قصص عراقية حقيقية بقلم ابو بغداد سائق التكسي

مصلحه

اليوم مراح اكتب قصة .. اليوم عاجبني احجيلكم شغلة عني لان هواي ناس كامت تدور على صفحة ابو بغداد سايق التكسي و هواي بالتعليقات اقرا ( شكد جنا نقرا قصص بالصفحات و الكروبات وهي نفس الاسلوب بس مجانو يخلون اسمك وعرفنا اسمك عن طريق تعليقات الناس .. يكتبون هاي قصص ابو التكسي ابو بغداد لان اسلوبك بالكتابة يعرفوه و دائما متخلي عنوان للقصة بس بنهايتها تخلي العنوان) .. اليوم راح احجيلكم شغلة عني ... قبل من جنت اداوم اعدادية زراعة بمنطقة الفضيلية .. جنت اسمع عن شغلات تحبها البنات .. الي هي دفاتر المذكرات .. هالحجي بالتسعينات .. البنات جانو يشترون دفاتر جبيرة جلادها حلو و يكتبون بي ذكرياتهم .. يوثقوها للزمن و اكيد اكو بنات لحد الان عدهم هالدفاتر .. اني جنت طالب و اشتغل .. فكرت اشتري دفتر و اكتب بي ذكريات بس كلت عيب هسه اذا شافو اصدقائي شيكولون عليا بنية .. وادري بجماعتي بذاك الوكت اذا يلزكون بالشقى يلزكون طول العمر .. و اكيد راح اسمع منها تصنيف و كمت اتخيل اصلا شراح يحجون ( بله بشرفك ليث متستحي تكتب ذكرياتك فد مره ارسملك قلب حب لو ارسملك ورده لو فراشه  .. لك بابا هاي سوالف نسوان عيب) هيج كمت اتخيل الكلمات الي راح اسمعها اذا اشتري دفتر ذكريات و يلكفوه عندي اصدقائي و حتى تخيلت اخويه الجبير اذا شاف الدفتر هم راح يصنف عليا و يكلي (ايباخ علساس انته المتنبي كاعد تكتبلي ذكرياتك هو انته حياتك بين دراستك و شغلك والتكسي و كعدتك بالركن  وي ربعك اهل المشاكل ... هاي سوالف الفايخين بطلهن) .. كلت بمكان ما اشتري دفتر و اسمع هالسوالف .. خلي اكتب بورق عادي السوالف الي تمر بيا .. بديت اكتب شغلات بسيطة بالبداية .. مثلا موقف يضحك بالاعدادية .. لو عركة مال واحد من جماعتي .. لو شلون رحنا لباب الشرجي و فتنا سينما .. لو شلون من اشترينا حذاء (مكرم القارئ) كتربلر ابو الحديدة .. لو شلون من اشتغلت فترة بمعمل قماصل صبغ و تفصال .. كمت اوثقها بكل بساطة .. بعدين كمت اكتب تفاصيل .. و الورق الي اكتب عليه كمت اشوفه يخلص بسرعه .. و رحت اشتريت دفتر ذكريات و الدفتر صارو ثنين ... بس .. مجنت متوقع بيوم او اصلا عندي جراءة و جساره اخلي عالم ماعرفهم ولا يعرفوني يقرون هالتفاصيل .. جنت اكتبها لروحي .. لنفسي .. جنت اكتبها حتى من اكبر بالعمر اقراها و اضحك .. او اقراها وانقهر و ابجي .. مجنت متوقع راح تقراها انته لو انتي .. اني جنت ممفكر بيكم اصلا .. مجنت اعرفكم .. و مستحيل و من سابع المستحيلات افكر القصص هاي البسيطة الي دارت بشوارعنه راح يقروها الناس .. وعلى شنو يقروها اصلا هاي قصص تصير و صارت وراح تصير دائما بالعراق .. اصلا مو مهمة .. لان هي حياة الناس العادية .. مجنت متوقع راح يصير عندي ناس هلكد بهل العدد يقرون القصص هاي .. هو اني مجان عندي جراءة اخلي اصدقائي يقرون القصص شلون اجي انشر قصص لناس اصلا ماعرفهم .. وفوكاها الناس تبجي من تقرا القصص وناس تضحك .. لا و فوكاها هم .. ناس تدور على اسمي حتى يفوتون للصفحة يقرون القصص ومن اغيب فترة يسألون و يدزون رسائل .. ناس ماعرفهم معرفه شخصية .. يدورون عليا ؟؟ مجنت متوقع بصراحة اصلا اسوي هالشي .. و صار صدفه ... و بديت انقل القصص من الدفاتر للصفحة و لموقع على الانترنت الي اصلا مجنت اعرفه شنو بذاك الوكت و اصلا ماله وجود بذاك الوكت .. اني بحياتي مقاري قصص و مقاري جرايد غير بس الي تجي بيدي صدفه .. و هسه لو يرجع بيا الزمن ورى و واحد يكلي هالقصص الناس راح تحبها بالمستقبل اكله بابا انته مخبل .. شتحب منها وهي مكتوبه اصلا بالعاميه .. هسه نجي للي اريد اوصله الكم .. اني من انزل قصة ممتقصد ابجيكم .. لاتزعلون مني اذا بجيتو بيوم من قريتولي قصة .. لان كلبو بالتعليقات راح تلكون ناس هووووواي كاتبين (لو ندري ممكملين القصة غصينه من البجي) ... اني ماريد ابجيكم .. ماريد اصلا اضايق بشر .. اني مجرد واحد ينقل قصصكم بطريقته .. واحد يسمع حاله و يكتب عنها واصلا ميعرف منو صاحب الحاله ولا شايفه بس اتخيله .. اتخيله و اسمع حتى صوته و صوت اهله .. اتخيل كعدتهم بالبيت و طلعتهم وطبتهم .. اتخيل حتى لون لبسهم (على حسب وضعهم المادي) .. و اشكر وجودكم بحياتي .. متوقعت بيوم من الايام راح يصير عندي اصدقاء بهل العدد .. متوقعت بيوم راح الناس تدور عليا حتى تقرا الي اكتبه .. شكرا لان تجمعنا هنا بهل الموقع بدون (مصلحه) .. لا اني عندي مصلحه وياكم ولا انتو عندكم مصلحه وياي .. شكرا لان انتو بحياتي ..
#ابوـبغداد