🥀💎 المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 65
طالع في دروج حاط يديه في جيبو... يحس كل بلاصة في جسمو باردة وتسطر... في نفس اليوم زوج ضربات والوحدة اكثر من اختها... حبس وقت سمع خوه معتز يعيط عليه... حبس استغفر بعدها دارلو عاقد حواجبو يحكي...
حمزة : انعم غير الخير...
معتز: قالي سفيان طالع تحكي مع طبيبة...
حمزة: ايه ومن بعد
معتز: جاي معاك نحب نفهم انا ثاني...
حمزة: ااا تحب تجي باه مرة هادي تزيد تضرب طبيبة هذي ثاني... شوف مانسيتلكش وش عملتي قبيل... صح مظغوطين خونا بين لحياة والموت اما وقت الغش نتحكم في اعصابي مش نتهجم على ناس...
معتز: هذاك طبيعي وانت قلتها وقت الغش...
حمزة:ماتعطيش لروحك الحق فهمتي غالط غالط من غير ما نطولو طريق لبعضانا...ودرك احكم بلاصتك...من صباح وانا نشوف فيك تشارع بتلفونات...
معتز:وش تحبنخلي حق خويا يضيع...مستحيل لكان انت تسامح انا مانسامحش...
حمزة:شكون قالك نخليه يضيع... اما نعرف وقتاه نديه... مش كما انت تتبربص كما زربوط... شفتي رزا تاعك هذا الي نكرهو...روح اخطى🤬 ركح روحك ومن بعد عندي هدرة خلاف...
معتز: مكان حتى هدرة الي في راسي نعملو وانت دبر راسك...
حمزة: جرب اعمل حاجة من ورايا وتشوف... ديجا روح شوف والديك... خليني طالع نشوف كشما نفهم حاجة...
خلى خوه وراه يشوف معاه وطلع يحوس بعينيه كشما يلقى واحد يسقسيه...بعدها توله لرقم بيرو قرب بحذاه جبد نفس كبير...وهز يديه متردد ...ثواني واقف بعدها طبطب حتى صوتها
ياسمين:تفضل...
حط يديه على بوانيي وفتحو قابلاتو حاطة راسها مع الورق وكاس في يديها تشرب...ماطلعتش حتى راسها... حمحم بعدها نطق...
حمزة:سلام عليكم...
هزت عينيها مع صوت لخشين المليان بحة
ياسمين:وعليكم السلام...تفضل
تبسم كما شافها عرفها قرب وين البيرو يحكي
حمزة: حكيمة انا خو طفل الي حكالك عليه سفيان ميكانسيان...
ياسمين:ااا داكور بانتلي ههه انا المسؤولة على حالة خوك من غير مانتعب روحي... تفضل اقعد
حمزة: يعيشك (قعد) وي ماتهنيناش حبينا واحد يهنينا عليه...
ياسمين:طبيعي ماتتهناوش خوك هذاك مش لعبة مطيشة هنا...
هبط راسو حمزة يخبي في ضعفو مشبك صوابع يديه في بعض:هذاك مش خويا...
عقدت حواجبها:كفاااه
طلع راسو يشوف معاها عينيه حمر:هذاك روحي ولدي مش خويا مانتخيلش دقيقة وحدة من غيرو...ربي يخليك انت وطبة الي معاك اعملو الي تقدرو عليه...
تسمع فيه راح عقلها لخوها الي غدرها طاحت دمعتها على خدها وتبسمت تحكي
ياسمين:الموت والحياة بيد ربي سبحانو...انا ولا غير مجرد اسباب فقط...حاليا مانقدرو نعملو حتى حاجة من غير انو نستاو جسمو يقاوم...مزال صغرون إنشاءلله يتحدى ويرجع...
حمزة:نتمنى والله (وقف ) سامحيني ديت من وقت...مهم عايلتو كامل لتحت كشما يكون خبرونا...
ياسمين:غير روحو وارتاحو لانو بقاءكم كاعدمو...انا هذا رأي باه تقدرو تقاومو الايام جاية...
حمزة:نشوف كيفاه شكرا حكيمة...ومرة خلاف سامحيني على الي عملو خويا معاك وعلى ازعاجك في الوقت هذا...
تبسمت معاه:لا عادي مكان حتى مشكل
