المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 145:
سولا تحكي...
دخلت نجر في خيبتي ورايا... قفلت الباب تكيت عليه... ورجعت راسي نضرب عليه بضربات خفاف... نجبد في نفس بسيف... عينيا يحرقو نحس فيهم راح يخرجو... نحب نعيط نحب نبكي اما مش مسموح ليا... وش راح نقلهم علاه راني نبكي وش هي سبتي... راح نقدر نقلهم راجل الي حليت عينيا فيه... خلاص بح مابقاش شاف حياتو... راجل الي حلمت نكون ملكو وعلى إسمو... راح يتكتب اسمو مع مرأة اخرى... عضيت على شفتي تحتانية نغمض في عينيا مش حابة نبكي... بعدتعلى لباب ماشيا من غير روح ... قابلتي ماما واقفة في الباب نتع الكوزينة حاطة يديها على خصرها تسقسي فيا...
وردة: خوك الهامل.. بعثو يجيبك لاخر جيتي وحدك...
كملت ماشيا وانا نحكي: جاي من وراي...(ما حاسة بشيء...وما قادرة نستوعب شيء )
وردة: سولا شبيك وش صرالك...
كملت طالعة في دروج من غير مانحكي معاها ولا نردلها... دخلت لبيت قفلت لباب ورايا وقعد على سرير جثة من غير روح... حتى دخلت من ورايا تمسح في يديها في طبليي نتع كوزينة وقعدت بحدايا...
وردة: سولا شوفي معايا...
ماقدرتش ندور ونشوف معاها لانو صح مضرورة... ومش قادرة حتى نسمع...
وردة: بنتي لازمك تفوتيها لحكاية ايمن مش ليك افهمي...
مسحت دمعة الي ساحت على خدي ودرت شفت معاها نحكي...
سولا: علااااه علااه مش من مكتوبي... علاه نفوت لحكاية... حبيتو ماما حبيتو.. تفهمي وش معناها حبيتو...
وردة: نقصي حسك يسمعوك... هبلتي ولا كفاه... حكاية خلاصت وانت مزالك صغيرة... اقراي قرايتك حاجة الي تصلح بيك... مش تصححي في وجهك قدامي وتحكيلي في لخرطي هذا...
سولا: هههه حتى ونحب نخمم فيه... خلاص خطب وحدة اخرى... هو الي تكبر على بنتك شافني مانصلحلوش...
وردة: ههه منك بصح ايمن يتكبر عليك... ياااما جات أمو حبت تحط عليك الكلمة وانا الي رفضتو... حتشا قال بنتي انا يتكبرو عليها...
كلامها قعد يدوي في وذني... يعني ايمن حب عليا وهي الي ماقبلتش...
سولا: يعني... ي عني انت الي رفضتيه... هو كان حاب عليا وانت الي رفضتيه...
نضت ندور في لبيت كما المهبولة... يديا وسط شعري قريب نتفو...
سولا: خسارتك اماما... علاه وش عملتلك مش قتلك من قبل نحبو... مش حرام عليك تفرقينا... وش عملت انا حتى تعملي فيا هك...
وردة: عملت صح مستحيل نقبل بواحد ولد حرام ياخد بنتي مستحيل
سولا: علااااه هو الي قالهم جيبوني وطيشوني... ياك عبد كما لعباد كل راجل وسيد رجال خدام وبدارو... وزيد متربي... وش تسحقي اكثر من هك...
وقفت وردة حكمتها من فكها ترص عليه وتحكي : انا كلمتي قلتها... وانت غير نحيه من بالك... كل مازربتي كل مايكون احسن ليك... والموضوع هذا مانحبكش تزيدي تفتحيه مرة خلاف تسمعي فيا...
سيبتها وخرجت قفلت الباب بالقوة خلاتها تتهز وتتنفض في بلاصتها... من دمعة ولات دموع... وقفت قدام طاقة تشوف مع طاقة تاعو... تحس في روحها راح تهبل... يعني حكايتها امها كانت سبة فيها... درك خلاص خسراتو مابقاش كاين امل... تعرفو وتعرف طبعو من كانو صغار كلمتو عمر يرجع فيها... رجعت رقدت على سريرها ضامة رجليها لصدرها... شعرها هابط على وجها... دموعها تنزل من غير حبسة... صوت شهقات الي تحاول تخبي فيهم ساعة على ساعة يخرجو...
