🥀💎 المكتـــوب 💎🥀
⭐🌾على عشقـــــك لامـــــــوني 🌾 ⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 9:
فطرو لكل في جو مليان ضحك كل مرة يشايخو على واحد فيهم... مسح فمو وناض
حمزة: انا نخليكم هابط عند سفيان...
وردة: حتى بجمعة ثاني خدمة ريح روحك وليدي بزااف عليك هك...
سولا: والله ماما عندها الحق تعب في روحك بزيادة...
معتز: انا ماعدتش نهدر...
حمزة: تسمى كل تحبو دبرو عليا.. ولا (هز مفتاح وقصد لباب حتى حبسو بوجمعة )
بوجمعة: عمري ماتدخلت فيك دايما نخليك على راحتك... اما وقت ضر روحك سامحني... هنا انا الي نوقفلك...
رجع وراه سلملو على راسو...
حمزة: قدرك عالي يابابا اما وقتنا لازم نجرو ويارب نلحقو... بكري كانت اي حاجة ترضينا اما درك هههه نحب غير لاكثر ونحبو لمخيرة... وهذي ماتجيش بساهل وباه نمد يدي للحاجة ساهلة مانعملهاش....
بوجمعة: ماخليتليش هدرة... ربي يكملك بعقلك وليدي...
حمزة: امين يارب وخليكم تاج فوق راسي...
________
واقفة قدام الباب تحوس على لمفتاح مالقاتوش... طبطت طبطبت واحد لا فتح... حطت رقم تاعو يصوني مايهزش غلبت على امرها... رجعت قعدت على دروج حاطة يديها خدها... تحكي وحدها...
ياسمين: اكيد يكون هامل في شي بلاصة وهو والعقرب وانا نتلاطم لبرا... تقول هج*الة... الله لاتربحك انورة نشوف فيك نهار إن شاءلله...
فاتت عليها حليمة... بقات تشوف معاها بعدها سقساتها
حليمة: تحتاجي حد بنتي...
ياسمين: نسيت مفتاح نتع دار ونطبطب مايفتحوش...
حليمة: انتم الي نقلتو جدد سمعت عليكم لبارح
ياسمين: ايه حاجة احنا هم إن شاءلله نكونو خفاف عليكم...
حليمة: إن شاءلله بنيتي... تحبي تجي لعندي حتى يرجعو تع دار...
ياسمين: ربي يخليك خالتي مانحبش نقلقك معايا...
حليمة: مكان حتى قلق بنيتي تونسيني راني غير انا وطفل ودرك يكون خرج يرجع غير مع الليل... هاك تشوفي خرجت انا نشري لخبز... كما رجعت شفتك قاعدة جيتك كما تعرفي لحومة هذي كلنا عايلة وحدة وانت درك وحدة من العايلة
ياسمين:ربي يخليك خالتي إنشاءلله دايما ملمومين يارب... اما مانحبش نكون تقيلة على حد ومزالني جديدة هنا...
حليمة:يا يما على هذاك الفم الي يخرج غير لعسل... مكان حتى قلق ماتقلي عليا لا شيء.... نوضي بنيتي نطلعو مش مليح ليك تقعدي برا واليوم جمعة رجال لكل تخرج برا... وزيد خليت قدرة على نار...
تبسمت معاها ياسمين وهزت صاكها ماشية معاها تحكي دارك بعيدة خالتي؟
حليمة: غير منا فلحومة فوقانية... مش بعيدة بزاف
ياسمين: خليني نعاونك نهز عليك...
حليمة: يعيشك اما ماتقلقيش روحك مش تقال...( طلعو مع بعض كل مرة حليمة تسقساها على حاجة حتى وصلو لدار ودخلو وراتلها دوش تغسل وطلبت منها ياسمين بلاصة ترقد ترتاح بعدما حكاتلها على الخدمة الي تخدم فيها .... حطت راسها مافاقت لشيء بعدو.... واخدة راحتها تقول دارها...
