🥀💎 المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 30:
من عيطلها حمزة وهي طالعة هابطة تقول واقفة على جمر... مرة على مرة تطل على لباب لا يجي... حتى صونا تلفونها...
حمزة: اخرجي ايمن لبرا...
سولا: اوكي اني خارجة...
وقفت ترد في نفس هذي مدة ماشافاتوش وجه لوجه... عدلت شعرها وتمشات خطواتها خارجة لبرا حتى وصلت لطموبيل... مخرج يديه يتكيف شاف معاها جبد من جبدة وحركلها راسو تطلع... وهذا الي كان قربت راح تحل الباب من قدام... حتى يخلعها بصوتو لخشين...
ايمن: اطلعي من لوراء...
بعدت يديها ومشات خطوة حلت باب من لوراء غايضتها روحها... ماكنتش تتوقع يحكي معاها بطريقة هذي... طلعت وردخت الباب بلاما تفيق...
حمزة: طيريه خير...
سولا بصوت قريب مايتسمعش: سامحني مانيش بدمة...
دار قدامو من غير مايحكي معاها مديماري مرة على مرة يشوف معاها من مراية الي قدامو... وخي حاطة راسها على طاقة تايهة حتى نطقت بعفوية...
سولا: علاه تتجنب فيا...
هز حاجبو فيها يحكي: وعلاه نتجنب فيك عادي...
سولا: من وقتاه ماحكيتيش معايا... اممم
ايمن: ماشفيتش علاه تسقسي...
سولا: حبيت نعرف لدرجة هذي كارهني...
فرينا بجهد يشوف قدامو ويحكي: وقتاه كرهتك...
سولا: تصرفاتك هك تقول لا؟
ايمن: وقتاه تصرفت حتى تبانلك كرهتك...
سولا: من تشوفني تبدل طريق.. من تجي تعيط لحمزة ولا معتز نسلم عليك ماتردش سلام.. بعتلك مساج فلفيس ماشفتو ما رديت عليه...
ايمن: وانت وعلاه تبعتيلي اممم... ياك غير جاركم وصاحب خوك... ولا صحاب خوك كل تحكي معاهم اااه...
هبطت دمعتها: لدرجة هذي ايمن...انا تشوف فيا نرمي في روحي على ناس الكل...
غمض عينيه يرص عليهم يكذب على روحو لو كان رقول مايحبهاش اما هذي امانة واخت صاحبو لازم يصونها... رجع ديمارا
ايمن:ماقلتش هك...اما نصيحة اقىاي قرايتك وما تحوسي على حتى حاجة اوكي...
سولا:ههه يكثر خيرك خويا إنشاءللهاخر مرة نحكي معاك فيها...
ايمن يتمتم بينو بين روحو :(خويا خويا وقتاه كنت خوك ) حرش صوتو ونطق وصلتي درك تقدري تهبطي...
سولا:اممم شكرا وسامحني قلقتك...اخر مرة ماعادتش تتعاود...
اكتفى انو يحركلها راسو...مشيعها بعينيه حتى وبن وصلت لدار ودخلت بعدما دارت تشوف معاه...هي دخلت وهو هبط راسو على فلون بعدها طلعو يضرب فيه...مرة هذي خسرها صح...
