قصص عراقية حقيقية بقلم ابو بغداد سائق التكسي

آسف

اختي الصغيرة جانت عدها خنكة تجيها بين فترة و فترة ولازم ننومها مستشفى … الخنكه يحتاجلها اوكسجين … اني رحت وي امي وابوية و بقينا يمها بذاك اليوم … ابوية امي كالتله ارجع للبيت واني و مريم نبقى يم شهد … راح ابوية و اني وامي نمنا وياها .. بذاك الوكت جنت اداوم كلية .. سنة اولى …
بذاك الوكت مجان اكو تلفون التهي بي و لا اكو تطبيقات اكعد اشغلها بليل … جنت اكثر شي احبه هو دفتر ذكرياتي و اتوقع اغلب البنات بذاك الوكت (بالتسعينات) عدهم دفتر ذكريات .. جنت مرات اجيب صمغ و اكص بالمكص اشكال ورقية ملونه و الزكها .. و حتى مرات جنت اشتري اقلام جاف ام العطر اكتب بيهم الذكريات … بس مجنت اكتب كلشي لان ميكفي .. جنت اكتب بس الشغلات المهمة الي تصير بيومي … و جنت كاتبة بالصفحة الاولى من الدفتر عنوانا و اسم كليتي و جواها رقم تلفونا الارضي و بنفس الوكت كاتبة اسماء المدارس الابتدائية والمتوسطة و الاعدادية الي داومت بيهم … حتى الالوان الي احبهم جنت كاتبهم … هالدفتر من كثر ما اروح وي شهد وامي جنت دائما اخذه وياي لأن اعرف احنا نبات وياها … و فد يوم رحنا مثل مكلت و بقينا وي شهودة بالمستشفى .. اني بليل طلعت كعدت بالردهة … جانت فارغة كلش و بنهايتها اكو شمعة سقفية تشتغل و تطفى ... الكراسي جانت متصلة وحدة بالثانية بس مو لزك .. بينهم مسافة بس كلهم على حديدة وحدة … الكاشي جان مبلل شوية .. و تقريبا يم الشمعة الي تشتغل وتطفي اكو مرية لازم ماسحة جبيرة مو مثل الماسحة مال بيوتنا الصغيرة و كاعدة تمسح الكاع … الجو ليل و صوت كحه اكو بس من يا غرفة تحديدا ماعرف .. الصوت جان بعيد بالبداية .. و شوية شوية كام يتقرب .. اني جنت اكتب بنفس الوقت الي صوت الكحة كام يتقرب … و كل شوية اعوف القلم و اسمع صوت الكحه .. الصوت جان صوت كحه بس لرجال مو مرية .. لان خشن كلش … و صار صوت فتحة باب … انفتحت الباب طلع ولد شاب طويل لابس تراكسود من هذا التراكسود الي بذيج الفترة صار مثل الموديل .. الي لبسه هيثم يوسف باغانية و حاتم العراقي … جان التراكسود مالته بنفسجي و ازرك … باوع عليا و جان يكح و هو ديكح كال اسف يمكن ضوجتج كحتي … كلتله لا مصار شي … اني بهل الحجي جنت لابس بنطرون كابوي و تيشرت شتوي ابو الكلاو .. و جنت نازعة النعال (مكرم القارئ) و مصعدة رجليناتي عالكراسي الي بصفي … و الدفتر جان بحضني … هو تقرب اني رأسا شلت رجليناتي هو عباله اني خفت منه .. بس اني احترما الى نزلتهم ..
هو بهل الحركة مالتي كال ترى ما اعدي ههههه .. كلتله لا والله ترى مو قصدي بس اخاف تريد تكعد … كال اي والله كرهت جو الغرفة ممكن اكعد ؟
كلتله تفضل .. كعد بس كعد بعيد عني .. جان يكول تعرفين صلاح .. ابتسمت كلتله منو صلاح و شمعرفني بي .. كال صلاح جوارينا ابو جان عنده محلات مال اقمشة بالسوق العربي .. من توفى ابوه هو ورث المحلات وهسه هو لازمهم … و سكت .. ضحكت اني وكلتله و شنو قصدك ؟
كال الناس تورث محلات تورث عمارات تورث قطع اراضي واني ورثت الربو و ضحك و كام يكح ههههههه .. اني ضحكت كلتله الله يشافيك اني هم اختي عدها هيج شي و جايين وياها و هم كل فترة نجيبها ننومها هنا .. كال انتي دتدرسين اخاف واني الهيج عن دراستج .. كلتله لا والله بس هذا دفتر اكتب بي ذكرياتي … كال حلو و راح تكتبين بي التقيت بواحد دوخني بالكحه مالته و حجالي عن صلاح الي اصلا اني ماعرفه هههه .. ضحكت اني كلتله يجوز .. كال زين انتي تدرسين ؟؟؟
كلتله اي اني مرحلة اولى .. كال حلو .. سألته وانته ؟
كال اني تخرجت بس بعدني ممتعين … و كال دقيقة عندي شغلة خلي اجيبها تشوفيها .. جان يفوت جوى للغرفة و رجع جايب وياه دفتر .. الدفتر مالته كله رسومات بس الرسومات البي مال افلام كارتون … يعني راسم عدنان وعبسي .. كرندايزر .. كابتن ماجد … جنت داكلب بالرسومات و كلتله شنو ماكو شخصيات بنات اشو كلهم ولد … كال دكلبي هسه يطلعون .. بقيت اكلب جان اشوف ساندي بيل و سالي و جورجي … و حتى راسم بشار هذا النحلة … بس بالنهاية جان كاتب كلمة الكلمة جانت (اسف) سألته كلتله شنو اسف و اشو خاطها بخط جبير … كال كل حرف من كلمة اسف يمثلي شخص … ابتسمت كلتله هاي يرادلها جاي تشرب جاي ؟
كال ياريت … طبيت للغرفة يم امي وجانت امي نايمة بصف شهودة و حاضنتها .. طلعت الترمز مال الجاي الي نجيبه ويانا دائما لأن امي واني نشرب جاي هواي … صبيت كلاص اليا و كلاص للولد .. طلعت لكيت الولد ماكو فد ضجت طبعا … بقيت شايله الكلاصات بيدي و واكفه .. جان تنفتح الباب وطلع ابتسمت وكيفت هههه .. شفته شايل كلاص بيده .. كلتله هاي شنو مو صبيتلك .. كال انطيني الجاي .. جان ياخذ الكلاص الصبيته الى و داره بالكلاص مالته .. كال هيج احسن .. كلتله ليش يمعود انته من كل عقلك عبالك خايفه لا تعديني ترى الربو ميعدي ههههه كال هاي شنو ترى هالمعلومة اني كلتلجياها .. ابتسمت اني و كلتله لا صدك ليش درت الجاي بكلاصك .. كال هسه دتعالي احجيلج … كلتله يله بس ولو هاي محبيتها مال عبالك خايفة … ورجعنا كملنا كعدتنا … كال اول حرف من اسف (أ) ايمان … ايمان اول بنية بحياتي .. كبرت و هيه كبرت كبال عيني .. جوارينا … حبيتها و جنت من بعيد لبعيد اراقبها بعيوني … جنت احسها شخصية من شخصيات افلام الكارتون .. كل ما اشوف شخصية محبوبة بالكارتون اتخيلها ايمان … فلم عربي يطلع تطلع بي ممثله حتى لو بس عيونها تشبها اشوفها هيه … بس اخاف اروح احجي وياها .. لان جوارينا و اخاف من ردة فعلها و ردة فعل اهلي اذا عرفو … مع العلم جانت عيوني تحاجي عيونها وعيونها تحاجي عيوني بكل مرة نلتقي بيها بمكان … حبي الها جان حب بريء مابي شي غلط .. جنت بوكتها بصف خامس اعدادي … و مرة كلت خلي اكول لأمي اريد اتزوجها .. أمي كالت يمه بعدك لا شهادة لا وظيفة لا شغل قابل تجيبها ابوك يصرف عليها هههههه ..
وبقى حبها عايش بيا بس متجرأت اروح اكلها اني احبج … و تدرين بالعراق ماكو عمر محدد لزواج البنية .. صغيرة جبيرة تتزوج .. جانت هيه بصف رابع اعدادي و جوها خطابة .. ابوها شخصيته كلش قوية و كلشي بيده .. قبل حتى بدون موافقتها وطبعا هالحجي بعدين عرفته من اختي … اختي جانت صديقتها … و طبعا هيه طلعت هم تحبني بس منتظرة مني اول خطوه .. و ورى يومين من خطوبتها اختي راحتلها و لكتها تبجي و هالحجي منقول حرفيا عن لسان اختي .. كالتلها اني ماريد اتزوج اريد اكمل دراسة بس ابوية غصبني .. و بنفس الوكت كايلتلها اني جنت احب اخوج بس هو محاجاني بيوم و جنت دائما اطول بالنظرة وياه من يصير كبالي حتى بس يحس وهو هم يباوع بس ميحجي .. اختي بوكتها من كالتلي اختنكت و لزمتني نوبة الربو بالكحه .. و المصيبة بعد شيفيد الحجي اصلا استحيت و خفت عالبنية لان انخطبت .. سكتت و ضميت الي بكلبي و البنية راحت و تزوجت … هاي حرف اليف راح من ايدي … نجي على (س) سمر … سمر حلم جانت … شكلها طبيعي و كلش هادئ .. تعرفت عليها بالكلية بموقف عجيب … جنت سنة اخيرة و هي سنة اولى … فرق بيني وبينها و جانت جديدة و متعرف احد … تروح بطريقها وترجع بطريقها … بيوم من الايام اني واكف برى بالباب مال الكلية وي ولد … و عيني عالباب مال كلية دانتظر ولد صاحبنا ثالث يطلع علمود نروح بشغلة … ازدحام و طلبة ديطلعون … هي طلعت مستعجلة و جانت لابسة قميص ابيض و تنورة رصاصي مال زي موحد .. اني عيني صارت عليها و اني اصلا جنت دائما اباوع عليها بس هيه متباع عليا … طلعت مستعجلة و قميصها جلب بالحديدة مال باب لان شباب ديطلعون وهسه مستعجلة و انحصرت يم الباب .. انشك قميصها و هيه حاولت تتلافى الموقف بس الشك جان جبير … شكلها انكلب المسكينة اني ركضت عليها وجنت لابس ستره بس الستره رجالي البسها فوك القميص الابيض .. هيه مشت سريع واني لحكتها .. طبعا اني ماعرف اسمها .. نزعت سترتي و خليتها على ايدي ولحكتها .. كلتلها و حاجيتها و هي بالكوه ردت عليا .. كلتلها هاج الستره ترى اني جنت واكف و شفت الي صار … و اخذت الستره و لبستها ههههه طلعت عبالك سمير غانم من جان يسوي فاوزير بطوطه .. وراحت و ثاني يوم رجعتلي السترة .. و كمت احجي وياها من ورى هالموقف …
حبيتها و هي بدت تحبني … و كمنا نتشاوف دائما يم الكلية ورى متخرجت اني .. و نتخابر بالتلفون هم .. و فد يوم اتصلت بيا تبجي .. كلتلها شكو ؟
كالت راح نسافر لألمانيا يم خالتي و امي قافلة اذا وصلنا هناك بعد منرجع .. طبعا السفر بذاك الوكت جان صعب بس ابوها جبير بالعمر و امها هم جبيرة وهيه بنية ما عليهم تشدد مثل الشباب و خصوصا بذاك الوكت الي ممخلص عسكرية ابد ميكدر يسافر بس همه خالتهم دازتلهم دعوى و كلشي رسمي .. كلتلها واني .. جان تكول هو بيدي ابوية و امي اتفقو عالشغلة واني الوحيدة الهم قابل شبيدي .. كلتلها لعد خلي اخطبج حتى اذا سافرتي ورى فترة ترجعين .. كالت وانته من كل عقلك ابوية وامي يقبلون هسه يكولون لا لان ورانا سفر .. كلتلها وانتي ؟
كالت اني احبك بس مو بيدي خلي اسافر و نبقى نتواصل و اكيد ادبر حل .. طبعا اني خفت بذاك اليوم بس ماكو حل اني بعدني ممتوظف و بعدني ماعندي ذاك الشغل الي يخليني كبل اخطب واتزوج وافتح بيت .. واهلي ناس على كد حالهم .. بلعت لساني بحلكي و صدك والله كلشي بسرعة بسرعة صار و سافرو .. بقت تتواصل وياي بس جانت الاتصالات غالية و ماكو موبايل جنت اتصل بيها عالارضي و تجي الفاتورة نار .. وهي من وصلت هناك البرد الي باوربا يمكن اثر عليها و برد مشاعرها تجاهي .. كامت شوية شوية تقلل الاتصال .. واخر مرة كالت منرهم نبقى سوى اني هنا بديت حياة جديدة وماكدر اعوف اهلي تكدر تجيني ؟؟؟ كلتلها اجي .. كالت تعال وهنا نتزوج .. بقيت احاول اكثر من مرة بس مصارت لان صعبة بذاك الوكت السفر و حتى التهريب جان يخوف و مابي ضمان و حاولت التقي بمهربين بس كلهم مو ضمان لأن يطلبون الدفع مقدما .. اخر شي اتصلت بيها كالت اكلك حتى لو تجي بعد مترهم لأن هنا اكو ولد عراقي دكتور مال اسنان ابوه صار صديق ابوية وتقدملي وابوية وافق .. كلتلها و تعوفيني .. كالت مو بيدي .. و تعاوفنا .. مراح اكول تعبت و انقهرت لأن تدمرت وراها … بس هم الدنيا مشت و جتي الاخيرة الي هيه (ف) فاتن … فاتن موظفة بالطابو ..
وهالحجي قبل فترة مو بعيدة … يعني قبل ما اشوفج اليوم نكول بسنة ونص .. من شفت التعيين تعطل اشتغلت وي ولد عرف معقب معاملات .. لأن اني خريج وشوية عندي خبرة .. عرفني عالموظفين و عرفني خصوصا عالموظفين الي ياخذون فلوس من جوى العباية … و كمت بالمعاملات انطيهم و يسرعولي المعاملة .. فاتن جانت موظفة بس جديدة … وطبعا مو من ضمن الموظفين الي ياخذون فلوس .. هيه صغيرونه .. و جديد متعينة .. و جانت بس تريد تعيش .. اهلها امكانيتهم على كد الحال .. طبعا هالحجي ورى متعرفت عليها عرفته .. اول حجاية حجتها بعلاقتي بيها (زواج) البنية تريد زواج و بس .. متدور علاقات و حب .. واني هم جنت ادور زواج بس ستوني جنت مشتغل يعني ممجمع .. هي كالت اني اساعدك و انته هم تساعدني و نبدي من الصفر .. و صدك والله البنية جانت هيج … جانت عملية كلش و راسمة كلشي براسها ..
و حاولت تدفعني الكه وظيفة .. بس شسوي ملكيت .. بقيت هيج اشتغل والكط رزقي من تعقيب المعاملات .. وفد يوم جتني كالت متقدملي واحد امكانيته زينة و هو جان عنده معاملة بالدائرة و شايفني و سأل عليا و الرجال ميتعيب …و مندل بيتنا و كبل فات من الباب و اني بعدني ممنطية جوابي .. اني بوكتها من حجت عبالي هي تريد تجس نبضي .. كلتلها يابه مو دشوفين الوضع شسوي يعني ..
هاي داركض منا ومنا مخليت دائرة مدكيت بابها و رغم ما شهادتي جبيرة هاي كاعد اعقب معاملات شسوي احجيلي .. كالت انت تعرف البنية من تعبر فلان عمر و متتزوج هنا بالعراق يعتبروها عنست و اني ماريد .. كلتلها اشششششش لاتكملين كلامج الي تريدي سويي .. و عفتها ورحت و اني بكل خطوه امشيها ادعي تصيحني .. بس مصاحتني و متصلت بيا بعد و من اروح للدائرة متحجي وياي ولا تباع بوجهي … اخر شي ورى شهر تقريبا كلت كافي كرامة و كبرياء خلي اني اروحلها لان ماريدها تروح مني ……… ورحتلها للشباك مالتها و جنت شايل وردة وياي مخليها ورى ظهري ههههههه ..
جان تشوفني ابتسمت و اني ابتسمت كلتلها شلونج ياوردة .. جان ترفع ايدها و شوفتني الحلقة .. كلتلها بهل السرعة ؟
كالت انت بعت .. كلتلها ماشي و لزمتني الكحه وطلعت برى الدائرة و وراها بطلت شغلي بالتعقيب .. وهاي جانت اخر حرف بس سبحان الله .. مرة كتبت اسامي البنات و ماعرف شلون عيوني راحت على اول احرف من اساميهم و كتبتهم سوى طلعو كلمة (اسف) و بصراحة ماعرف اكول اسف لا ايمان لان مكلتلها اني احبج بس حتى لو كايل جان شغيرت ؟؟؟ لو اكول اسف لسمر لأن مكدرت اوصللها بسرعة و اصلا شلون اوصللها .. لو اكول اسف لفاتن الي رادت زواج بس اني هم بعدني ماعندي امكانية … اسف ههههه لنفسي يمكن ..
لو اسف للوضع الي كله صاير واسطات و رشاوي … لو اسف عالسنين الي درست بيهم و شبعت تعب و تاليها شهادة خاتله بالكنتور .. لو اسف اكولها للأهلي الي منتظرين مني اساعدهم واني ايد ورى و ايد كدام .. وفوكاها ماكدر اشتغل اي شغله لأن الربو ملعب نفسي و جربت مرة اشتغل عماله بس العماله كلها تراب و اني التراب يشك صدري شك .. اسف المن و المن و المن احجيها … اسف لأمي المسكينة الي تدعيلي من الصبح لليل اتوظف لو اشتغل شغلة بيها خير .. اسف المن .. احسن شي اكلج الج اسف لان دوختج بقصتي ههههههههههههه .. كلتله لا و طبعا هالحجي الصبح صبح علينا و الشمس دخلتنا من الشباك .. كال طلع علينا النهار و اني اسف سهرتج وياي .. بس ممكن طلب .. كلتله كول .. كال ممكن اكتب شي بدفتر ذكرياتج .. و بتاريخ اليوم .. كلتله اي هاك و انطيته القلم .. كتب .. جملة وحدة
( الحياة حلوة لأثنين بس .. للعنده فلوس و العنده ظهر و معارف .. و الباقي مجرد عدد .. اسف) ابتسمت اني وكلتله هم كتبت اسف هههه كال اسف و راح لغرفته بس ظهره منحني و حسيت لزمته العبره و راد يبجي بالغرفة لوحدة .. و ثاني يوم طلعنا شهد و رجعنا للبيت بس ابد منسيته .. و راحت سنين وجتي سنين و ما شفته بعد .. شكد تمنيت اشوفه صدفه بس مع الاسف مشفته .. يجوز اذا يقرأ القصة يعرف نفسه .. اريد اكله كلمتين .. اني بكل فترة الكلية جنت انتظر اشوفك تجي تزورني لأن كلتلك اني بيا كلية .. بس انته ما جيت .. تصدك جانت امنيتي شنو .. جانت امنيتي امسح كلمة اسف بكل ذكرياتها و بكل وجعها .. واخلي اسمي بس ……مريم….. بس كلت اتمنى .. و تبقى امنية بالاول والاخير ..
(اسف)
انتهى اخوكم ابو بغداد سايق التكسي
#ابوـبغداد