قصص عراقية حقيقية بقلم ابو بغداد سائق التكسي

المعلم

#سالفة_اليوم

أليوم الي اخذت بي الشهادة و نجحت و صرت معلم .. جان يوم مو عادي لا بالنسبة الي ولا حتى بالنسبة لأهلي .. كيفو كلهم و اني الدنيا مشالتني .. بذاك الوكت جان شارعنا كله ما بي معلم .. اني اول واحد انجح و اصير معلم .. و بيتنا تحول اسمه من بيت ابو ثائر (اخويه الجبير) الى بيت المعلم .. صرت معلم .. مكيف .. راح اتوظف .. راح اعلم اجيال .. و راح اتزوج .. لأن جنت بعدني ممتزوج .. احلامي راح تتحقق وحدة وحدة .. و توظفت بمدرسة بمنطقة بصف منطقتنا لزك .. رحت اول يوم تعرفت عالكادر التدريسي .. و اخذت الجدول الي اني راح اشتغل عليه .. و بدت سفرتي وي التعليم ..
احلى شعور من جنت اعلم طفل شي جديد .. و احلى شي من يسألوني .. علاقتي جانت بالطلاب مو علاقة معلم يخوفهم بالضرب لو بالكتل .. جانو يحبوني واني احبهم .. و لأن علاقتي حلوة بيهم جانت درجاتهم كلها زينة و يحبون المدرسة لأن اني موجود .. جنت اساعدهم بكلشي .. و اعلمهم على كل شي حتى لو خارج المنهج .. جنت احب بالفرصة اكعد برى بالساحة اباوع عليهم شلون يلعبون و ابد ما اخليهم يتعاركون .. و حتى بنهاية الدوام من اشوف ثنين يتعاركون اروح اصالحهم و احجي وياهم بأسلوب حلو مو اهددهم بالفصل لو بالكتل .. الكل جان يحبني .. و حتى المعلمين و المدير و المعاون هم جانو يحبوني .. جان احلى شعور عندي من اطلع للسوك و يشوفني طالب .. يسلم عليا بلهفه استاذ استاذ شلونك ..
يسلم عليه و اهله اذا وياه هم يسلمون عليا ..
هالحجي قديم .. بس هسه من داذكره اتذكر وياه حتى ريحة المدرسة .. اتذكر وياه شكل المعلمين و الطلبة .. اتذكر وياه اصوات الطلاب برفعة العلم و صوت الطلاب بالفرصة .. جانت احلى ايام حياتي ..

بيوم من الايام اكو معلم اسمه استاذ صفاء .. استاذ صفاء كعدنا اني وياه نسولف و حجالي على طالبة جديدة  اسمها شيماء جاية نقل من مدرسة ثانية .. كالي هالطالبة كل ما احجي وياها كلمتين و الثالثة تبجي .. كلتله شلون تبجي .. كال ماعرف مدمنة بجي .. و كسولة لدرجة جبيرة يعني كلشي متفتهم و من اسألها على شي كبل تبجي لأن متعرف الحل … كلتله استدعي ولي امرها و حاجي .. وراها بكم يوم اني جنت بالدوام و عندي درس شاغر (يعني ماعندي شي) و جتي بنية لابسه عباية شافتني بالممرات دأمشي كالتلي السلام عليكم استاذ .. كلتلها وعليكم السلام .. كالت انته استاذ صفاء .. كلتلها لا اختي استاذ صفاء عنده درس تفضلي .. كالت اني والدة شيماء و استاذ صفاء داز عليا خير شبيها بنتي .. كلتلها اها هو حجالي على شيماء .. شيماء متحفظ الدروس و تبجي هواي خير شبيها ..
اشو اني دأحجي وي ام شيماء.. رأسا عيونها دمعت .. كالت والله ماعرف شحجيلك استاذ .. كلتلها كولي اختي خير .. كالت ابو شيماء قبل فترة توفى بحادث .. و رجعت اني من بيت اهل زوجي الله يرحمه لبيت اهلي .. و شيماء جانت مدلله من جان ابوها موجود .. و هسه وضعها اختلف و شوية جهال اخوتي ديأذوها .. وكامت تبجي .. اني كلبي انكسر عليها لأم شيماء و خطية هي صغيرة يعني عمرها ٢٠ تقريبا .. كلت بكلبي هاي بهل العمر و هيج مكسورة .. انقهرت عليها لدرجة جبيرة و بنفس الوقت حسيت عبالك هالبنية مسوولة مني .. اني بحياتي كلها مجاية بنية شاكيتلي من شي و لا اصلا صاير بيا هيج موقف .. ماعرف من دتحجي و شفتها تبجي لزمتني العبرة و اني اصلا لحد هاللحظة كلبي كلش حنين .. ردت الزمها و اسكتها بس استحيت .. كلتلها سهله روحي واني اوصل هالحجي لاستاذ صفاء .. و حجيت وي استاذ صفاء .. و كمت اني ادور على شيماء بالمدرسة .. كل ما اشوفها اصيحها يمي و احجي وياها و مرات اخذلها نستله وياي .. الطفلة شوية تغيرت و تحسن مستواها .. بس صورة امها متروح من راسي ..و بيوم من الايام نمت كعدت الصبح كلت لأمي اريد اتزوج .. امي كالت هسه اشوفلك احسن وحدة ..
كلتلها لا اكو وحدة براسي .. كالت معلمة وياك ؟؟
كلتلها لا .. كالت جوارين كرايب .. كلتلها لا ام طالبة عندنا بالمدرسة .. امي كالت شنووووو ام طالبة مطلكة يعني .. كلتلها لا ارملة .. زوجها توفى قبل فترة .. كالت انته مخبل تتزوج وحدة ميت زوجها و عدها جهال .. كلتلها ماعدها بس بنية وحدة وهي صغيرة .. كالت صخام الصخمك تجيب مرية و علاكه وياها … كلتلها شنو علاكة كالت يعني بتها علاكة وياها .. كلتلها يمه البنية عاجبتني و اريدها .. كالت والله لا امك و لا اعرفك و لا تعرفني اذا تسويها ولك انته معلم و الف وحدة تتمناك شدتحجي انته .. و راحت حجت لأبوية و هم ما قبل .. و رزلني و كالي نفس الحجي .. اخوتي الاكبر مني هم حاجوني وجانو رافضين بس اخوية الوسطاني ما علق عالموضوع و حسيت جان طابك وياي ..  بس اني قفلت .. ابوية كالي من الاخير اذا تريدها و كاتل روحك عليها  .. روح شوفلك مكان ثاني روح تزوج بي و انسانا .. كلتله يابه انته صدك تحجي .. كال مثل ما اكلك .. هذولة بنات عمامك بنات خوالك تارسات عين الشمس و انته ملكيت غير وحدة رجلها ميت و عدها جاهله فوكاها .. كلتله ماشي ..
ورحت شفت مشتمل صغير اجرته و عزلت من اهلي و بديت شوية شوية ارتبه للمشتمل .. و طبعا اداينت من اخوية الوسطاني لأن هو الوحيد امكانيته زينة و علاقتي بي كلش قوية والوحيد هو جان طابك وياي .. اشتريت شغلات بسيطة و اخذت بالاقساط اغراض هم من صديق عنده محل كهربائيات و صدك عفت البيت .. و رحت تقدمت للبنية و فهمت اهلها من البداية انو اهلي رافضين لذلك اني جاي وحدي و سبب رفضهم شنو .. بصراحة ام البنية جانت شوية رافضة بس اخوتها بس رادو يدفعوها وجانو من جانبي .. كبل وافقو و تزوجتها .. البنية فقيرة لدرجة اذا اكلها هاي نار و شمري نفسك بهل النار ..
والله العظيم تشمر روحها بالنار .. مراح اكول نستني اهلي لأن بس ابن الحرام يكول هالحجاية .. بس اكول وياها ارتاحيت .. حسيت بطعم السعادة بكل انواعة .. و سبحان الله على كصتها امور هواي مشت بسرعة .. حتى الاقساط الي جنت شايللها هم كامت بسرعة تتوفى فلوسها .. بس اهلي ما احجي وياهم والوحيد الي عندي اتصال بي هو اخوية الوسطاني يجيني بين فترة فترة و طبعا اني تحولت بنفس المنطقة الي بيها مدرستي و شغلي .. و بقت علاقتي مكطوعة بأهلي ٣ سنوات .. صار عندي طفل و بالجذب محد ما اجاني كالي مبروك .. و طبعا شيماء تعدلت وضعيتها و كامت تصيحلي بابا .. صرت ابوها اني .. و الله العظيم و حق الي رفع السماء بدون عواميد ما فرقت بيوم بينها وبين جهالي لهذا يومنا ..
المهم .. ورى تلث سنوات والدتي تمرضت كلش .. واخوية الوسطاني فاضل هو الي كالي لازم تشوف امك ترى امنا مواته .. كلتله و شلون افوت للبيت .. كال اني افوتك .. رحت تواعدت وياه واخذت ابني وياي حتى امي تشوفه .. و فتت و بوست ايدي امي وبجيت كومة .. امي من شافت ابني وياي شوية ارتاحت و كالت هسه احاجي ابوك انته لازم ترجع خلص .. و رحت حجيت لزوجتي كيفت خطية بس كلتلها ترى اني ما ارجع بعد لبيت اهلي .. بس على الاقل علاقتي ترجع بأبوية .. و ثاني يوم اجاني اخوية اني كلت راح يفرحني انو امي حاجت ابوية و خلص .. جان اول مشافني حضني وكام يبجي كالي البقاء بحياتك .. جان يوم اسود .. اسود لدرجة جبيرة بحياتي .. رحت للفاتحة و ابوية طردني كبال الناس .. ملحكت امي ترجع علاقتي بي و فوكاها يكلي امك ماتت مراضيه عنك .. اخوية كاله البارحة فات للبيت و امي صالحته و رادت تحاجيك بس ملك الموت منطاها فرصة .. كايل لاخوية انتو جذابين ثنينكم و انته اصلا طابك وي اخوك العاق الي كسر كلمتنه .. و اخذت عزاء امي ببيتي .. سويتلها فاتحه بمنطقتي .. و حلفت بروحها بعد بيت ابوية ما افوته .. و مرت سنين و جهالي كبرو و توفى والدي .. و رجعت علاقتي بأخوتي بس البيت مدخلته بعد .. حتى الورث تنازلت عنه لأخوية الوسطاني  .. لان الحمدلله وضعيتي المادية تحسنت بمرور السنين و بطلت بصراحة من التعليم وعندي هسه مصدر رزق مختلف كل الاختلاف عن التعليم ..و هسه اني داحجي و هذا الي كاعد على رجلي هو ابن شيماء .. كرومي (اسمه على اسمي لأن اني اسمي كريم) .. المدلل مالتي نسختي .. اذا يمر اسبوع و متجيبه شيماء يمي مهددها لا اني ابوها ولا اعرفها ولا تعرفني هههههه و الحمدلله على كل حال .. طبعا يجوز اني غلطت لان كسرت كلمة ابوية وامي بذاك الوكت .. و يجوز اني صح .. بس بالحالتين اني مفوض امري لله .. اذا جنت غلط فأتمنى يعفو عني و يسامحني .. و اذا جنت صح الله يسامح ابوية و امي .. واني باريهم الذمة .. المهم الله يحفظلي جهالي و زوجتي و شيماء و كرومي .. و يحفظ الجميع ..
(المعلم)
انتهى
#منقول.