💎 المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 129:
في دار وردة...
من صباح وهي طالعة هابطة من حاجة لحاجة... مرة تعدل هذي مرة لخرى... مرة طل على طنجرة تدوقها ما خلات ما طيبت الي يحبها ويشهاها الكل دارتها... سولا مسكينة الي كرهتها حطي ديري... مزالت غبرة هنا... اعصري قارص ديري هذي جيبي هذي حتى هدت هدان خلاتها مطيشة فوق فوتاي مش موالفة تقضيها كما اليوم.... ولا الجيران الي كل مرة يطل واحد...فات نص نهار وماوصلوش من تعيط يقولوها مزال طبيب ما وقعش على لخروج... اما حمزة عند اكثر من ساعة مايردش قلبها مشقايللها خير... مرة تطل على طاقة مرة تحل الباب تطل منو...
سولا: ماما احكمي بلاصة... دوك هك شوي ويحلو الباب ويدخلو...
وردة: لا طول بزيادة وش هذا الكل... لايكون كشما زاد صرالو...
سولا: وش راح يصرالو... ياك خليناه لباس شوية سطر برك علاه راكي مكبرة لحكاية...
وردة: مانيش مكبرة.. اما نحب نشوفو في دار وسط عايلتو...
تحل الباب تنطرت واقفة تشوف مع ولدها الي داخل على رجليه يتبسم.. وباباه وراه هاز كابة نتع القش نتاعو...
تلاحت عليه هزاتو في يديها تقول طفل صغير... تبوس في كل شبر من وجهو وهو يضحك... صوتو واصل لاخر حومة... ولا سولا الي نحاتهولها من يديها... حتى هي عملت دالة فيه دخلاتو لصالة حطاتو على لفوتاي دارتلو مخدة وراء ظهرو كل مرة تسقسيه على حاجة... متلميين عليه.... من غير بوجمعة الي قاعد على لكرسي وجهو اصفر يخمم... شيء الي خلى وردة تتولهلو وتروح تقعد بحداه...
وردة: بوجمعة وشبيك؟
بوجمعة: لا والو غير تاعب...
وردة: راني حافضاتك ياراجل... وش كاين ديجا وينهم لولاد...
مسح على وجهو وعدل قعدتو...
بوجمعة: ولدك معتز ما نعرف وش من بلوة راح يبلي بيها روح...
ضربت على صدرها مخلوعة تحكي
وردة: يايما على ولدي وش صاير معاه... بوجمعة وش كاين طفل وينو... علاه انا نحكم واحد نضيع لاخر...
بوجمعة: بلعقل لولاد يسمعوك... هاو لحقو خوه بربي مايصرا شيء...
وردة: اخلاء داري ايما ولادي كل مرة تجيهم ضربة... ااا بوجمعة ما عدتش قادرة نتحمل ضربة اقوى من اختها ...
بوجمعة: يزي بلا نديب مش وقتو لازم نوقفو على ولادنا مش نتنادبو...
وردة: عيط اراجل عيط شوف وينهم... راهم حابين يقتلوني نافصة عمر...
بوجمعة: من صباح وانا نعيط واحد لا رد عليا...
ضربت على فخادها تحكي وتبكي...
يايما على ولادي ياما... الله لا توريني فيهم شر... ماتكونيش في كبدتي ياربي... والله ماعدت قادرة نتحمل... راني تعبت وتخنقت...
بشوف معاها وهو قلبو نار اكثر منها وقف حتى هو خارج من دار مش قادر يزيد اكثر فيها من يقول هانت تحلت حتى يلقى روحو في حفرة اكبر واوسع...
