💎 المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 131:
قاعدة عند سلمى مرة على مرة نجبدو حكاية... شربنا لقهوة وطيبنا لغداء تغدينا غسلنا لماعن... وهنا راقدبن حدا بعض في فوتاي حاطين على فيلم نتع berline syndrom (ههه هذا انا في خاطري نتفرجو ومالقيتوش شفت غير ملخص نتاعو 😢).... حتى نطقت ياسمين: سلمى نسقسيك...
سلمى: اممم يعني جيتي للقطة هذي وظهرتي تسقسي...
ياسمين: والله مني بصح شوفي معايا...
سلمى: اووووف هاني وش تحبي....
ياسمين: محمد يحبك صح؟
عقت حواجبها مكمشة عينيها: علاه تسقسي باين يحبك... علاه عندك شك؟
حمحمت: لا اما حبيت نسقسيك برك...
سلمى: ياسمين احكي علاه سقسيتي...
شافت ياسمين مع تلفونها هذي مرة الالف الي تشوف معاه...
سلمى: نحكي معاك علاه سقسيتي نعرفك كما تعود في فمك فولة... وديجا علاه راكي تشوفي مع تلفون كل دقيقة عندك حاجة مخبيتها عليا؟
حكت شعرها تلعب بعينيها: لا ماعندي علاه نخبي عليك... راني غير حبيت نسقسي برك... هذا ما كان... وقتاه راح تحطي على فيزا؟
سلمى: يابنت وشبيك اليوم مش نورمال... من جيتي وانت تحوصي... وتسقسي... غير لخير هاني نسمع فيك...
ياسمين: اوااه بانتلي حرمت لهدرة معاك... انا نروح هذاك هو نتلاقى مع مول دار ونروح ترتاح شوي...
سلمى: اممم اهربي هكذاك... براحتك اما نعرف نعرف الي قاعد يدور في راسك...
وقفت نلبس في veste وهبطت نلبس في سباط ...
ياسمين: وقتاه ناوية ترجعي للخدمة... راكي طولتي في ركشة...
سلمى: مانيش حابة نشوف وجهو...
هزيت صاك: باهي الالة اما لوقتاه اااه ... يجي نهار وتتلقايه...
سلمى: اما مش درك حاليا مش قادرة... ومحمد الي عاد موسوس من كل جاست صح تفهم لحكاية اما يبقى راجل في لاخير ومن حقو انو ياخد موقف...
ياسمين: اممم صح... انا نروح من بعد ونحكو...
سلمى: كان عكاك دار خبريني اوكي؟
ياسمين: اوكي ...
وصلت وين المصعد خرجت تلفون نشوف معاه... من بعتلي لعنوان ماعاودش زعما نعيطلو ولا يكون لاتي... كفاه نعمل مع راجل درك... لا خلي نعيطلو وش فيها ياك غير على دار... مش حاجة خلاف عادي يعني... امممم عادي صح راجل عندو حياتو وعايلتو ديجا كما عمل فيك مزية راه مليح... اااا ساهلة خلي نروح وين قالي ونستناها ممكن يجي.. خلاص هك احسن حل ركبت في هذاك المصعد.. هبطت لطموبيل نتاعي ركبت وقلعت حطيت على الموقع ومشست مع طريق كما ترسمت... نخمم زعمة راح بعطيني دار زعمة حمزة يجي ويقدر يقنعو؟ الف سوأل وحكاية تعدات على راسي... تفكرت الهم نتع سي خويا الي في جرتو راني نطايش كما ### اما معليه كل شيء فيىوقتو حلو... كون مانجريهوش هو وصفراء تاعو في لمحاكم مانتسماش انا... شفت حانوت هبطت شريت قرعة ماء وشكولاطة... وكملت طريقي حتى وصلت ڨاريت قدام البطيمة وحليت طاقة شوي مع انو برد الا انو مانحبش سخانة... خليت هدوك قطرات لمطر تدخل تضرب في وجهي...
