المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 133:
وردة تحكي...
نص نهار كامل وانا حاطة يدي على قلبي... ماقدرتش نفرح بخرجت وليدي معتصم كما يبغي خاطري... حسيت روحي بين ناريين.. مافهمتش علاه كل واحد من ولادي بعقلية ... من طاقة لطاقة نستنى وتلفون في ودني... نطلب فيهم بلواحد وحتى واحد ماكلف نفسو وهز عليا يطمني... ناس داخلة خارجة تطمن هلى معتصم... جثة نتاعي معاهم وعقلي وقلبي عند المهبول الي عطالهولي ربي... واقفة مع شباك حتى قابلتني طموبيل نتع حمزة داخلة الحومة... زادت دقات قلبي مانيش حابة نشوف واحد فيهم ناقص... هما تفتحو بيبان وانا عينيا تفتحو معاهم... اول ماشفتهم لزوج حسيت دم رجع يدور في كامل جسمي... رجعت ريدو وهبطت في دروج... وقتها صولا حلت الباب... قربت حتى لعندو ومن دون تفكير هزيت يدي وعطيتو بكف بكامل القوة الي عندي... وقتها بوجمعة نطق درت شفت معاه..
بوجمعة: وش الي عملتيه... من وقتاه نضربو ولادنا...
وردة: لااااا سامحني مرة هذي ماتخرجنيش غالطة...(درت شفت مع معتز وهزيت صبعي في وجهو...) وقت يولي ولدي مافيا والناس تجيبلي الهدرة عليه... وقت ولدي يروحلي ولدي بلمنظر هذا... هنا سامحوني الكل.... ما ربيتش ولادي باه يرجعولي كما لحرايمية... مستحيل نقبلها تسمعو فيا...
بوجمعة: بصح مش يهذي طريقة وردة كاين كفاه نتفاهمو معاه... نوجهوه مش نضربوه....
وردة: عمري ضربت حد فيكم... دايما راكشة عليهم كما دجاجة... انا الي نهزتسع شهر... انا الي نسهر عليهم انا الي نبات نبدل في لكوش ونقيسفي سخانة...نحط يدي نبقى نثبت الى يتنفسو ولا ... انا الي عيني حرم عليها نوم من وقت ماجبتهم... نعس فيهم في كل حاجة ... تحبني ما نعمل موقف... رجعلي واحد يروحلي واحد... شوف وجهو وقشو كفاه... وقت علمتهم يمشو مع الحيط هو علاه جاي متمرد... مانيش مستعدة نعاود نعيش نفس تجربة معتصم تسمعو فيا... مانيش قادرة ماعدتش نتحمل (هبطت دمعتها تحرق على خدها مسحتها وكملت تحكي ) قولو دكتاتورية قولو متسلطة قولو الي تحبو... وقت تتغمض عيني اعملو الي يساعدكم... اما درك وانا عيني تشوف مانحب نخسر حتى واحد...
قرب منها معتز مهبط راسو صح وجعتو وقت هزت يديها عليه... اما وجعتو اكثر وقت هبطت دمعتها وهي تحاول تبرر... حكم وجها بين يديه وباسها من جبينها بوسة مرصوصة يحكي...
معتز: سامحيني الغالية... غالط ونستعرف الا دموعك يحرقوني... والله ماعدت نعاودها مرة اخرى حطيها غلطة وفاتت... والحمد الله سلامات...
بعدتو عليها تحكي...
وردة: مانسامحكش امعتز... الخوف الي عيشتهولي اليوم ما نسامحكش عليه بهذي سهولة ...
حمزة: يما راك تاج الي فوق راسي... غلط وعرف غلطتو بربي مابقاش يعاودها مرة اخرى...
قربت حضنت امها تحكي سولا: ماما الله يخليك خلينا نفرحو برجعتهم لزوج... والله غشك منا صعيب...
قعد لوجمعة على لكرسي يحكي...
بوجمعة: ايواااه اني غرت منك اوريدة... لكل دايرين بيك وانا واحد لا علبالو بيا...
ضحكت بعدما كانت عابسة وجها: ههه ايواه احسدني حتى في طرف الحب نتع ولادي...
معتصم: بابا انا نحبك ما تغشش برك... خليك منهم لخرين...
خلاهم الكل يضحكو عليه... وعلى هدرتو لحلوة كما هو... رجعو قاعدين متلمين الكل في صالة... وهي عاملة روحها موال متغشة... لازم تكبس روحها شوي باه يعملو حساب مرة جاية قبل لا يغلطو...
