المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 135:
بعدما وصلني حمزة لدار... دخلت طول لبيتي مش ناقص منواشات نتع يما... دخلت نحيت veste... وزدت تريكو نتاعي تعافرت معاه بسيف حتى تنحى ترميت على سرير نحب نرقد نرتاح شوي... نحس في كل عظم هارب من خوه... رقدت على جنبي ماحسيتش حتى كفاه غفيت وعديت في طويل... فيقني صوت تلفون بقيت نتلمس ونا بلاصة حاطو عينيا مغمضين... اول ماوصلت ليه نقصتلو صوت من غير مانشوف شكون... شوي وزيد عاود تقعدت ننفخ كاره فيقوني من احسن نومة... هزيت وانا مزالني دايخ...
سفيان: وي...
جوجيتا: وينك من بكري وانا نعيط...
سفيان: اهلا روح لباس؟
جوجيتا: شبيه صوتك سفيان... وشبيك اليوم مش عاجبني...
سفيان: ماكان شيء غير كنت راقد...
جوجيتا: كاين راني حافظة كل همسة منك... حل كام راح نطلبك...(قصت عليه خلاتو ينفخ...وفي نفس ثانبة عاودتلو اول ما فتح الكام شهقت )...
سفيان: ماتتخلعي ماوالو ما صار شيء...
جوجيتا: شوف وجهك يااااا يديك وش صرالك... سفيان وش الي صرا... علاه ماعنديش علم بالي صرالك...
سفيان: قتلك ماكان والو غير تدخلت نفرق في زوج تعاركو
بدات دموعها تهبط: نحب درك تجي تروحني سفيان درك مانزيدش دقيقة اخرى هنا...
سفيان: يهديك ربي يابنت وين نجيك درك راح الحال... وزيد دار مزال ما وجدتلهاش كل شي...
جوجيتا: نحب درك سفيان مايهمنيش في دار... ولا تحبني نجيك وحدي...
سفيان: اركحي احكمي بلاصتك ماعندك وي تجي وحدك... غدوة صباح إن شآء نجيك...
جوجيتا: وش الي يصبرني لغدوة سوفي...
سفيان: هههه تصبري كما صبرتي اليمات الي فاتو كل... ودرك نخليك من بعد نعاودلك (قطع الاتصال...بكذب يقول مش فرحان للهفتها عليه...اما ثاني مزال متغششة من روحتها...)
~~~~
تدور في دار وكل مرة تشوف حاجة... دار صغيرة تحفونة ونظيفة وهذا الي عجبها فيها... على قدها تقدر تعيش فيها مرتاحة...
###: ماتخميش مادام لاكان عجبتك نقدر نتفاهمو في لخلاص عادي...
ياسمين: لحق عجبتني ونظن راح نكريها هي...(وشافت مع حمزة) وش قولك حمزة ياك مليحة...
حمزة: لحق نظيفة وتساعدك على قدك...
###: علاه راح تسكن وحدها؟
حمزة: ايه وحدها
###: اواااه مانقدرش نكريلها وحدها... حسبتها مزوجة
سكتت هبطت راسها ماقدرتش تجاوبو ولا حتى تناقشو...
حمزة: شوف اصحبة طفلة نعرفها مليحة تخدم طبيبة اهلها يسكونو بعاد ماتقدرش ت؟ يبهم وتسكن معاهم لهنا... هي فترة برك حتى تفرز امورها وتشوف كفاه تعمل...
###: وش راح نقلك صحبة صعيبة لحكاية...
حمزة: ماصعيبة لا شيء كريهالها على ضمانتي...
###: وش راح نقلك ربي يسهل اما كون واحد يجي يشكي منها راني نخرجها...
حمزة: بربي واحد لا يشكي...
###: هيا مريڨلة مالا نقلكم مبروك... والعقود من غدوة يتخدمو...
سلم عليه باليد: يعطيك صحة رجلة... غدوة انشاء الله...
هبط وهبطت معاه حمحمت تحكي...
ياسمين: قد ما نشكرك على وقفتك معايا مانوفيش حقك...
حمزة متبسم: هذا شوي من الهير الي عملتيه فيا قاعد نرد فيه...
حشمت مهبطة راسها: مرسي
حمزة: اممم شفتي صاحبي ميكانسيان حتى هو ساكن مقابلك لكان حتجتي حاجة تلقايه هو ولا مرتو...
وقفت قدام طموبيل هزت راسها: ربي يحفظك حمزة ان شاء نكون جارة خفيفة عليهم... وسامحني في شقوتك...
حمزة: مكان حتى مشكل تحتاجبني في اي حاجة حطبني في بلاصة خوك واجد في اي وقت...
حركتلو راسها ركبت في طموبيل... مش فاهمة علاه ماعجبتهاش كمة قالها حطيني خوك... حطت مفتاح وشافت مع لمرايا ديجا سبقها وديمار... تنهدت وبعدها حتى هي تحركت من لتم... من جيه فرحانة ومن جيهة حاجة وغاطة على قلبها...
