قصص عراقية حقيقية بقلم ابو بغداد سائق التكسي

الدكتورة

اصعب شي من تعيش ببيت تحس روحك عايش وحدك بهل البيت بس البيت بي فوك التسع نفرات … اني عايشه جنت هيج بالضبط .. كل واحد بهل البيت محتار بحياته و بس .. اني والدي عايش بنفس البيت بس ابوية عايش لروحه هم .. ابوية روحه بالسوالف المكسره … حتى انفصاله عن امي جان من ورى هالشي .. تعرف على وحده و ياريت لو متزوجها … طلعت مو زينه و فوك هالشي خلته يهدم بيت كامل و عافته … امي صغيرة بالعمر رأسا تزوجت و طبعا زوجها شرط انو تعوفني يم بيت جدي (ابو ابويه) و امي مقصرت بهل الشي كبل عافتني … بالبيت هذا اني جنت حالي حال الشخص الي واكف بكراج جبير .. كراج متروس ناس .. ناس تروح و ناس تجي و اهل المحلات موجودين .. و اصوات هواي .. بس كل واحد طالع بدربه .. اني جنت اتخيل روحي كاعدة عالرصيف و اباوع عالوجوه .. يصيحوني بوكت الاكل و بوكت من يريدون شي مني .. كومي سوي فلان شي .. روحي فتحي الباب .. روحي نزلي الهدوم من السطح راح تمطر .. كومي ترسي الصوبات خلصو نفط .. كومي غسلي مواعين .. كومي صبي الاكل .. و باقي اليوم كاعدة و صافنة عليهم .. الي يرتب جهاله و يلبسهم حتى يطلعون .. الي تحجي وي اهلها بالتلفون (اقصد وحدة من زوجات عمامي) .. الي يجي صديقه عليه و يطلع .. جنت اطلع قهري بالدراسة .. ذابه روحي عالكتب و عالحفظ … جنت اريد اطلع فد شي .. مو علمود افرح ابوية لو افرح امي .. لو افرح بيت جدي .. بس علمود افرح روحي لان ماعندي فرحة بحياتي غير بس فرحة الشهادة … و جنت مو مثل البنات ابد .. البنات جانو من ينجحون ابهاتهم لو امهاتهم يجيبولهم هدايا .. اني جنت بالكوى اسمع كلمه عفيه بنتي .. حتى وقت الشوفه لشهادتي جان عبالك وقت مستقطع من مباراة بوقتها النهائي .. بابا بابا نجحت .. ياخذ الشهادة بيده بسرعه يشوفها و اني متأكدة والله العظيم ميركز عالمكتوب ولا حتى على الدرجات .. يباوع عليها بسرعه يكلي عفيه و يبوسني من راسي و يروح يكمل الشي الي بيده … جنت مرات اصعد بالسطح ابجي .. و جنت هواي اجذب .. اكول لصديقاتي ابوية جابلي هيج و امي جابتلي هيج … جنت مجذبة عليهم و مكايله امي مطلكه .. بس وحدة من صديقاتي و هي جوارين بيت جدي حاجيه للطالبات اني عايشة ببيت جدي وامي مطلكه ..

و مره دنسولف و وحدة بيهم كالتلي هالشي .. من ذاك اليوم حتى الكعدة وي البنات بالمدرسة كرهتها … و مثل مكلت ذبيت نفسي عالدراسة و مو علمود احد .. لان محد مهتملي اصلا … كل واحد عنده طريقه الي يمشي بي .. نجحت و دخلت اعدادية و بالاعدادية طلعت اعلى معدل و دخلت طب .. ابوية حتى ما انافق و اجذب جان متكفل بسالفة الفلوس و ابد مبخل عليا بالفلوس بس جان بخيل مشاعر و حنان .. و طبعا هو بوقت دخولي للكلية جان متفق يتزوج و يطلع من بيت جدي واكيد ياخذني وياه .. تزوج و انتقلت وياه لبيت صغير و زوجته جتي .. طبعا زوجته الجديدة اكبر مني باربع سنوات … لا دارسة ولا تعرف شي عن الدراسة … رغم ما هي زوجة ابوية بس اني انقهرت عليها .. طبعا اخوها صديق ابوية .. و حالتهم المادية تعيسه .. اخوها الجبير راد بس يخلص من اخته و تكاليف عيشتها و يزوجها بأسرع وقت .. بمرور الايام صارت صديقتي و مثل اختي ولا عبالك زوجة اب .. من حجتلي قصتها بجيت اني و اني من حجيتلها وضعي شلون جان ببيت جدي هم بجت .. كلبها ملجوم مثل كلبي .. تكلي تعرفين اني جانت امنيتي اكمل دراسة بس اخوية مقبل بحجة احنا بمنطقة شعبية و تعال يوميا اتعارك من وراج .. ذاك صجمني و ذاك لحكني وذاك انطاني رقم بس والله العظيم جذب .. جذب جان ميريدني اكمل علمود المصرف .. وحقه لان هو الي يعيل عائلتنا كلها و ابوية رجال جبير .. ابوية لا يحل ولا يربط ولا حتى أمي هو الجبير و الي يصرف عالبيت … و ابوج مرة شافني صدفة و رغم فرق العمر بيني و بين ابوج من انسألت تقبلين تزوجين فلان لو لا .. كلت اي لان اعرف اذا كلت لا مراح ياخذ بحجايتي وهم يمشيني .. بس امانه ابوج ممقصر بشي صح اكبر مني بس حباب وياي .. اني بيومها ضحكت كلتلها ابوية حباب وي كل النسوان مو بس وياج .. و يوم ورى يوم كمت احبها .. صارت صديقتي و احجيلها كلشي وهي تحجيلي كل شي .. جانت تشجعني عالدراسة و تصيحلي دكتورة … تعلقت بيها كلش .. و ابوية من جان يصيح عليها ما اقبل .. حتى مرة كالي انتي على امج ممدافعه هلكد .. كلتله هاي مو امي هاي اختي .. ضحك ابوية و كال همزين دخلتي طب مدخلتي قانون جان حبستيني .. كلتله مو وحدك انته وامي .. هو ضحك عباله داتشاقى بس والله لو بيدي احبس كل واحد يخرب عائلته و جهاله يتاذون نفسيا … و مشت السنين و ابوية طبعا مخلف من زوجته و السبب جان ممفهوم .. هو ما بي خلل و هي ما بيها خلل بس ماعرف عبالك الله مكاتبلهم يصير عدهم جهال .. قبل ما اتخرج بسنه تعرفت على ولد طالب ويانه ..