المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 125
اليوم نهار جديد... الكل يجري في دار ريحة الحلوة عاملة حالة... سولا حاطة لغناء وتسيق في دار... بسيف حاولت امها ما تبعتهاش تقراى عندها ساعتين سبور وساعة فلسفة... ماتحبش تروح تحب تستقبل خوها في دار اليوم يروح... وردة من بلاصة لبلاصة تطل عليها يد في لحلو ويد مع لغداء... علبالها وقت يخرج زيارات تكثر...
حمزة يحكي...
صبحت راقد نحس في عضامي كل تسطر اليوم اخر يوم في كونجي... ونفس شيء يخرج معتصم ونتهنو من جري نتع سبيطار... الحمد الله صحة مليحة خرج منها سلامات معجزة من عند ربي... نضت من بلاصتي نتكسل... مزال ناقص نوم اما لازم نوض مزال ورايا ما نعمل... خرجت لدوس غسلت وهبطلهم وين دنيا الكل حافلة تشم غير في روايح زينة... شربت قهوتي ماحبيتش نكثر عليهم وهما حاصلين هزيت زوج حبات طمينة بتخبيه ههه وخرجت... قابلني ايمن يسخن في طموبيل قربت بحداه...
حمزة: صباح الخير رجلة...راك روطار اليوم...
ايمن: ياولدي رافاي يصوني وانا نقفلو ونرجع نرقد...
حمزة: ههه اليوم تنقصلك 100الف نتع روطار...
ايمن: خلي تنقص.. وش الي في يدك طمينة هات وحدة والله لاتحشم تاكل قدامي ماتعرضش...
حمزة: من نيتك وانت نتع عرضة...
ايمن: هات هات...(حطها في فمو) امم بالجمعة راح نعمل شوفة...
شرق في طمينة ولا يكح: هههه وش تشوف...
ايمن: طفلة شافتهالي حليمة...
حمزة: من وقتاه هذي...
ايمن: حبت تزوجني وانا قبلت وش فيها...
حمزة: ربي يهنيك صحبة هذي لا زملها قعدة....
ايمن: وقت يخرج عصومي تفرغ اللية ونڨصرو فيها...
حمزة: مريڨلة ليزوم...
~~~~~
ياسمين: ايه متاكدة وراني طولت ديجا
محامي: لكان هك اليوم نرفع دعوة... وقعيلي لهنا...
ياسمين: وقتاه يستدعوه ويحققو معاه...
محامي: لا كثرت سمانة... اليوم نحط القضية... هما يعملو الاجراءات ويبعتولو استدعاء...
ياسمين: مليح وقت يستدعو رقمي عندك
محامي: إن شاءلله...
وقفت بعدما ودعت هبطت من المكتب نتاعو... تفكرت حكابة دار لازم نفرزها...جاؤ لبالي حمزة... جبدت تلفون من صاك حطبت رقم نتاعو الي عطاهولي... مدة يصوني حتى هز...
حمزة: الو وي...
ياسمين: صباح الخير انا ياسمين طبيبة...
حمزة: اهلا حكيمة لباس؟...
ياسمين: لباس الحمدلله... عيطلك حبيت تاخدلي موعد من عند هذا الي قتلي عليه...
حمزة: شكون نتع دار؟
ياسمين: ايه هو ان شاء الله يقبل يكريهالي...
حمزة: خلاص مريڨلة دوك نشوف معاه بربي نفرزو لحكاية...
ياسمين: ربي يحفظك نستنى تلفون منك لانو صح زاربة...
حمزة: ههه قتلك مريقلة... هذا رقم نتاعك؟
ياسمين: ايه هو...
حمزة: خلاص دوك نسجلو هاو بينا تلفون...
