قصص عراقية حقيقية بقلم ابو بغداد سائق التكسي

ام الصالون

بسالفة نزول السوك بالتسعينات .. والدي تاذت مصالحه و خسر هواي .. وفوك خسارته دخل بشغلة ثانيه علمود يعوض الخسارة بس هم خسر بيها .. وراها كال راح نبيع البيت و نتحول بمنطقة ثانية و بالفرق مال فلوس البيت اسوي فد مشروع … طبعا هو شغله جان بالاجهزة الكربائية .. بس كلنا بالبيت حسينا ابونه مثل تغير .. ضعف و نفسيته صارت مكسورة و هواي يتعارك بالبيت على ابسط الامور … احنا بالبيت خمس بنات و امي .. ما عدنا اخ ولد … و طبعا الجبيرة اني جان عمري ١٧ سنه … جنت طالبة اعدادي .. تحولنا لمنطقة ثانيه .. و نقل مدارسنه كلنه … و هم دخل بفلوس الفرق مال البيت بسالفة وهم ما نجحت .. تمرض كلش .. و يوم ورى يوم نراجع بي دكاتره و مستشفيات بس ما كدر يتحمل سالفة الخسارة وحده ورى وحده وتوفى … عافنه لوحدنه .. و ياريت لو عمامي وكفو ويانه .. وحقهم لان هو من جان عنده فلوس جان كلهم مقاطعهم و يحس كل الناس تتقرب منه علمود فلوسه .. عالعموم الله يرحمه … بقينا بالبيت بس نسوان … امي اصلا جانت معلمه و من تزوجت ابويه بطلت .. من ابوية توفى رجعت لوظيفتها بس راتبها جان رمزي كلش .. و احنا طالبات و عدنا مصاريف و اني ورايا كليه … قررت ان اشتغل … و ما لكيت شغله غير بس صالون نسائي بمنطقتنه .. من دخلت اول يوم للصالون .. دخلت مثل العميه .. كل شي جديد عليا … لان اصلا اني جانت علاقاتي كلها بس وي اهلي و خواتي و صديقاتي بالدوام .. بالصالون كمت اتعلم سوالف مال تجميل .. و بصراحة ام الصالون هي مو جبيره هم شابه .. بس جانت كلش مداريتني .. و علمتني كل شي .. كمت اني اسوي كلشي بيدي بدون ما اطلب منها مساعدة مثل اول ايام .. و طبعا الحلو بهل الشغلة نفتح العصريات .. يعني الحك اكمل دوامي … كملت الاعدادية و دخلت كلية و بقيت بشغلي .. جنت مطلعه مصرفي مال الخط و مطلعه حتى مصرف البيت من هالشغلة … بالكلية صارو عندي صديقات هواي .. جنت محبوبه و احب الكل … و للأسف تعرفت على ولد هو اكبر مني و يداوم بقسم ثاني .. الولد حبيته كلش … و بقيت بعلاقة وياه سنتين ..
بهل السنتين ابد مكلتله اني اشتغل … استحيت .. لان هو ابوه امكانيته كلش زينه .. حجيتله امور هواي عن عائلتنا .. بس اعترف كبال الكل اني كذبت بس كذب ابيض .. مكدرت اكله اني اشتغل عامله بصالون مكدرت .. و الولد شفته ممهتم بهيج تفاصيل اصلا .. و طبعا هو تخرج قبلي بس قبل ميتخرج حاجى اهله حتى يتقدملي .. و اكيد اهله حالهم حال كل العراقيين لازم يسألون على البنيه .. و امه من سمعت اني اشتغل بصالون مقبلت على سالفة ارتباطنه .. مقبلت و مو بس هيج .. حتى بشرفي حجت .. هسه اني مرت سنين على هالموقف بس من اتذكر شلون اجاني عبالك لسانه مشلول و يريد ينهي كلشي احتصر و ابجي والله العظيم .. اول حب بحياتي جان .. و اول رجل فتحت عيوني عليه هو .. اجاني و ذب الصوج بيا مو بأمه .. كالي ليش جذبتي عليا .. كلتله قابل اني مطلكه لو مهزومه من اهلي .. هو اني اشتغل .. اشتغل يا انسان اشتغل .. شغل اخذ مقابيله راتب .. قابل شمسويه .. و الله العظيم اني بذاك اليوم احجي و ابجي .. كلتله معقوله علمود اشتغل امك متريدني .. كالي لا بس اكو هواي سمعه مو حلوه على البنات الي يشتغلون بالصالونات و احنه عائله محافظه .. كلتله زين و عرفت من كلامه و بروده بالحجي هو طابك وي امه .. و رجعت للبيت .. جنت مقهورة و كلبي مكسور بس مبينت كلشي لامي و خواتي .. و خصوصا خواتي .. خواتي اعتمادهم عليا .. و يحسوني اني قوية البيت .. يعني ياخذون قوتهم بهل الدنيا مني .. اذا شافوني مكسوره همه هم ينكسرون .. كرهت شي اسمه رجال بوقتها .. و بقيت بشغلي و دوامي بالكليه و بعد ابد مشفت خلقته … كرهته .. كرهت جذبه و وعوده اليا .. معقولة رجال شكبره شكده ميعرف يقنع امه … ميعرف يكلها هاي حبيتها سنتين .. لعد وين انتي الي .. وين انتي مالتي .. وين انتي مستقبلي و بدونج اضيع .. وين غيرتك اذا طالب يباوع عليا .. يعني بسهوله تخليت عني .. تخليت على مالتك .. تخليت على الي الك .. و بديت صفحه جديدة بحياتي .. صفحه ما بيها حبي الاول … و بقيت بشغلي و تخرجت .. طبعا الوظيفة متوظفت بيها لان راتبها مقارنه بفلوس شغلي بالصالون (لاشيء) .. بس اخذت الشهادة و عفتها على صفحه .. و الحمدلله خواتي هم جانو ينجحون و الاصغر مني انخطبت ولد من منطقتنا .. الولد كلش مودب وحباب .. الوحيد لأمه و والده متوفي … اخذها و كلش ارتاحت وياه .. اني قفلت سالفة الارتباط .. بقيت بشغلي بس اخذت صالون لوحدي .. لان ام الصالون رجلها سافر لعمان و راحت وراه .. اخذت الصالون بغير منطقة .. و اخذته قريب من مصور مال اعراس .. و طبعا البنات الي جانو يجوني بالصالون القديم كامو يجوني للصالون الجديد .. و الحمدلله شغلي مشى ..
و بيوم من الايام اكو ولد ابو كوستر .. شافني صدفه من دتطلع العروسة من الصالون .. و جنت ممخليه ربطه على شعري .. هو جان طالع وياهم اجره .. من يوم الي شافني كام يحاول يحاجيني .. مره يلحكني يم بيتنا .. وطبعا هو بيتهم بعيد مو يم منطقتنه اصلا .. و مره ينتظرني يم الصالون .. بس جان يحاول يشوفني نفسه .. طبعا الصالون جان ما بي رقم تلفون .. بس التلفون الارضي ضروري كلش بالشغل .. جبت خط ارضي و هو كام يوميا يتصل .. اني من شفته هيج .. حاجيته .. كلتله شتريد … كالي بس نلتقي مره وحده و بمكان انتي تحددي .. و التقيت بي .. التقيت بي بمكان عام .. الولد اول ما بده يحجي .. حجالي عن ظروفه .. كلتله هسه انته جايبني هنا حتى تحجيلي عن ظرفك .. كالي لا اريدج تعرفيني اني شنو واني منو .. كلتله كمل .. حجالي وضعه و شلون تعب يله اشترى السيارة .. و اهله ناس ظرفهم المادي متوسط .. وهو ممكمل دراسه .. بس شفته رجال .. حسيت بي مو من جماعة الي ياخذون مصرفهم من اهلهم .. ماعرف ليش ارتاحيتله .. و كالي بس اريد اتعرف عليج اكثر .. و ترى اني نيتي ابد مو مال لعب و علاقات وحب .. اريد بس اتعرف عليج .. ومثل ما عرفتج عن نفسي احجيلي كل شي عنج .. كلتله ماشي افكر بالموضوع .. و انتهى اللقاء و رحت اني .. وكلت بيني و بين نفسي .. الولد مدام يريد يعرف كل شي عني .. اكيد نيته صادقه .. و بديت احجي وياه بالتلفون و مرات التقي بي بنفس المكان الي التقيت بي لأول مره .. حجيتله كلشي بس (سالفة الولد الطالب وياي ابد مجبتلها طاري) … و يوم ورى يوم كمت اتعلق بي و نسيت وياه السالفة مال حبي الاول .. نساني كل شي .. جان يضحكني من يشوفني ضايجه بكل الطرق يضحكني .. رغم ما هو شخصيته و وجه مو كوميدي ابد .. حسيت وياه بقوه .. و شهر يجر شهر هو ابد متطرق لسالفة الارتباط .. اني فتحت وياه الموضوع .. كالي وضعي مو مال ارتباط هسه .. بس دتشوفين بعينج داركض ركض و ارتب روحي .. بوقتها كلت خلي اساعده .. ما قبل المساعدة و تعارك وياي .. و وراها بفتره خابرني كالي المحرك مال السيارة خرب .. كلتله اني اساعدك بس لا تتعارك وياي لان اني وياك واحد .. سكت مجاوبني .. و من يومها بديت اساعده .. جنت مثل المنومه مغناطيسيا .. يعني يوميا يطلعلي شغله .. مره محرك .. مره اندعمت .. مره اريد ابدل الماعرف شنو  .. يكلي اسماء مال شغلات بالسيارة ما اعرفها اصلا .. و اني اجيب و انطي ..
اخر شي ضجت لان سالفتي طولت .. كلتله اكلك احنا شوكت سالفتنه نكملها .. كالي مدتشوفين الله مطيح حظي بالشغل و مكاعد الزم فلس على فلس .. كلتله و الحل .. كالي ماكو حل انتظري .. كلتله شانتظر و تعاركنه عركه قوية اني وياه .. و ماعرف شلون فلتت من لسانه جمله هي جانت طلقة الرحمه على العلاقة كلها .. اني اعترف صيحت عليه و كلتله انته بالبداية كتلت روحك بس علمود احجي وياك .. كالي حرفيا (هو انتي كلج على بعضج ام صالون) كلتله شنو قصدك .. كالي ما قصدي شي بس لزمي لسانج .. كلتله لا فهمني شنو ام صالون .. كالي روحي سالي شنو ام صالون .. من كال هيج متحملت كمت و كلتله ام الصالون اشرف منك يا جذاب .. هو ضحك ولا عبالك صاير شي و كالي دروحي بابا روحي .. رحت و بعد ابد محاجيته .. حاول يدك و يتصل بس ابد مجاوبته .. و اجى مره يم الصالون .. رحت صحت ابو التصوير الي بصفنه تعارك وياه ومن وراها بعد ابد متقرب عليا … و عرفت هو جان يكضي وقت وياي وبس .. و حلفت بعد للموت ما ادخل احد بحياتي لان حظي واضح .. و سنه جرت سنه … خواتي تخرجو و توظفو و طبعا الوظيفة هسه راتبها قوي صار .. قررت اعوف الصالون و اتوظف بشهادتي .. لان اصلا شغل الصالونات هم تعب .. و عن طريق معارفي البنات الي يجون يمي بالصالون .. توظفت بمكان كلش زين .. مكان حلم لغيري .. و اخذت سيارة و خواتي هم عدهم سيارات .. لان كلهم موظفات .. طبعا خواتي تزوجو كلهم .. واني تقدمولي ثنين .. وثنينهم اني مقتنعت بيهم .. لان عرفت جايين على شنو .. جايين عالراتب .. جايين عالسيارة ..
جايين مو علمودي .. طبعا اني متاكدة هم يعرفون اني جنت صاحبه صالون قبل .. حتى من تقدمولي بيني و بين نفسي ضحكت .. كلت الله يرحم ايام زمان من جانو لاكيلي حجة .. ام صالون ..
المهم .. اني تزوجت رجال ابن اوادم و بصراحه الرجل جان صريح من البداية وياي .. هو وضعه المادي كلش زين .. بس منفصل .. هو اكبر مني .. رجل متزن و محترم بنص الناس … زواجي جان بدون لا علاقة و لا حب .. هو شافني بالدوام وهو يداوم وياي .. كبل اجه وجه لوجه حاجاني .. و كبل فتح موضوع زواج .. قبلت .. و اني سعيدة وياه الحمدلله .. هااا و الي تزوجني حجيتله كل شي من الالف للياء .. و من اكول كل شي يعني كل شي .. ما ضميت عليه ولا حرف .. وهو هم حجالي كل شي .. و هاي صارلي سنتين متزوجته .. لا مشاكل شفت وياه .. ولا صيح بوجهي .. ولا عاملني بسوء ابدا .. والله العظيم مدللني عبالك بنته مو زوجته .. بس سالفة الاطفال بعد الله ما اذن النا يصيرون .. الله يحفظه اليا و يحفظ الكل و الله يرزقنا بالخلف الصالح .. وحتى اذا ما كاتبلنا يصير عدنا جهال هم مو مشكله .. المهم هو بخير و يبقى فوك راسي لأخر نفس ..
واخيرا .. اتمنى لكل بنيه بهل الدنيا متمر بلي مريت بي .. لان صعب .. والله صعب .. بس الحمدلله .. بالاخير ارتاحيت و اتمنى ابقى مرتاحه ..
(ام الصالون)
انتهى
اخوكم ابو بغداد سايق التكسي
#ابوـبغداد