قصص عراقية حقيقية بقلم ابو بغداد سائق التكسي

(عامل البنجرجي)

بديت بالشغل و اني بعمر 7 سنين بعد وفاة ابوية بسنة .. جان شغلي بمحل مال بنجرجي عالشارع العام .. دراسة مكملت بس تعلمت من اختي (العرض واحد) شلون اكتب و اقرا .. هي درست لحد صف 4 اعدادي و وراها بطلت و تزوجت .. جانت هي تدرسني لان اني احب اتعلم قراية و كتابة ..
ردت بس اعرف اقرا حتى لا يكولون عليا جاهل .. و ما قصرت وياي خطية ..
جانت الي تاخذة بالدوام ترجع ملهوفة حتى تعلمنياه .. و مرات تتقصد تفوت من كبال المحل الي اشتغل بي و تصيحني ..
تكلي اليوم اخذنا فلان شغلة حضر نفسك اعلمكياها مو تجي تعبان وكبل تنام ..
مرات جنت اخجل من تجي للمحل .. و فوكاها تجيب صديقتها وياها و تكلها هذا اخوية ..
عبالك اني دكتور ههههه واني كلي بذاك الوكت عامل بنجرجي .. بس خطية كل اخت يعجبها تفتخر بأخوها ..
الحمدلله على كل حال .. جنت اكلها لاتجين بس هي تجي خطية ..
المشكلة بيا شكد ما اتعصب عليها .. بعدين انقهر و اصالحها ..
علمود هالشي هي جانت تمشي على سالفة (من امن العقاب اساء الادب) .. بس طبعا هي متسيء الادب لا سامح الله .. بس تجي للمحل حتى لو احذرها ..
فد يوم جانت دنيا مطر و الشوارع شبه غركانة .. فايضة الدرابين ..
المحل الي اشتغل بي .. بالصفحة مالته بس شوية ليكدام اكو مدخل صغير (يعني دربونة) بس مو للسيارات .. للناس و هالدربونة صايرة بين بيتين و تعبر عالشارع الورانا ..
رحت اجيب جكاير للأبو المحل من اللاسواق الجوى بالشارع .. و طبعا ركض رحت لان مطر قوي ..
ماعرف شلون من فتت من يم الدربونة عيني صارت عليها .. جان اشوف بنية ممدة بالكاع .. نايمة بنص المي الفايض بالدربونة ..
رئسا وكفت و فتت للدربونة .. خطية بنية صغيرة بكد اختي تقريبا ..
معرفت شسوي و عبالي ميته .. كمت ابجي واصيح بصوت عالي و رحت شلتها و اصيح بصوت عالي  ..
اكو سيارة جانت واكفه عالشارع مال واحد جان جاي على بيت صديقة ..شافني شايل البنية و ابجي .. كال شبيك شكو ؟؟؟
ركض شال البنية وحطها عالكشن الورى و صعدت وياه اني وطلعنا للمستشفى ..
سألني كالي شبيها كلتله ماعرف ..
وصلنا للمستشفى و الحمدلله البنية صحت ..
طلعت منتولة و مشمورة .. الحايط الي بالدربونة ناتلها و شامرها وهي خربانة ..
الظاهر بي واير مزلوغ و متنكع بالمطر و الحايط كام ينتل ..
المهم
سألوني هناك هاي اختك .. كلتلهم ماعرفها اصلا ..
كامو يضحكون و الدكتور باسني لان بجيت كومة و حتى ابو السيارة باسني ..
رجعنا اني و ابو السيارة للمنطقة و البنية بقت هناك .. ابو المحل الي اشتغل يمه لكيت عيونه صايرة بظهرة و نار نار فاير فور لان ماكو اني ..
راد يضربني بس ابو السيارة ما خلاه و شرحله الي صار .. كال هسه جوي اهلها يدورون ... هاي بنت بت ابو فلان اهل السكلة ..
رحنا اني وابو السيارة على السكلة لان اندلها اني .. وكلنا لابو البنية و طلعنا للمستشفى جبناها و جينه ..
ابو البنية كام يدعيلي و يبوس بيا كومة .. و تشكر ابو السيارة كومة و انطاه فلوس بس ما قبل وكاله شنو تكاطعت الدنيا ..
راح ابو السيارة بس اني ما خلاني اروح الا يجي وياي لبيتنا لان نفس المنطقة مو مثل ابو السيارة من غير منطقة ..
اجه وياي للبيت و تشكر أمي هواي و كالها هذا ابنج من اليوم ابني و لا يكول ابوه ميت بعد .. اني ابوه و اريده يجي يمي يشتغل بالسكله ..
امي كالتله هو بكيفه ..
ثاني يوم رحت للبنجرجي الي اشتغل يمه و كالي روح هاي هي .. حاسبني على نص الاسبوع الي اطلبياه و رحت للسكلة اشتغلت ..
ابو البنية الله موفقة و كام ينطيني دبل يومية .. العمال الباقيين يغارون و كامو يحاولون يحركوني كبالة و يكولوله ميشتغل زين .. بس هو مياخذ بحجيهم ..
ارتاحيت كلش وي ابو البنية بالشغل و اهلي هم ارتاحو خطية .. و مرة سنة ورى سنة واني وياه اشتغل و شوية شوية اني صرت الكل بالكل بالسكلة ..
لزمت السكلة كلها وحدي و ابو البنية يجي مرة لو مرتين بلاسبوع .. طبعا هو عنده ولد 3 .. بس مدللين و مو مال شغل ..
لذلك هو ميعتمد عليهم ..
البنية الي انتلت صارت صديقة اختي الروح بالروح .. و كل فترة تجي يمنا للبيت هي وامها .. لو اختي هي وامي يروحون يمهم ..
بهل الحجي احنا كبرنا .. واختي جتي قسمتها وتزوجت صديقي وابن منطقتي ..
طبعا الولد حالته مو كلش زينة .. بس ابن اوادم و مربى .. اني بشغلي جنت مجمع خوش فلوس .. اشتريت سيارة وهو لزمها يشتغل بيها .. هم ينطيني يومية و هم مصرفه و مصرف بيته طالع .. و حتى مرات جنت اخليله اليومية كلها حتى يرتاح هو واختي خطية ..
ابو البنية و السكلة توفى .. جانت صدمة اليا لان صدك هو صار ابوية .. ورى متوفى بفترة بدت المشاكل ..
ولده كامو يتعاركون عالورث و اكيد بطلوني و بطلو العمال بالسكلة لان عرضوها للبيع هي و كل املاك المرحوم حتى كل واحد ياخذ حصته ..
و تقاسمو و كل واحد راح بمكان بس الام و البنية و واحد من الولد بقو بنفس البيت ..
ام البنية جتني للبيت .. كالت انت ابني وهاي اختك امانة بركبتك منا ليوم الدين .. اذا اموت اني انت عينك عليها لان اخوتها مو مال اعتماد ..
اريد بحصتي و حصتها بالورث تسويلنا مشروع و يبقى بأسمها بس انت تلزمة .. كلتلها صار يمه تدللين ..
و سويت سكلة بس صغيرة بنفس الشارع والله .. و جبت نفس العمال و الحمدلله والشكر مشى الحال و اشتغلنا لان الي يتعاملون ويانه بالسكلة القديمة كلهم يعرفوني ..
و خير من الله صار الشغل و كدرت افتح محل اليا مال ملابس عالشارع العام و المحل صار ثنين والله فرجها من واسع و تزوجت و صار عندي 4 جهال .. بس الله شاهد ابد ما مقصر لا وي البنية و امها و لا وي اختي و رجلها و امي طبعا اروحلها فدوة ..
بس الي قاهرني شي واحد .. ولد المرحوم الي نقلني من حال لحال .. بعدهم مخربطين و فوكاها يجون مرات ياخذون فلوس من ام البنية و حتى من اختهم ..
عالعموم الله كريم و الله ينطيني صحة و عافية وعمر طويل حتى ما اقصر وي المرية و بتها لان همه السبب بحالتي هاي و كل فلس عندي جاي من خيرهم الله يحفظهم ..
(عامل البنجرجي)
انتهى
اخوكم ابو بغداد سايق التكسي
#ابو_بغداد