قصص عراقية حقيقية بقلم ابو بغداد سائق التكسي

صادق وامه

شكد ظهر العراق حار و شكد الدنيا حارة وخصوصا الظهر جنت ابقى كاعدة ورى الباب و فاتحه شوية منها و اراقبه شيسوي و عيوني عليه … العرك من جان ينزل على عيوني من الحر امسحه بسرعه حتى عيني ترجع تكمل مراقبته و ما تغفل عنه  … جان من يخسر بالدعابل يكول لصديقه ترى اني ملعبت كل قوتي اني من يكول هيج ابتسم و اضحك بيني و بين نفسي .. و كل شوية اكله ها يمه ما جعت متجي تاكل ؟؟؟
يكول لا يمه خلي العب … روحي بي ساكنه و ماعندي غيره و خصوصا هو اجه بعد زواجي بسبع سنوات … اغلب الي يعرفوني من اقربائي و حتى صديقاتي جانو يكولون روحو سوو تحليل روحو دكتور فلان و جانو يجيبون عناوين لدكاتره اصلا احنا مطالبيها ولا مدورين عليها لا اني ولا رجلي و جنا عايفيها على الله … صار جهال صار .. مصار شنسوي يعني … و اخر شي انرزقنا بصادق … صادق من اجه للدنيا هو وصغير يبجي حاله حال الجهال … جنا مثلا اني وابوه بالصالة كاعدين وصادق نايم بالغرفة … من يبجي ابوه يكلي عوفي يبجي عليج الله صار سنين منتظر اسمع هالصوت بالبيت … بس اني كلبي مينطيني اكله درووووح خلي اشوف الولد يمعود ههههه .. جنت اركض عليه احضنه و ابوس بي واشمشم بي … صادق من بده يكبر الخوف عليه صار اكثر .. ابوه جان كل شوية يخابرني من شغله .. يسأل عليا وعلى صادق .. و طبعا حاله حال كل الجهال يحب يلعب برى .. جنت هواي احاول ادخل صادق و اصدقائه الجهال للحديقة يلعبون بس ميقبلون يحبون يلعبون برى .. عيوني جانت متغيب عنه .. و لحد هسه اتذكر اول يوم لصادق بالمدرسه … رحت وصلته للصف و بقيت يم السياج واكفه بجيت من عفته جوى .. لأن هو مجان مرتاح  حبيبي للمدرسة حاله حال كل الاطفال بأول يوم الهم بالدراسة … بقيت منتظرته و تاليها جبت بلوكه و كعدت يم السياج انتظره يطلع .. من بدو يطلعون الجهال صار عندي عيد ركضت انتظرته و اول مطلع حضنته عبالك مشايفته صار سنين … جنت اعبيله الجنطه مالته اكل حتى ميكدر يشيلها و جنت اني اودي للباب مال مدرسة اساعدة بشيلة الجنطه … و سنة ورى سنة يكبر كبال عيوني و اني مدللته و دخل متوسطة اول عركة لصادق وانضرب بيها جانت بالاول متوسط .. من جانت بالابتدائية العركات مالته جانت كلها بسيطة بس بالمتوسطة انضرب بخشبة وانشكت ايده .. اني الليل كله ابجي عليه وهو يضحك عليا يكلي امي اني رجال يمعودة وترى عادي تصير عركات و راح تصير .. حلفته ميسوي عركات بعد و صدك سمع كلامي لان انقهر عليا من شافني هيج مفرفحه عليه و خايفة … اني جنت احس هو يتعارك برى بس يجي ميحجي حتى ميقهرني … و من خلص المتوسطة ودخل اعدادية حسيته كبر صار صدك رجال .. كام يساعد ابوه بالشغل و اول علاقة حب لصادق مو صادق وحده عاشها حتى اني عشت وياه بيها … جان يحجيلي على الي يحبها هي هم طالبه اعدادية اسمها نور و هو يدلعها نونه … جان يحجيلي عليها و جان يخليها تسلم عليا بالتلفون …  و نجح صادق و بده يداوم بالكليه …
صادق يحب الرسم ..هوايته الرسم .. بس كليته واختصاصه بعيد كلش عن هوايته .. جان محبوب ومحترم بين اصدقاءه و المنطقة كلها تحلف براسه .. يساعد الجوارين و يسلم عالصغير والجبير بالمنطقة … جان احلى شعور احسه من نطلع اني وياه نتمشى و اشوف الناس كلها تسلم عليه وهو يبتسم و يسأل عليهم .. و احلى شي بعد من نصعد اني وياه كوستر و واحد يصيح واصل خوية صادق انته والحجية .. جنت ابتسم بس صادق ميقبل وهو الي يدفع … رجال جان رجال .. شكله وطوله وهيبته تخبل .. كليته جانت بباب المعظم .. و بذاك الوكت بدت الطائفية تدك بواب العراق .. ودخلت مع الاسف .. من جنا نسمع اني و ابوه على سوالف القتل عالهوية نخاف كلش .. بس صادق جان يضحك يكول اني امشي بزودي وما اخاف لان مقسوم نصين .. انتي شكل و ابوية شكل (يقصد عالطائفة و على اللقب) .. احنا جنا نخاف عليه و منقبل يداوم بس هو يكول بالطريق لكليتي ماكو شي .. وراح صادق يمه .. راح وليدي الي ربيته بليله ويوم .. استلمنا من الطب العدلي و الطلقة حافرة راسه حفر بعد امه .. بذيج الدقيقة كمت اصيح ياريت بيا ولا بيك صادق .. ابوه تخربط واني حاضنته ابوس بي و اشمشم بي و بذيج اللحظة والله والله والله وحق روحه الطاهرة اباوع عليه اشوفه ذاك الطفل الصغير الي جنت احضنه من يبجي .. شكله تغير بعيوني … بقيت اجر بي واريد اخذه للبيت و الناس متقبل يكولون حرام كافي الي تسوي حرام .. كلتلهم عوفوني اني كافره اريد اخذ ابني للبيت هذا ابني عوفوني اخذه ابوس ايدكم اريده ابني هذا ابني .. يكولولي حرام .. لعد مو حرام يضربوه طلقة .. مو حرام يحرموني منه اني وابوه و حبيبته نور .. جان يريد يتخرج حتى يتزوج نور .. اخذوه مني و هو ممسوي شي … اليوم اني بنص المتظاهرين افتر اني وابوه .. اباوع بالوجوه و اركض عليهم ابوسهم من راسهم .. اشوف صادق بيهم والله اشوف وجه صادق بيهم .. ابوه يجرني كل شوية .. اكله الله عليك هذا مو شعره مثل شعر صادق .. هذاك الولد الواكف يم الحايط مو بطول صادق … يكلي اي .. و امشي شوية اشوف واحد نفس عيون صادق والله .. ابو صادق يبجي يكلي كافي .. اني ابتسم اكله لا .. مو كافي هذولة الي بالمظاهرات همه الجابو حق صادق و كتلو الطائفية الي اخذت مني صادق … اني مو الام الوحيدة الي فقدت ابنها بالطائفية لو بالحرب لو بالمظاهرات .. بس الولد عزيز .. و صادق ابشرك اخذو ثارك الثوار و كتلو الطائفية الي اخذتك مني .. حبيبي صادق كلهم بعمرك و كلهم يشبهوك.. حبيبي نام مرتاح هسه ..
(صادق و امه )
انتهى
اخوكم ابو بغداد سايق التكسي
#ابوـبغداد