🥀💎 المكتـــوب 💎🥀
⭐🌾على عشقـــــك لامـــــــوني 🌾⭐
❌⛔ ممنوع النقل حاليا ⛔❌
🖋 بقلمي: زينب 🖋
حلقة 60:
قاعد حاط راسو بين يديه عينيه حمر جمر... قاعد يرجع في اخر هدرة هدرها معاه... يرد في النفس بسيف...
اما وردة قاعدة مرجعة ظهرها على لكرسي تشوف معاه دموعها محجرة بين شفار عينيها... مكبرة قلبها على كبدتها املها بربي كبيير... تشوف وتتامل فيه بعدها من قوة لوجيعة نطقت...
وردة مع دمعة يتيمة هابطة على خدها : انت سبابو...
سمع وماسمعش هدرتها... طلع راسو يشوف معاها ويثبت في الي قالاتو...
وردة: ايه انت سبابو... انت وقت قتلو ارجع لبيتك تقرا قرايتك... عكستني وقلتي خلي يخرج علاه خانقاتو ... تقول انا مرت باباهم ومانحبلهمش الخير...
بوجمعة: قاعدة تلومي فيا درك ولا تنا مافهمتش...
وردةبعدما علات في صوتها:ايه نلومك علاه مانلومكش ااااه...من دايما نقول انا بيضة تقول كحلة..مهم تعكسوني وخلاص...عدت نحس في روحي مرأة ديكتاتورية...كرهتوني في روحي وفي شخصيتي... نهار كامل ضدي وضد قراراتي (بعدها وقفت من الكرسي تشوف معاه )
بوجمعة: وانا وين نعرف وش راح يصرا... حبيت نخليه يلعب باه يقدر يقرا وقت يقرا بضغط يكره.... قلت يلعب شوي ويروح كما كل مرة ...
صفقت بيديها تضحك بهستيريا وتحكي...
وردة: ههههه ضحكتني هاو يقرا بين يدين ربي درك بردت هك اااه... كبدتي راح نخسرها في جرتك... كبدتي هذاك شويتوني عليها...
سولا: ماما مش وقتها الهدرة هذي...
وردة: انت بدات تسكتي مانحبش نسمع صوتك... نهار كامل انا الي غالطة وانتم على حق...
وقف بوجمعة يشوف معاها: خليها تحكي خلي تفرغ قلبها... دايما هي صحيحة وهات مالقاتلنا غلطة تحكي فيها...من دايما غافصتنا مكرهتلنا حياتنا بأوامرك زايدة...نحكو معاك شوي تبداي عاد بلعياط...احكي الالة نسمع فيك... فرغي قلبك كاين بوجمعة يسمع ويسكت...
سولا:بابا ماما خويا بين الموت والحياة وانتم تتعاركو لهنا...
شافت معاها وردة شوفة خلاتها تبلع لسانها...
وردة: نحكي كون نحكي للعام جاي وتخلاصش لحكاية... هههه معليه لاكتب لولدي عمر جديد راح نعاود حسباتي من الاول... راح نخليك تشوف مرأة خلاف...
بوجمعة: محسوب راح نعيش حاجة جديدة... اسكتي يرحم والديك خليني ساكت خير...
وردة: هههه اهرب كما عادتك ماتقدرش تواجه اهرب اهرب...
سولا: ماااامااااا بااااباااا راح تهبلو وش هذا... خويا لداخل افهمو علاه تعملو هك 😭 كرهنا من لعراك حتى في سبيطار وتتعاركو...راهو ولدكم هذاك اربي علاه علاه...
قرب بوجمعةحضنها يمسح على ظهرها يحكي...
بوجمعة:خلاص تناقشنا برك هذا مكان...
طلعت راسها تشوف معاه:بابا قولي خويا يمنع صح راح يرجع معانا لدار...
شاف مع وردة الي مسحت دموعها وقعدت على لكرسي مدورة وجها عليهم...بعدها رد عليها
بوجمعة:انت ادعيلو يرجعلنا بخير...
سولا:نحب يرجع باه نتعاورك معاها ونعضو على خدوة لقطة الي مايحبهاش...نجري من وراه على جال ستيلو...ندخدخو على يتقطع فيه نفس...نبوسو حتى يقلق ندوشو بسيف عليه...(تحكي وتبكي )
بوجمعة:يكفي من البكاء ...امسحي دموعك لبكاء مايرجعوش...ادعيلو برك...
حركتلو راسها داخلة في حضنو تبكي بساكتة...
