قصص عراقية حقيقية بقلم ابو بغداد سائق التكسي

التواضع

برى المحل الي اشتغل بي يكعدون اهل العرباين الدفع … تجمعهم يصير كبال المحل بالضبط .. اني لأن المحل عليه شغل قوي و دائما هوسة و مشتري طاب و مشتري طالع ما عندي وقت حتى احك راسي .. دائما مشغول .. ابو المحل الي اشتغل يمه رجال كلش جبير بالعمر و بصراحة كلش نحيس و يعشق شي اسمه عصبية و يدور مشاكل حتى وي الكاع ..

ابنه مو مثله .. ابنه طيب و حباب .. و لو مو ابنه هالمحل ميفوتله اي زبون .. لأن اذا نبقى على ابوه و عقلية ابوه جان المحل وكف شغله .. أبن ابو المحل دائما يكعد وي اهل العرباين .. يسولفون و يتشاقون سوى .. جنت من جوى بالمحل اشتغل و اباوع عليهم برى ..

اني أكدر وحدي امشي المحل و اصلا اني خريج محاسبة وعلى هالاساس شغلوني بالمحل ..

ابوه للولد (صاحب المحل يعني) كل ميجي للمحل يطرد اهل العرباين و يمنع كعدتهم كبال المحل .. اول ايام شغلي بالمحل جنت اخاف عالرجال الجبير .. اكول بيني و بين نفسي هسه يطكوه بطابوكه ينوموه بمكانه .. لان اهل العرباين هواي و جنت اخاف منهم .. اني نفسي كرجال اخاف منهم لان شايف عركاتهم بعيني و شلون ميخافون.. بس الغريب بالموضوع من جان يصيح عليهم كبل يوخرون .. و يروحون يكعدون بمكان ثاني بي فيي ( يعني مكان متلوحه الشمس) ..

بمرور الوكت و من خلال شغلي لفترة طويلة بالمحل عرفت همه ليش يسمعون كلام الرجال الجبير ..

لخاطر ابنه صديقهم ينزلون راسهم و يروحون لمكان ثاني .. لأن ابن ابو المحل صديقهم .. فد يوم قررت ادخل بسالفة هالعلاقة و اعرف شنو سرها .. يعني الولد ابن ابو المحل خريج و عنده سيارة سعرها ميتسولف .. و تعاملة كله بالدولار و كل التجار يعرفوه .. و عنده علاقات حتى بناس بالدولة ليش هالولد مقوي علاقته بأهل العرباين هيج و دك ضحك و دك شقى و يصيحوله بأسمه و يتشاقون حتى شقى ثكيل بيناتهم .. يعني (ميانه قوية) .. كلت خلي اسأله .. طبعا اني كله استاذ اصيحله .. فد يوم كلتله ممكن اسألك سوال …

كال كول .. كلتله ولو هو مو من حقي اسألك بس انته تعرف اهل العرباين كلهم و كلهم اصدقائك و ابوك شكد ميرزل بيهم ويطردهم من يجي (وطبعا ابوه يجي بين شهر و شهر مو دائما بالمحل) كلتله شكد ما ابوك يرزل بيهم ميحجون ولا كلمة مع العلم همه مو قليلين شر و اني شايف عركاتهم بعيني ميخافون من اكبر واحد … شنو السالفة ..

ضحك هو ..

كال شوف .. ابوية الي تشوفه ولو ميصير احجيلك بس انته مو غريب صرت و صارلك فترة ويانه .. كل اهل العرباين و كل اهل الجملة هنا يعرفوه .. ابوية رجال قاسي كلش .. بس يبقى ابوية و ابقى احبه .. ابوية ورث هالخير من جدي .. و ترى شغلتنه هاي قديمة كلش .. يعني حتى ابو جدي جان يشتغل بالجملة .. ابوية جانو الناس يتعاملون وياه علمود اسم جدي .. لان هو مع الاسف (اي لغة حوار ماعنده) بس للأمانة عقله بالشغل لحد اليوم كلش قوي .. يعني يعرف يطلع الفلس من التراب .. بس لغة حوار ماعنده و عصبي و قاسي .. يتعامل وي الناس بطبقية .. و حتى وياي توقع اني جان يتعامل وياي هيج قبل ..