المكتوب " على عشقك لاموني "

حلقة 21

🥀💎 المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 21:
واقف يجبد في نفس لخر من ڨارو قبل لا يحل الباب ويرميه ... جبدو ورماه عفسو برجليه... يحس في راسو طبلة اما زاهي بيه ... شيخة الليل عملت فيه يستنى بدقيقة ودرج وقتاه يدخل ويلقاها... يحل فلباب يدندن زاهي فرحان عروستو لداخل تستنى فيه... هو حط رجليه وشعل ضوءتقابلو امو هي الي تستنى فيه...
سعيدة: اهلا بسيد رجال...
مسح وجهو كاره قصت عليه شيخة: اهلا لميمة... علاه ساهرة لدرك... إن شاءلله لباس
سعيدة: وهو الي يعاشر مرتك يبقى لباس (وبدات تهبط فهدوك دمعات )
سفيان: خير طفلة وش عملت هذا وين دخلت لدارك صاي كرهتك
سعيدة: اييي ياوليدي وش راح نحكي وش نشكي وش نخلي... هاو خيار يديك مرمدتني وقفت في وجهي على جالها...هاي حاطتني خديمة عليها تقول انا لكن.وهي لعجوزة ... قلتلها بنيتي جيبلي كاس ماء... شعلت فيا من لحزام وأهبط... ما خلاتليش بسبان ... حتى من ضغط طلعلي... ودخت لقيت روحي مرمية فلارض ما كسرتش راسها وفيقتني...
سفيان: متأكدة يما تحكي على جمانة؟ طفلة عاقلة عينها ماتهزهاش...
سعيدة: يا حسرة يا ولدي هذيك راهي لفعة بزوج روس... وراس وليدي انا نقلها يمين تقلي يسار مهم تعكسني وخلاص... وانا مميمتك مرأة كبيرة على روحي ماليش في تكسار راس... ترضى لامك تدلها مرتك مع اخر لعمر... ترضاها؟
مسح خشمو يحكي: ما تقلقيش روحك انا نريڨلها انت روحي ارقدي وما تعمريش راسك بيها...
سعيدة: نعرف ولدي راجل مايرضاش بدل لامو... ربي يخليك ليا وميحرمنيش منك يارب...
خلاها وراح ماشي لبيتو نار شاعلة بين عينيه... وسعيدة تضحك حست انها انتصرت والي وعدتها بيها لعشية عملت بيه...
🔙🔙🔙
سعيدة:يا طفلة جمانة وينها الهم هذي
جومانة:هاني يما سامحيني ما سمعتكش كما عيطتي،...
سعيدة:ايه على خاطر طرشة ماسمعتيش..
جمانة:علاه يايما الهدرة هذي غير كنت مع لكسرة في طاجين...ما سمعتكش علاه الهدرة زايدة...
سعيدة:وش الالة وترديلي في الهدرة يعطيك صحة...روحي روحي جيبيلي كاس نتع ماء
جمانة:باهي يما دقيقة يكون عندك...راحت ورجعت بلكاس...
هزاتو سعيدة من عندها:وش هذا علاه الكاس مضبب...حتى لغسيل مكسرة...حابة ترهجيني (وسيحتلها الماءفي الارض )
شافت معاها جمانة:علاه هك ميمتي...غير هذا وين سيقت...واللهالكاس غسلتو وبجفال...
سعيدة:وش هذا الر علاه روحي جيبي نشاف وعاودي امسحي...ونحب لكسان الكل يتعاود غسيلهم...بنات اخر زمان غير لكسر...
جمانة:حرام عليك واللن غير ظلم الي تعملي فيه...من صباح واقفة على رجل وفي لاخير هذا جزاتي...
سعيدة:يحرم جلدك من عضمك انا حرام عليا يابنت الك*لب...انا تقوليلي هك...الليلة تشوفي لحرام على اصولو...
جمانة:ربي يهديك برك راك في مقام يما ما لقيت مانقول...
سعيدة:وحابة تهدري ثاني اية ذهبي وجهك من وجهي
🔚🔚🔚🔚
وهاي عرفت كفاه تحرش ولدها... تعرفو عليها يحرق لخضر واليابس غير واحد يقلها كلمة ياصار يبكيها... ضربت على رجليها وقفت رايحة لبيتها وعلامات انتصار مرسومة على وجها...تستنى في نتيجة...