قصص عراقية حقيقية بقلم ابو بغداد سائق التكسي

موعد الدكتور

بذاك الوكت جنت ما أملك سيارة و ستوني متخرج و تعييني بعده مطالع … لحد هسه اتذكر اليوم بكل تفاصيله ورى كل هل السنين … جان الجو لا حار ولا بارد (وسط) بس بي نسمة هوى من هاي الخفيفه …  جنت لابس بنطرون قماش اسود و قميص كلش معتز لأن جايني هدية من اخوية بيوم تخرجي .. لونه ابيض و بي علامة مثل النسر عالجيب الامامي صغير كلش النسر …
حتى التكسي الي اخذني أني و أمي لشارع السعدون (لمجمع الدكاتره) اتذكرها و اتذكر السايق .. جانت برازيلي تكسي و السايق رجال جبير حتى بيومها جان كلامه محبط اليا (طلع خريج هو و شهادته تسوى شهادتي عشر مرات) و بيومها كالعادة بالعراق .. لازم تنفتح مواضيع بين السايق و العبري اذا طريق الكروه بعيد ..
حجالي على وظيفته و الراتب الرمزي وهو عنده خمس جهال كلهم مدارس و هو اصلا كاعد ايجار … قهرني و امي بقت تدعيله من نزلنه …
طبينا للمجمع جان متروس ناس و خصوصا ناس هواي جايه من غير محافظات .. و كل واحد بيهم خطية شايل جيس مال ادوية و اشعات .. و الي شايله جاهل .. والي على عربانه .. بس كل واحد بيهم متوجه على دكتور يعرفه .. يعني الشغلة مجانت عشوائية .. كلهم عدهم مواعيد و أني و أمي هم عدنا موعد .. دخلنه للعيادة و طبعا احنا جايين من وكت … بقينا كاعدين ننتظر دورنا … طلعت بنيه من الغرفة مال الدكتور .. البنية شكلها كلش طبيعي بس تجذب الانتباه .. يعني بيها شي مميز كلش .. حتى لبسها كلش عادي جانت مودة بذاك الزمن قمصان ام الكتافيات .. يعني ههههه صح كل وكت بيها مودة بس سالفة الكتافيات اليوم من نكعد نتذكرها نضحك .. لان البنات بذاك الوكت جان جتفهم مثل جتف مازنجر هههههه و طبعا حتى احنا الشباب هم جانت عدنا شغلات تضحك بلبسنا مثلا الياخة الذهبية هههه اريد افتهم شنو فائدتها حديدة و نخليها بالنهاية مال ياخه .. بس عادي كل زمن بي شي بوكته حلو و اكيد باجر عكبة من راح يمشي الوكت هم اكو اجيال راح تبتسم من تذكر لبس الشباب هاليومين ..
عالعموم .. البنية ماعرف شنو الي خلاني انعجب بيها و بالمناسبة هي تشتغل بالعيادة بس لأن اخوية اجه اخذ الموعد اني مشايفها يعني جانت الي أول مرة اشوفها لهل البنية ..
كعدت عالميز و رأسا اني كمت بس ردت احجي وياها  .. هي سلمت من طلعت من غرفة الدكتور .. كلتلها عدنا موعد و فهمتها .. كالت اي ماشي الدكتور عنده مراجع بس يطلع انتو تدخلون .. وطلع المراجع .. احنا دخلنا و كملنا موعدنا و طلعنا رجعنا للبيت .. أني بقت البنية براسي و قررت اروح بحجة عندي كلام وي الدكتور حتى اشوفها مرة ثانية .. و رحت و لأن اني اعرف وقت الدوام .. و لأن اني اعرف باب العمارة جان بيها مدخل واحد .. و لأن اني مستقتل عالبنية و جيتي كلها علمودها .. على حظي الفكر اخذوني التحريات لأن تلاسنت وي الضابط .. هويتي و اوراقي الثبوتية حظ الفكر مرة تبللو بالغلط … مي وكع عليهم …
المي جان شوية مو هواي و الكتابة مخربطة بس والله العظيم و داعة امي واضحه .. و كل مرة اريد اروح اغيرهم بس اتعاجز لأن معاملات وروح وتعال .. الحاصل اخذوني تحري .. اكلت ٣ ايام مرتبات و طبعا اتطبطت عالخفيف .. و القميص الي جنت معتز بي حتى النسر الي عالجيب طار ههههه ماعرف وين راح .. هو بصراحة الجيب الامامي الفوك كله انشك .. كلت بعد هي خربت خربت .. شكيته و ذبيته و النسر حبيبي راح .. عالعموم طلعت بعد منطيت فلوس الي بجيبي جانت لواحد من الحرس .. خابر اهلي و دزولي واحد بالمنطقة ضابط بس حباب و يركض للناس .. حتى من صارت احداث ٢٠٠٣ محد متقربله ..
لأن فايد الناس و ما عنده اذيه عالناس .. طلعت و بوقتها حجيت لأخوية لأن سألني شعندك هناك .. كلتله خوية هيج و هيج السالفة .. كال يله تصير المهم انته بخير .. و رحت ورى كم يوم من هالموقف جددت الاوراق حتى ما اوكع بهيج مطب … و كلت خلي اروح اشوف البنية .. و رحت بس هالمرة مرحت وحدي .. عندي ولد بالمنطقة هو صديقي و صديق طفولتي .. بصراحة الولد اكثر من اخ .. حجيتله كلشي و كالي عادي اني اوديك وانتظرك .. و اخذني و رحنا .. نزلت هناك و صعدت للعيادة شفتها كاعدة و لحد هسه اتذكر شكلها .. من الحر و كثرة المراجعين .. جانت كاعدة هي عالميز المقابيل الباب .. و خطية لازمة بيدها مجلة الف باء و دتهفي بيها على وجهها .. هلكد مجنت مركز حتى المجلة اتذكرها هههههه .. سلمت و كلتلها ممكن اسألج كم سوال .. كالت تفضل ..
كلتلها اني جيت قبل كم يوم اني و الحجية راجعنا يم الدكتور و ردت اسألج يصير اغير العلاج لأن والدتي كاعد نفسها تلعب من تاخذه و متشتهي تاكل .. كالتلي والله ماعرف بس اذا تريد انتظر اني أفوت اسأله للدكتور لأن متسوى تاخذ موعد و تنتظر و دتشوف انته الهوسه .. كلتلها زين و كيفت و كعدت بس شنو عيوني عليها .. اتذكر شكلي صار مثل التمثال الي ميتحرك و وجه مصمم على جهة وحدة ههههه بقيت هيج صافن عليها و هي بصراحة حست .. حتى تأففت .. اني من تأففت رأسا درت وجهي .. استحيت .. عالعموم طلع المراجع الي يم الدكتور و هي فاتت سألته بدون ما افوت اني .. كالها يصير بس هو احسن شي الها .. تشكرت منها و رحت .. بس بقيت منتظرها جوى اني و صديقي .. و حتى صديقي كالي يمعود اذا انته رايدها صدك احجي وياها طك بطك شنو هالجبن الشايلة .. ترى عادي كلش انته معجب بيها و يجوز تصير من نصيبك .. و حتى كالي حرفيا انته ترى اذا تظل هيج طول عمرك مراح تتزوج لان دخلت كم سنه كليه و بالجذب مسمعتك صادقت لو حبيت متكلي شبيك .. كلتله يمعود استحي استحي .. كالي بابا ترى الشي طبيعي .. اذا هي مرتبطة (مخطوبة متزوجة مصادقة) راح تكلك و انته شيلها من راسك .. كلتله زين .. و طلعت هي طبعا بيومها عزمت صديقي على لفات جوى و عيني عالباب مال عمارة .. لان عيب جابني و دينتظر وياي .. اشو هاي طلعت الدكتور طلع وياها و تمشو ثنينهم لكراج ورى العمارة صعدو بالسيارة مال دكتور .. صديقي كال استفاد طلعت مزوجها لو مصادقها … كلتله بابا دعوف هالتفكير النكس مال مسلسلات و افلام مصرية الدكتور بكد ابوها .. امشي خلي نلحكهم .. و لحكناهم .. الدكتور يمشي علكيفه يعني ميسوق سريع .. لحكنا بي بسيارة صديقي و بقينا نمشي وراه .. و وصلنا لمنطقة كلش شعبية ببغداد هي نزلت و الدكتور راح بطريقة ..
باوعت على صديقي كلتله هاااااا طلع الرجال ديوصلها على طريقه .. كال يابه اعتذر دنزل الحكها قابل افوت بالدرابين ..
نزلت اني وراها امشي و بنص دربونه فارغة الوقت جان مغربية وصلت وراها بس خفت احاجيها .. بقت تمشي هي واني وراها جان نوصل يم بيتهم .. و طبعا عرفت بيتهم لأن الباب مالتهم مطلعين من الحديد مالته واير مال كهرباء صغير مربوط باليده مال باب الورى .. جرته و انفتح الباب و فاتت .. رجعت لصديقي كالي ها حاجيتها بشر .. كلتله لا والله استحيت ..
بقى يرزل بيا الطريق كله مال الرجعه للبيت .. وراها بيومين على كصتها تعينت .. كيفت و كلت والله الا الحكها بس هالمره رحت وحدي و اني اعرف وقت رجعتها للبيت كلت انتظرها هناك لأن مال اروح للعيادة لو جوى العيادة مترهم لعدة اسباب .. اولا بالعيادة ناس اكو و مو مال حجي .. ثاني شي الدكتور ياخذها بطريق رجعته يذبها يم منطقتهم يعني مترهم كلش … و رحت انتظرها بالضبط يم المكان الي يذبها الدكتور .. انتظرت و جان تجي .. لحكتها و حاولت احجي وياها بس موكفت .. بقت تمشي و كامت تسرع بخطواتها .. المصيبة اني حتى اسمها ما اعرفه .. كلتلها بس اوكفي اني اعرفج وهم موكفت وعلى حظي واحد ابو محل شافني لاحكها والظاهر يعرفها .. اجه جان يلزمني واني معرفت شحجي .. كالي انته متستحي (طبعا هي حتى مدارت وجهها و كملت مشييها) .. كلتله يابه انته متوهم .. كال مو داشوفك لاحكها و جان يضربني رأسا بدون اي مقدمات .. هو ضربني اشو سبحان الله المحل مالته طلعو منه ثنين بعد و عبالج هالاثنين جواعه مال عركات .. مشوهيين مال ضرب و جلاليق .. تلاثتهم ضربوني المصيبة اني من حلاة روحي ماعرف شلون رفعت ايدي جتي بوجه واحد .. سمعت يكفر و يكول تضربني ابن الهيج .. اني مغطي راسي بيدي و اصيح والله مضربتك .. وهو يضرب بيها .. بالكوه عافوني و ركضت بالشارع .. المصيبة من كثر الكتل ماعرف منين دخلت للشارع .. و هلكد مو فكر اني صارت منطقتهم مثل هاي الالغاز بالمجلات اركض بشارع و اطب بي الكه روحي قريب من نفس المحل ..
ماعرف شلون وصلت للشارع العام .. وكفت تكسي و ابو التكسي من شاف شكلي مبين مكتوب و قميصي شوية بي دم .. خاف عافني وراح .. الثاني رجال جبير صعدني والله .. يابه من طلع ابو التكسي .. عبالك واحد مهزوم من الاعدام وماخذ افراج ستوى .. جريت نفس و فد كيفت بداخلي بس صوت دكات كلبي حسيت حتى ابو التكسي راح يسمعها ههههههه لان اني اسمعها .. و وصلت للبيت و طبعا لازم افوت قجق للبيت لان اذا يشوفوني بهيج حاله يدخلوني استجواب و (س و ج) .. شفت الفرص كلها متاحه اصعد للغرفة .. صعدت .. ذبيت هدومي و طبيت سبحت .. طلعت بس ممنتبه عيوني وحدة منهم جواها صاير ازرك .. امي سألتني شكو ..
بقت تستجوبني لحد معترفت بكلشي .. و كلتلها كلشي .. طبعا امي قريبه كلش عليا .. كالت يمه هاي غراب فكر .. كلتلها ليش .. كالت اول مرة لزموك و انسجنت و ثاني مرة جيتنا شابع كتل ثالث مرة شيصير ياستار ياربي .. عوفها خلي تولي و اني اشوفلك وحدة تسوى راسها ..
كلتلها لا يمه والله صدفه ترى .. و امي كالت  زين افرض حاجيتها انته منو ترضى بيك ماعندك لا شغل لا وظيفة  ستوك انقبلت بالشغل ..
عالاقل انتظر  تداوم  .. واني مستعدة اروحلهم للبيت لو حتى للعيادة احجي وياها و انته تريدها زوجه يعني قابل بايكين احنا ..
شي عادي .. بصراحة مصرفلي حجي امي بس هو صدك ميه بالمية و اصلا اني صارت بيا خوفة مال اروح احجي وياها مباشر ..
و كلت خلي انساها احسن .. و بديت بحياة جديدة ..
حياة الشغل و الوظيفة …. تعرفت على ناس هواي بأول شهر بداومي و شفت موظفات اشكال و الوان ..
و كلهم حبابات و طيبات .. بس هالبنية براسي .. المصيبة اني أي تفاصيل ماعرف عليها غير بس شغلها و اندل بيتهم و هاي هي ..
ورى الشهر الاول كلت لأمي يمه اريد اتزوج اني … كالت اكلك الظاهر انته الحجي ميفيد وياك .. شو وديني للعيادة واني راح اسألها .. اذا رهمت السالفة رهمت .. و اذا مرهمت خلي انساها .. و اخذت وامي و رحنا للعيادة .. و نزلت اني و امي و فوتتها جوى للعيادة و نزلت جوى اني .. وراها امي نزلت كالت يمه طلعت مخطوبه و عرسها بعد فترة .. فد انقهرت اني و رجعنا الطريق كله اني ساكت .. و طلعتها من راسي البنيه .. بس المصيبة رغم ما اني ما حجيت وياها ولا صارت بيناتنا علاقة بس والله العظيم احس داخل وياها علاقة حب و عبالك احبها صار سنين … وهي اصلا متعرفني غير بس الي حجيته .. وكملت حياتي بدونها .. بس جانت امنيتي اتزوجها ..
المهم .. ورى سنتين من تاريخ الموقف تزوجت اني .. و بديت اتطور بالدوام و مرت سنين و صار عندي جهال و صار عندي شغل ثاني غير الوظيفة ..
الحاصل ..
قبل جنت مطلع زوجتي للمول .. الجهال كبار ميحبون يطلعون ويانه .. بس اني وياها طالعين .. جان اشوف نفس البنية صدفة هي وياها بنية ثانية مبينه بنتها طبعا شكها متغير بس مو هواي …
.. ابتسمت لا اراديا بوجهها .. و زوجتي محست لان جانت دايرة وجهها عالمحلات ..
بس حسيت البنية كالت بداخلها (عمت عينه وياه زوجته و يباوع عالنسوان) .. والله ابتسامتي جانت لا اراديا و طبعا المفارقة بالموضوع كله .. انو هي اكيد معرفتني بس المفارقة الاكبر .. من رجعت للبيت و حجيت للحجية (امي الله يحفظها و يحفظ اهلكم) الي صار و كلتلها يمه شفت السكرتيرة الي ردت اخطبها  .. امي صدمتني بشغلة اكبر .. كالت تدري بيوم الي وديتني يمها و علساس اسألك مسألتها و سويت نفسي جايه اسأل عالدكتور و شفت الدكتور بيومها .. طبعا اني ماعرف اضحك ابجي ورى هالعمر شحجي ههههههههه ..
كلتلها بس كوليلي ليش هسه ماشي اني عندي حياتي و تزوجت و احب جهالي و احب مرتي بس ليش ؟؟
كالت مو يمه كتلك بوقتها البنية جان فكرتك لان انته انحبست و انبسطت من وراها .. كلتلها يمه صدك تحجين انتي .. يعني معقولة انتي مصدكة انو الي صار من وراها للمكرودة ..
كالت اي اي مصدكة .. عالعموم السالفة راحت و انتهت بس ليش يمه .. يجوز بوقتها جانت ممتزوجة و جان اتزوجتها و هي الي جانت طالعه وياي للمول و هي الي جان جابتلي هالجهال .. بالمناسبة هالحجي مو معناها اني اخون زوجتي بس هههههه الحجي انو اكو ناس من كل عقلها الامور الي تصير بحياتنا اليوميه الها ربط بالناس الداير مدايرنا .. و يجوز السكرتيرة راح تقرا القصة بس مستحيل راح تعرف انو هالحجي عليها ..
لأن ببساطة لا قبل هي عرفتني و لا حتى بالمول هي عرفتني ..
(موعد الدكتور)
انتهى
اخوكم ابو بغداد سايق التكسي
#ابوـبغداد