🥀💎 المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 70:
صباح يوم جديد شمس طالعة... مغطيتها غيوم كحلة الجو بارد قطرات مطر ترشرش... ريحة تراب البنينة فوحت الجو...
واقفة في لكوزينة تطيب في الحليب والقهوة... وعقلها غايب فاقت غير على لحليب الي فاض... طفات على نار دمعتها ساحت كون ما خرجش يلعب راهو درك يشرب في قهوتو... مسحت هذاك لحليب والباقي حطاتو في البريق على طابلة... وطلعت تحرك في روحها بسيف... لعند سولا تفيقها...طبطبت على لباب ودخلت لقاتها واقفة تمشط في شعرها عينيها منفخين حمر جمر...
وردة: صباح الخير...
سولا: صباح النور كيفاه صبحتي...
وردة: وانت وش رايك زعمة... حالت وحدة كبدتها مرمية في سبيطار...
قربتلها سولا حضنتها مدورة يديها على ظهرها تمسحلها عليه وتحكي
سولا: خويا راح يرجع وراح نهبلوك انا واياه بعراكنا... وراح تكرهي منا وتنوضي تعيطي وترمي علينا فردة الصباط...
تسمع فيها ودموعها تسيل بعدتها تمسح على شعرها تحكي...
وردة: بنتي كبرت وعادت تعرف تواسي امها... ربي يخليكم ليا...
سولا : ويخليك لينا انت وبابا...
وردة: امين يارب... بالا فيسع البسي راح يفوتك وقت لقراية...
سولا: اااه راح تبعتيني نقرا وخويا مريض؟
وردة: وانت وش راح تعملي وقت تضيعي قراتك اااه... راح تداويه انت؟ بالا فيسع لحليب راح ببرد...( دارت خارجة)ماتطوليش ماتخلينيش نزيد نطلعلك والموضوع مافيهش نقاش...
خرجت راحت لبيت لولاد طبطبت اكثر من مرة اما ماردش فتحت غير شق برك يبقاو ذكورة مايليقش تدخل عليهم من غير مايسمحولها يكونو يبدلو ولا حاجة...بانلها سريرو فارغ...كملت حلت الباب تتاكد...مكانوش ترسمت على وجها علامات الاستغراب وقتاه خرج وهي كفاه مافاقتش...
~~~~~~~
واقف حاط يدو في جيبو...يستنى فيه يجي مرة على مرة يطل على طريق لا جاء ولا مزال...حتى تحطت يد على كتفو خلاتو يدور بلخف...
معتز:هذا انت على سلامتك...
###:الله يسلمك...قالولي تحتاجني غير الخير...
معتز:سمعت بحكاية خويا لبارح اكيد...
###: ايه سمعت وانا وش علاقتي...
معتز قرب ليه حصرو مع الحيط جبدو من تريكو تاعو يحكي:عندك الخو علاقة...وقت تبيع في زبلك لرعيان وخليتيهم يدخلو لحومتنا...هاني نخلص اسيد شباب...
###:نحي يدك (وحط موس في جنبو)بانتلي ماتعرفش شكون انا...
معتز:ماحسوب خفت...نحي خماجك احسنلك...نحب نعرف شكون الي شراو من عندك البارح...ولا وقت يرجعولك اعطيني خبر...
###:وانا وش نربح كما نزفلك اااه...
معتز: ههههه صح قليل اصل... باهي وش تربح... تربح مانزفش بيك انا ولا نحط اسمك عند لابوليس ولتم انت تقر وحدك مع سلعتك عادي تجيب 10 لداخل...وبدليل ثاني...خير عاد انت وينها تخير تزف ولا نزفو بيك...
###:اكيد نزف اما مش خوف منك لا لانو تبقى ولد حومتي...
معتز:تعرف ضحكتني صح... هذا رقمي نحب اول مايجو عندك نسمع وتعطلهم حتى نجيك تفهم...
###:باينة هذي...
