديروا الكميه كبيره هلبه بتعبكم..
مطيره؛نتعاونوا عليها نكملوا فيسع..
طوبى بإبتسامه؛باهي ربي يعاونكم..
ومشت بإتجاه الدار..
آلاء؛المهم الكوجينه اللي برا مانعرف حد يخشلها..
مطيره؛غير نقرشي..حوسه البسيسه كلها فيها هي عندك الكوجينه هادي لبزي فيها لين تشبعي..
الاء؛خلاص مانعرفكش بعدين تعلقي ع الفوضى باهي..
مطيره؛تعودت بيك ماديريش حاجه كامله طالعه لخالتك غرفه..
غرفه فنصت وقالت؛عمتي!
مطيره؛ماكذبتش..
وهما حداها يضحكوا..
🍃في الدار..
طوبى خدت حوايجها وخشت للحمام..
واريج بعد مابدلت وصلت..
طلعت من الدار وهي تتصل بنضال وتعاود ويطلع خارج التغطيه والقلق بدي يسيطر عليها..
🍃لحظات..
وطوبى طلعت من الحمام وهي لابسه قفطان حوش لونه زهري وعليه ورد مرسوم بألوان زاهيه..وكان نص كم وطوله لتحت الركبه..
لامه شعرها فوق بعبث واثار مية الوضوء قاعد عليها..
وصلت في الدار وخشتلها بش تصلي..
🍃🍃🍃🍃🍃
وقدام امواج البحر المتلاطمه.."الكورنيش"
كانت نجاه مقعمزة تتفرج عليه..
بعيون غاضبه..حاقده...الدموع تنزل منهم زي السيل..
كانت تفكر كيف تبرد شويه من النار اللي قاعده تاكل فيها من داخل..
كيف بتحرق قلب الجالي..وكيف بتقهر طوبى زي ماهي مقهورة وتخليها تبكي زي ماهي تبكي..
وبعد تفكير دام ساعة ونص..
بدت بتنفيذ...
مسحت دموعها..وقامت تليفونها..
وكانت مسبقا حاطه ع رقم طوبى..
بعد مافتحت الشاشه..طول..
اتصلت بيها..
🍃لما رن تليفون طوبى..
كانت كيف مكمله صلاه..
ناضت ومشت لشنطتها اللي كانت محطوطه ع السرير..
خدتها وفتحتها وطلعت التليفون..
حطت الشنطه..
وشافت للتليفون..
المتصل كان..
نجاه..
هي لما شافت اسمها..قلبها انقبض..خافت..خافت هلبه..
لكنها قعد تخمد في هالخوف وتحاول تتشجع..
بعدين قالت من وسط قلبها..
"حسبي الله..ونعم الوكيل"
وفتحت الخط...وحطت ع التليفون ع وذنها وقالت ببرود مقصود...
اهلا نجاة عاش من سمع صوتك..
🍃نجاة غمضت عيونها بغضب بعدين فتحتهم وقالت..
انتي شني انتي قوليلي.
هبله..غبيه..دوريشه..
حيط عديمة احساس!
معقول ياغبيه ياساذجه هدا كله ومافهمتيش.
هدا كله وماحستيش يابليده ان راجلك مش معاك ومش ليك وقلبه مع غيرك..ماحستيش انه مايحبكش ويعامل فيك معاملة الخدامه اللي مايقدرش يستغنى عنها.!.
تعرفي ياهبله علاش الجالي خداك من اصله..مش حبا فيك راهو..الجالي مجبور عليك جبر..اخته خديجه لما عرفت انه يحبني ويبيني دارت كل شي بش تفرق بينا..
هدداته ببوه وخلاته غصب عنه ياخدك...
الجالي اول زواج انتي وياه خلاك لين رقدتي وجاني لشقتي وقعد معاي للصبح وانتي خلاك ملوحه بروحك في الفندق زي الكلبه..
