(مش مسامحه أي وحده تقرا وماتتفاعلش) #طوبى "أقحوان وفلة وياسمينه" #جمان_فريد #الجزء_الخمسون"الماجده4" 《معظم أحداث هذه الرواية حقيقيه》 لو فاتتكم صلاة او خش عليكم وقت صلاة صلوا قبل بعدين اقروا...الصلاة قبل كل شي وكل شي يجي بعدها وصلوا على الحبيب🌼 #تاج_الذكر لاإله إله إلا الله وحده لاشريك له له الملك وله الحمد بيده الخير وهو على كل شيء قدير🌸 🚫🚫ملاحظه🚫🚫 اي تعليق عنصري حيتم حظر صاحبه اي تعليق فيه سخريه ع ثقافه الطوارق حيتم حظر صاحبه واني هني نكتب في الحوارات باللغه الامازيغيه التارقيه لأعزائي التوارق مش لغيرهم احتراما ليهم وحبا لثقافتهم نتمنى تكونوا قريتوا هالملاحظه كويس..وشكرا ع تعاونكم مسبق🌸 ☕☕☕☕☕☕☕☕☕☕☕☕☕☕☕☕☕ في الطريق... الجالي وهو يشبح لمعاذ من المرايه؛قداش ليه حرارته من مرتفعه؟ نجاة:من بعد الظهر.. الجالي:كيف هكي يانجاة معقوله تخليه هكي الوقت هدا كله؟ طوبى تسمع فيهم وهي تشوف للطريق بتوتر.. نجاة:تعرفني نخاف ع الصغار من الدكاترة والادويه بالذات في عمر معاذ يهلكوهم بالمضاد الحيوي.. الجالي:حولي من دماغك الدوة الفاضيه اهم خوته ياما مشوا مستشفيات وخدوا دواء شن صارلهم.. طوبى:هدي شويه جالي هي بروحها متوترة.. هو استاقظ وتفكر ان طوبى معاهم.... نجاة:هو المتوتر مش اني..نعرفه لما يعصب زياده عن اللزوم.. هو شبح لطوبى.. لقاها تشبح للطريق وحواجبها معقودة.. شبح القدام وقال:ليك عام معاي في الخدمه حفظتي طبعي.. نجاة ابتسمت تهكما وقالت:ايه هدا علاش ان الهاتف اللي جاك في اجتماع اليوم نرفزك هلبه.. رفعت طوبى حواجبها.. الجالي شافلها ورجع شاف للطريق وهو يقول في نفسه.. "حلال فيها نزلها من السيارة وهي وتمشي المتخلفه هادي" طوبى:ليك عام تخدمي في الشركه اللي يديرها الجالي؟ نجاة ابتسمت بغيظ وقالت:ايه حبيبتي.. طوبى:انت اقدم واكثر خبرة زي ماواضح بس الباين الابداع يتعدا الخبرة هدا علاش الجالي مدير الشركه.. ابتسم الجالي.. نجاة:اني وقفت ست سنوات..لولا هكي ماكانش طلعله معاي. طوبى:علاش وقفتي؟ نجاة تبي تغيظ الجالي:الله يرحمه طاهر كان مغيار.. ونجحت في مبتغاها..انغاط وشد الدومان بإيديه الزوز بعدين نزل وحده... ابتسمت بمكر.. وهو شبحلها بحده من المرايه.. طوبى وهي تشوف القدام:امم..عنده الحق انتي جميله وهو الباين كان يحبك هلبه.. الجالي كان ينضغط ع اعصابه بقوة.. ونجاة تقول في نفسها.. "زيدي ياهبلة احرقيه زيدي واني نحرقك" نجاة بضحكه:شكله الجالي مايحبكش ياطوبى اللي مخليك تقري وتطلعي وتخشي.. الجالي:ترا صلي ع النبي نجاه! طوبى بضحكه:خيرك شن قالت.سؤالها منطقي وتو نجاوبها عليه...هو زي ماباين يحبني ومع الحب في ثقه هدا علاش مش مسكر عليا.. الجالي عقد حواجبه وهو يفكر في كلام طوبى.. اما نجاة أنقلب سحرها عليها وقالت وهي تسحن:شن قصدك؟ طوبى بإبتسامه:قصدي ان طاهر الله يرحمه عقليته الباين كانت صعبه شويه.. الجالي:صح تفكيره كان قديم شويه.. اهوا وصلنا... وخشوا لعياده بعيده عن المنطقه شويه.. درس الجالي وقال؛هي انزلوا.. نزلت نجاة بولدها وهي معصبه.. سبقتهم وهي تمشي بعصبيه.. والجالي وطوبى وراها.. طوبى كانت تمشي بهدوء عكس اللي صاير داخلها.. اما هو كان يمشي ويسرق في النظر لنجاة.. وخشوا التلاته داخل العياده.. 🍃ومن عواصف الخفاء.. للعاصفة الهوجاء اللي صايرة في العلن وعلى مرئ ومسمع هلبه عيون وأذان.. المهدي بدون وعي منه جي لعبد المطلب وضربه بقبضة يده ضربة قويه جدا طيحاته مرة تانيه.. وجاي بيكمل عليه شده عبد القيوم وهويقول:مش هك يامهدي مش هك.. مطيرة وهي تنهض في سدرة:سدرة بنتي! سدرة وقفت ع حيلها وهي تقول:امي امي.. ع نزلة فايزة وهي لابسة ملامة الصلاة . جتهم تجري وصلت في صفيه وقعدت تنهض فيها وهي تقول؛نوضي معاي خالتي... 🍃واللي صار كانت اصواته عاليه انسمع في حوش شنيبه.. اللي فيه قعدوا يتفرجوا من الرواشن.. ماعدا عائشه واميمه اللي طلعوا يجروا.. اميمه فتحت الباب الخارجي وطلعت تجري لأمها.. اما عائشه نسرين خديجه ومعاهم عواطف كانوا واقفات يتفرجوا ومعاهم الصغار.. اميمه وصلت في امها بعد مانهضتها فايزة.. شدت وجهها وقالت ودموعها ينزلوا وهي مصدومه:ماما ش صار علاش دار فيك هكي!؟ هو ناض وشد وجهه وقعد يقول:امك خنابه..خنبت فلوسي الخنابه.. اميمه شبحتله وصدمتها زادت كبرت.. عبد المطلب ووجهه ينزف:ياطلع فلوسي يانحبسها.. اميمه بصوت عالي:اسكت خلاص اسكت.. عبدالمطلب: تعيطي في وجهه بابنت الكلبه..اصلا انتي زيك زيها مرات تطلعي خانبتيهم انتي وياها.. المهدي فك روحه من عبد القيوم وهو يقول بغضب:تي خش داخل ياسر من العار وتحشم ع شيبتك!.. عبد المطلب:مش خاش لين يطلعوا فلوسي نبي فلوسي..فلوسي..وقعد يعيط وينوح فلوسي.. التفتت صفيه وهي تشوفله بكره واشمئزاز. اما اميمه نظراتها ليه كانت نظرات قهرة وخزي من الناس.. وهو يعيط ويقول:طلعوا فلوسي ياخنابات.. ☘من واحد من رواشن حوش عبد الرؤوف.. غرفه:عليك عار عليك فضايح! نبيله بألم:صفية واميمه يوجعوا القلب.. 🍃قدام باب حوش شنيبه.. عواطف:زعما حق داروها؟ خديجه:ماتستبعدي شي.. نسرين:بش ينتقموا منه زعمه!؟ عائشه:شن تقولي يانسرين! وبعدين معاش تتكلموا في شي وانتم مش عارفين حاجه.. شبحتلها خديجه من فوق لتحت.. وهي تراقب في اللي يصير بس اكثر شي سدرة.. سدرة اللي معاش قدرت تتحمل واللي صار زاد تعبها. وهي تسمع في صوت عياط عمها.. حست روحها تبي تعيط.. معاش قدرت تتحكم في نفسها.. وبدت تعيط ع طول حسها. كل من فالشارع انفجع واولهم المهدي.. وسدرة تعيط ع طول حسها.. شدتها عمتها وجت بدخلها.. دفتها بقوة وهي تعيط..وجت بتطلع تجري.. المهدي بصدمه:سدرة! وعبد القيوم يشوف لحالتها بتركيز. لحقتها فايزة تجري.. وعائشه طلعت من الحوش تجري وهي لابسه ملايه من غير خمار.. وصلوا فيها الزوز شدوها بقوة.. وهي تحاول تتفلت منهم.. خديجه بصدمه:حي عليها سدرة خيرها! ونسرين تشبحلها بصدمه ودموعها زي السيل.. زي دموع غرفه.. ونبيه حاطه يدها ع خدها وهي تقول بصدمه:شن جاها.!؟ وعائشه وفايزة قعدوا يعاندوا فيها لين دخلوها للحوش. وعمتها خشت وراها وهي تبكي بالعبرة.. وصفيه وهي في حالتها هادي لحقتهم ووراها اميمه اللي كانت تبكي.. وعبد المطلب يقول؛وين ماشيات ياخنابات.. المهدي وهو يسمع في عياط سدرة ولى مخلوق فاقد السيطرة ع نفسه.. جي عبد المطلب شده وطاح فيه ضرب.. وعبد القيوم جي يحز فيه عنه..ضربه حتى هو .. عبد القيوم مااهتمش وحاول يفك عنه لين نجح في الاخر وقعد شاده بقوة وهو يقول:وحد الله مهدي.. سمع صرخة سدرة مرة تانيه.. فك روحه بقوة من عبد القيوم وهو يقول بخوف وغضب.. لاإله إلا الله..لاإله إلا الله.. ولف ومشي خش للمطحن لز اللي فيه وسكره ع روحه.. خديجه:كان ماتصيرله حاجه!.. ومشت تجري بش تخش للمطحن من بابه اللي ينفتح ع الحوش.. اما نسرين خشت وهي تبكي ومش مستوعبه الحاله اللي شافت فيها سدرة.. عواطف:الفجي وخلاص.. وسكرت الباب.. 🍃في حوش الواعر.. كانت عائشه ضامه سدرة وتقرا عليها بترتيل.. ¤بسم الله الرحمن الرحيم الحمد لله رب العالمين. الرحمن الرحيم.. ملك يوم الدين.. اياك نعبد واياك نستعين.. شدت سدرة بقوة في عائشه وقعدت تبكي بقوة واهاتها تطلع.. "آاااه" عائشه بنبرة باكيه.. اهدنا الصراط المستقيم صراط الذين انعمت عليهم سدرة بوجع وبكي:آاااه... عائشه بنفس النبره.. غير المغضوب عليهم ولاالضالين سدرة ببكي:بنموت ياعيشه بنموت. باست عائشه وضمتها بقوة وولت تقرا.. الله لاإله إلا هو الحي القيوم.. وسدرة دفنت وجهها في حضنها وهي شاده ذراعاتها بقوة وهي تبكي بكي بالصوت ونقول.. "آااه".. وفايزة حداهم تبكي.. ومطيرة تشبح لبنت خوها بألم وقلبها قاعد يتفتت عليها.. 🍃"مهدي" خشت خديجه ع خوها.. لقاته حاط راسه ع ذراعه المحطوطه ع الطاوله.. وجسمه يهز.. خديجه بصدمه:تبكي!!. وهو مايطلعش منه كان صوت الرشفات. وجعها خوها هلبه..ومش مصدقه الحالة اللي شافاته فيها.. المهدي يبكي!.. جاته..حطت ايديها ع ظهره وقالت:مهدي..مافيها شي ماصارلها شي.. جاها صوته المكتوم.. اللي هي فيه نصه مني اني كان صبرت عليها كان استنيت كان قعدت واقف في ظهرها راهو ماوصلتش لهني.. اني اللي درت فيها هكي اني اللي دمرتها..لا يخليني ربي لو تصير فيها حاجه.. نزلت براسها ع ظهر خوها وضماته وهي تبكي معاه بصمت.. وفي هديكا اللحظه حست بالندم.. لو مااستغلتش لحظة غضبه في هديكا اللحظه ماصار شي من اللي عاشوه.. بس حسدها وغيرتها من حبهم خلاها تستغل اول فرصه جتهم بش دمره... ☘وكل فرصة فيها دمار لبنات عيت الواعر استغلتها خديجه بقصد وبدون قصد.. وطوبى وحده من ضحاياها.. بل اعظم ضحاياها.. 🍃ماشيين مع بعض في الممر بعد ماعاينوا معاذ.. ع اليمين طوبى.. ع اليسار نجاة.. وفي النص الجالي وهو رافع في حضنه معاذ وشاد في يده الوصفة الطبيه.. وطوبى مازالت في حالة توتر.. وهي ماشيه فات من جنبهم واحد قريب كلاها بعيونه.. خافت ليشوفه الجالي ويدير مشكله.. شبحتله لقاته لاهي مع معاذ يلاعب فيه.. تنفست بإرتياح وشبحت القدام.. شويه وفات واجد من جنب نجاة وعيونه عليها.. هي شبحتله وقلبت عيونها بغرور.. هو قال:هما العيون.. سمعه الجالي..وقف والتفتله وقال بغضب:شن قلت!؟ نجاة حطت ايديها ع الجالي قالت:خلاص فوته.. اللي ناشب نجاة مشي بسرعه هارب.. الجالي بغضب:وسخ.. مد العيل لأمه وقال:خودي.. خداته نجاه وشبحت لطوبى.. لقتها واقفه تشبحلهم ونظرات عيونها باينه فيهم حيره وخوف.. هي بادتلها بنظرة مستفزة.. تأكدلها اللي بدت تفكر فيه.. الجالي بعد ماعطي نجاة ولدها.. مشي بعصبيه وهي وراه. وطوبى وراهم وهي تشوفلهم.. ماقدرتش تعدي شي من اللي مر عليها.. كل شي شافاته يقول ان في شي غلط.. بس مش راضيه تعرفه شن هو.. خايفه تعرفه شن هو... هو بعد مامشي كم خطوة شبح يمينه مالقاهاش. وقف والتفت.. الجالي:طوبى خيرك بعيده..تعالي..ومد يده.. هي بلعت ريقها وجاته.. حطت يدها في يده.. شد عليها بقوة وقال:ايدك مصقعه.. طوبى :عادي.. ونجاة تشوفلهم بحقد شديد.. الجالي:خلاص تو نروحوا للحوش تركبي طول للجناح وترقدي تعبتي هلبه اليوم.. هزت راسها وهي ساكته.. مشي بيها ونجاة هي اللي قعدت وراهم تشوف لإيديهم وتتمنى لو تقدر تقطع يد طوبى.. طلعوا برا العياده وركبوا السيارة.. الجالي بعد شغل السيارة خدي طوبى شدها بالقوة وبدي يسوق .. هي قعدت تشبح ليده كيف شادة يدها.. ونجاة كانت تحاول بكل قوة تتحكم في أعصابها... 🍃عكس اميمه اللي فقدت هدوئها تماما.. وهي تتكلم بغضب:معاش توليله الحوش هداكا خلاص..لين يطلع منه هو .. وصفيه تسمع فيها وهي حاطه راسها بين ايديها وتشبح في الفراغ وتتفكر في اللي صار.. اميمه بغضب ودموعها ينزلوا:شن محصلين منه حني..غير الذل والاهانه وقلة القيمه..واخر شي العار. مطيرة؛اميمه خلاص خلي امك واطلعي.. اميمه:تعرفي ياعمتي باللي داره شكل الموقف اللي حطني فيه قدام عمر وعيلته.. صفيه بألم:حسبي الله ونعم الوكيل.. وبنتها ودموعها زي السيل:احب ع قلبه دماري الراجل هدا..تقول مخلوق بش يدمرني بس.. صفيه وهي تبكي:حسبنا الله ونعم الوكيل.. 🍃ومن دار المعيشة لدار البنات.. رقدت عائشه سدرة في سريرها وغطتها.. وخدت شيشة ميه صغيره قريب عليها سور الرقيه وحطتها جنبها.. بعدين طلعوا من حداها هي وفايزة وسكروا عليها الباب.. عائشه:وقظتي عمتها ماتخليهاش بروحها.. فايزة؛حاضر.. عائشه:السلام عليكم.. فايزة:وعليكم السلام.. مشت عائشه بتطلع وهي تتفكر في اللي صار بينها وبين سدرة اليوم.. 《مانعرفش كان وسواس ولالا..بس قلبي حاسني اني حنموت قريب ياعيشه..مانبيش نموت الا وانتي مسامحتيني ياعيشه..بسببي اني ماتهنتيش في حياتك》 مسحت دموعها لما وصلت في الباب.. فتحاته وطلعت بعدين سكراته وراها.. ع خشة لطفي وعلي الواعر من الباب الفاصل.. علي قعد ينادي:صفيه..مطيره.. لطفي:سدرة.. ع جية مطيرة تجري ووراها اميمه.. مطيره:بوي.. شاف لملامح وجوههم قال الجد.. علي:شن صاير..خوك خيره يامطيره خشينا عليها الحوش لقيناه يعيط ويقول:نبي فلوسي اللي خدتهم صفيه.. اميمه:وان شاء الله انت صدقته جدي.. علي الواعر:شن بنصدق! فهموني شن اللي صار.. اميمه:قول شن اللي ماصارش ياجدي..اللي اسمه بوي ضرب امي في الشارع قدام الناس وهو يقوللها ياخنابه.. درالنا العار وشهدر بينا قدام سكان الشارع كلهم.. لطفي بصدمه:امتى صار هدا!؟ مطيرة بنبرة ألم:مع المغرب..!. والحاج علي من صدمته مش قادر يتكلم.. اميمه بقهر:فضح بينا قدام الناس كلها دارلنا العار حشمنا.. امي اني بعد هالعمر بعده اللي راته معاه..فوق صبرها وتحملها كافئها بأنه يضربها في الشارع قدام الناس..! الحاج علي تخيل اللي صار.. فقد اعصابه.. مشي بسرعه ولى للحوش.. لطفي:بوي! لحقه يجري ومطيره وراه.. خشوا من الباب الفاصل.. وعلي الواعر:وصلها لأخرها خلاص وصلها لأخرها.. خش عليها لقاه مقعمز حاط ايديه ع راسه.. جاه وبدي يخبط فيه بالعكاز وهو يقول:اطلع..اطلع من حوشي اطلع معاش نبيك.. لطفي بصدمه:بوي!.. علي بغضب:اسكت انت خير مانلحقك بيه.. عبد المطلب ناض وقعد يمشي للخلف وهو يتفادى في ضربات بوه ويقول:يابوي اللي مضرر..فلوسي راحو يابوي شقا عمري راح..عمري كله راح. وعلي يضرب وهو يقول:ان شاء الله معاش يولوا ياعملي السيء في دنيتي.. معاش نبيك قلت معاش نبيك في حوشي.. وصل بيه برا وقال:لطفي افتح الباب.. لطفي من خوفه ع بوه نفذ امره وماباش يناقشه.. وفتح الباب.. وعلي طلع عبد المطلب برا وهو يقول:ظالم ظالم طول عمرك ظالم.. وسكر في وجهه الباب بقوة وهو داهش.. لطفي بألم:بوي! علي:مش انت بس اللي انبليت بالولد العاق..مش انت بس.. ولف ومشي خش داخل وعيونه بنته وولده معاه وهما متألمين للعمق.. ☘الولاد.. مايندروا ع شي.. حسين حطهم في بدايه الشارع ع حسب طلب جده ومشي لمقر عمله.. اما يوسف...فكانت مرته تراجي فيه فم الباب بش يروحوا.. وهو طول ركب سيارة اللي كانت مدرسة في الباب دارلها رنه طلعت تجري بدون ماتسلم ع الحاج علي ولطفي اللي جو خاشين...☘ قعد عبد المطلب فم الباب ينعت في بوه بأقسى النعوت.. بعدين مشي وهو هايم ع وجهه.. ☘والجار الجديد اللي شهد ع كل شي صار قال عنهم.. عبد القيوم وهو متكي في داره:باينهم عيلة منكوبه ..كان الله في عونهم.. 🍃في هالأثناء.. وصلت سيارة الجالي للحوش.. خش داخل.. درس.. نزلت نجاة بولدها.. وطوبى والجالي نزلوا مع بعض.. جاها وشد يدها وهو يقول:تعالي نخشوا من الكوجينه.. ومشوا.. ونجاة تشوفلهم بنظرات غيرة وحقد غارقات بالدموع.. بعدين مشت خشت داخل.. 🍃والجالي ركب بطوبى للجناح طول.. خلاها غيرت حواجيها. رقدهة ع السرير وغطاها.. وجي بيمشي.. شدت يده وقالت؛وين؟ الجالي:بندوش.. طوبى؛مش لازم بدل وتعالى ارقد.. هو ابتسم وقال:أمرك.. 🌸ودار اللي تبيه..ورقد حداها.. شدت في يده وغمضت عيونها.. وهو يمسح ع شعرها بيده التانيه لين رقد هو.. ايه هو .. وخلاها هي في حالة صعبه.. الشك بدي يخش قلبه.. ومادامه خش قلبها القادم من حياتها غير مبشرة.. ن ☘اما نجاة بعد خشت الحوش.. نادت ع صغارها وطلعوا روحوا.. 🍃في الطريق.. نجاه وهي مذهوله:من هي المراة حبيبتي؟ جوري:هادي ام العروسه اللي زي سندريلا ماما.. حمزة؛واخت ابلة طوبى حتى هي قعدت تعيط في الشارع.. نجاة بضحكه؛عيلة دردنوا متاعين فضايح..تستاهل يلي في بالي ماتبيش تسمع الكلام.. ☘☘☘☘ الساعه 10:30ليلا.. حط بوه ع السرير بعد ماساعده يخشله.. غطاته بالبطانيه وهي تشوفله وتتفكر في جزء تاني من كلام صاحبتها.. 《نعاود نقولك اللي قلته زمان..خليه يحبك ياعيشه.. اني متأكده اني بعد مانطلع من الحياة بكبرها حيحبك صدقيني..》 مسحت دمعتها اللي نزلت وقالت لولدها بهمس:خلاص اطلع.. محمد وهو يشوفلها بحزن قال:تصبحي ع خير.. هزت راسها بدون ماترد.. هو مشي طلع من الدار.. وهي قعدت مقعمزة جنب راجلها.. تتأمل فيه..وبين عيونها يمر شريط ذكريات ايام الطفوله والمراهقه.. حب المهدي لسدرة هو هو ماتغيرش.. عارفه ان لوصار وفعلا ماتت سدرة حيلحقها.. بالموت..او بالحياة.. وكلاهما...احلاهما مر... ☘☘☘☘ "مستغرب في قسوة القلب هادي معقوله اختك تتعب وماتمشيلهاش" غرفه:ممكن رؤوف ماتدخلش بيني وبين خواتي!.. عبدالرؤوف ضحك بتعجب وقال:توا معاش تبيني ندخل؟! سكتت غرفه وهي مضايقه.. هو هز راسه وقال؛ياريتني درتها من الاول ومادخلتش ماكانش صار اللي صار..ولولا انك فات فيك وعزمتيه ماخليتاش يخش حوشي.. غرفه قعدت تشبحله وهي مضايقه ع الاخر.. وهو خدي بطانيه من الدولاب وقال:بنمشي للدار التانيه ردي بالك تلحقيني.. ومشي طلع من حداها.. هي تأففت بغضب.. ورفعت رجليها ع السرير وحطتهم ع بعض.. وشدت تليفونها في يدها ولهت بيه روحها لعند ماجاها النوم ورقدت.. 🍃وشارع القهوة هديكا الليله.. بين ناس راقده هربا من الوجع.. وبناس مش قادرة ترقد من الوجع.. وناس وهي راقده تتكرر عليها منامات غريبه ومخفيه.. ☄زي نجاح.. اللي حلمت انها ماشيه في الليل في طريق مظلمه.. كانت ضايعه ودور ع الطريق اللي ترفعها للحوش ماتلقاش فيها.. وتلقى روحها كل مالها تزيد تبعد اكثر.. ملي الخوف صدرها.. وين فاقت حست بالموقف مستوطن قلبها حتى برا الحلم.. حطت يدها عليه وهي تفكر فيه..وفي ماسبقه من احلام.. ومش فاهمه علاش وين ترقد وهي قاريه اخر جزء من سورة البقره..وصفحه من الورد..وسورة الملك.. وتقرا اذكارها اللي تختمها بتاج الذكر.. لازم تشوف احلام سيئة وغريبه.. للحظه حست انها تعبت ومش قادرة تتحمل.. لكن وين تتفكر كلام طوبى تقوا وتصير انها تتمسك بكل شي حلو خداته عاده خلال هالفترة... ☘وفي شقة خوهم.. كان يحكي مع مرته في موضوع .. محي:سعرها مناسب وعجبتني هلبه.. خديجه؛في الصور تبان حلوة بس لازم تمشي تشوفها ع الطبيعه.. محي:اكيد حددنا موعد يوم الخميس نمشي غادي نشوفها بالك نتفقوا ونتموا الموضوع.. خديجه:ع خير ان شاء الله.. محي:ان شاء الله....
#الماجده #طوبى
...يتبع....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
