قصص عراقية حقيقية بقلم ابو بغداد سائق التكسي

التانكي

اشتميت ريحة جكاير بملابسه اكثر من مرة … و كل مرة اسأله بيها يكلي اصدقائي يدخنون و ريحة جكايرهم تلزك بهدومي … هو بتفكيره و بعمره يتوقع اني ماعرف هو يدخن … و لأن اني مار بهل الموضوع قبل و اصلا مريت بفترة مراهقة مثله اعرف تفكيره … بس الفرق بيني و بينه اني ابوية و اخوتي شكل و اني الي ابوه شكل ثاني … راقبته و عرفته يدخن و لزمته لزم يد … خاف و لونه تغير و كام يبجي … و توقع راح اجوي بالجكارة بس اني ما جويته اخذت الجكارة من ايده و شربت منها نفسين و طفيتها و طلعنه نتمشى اني وياه … هو يمشي بصفي بس خايف .. وكل ما اتحرك حركة عفوية يتخيل راح اضربه و يفز … اخذته للبيت و كعدنا اني وياه و امه جتي كلتلها روحي شوية عندي حجي وياه … راحت امه و اني بقيت اسولف وياه .. هو ساكت و منزل عيونه بالكاع و يسمع كلامي .. كلتله شبيك احجيلي الصدك .. كال خايف منك يابه … كلتله من شنو تخاف ؟؟
كال تضربني .. كلتله زين ضربتك و كسرت عظامك هسه شراح يصير .. راح تبطل الجكاير  أو متبطلها .. بس مو هاذا موضوعي .. تريد تدخن روح دخن بس لا تجذب عليا .. اني فد يوم ضربتك ؟؟
كال لا .. كلتله فد يوم امك ضربتك و اني قبلت عالموضوع ؟؟
كال لا .. زين انته محتاج شي … ناقصك شي .. مقصر وياك اني لو امك مقصره وياك ..كال لا ..
كلتله زين سألت نفسك اني ليش ما اضربك و ما اقبل امك تضربك ليش ؟؟؟
كال ماعرف بس امي تكول انته جان جدي و عمامي هواي مأذيك علمود هالشي تكره سالفة الضرب … كلتله التانكي …
كال شنو ؟؟ 
كلتله التانكي مال مي تعرف الي فوك سطوح البيوت … كال اي .. كلتله ببيت جدك الي هو ابوية جان عدنا تانكين فوك السطح … واحد نستعمل و الثاني بمرور الوكت صار بي خياسات هواي و كمنا منستخدمه بس عفناه فوك السطح .. هالتانكي الثاني جنت مرتبله ترتيب اني … البيتونه مالتنا جان بيها كومة قلاقيل و غراض و دعافيس … و طبعا اكو دواشك و بطانيات تعبانه هم .. اني جنت ماخذ بطانيات و حاطها جوى بالتانكي الفارغ الخربان … و مرات من جان ابوية لو اخوتي يريدون يكتلوني اروح اختل بي … بيتنا جان عبارة عن صياح بصياح … عبالك سوك جمعة مصغر … اخوتي يتصايحون بيناتهم و ابوية يصيح على امي و كله صياح بصياح … اليوم الي متصير عركة بالبيت معناها معجزة سماوية صارت … و اني جنت اكثر واحد متضرر بين الكل .. مراح اكول اني جنت عاقل و ملاك عندي جناحات .. بس ماعرف جنت احسهم من يكتلوني يتلذذوني بالضرب و يرتاحون من يشوفوني ابجي بصوت عالي … حتى ابوية نفس الشي .. بس الي عرفته و افتهمته بمرور الوكت .. انو كل واحد بيهم يطلع حيفه بيا ..
شلون ؟؟؟
ابوية قاسي جان (الله يرحمه) كلش قاسي .. اول واحد ابوية بده يكتله و يبسطه بقوه هو اخونه الجبير … و طبعا احنا خمس اخوة و بنات ثنين .. وراها من اجه اخوية الثاني و كبر منو كام يكتله ؟؟
اخوية الجبير و ابوية .. و بعدين من اجه الوراه هم كامو يكتلوه  الاكبر منه و استمرت السالفة لحد موصلت الي ههههه اني الصغير الي ما اجه احد ورايا حتى اضربه .. و حتى لو جاي مجان ضربته لان اني اكره سالفة الكتل .. جانو انواع الضرب يضربوني .. بالماسحة و بالنفاضه مال جكاير و بالنعلان (مكرم القارئ) و بالصونده و حتى بواير مال كهرباء مره كتلوني .. و الاسباب جانت تافهه .. يعني مثلا ما اروح لسالفة اذا يدزوني .. لو مثلا اروح العب فيشة و يلكفوني يم الفيشه واكف وي جهال المنطقة .. و المصيبة الكبرى .. يطالبوني بالدراسة و النجاح و يكتلوني لان ممحضر دروسي وهمه كلهم ومن ضمنهم ابوية (جدك) ما مكملين دراسة ههههه .. يعني جانو يريدون صيغة او مبرر حتى يكتلوني بي … و مرة اتذكر تعاركت وي جاهل بالمنطقة .. الجاهل يصير اخو صديق اخوية … الجاهل هو اعتدى عليا و صاحلي ابو اذانات واني من جنت صغير جانت اذاناتي كلش بارزه و واضحة بس من كبرت طبكو و صار شكلهم طبيعيات .. ضربته و هو كال لاخوه و اخوه كال لاخوية .. الي كسر نفسيتي و خلاني اتأذى من داخلي مو ضرب و كتل اخوية اليا .. بالعكس ماشي غلطت و اتحمل نتيجة غلطي .. بس الي كسر نفسيتي انو هو كتلني كبال صديقه و بنص الشارع و من ردت انهزم من ايده جلب بالبجامة مالتي و انشكت و طلع لباسي كدام الناس و عافني هو .. لزمت البجامة بالكوه لفيتها و امشي و ابجي و اغطي المكان المشكوك بالكوه بالبجامة .. لحد موصلت لباب بيتنا .. امي تلكتني من باب سكتتني و اخوية بس شافني ابجي غير ذاك الكتلني .. شال نعاله و كال شمسوي مكسورة ياهيج ويا هيج .. و من يومها قررت اسوي اخطاء جبيرة حتى .. ليش لان اني هيج هيج على اخطائي الصغار انكتل و اشبع كتل .. بعد من شنو اخاف ههههه اني هسه انته دشوفني اضحك .. بس والله من داخلي احس كلبي مثل الواحد لازمه و كاعد يمرغ و يمرد و يعصر بي قوي قوي … و اول شغلة سويتها بعمر صغير كمت اشرب جكاير … و هاك شوف يجوز هسه بمرور الوكت الجويات شبه اختفت .. بس هاي الي دشوفهم بيدي و بجتفي كلهم جويات مال جكاير اخوتي و ابوية جان يجووني .. جسمي اتدبغ عالكتل .. و كمت من اسوي غلطه ارجع للبيت اذا ميكتلوني و بعده خبر المشكلة مواصللهم .. اسويلي عركة وي واحد منهم حتى بس انضرب … و طبعا هالحجي سنين تمشي واني مثل ما اني .. و كبرت …
و طبعا بطلت من المدرسة و جنت اشتغل شغلات اطلع منها مصرف لان صح ابوية امكانيته زينه بس جان مانع عني المصروف بسبب سوالفي المكسرة .. و اجه اليوم الي كل اخوتي وحتى ابوية خافو مني و بطلو يمدون ايدهم عليا .. وهالشي صار بموقف … فد يوم طلعنا اني و شباب جماعتي طلعه .. ورجعت متاخر الوكت .. واحد من جماعتي جان عنده قمصلة يمي بالبيت بس مو مالته مال اخوه .. اني جنت اشتغل بوقتها بمعمل صغير مال تفصال قماصل جلد .. جنت مكملها بس باقية يمي بالبيت .. من رجعنا كالي انطينياها .. فتت للبيت جبتها و طلعت انطيهياه .. جان اخوية يطلع عود راد يضربني كبال صديقي بسبب تأخيري بره .. ضربني بس هالمره ما سكتت .. ضربته بس ضربه كلش قوية كسرت بيها خشمه … و ردة فعلي جانت مو طبيعية لان صديقي يمي واكف يعني اخوية حتى ما انتظر اطب جوى .. ماعرف شنو الي خلاني اسوي هالشي .. و هو وكع بالكاع لا حس ولا نفس .. و صديقي كلتله روح و طبعا الولد راح و اخذ القمصله .. طبيت للبيت كلتلهم طلعو فوتو فلان برى .. و هالحجي ابوية جان نايم وحتى اخوتي بس ثنين منهم كاعدين .. طلعو طببوه و هو جوى كام يتهدد عليا .. اني وكفت اضحك كلتله دروح للمستشفى خلي يعالجوك .. اخوتي الباقين معجبهم كلامي رادو يضربوني هم ضربتهم .. عافوني اخر شي وابوية كعد وامي واخوتي كامو يصيحون … جان ابوية يكلي شلون تمد ايدك على اخوتك الكبار  ياهيج و ياهيج .. كلتله انته علمتنا هالشي .. و جان انفجر عليهم و كمت ابجي .. و حجيت كل الحجي الي حجيته الك .. كلتله انته من صغرنا تعلمنا عالقسوى و عالضرب و عالكتل .. وهسه جاي تسألني ليش … كله من ايدك انته ضربتهم من صغرهم و همه يضربوني من صغري و هاي اني هسه .. مستعد هسه حتى قتل اقتل …وابشرك كلب ماعندي .. وما اخاف … و كله بفضلك و بفضل هالابطال (و اشرت بايدي عليهم) … طردني من البيت بوقتها و بقيت اسبوعين ببيت خالي .. و تالي رجعت للبيت بس رجعت غريب بنصهم .. ما احجي وياهم ابد ولا همه يحجون وياي .. كلهم من عده امي وخواتي .. و طبعا بذاك الوكت جان اخوية الجبير يريد يتزوج و تزوج و طلع بيت وحده .. و الثاني وراه تزوج وهم طلع بيت وحده .. و الثالث تزوج بس بقى بالبيت نفسه .. و طبعا هالحجي سنين تمشي وابوية توفى .. ورجعنا نحجي عادي بس الضرب انلغى من بيتنا .. و اخوتي خلفو و جنت اشوفهم يكتلون جهالهم وما اقبل .. حتى وصلت للزعل كالولي حرفيا( جهالنه و نعرف شلون نربيهم عود من تخلف انته ربي بكيفك) وانته نفسك شايف عمامك شكد قاسين وي جهالهم .. بس اني ما صرت مثلهم وياك .. و دللتك .. و خلي ببالك شتسوي غلط اني اعرفه .. لان ماكو اب من عدنا ما مر بفترة مراهقة ..
انته كبالي مكشوف … شلون كلاص المي الشفاف .. هيج اشوف شكو بداخلك .. بس ما اضربك .. و روح دخن .. روح شتسوي سوي .. بس لا تكذب عليا .. اني مراح اعاملك مثل ما ابوية و اخوتي عاملوني .. بس بالمقابل اريد منك شي .. قدر اهتمامي بيك و بأخوتك و خوفي عليكم و لاتخلي شي يضرك لو يأثر على دراستك لو يأذيني و يأذي امك .. اني تأذيت هواي بصغري .. بس ابد ما طلعت عقدي النفسية لو امراضي لو شسميها سميها عليك لو على اخوتك لو حتى على امك .. اتمنى تقدر هالشي و كلتلك روح دخن بس جذب لا تجذب عليا … و ارجع واكول ماكو اب لو ام ميعرفون جهالهم (الي همه قطعه منهم) شيسون .. بس على كولة شباب هالوكت (مغلسين) اتمنى تقدر هالشي و متأذينه .. و اني من اكلك بطل جكاير مو علمودي بس علمودك ..
عالعموم .. اتمنى اذا باجر عكبة الله رزقك بجهال تعاملهم مثلي .. و ديربالك تضربهم .. ديربالك .. ماكو شي يسوي بهل الدنيا تهين طفلك بي كبال الناس .. ماكو شي يسوى بهل الدنيا تخلي ابنك يبجي كبال الناس و انته تضرب تضرب تضرب تضرب بي .. حتى لو غلط .. تكدر بينك وبينه .. و هاي هي ..
(التانكي)
انتهى
اخوكم ابو بغداد سايق التكسي
#ابوـبغداد