قصص عراقية حقيقية بقلم ابو بغداد سائق التكسي

الوسواس القهري

حياتي عادية و عندي صديقات و نروح و نرجع سوى .. عندي داير مدايري علاقات حلوة .. اهلي يحبوني و كرايبي يحبوني .. و مثل الطير طايرة بهل الدنيا .. عمري صغير فرحانة بالدنيا .. عائلتي ما عدها اي مشاكل لا مادية ولا معنوية .. بابا امكانيته زينة و ماما موظفة .. اخوتي الاكبر مني كلهم يدرسون .. عائلتنا كلب على كلب .. اقربائنا يحبونا .. يجونا زيارات للبيت .. و احنا نروحلهم …
لهنا كل شي حلو .. يعني من الاخير .. حياتي بصراحة جانت كلش حلوة .. بصف الاول متوسط نمت كعدت لكيت يم اصبع ايدي الصغير طكعه بيضة .. صغيرونه .. حاولت امسحها و اغسلها مراحت .. حجيت لأمي كالت ماكو شي لان جانت الطكعه صغيرونه .. اني بذاك الوكت حالي حال اي وحدة بعمري ناخذ الحجاية من الام وبس ..
يعني امي اذا كالت كلشي ماكو خلص يعني كلشي ماكو .. نسيت السالفة بس الطكعة بعدها بيدي ..و مشت ايام .. اني واختي الاكبر مني عدنا غرفة وحدة .. ننام بيها سوى .. و طبعا حالي حال اي خوات كاعدات بغرفة وحدة يعني مرات تنكشف مقاطع من الجسم وحدة مقابيل وحدة .. اني جنت دابدل التيشرت مالتي اختي جانت متمددة تقرا … اشو صاحت سرى تعالي بله .. رحت كالت انداري .. انداريت رفعت تيشرتي و كامت تباوع على ظهري و رأسا عافته و صاحت امي .. جتي امي نزعتني التيشرت جان تكول هاي شنو ياستار ياربي .. و راحت خابرت ابوية اجه ابوية و بنفس اليوم رحنا كشف مستعجل لدكتور جلدية .. طلع عندي بداية بهاق .. الدكتور كال احنا بلكي نكدر نوكف انتشاره ومنين اجاني ما اعرف ياربي ..
منييييييين ماعرف .. بس تعامل اهلي اختلف وياي من ذاك اليوم .. حسيت بيهم يخافون يطخوني مثل قبل .. يعني حتى اختي الي جانت مرات تكعد على سريري لو تلزم اغراضي حسيت بيها تخاف مني و متتقرب من اشيائي مع العلم الدكتور كال ميعدي .. هالشعور محد يحس بي الا الي جربه .. جنت اسمع كلمة اخاف تعدينا و هو ميعدي اصلا .. مصيبتي جانت بذاك العمر بس يوكف انتشار البهاق على جسمي .. يعني وحدة بذاك العمر وكلها حيويه و نشاط تنكسر بهل الشي !!
نفسيتي صارت زفت .. و الانتشار موكف و وصل لوجهي .. وجهي جان يضحك للهوى .. تعابييره كلها فرح .. انكلبت تعابيير وجهي و صار كله حزن و خوف من تعامل الناس وياي .. الطالبات الي وياي بالمدرسة وحتى المدرسات حسيتهم اختلفو وياي .. صديقتي و شريكيتي بالرحله (يعني الي تكعد بصفي عالرحله) كامت تحاول متطخ جسمها بيا و تخلي مسافة اصبعين لو تلث اصابيع فرق .. اني من كمت اشوف هيج امور نفسيتي يوم ورى يوم كامت تنكسر والدراسة الي جنت احبها و انجح بيها كامت درجاتي تقل بيها لحد مطلبت من ابوية ان ابطل من المدرسة و ابوية تفهم الموضوع لان شبعت بجي كباله و حجيتله كلشي .. حتى ابوية هالجبل العظيم الي شخصيته قوية شفت دمعته بعينة من جنت احجي و ابجي .. بطلت و كعدت بالبيت .. اقربائنا من جانو يجونا اني جنت ما اطلع اشوفهم .. غرفتي صارت هي ملاذي الوحيد بهل البيت .. كل كعدتي بيها و كمت اتجنب اي مرايا بالبيت .. كامت تلعب نفسي من المرايا .. و صار نهاري مثل ليلي و ليلي مثل نهاري .. بس هلكد ما حجى وياي ابوية و كالي ترى عادي قررت ارجع للمدرسة بعد ما ضيعت سنة كاملة اني مبطلة .. رجعت وي صف غير صفي و بنات غير البنات الي اعرفهم .. و جنت اروح لوحدي و ارجع لوحدي .. ما اصادق بنات لأن اعرف راح يسألوني على هالبياض الي بوجهي شنو .. و يجوز اني صارت عندي خوفة من لا شيء .. كمت احس كل الداير مدايري يباوعون عليا ..
يجوز هالشي مموجود بس ما اعرف اني صارت عندي وسواس قهري من هالموضوع .. و سنة ورى سنة كبرت و دخلت كلية .. بالكلية شفت نظرة الطلبة تختلف من الاعدادية و المتوسطة (بحكم العمر) لان هنا الاعمار جبيرة شوية .. بس نفس الشي هم الوسواس موجود .. جنت اخلي مواد تجميلية و جنت اضيع شوية من البهاق بهل المكياج .. بس هم مبين .. صارت عندي علاقات وي بنات بس مجانو يسألوني على الموضوع مراعاة لمشاعري .. المشكلة عدة مرات اهلي كالولي ترى انتي مزيدتها للسالفة كلش .. بس هالحجي مو صح .. اني بنية .. خزينة البنية بالحياة هو مظهرها .. جنت اكلهم لحد يكعد يقنعني انو البيا شي طبيعي .. اني بنية .. يجوز الرجال من يصير عنده هالشي عادي عنده بس اني بنية .. و من حقي افكر باجر عكبة يصير عندي عائلة … منو ينعجب .. منو ياخذني .. وهالشي داشوفة بالكلية .. اني بنت عائلة و مربية و ما ادور علاقات صح .. بس جنت اشوف كل البنات الداير مدايري يجون عليهم شباب بالكلية و يصارحوهم و طبعا هي المسألة مو مسألة اني اريد علاقة .. بس طول فترة دوامي بالكلية لحد متخرجت محد ما اجه صارحني ولا حتى سمعني كلام ..
اني ما اكول اني جان وافقت بس اني بنية بنية  .. و مرت سنين و تخرجت و توظفت بوظيفة بدائرة حكومية يوميا يفوتولها الاف المراجعين و عمري بده يكبر و خواتي تزوجو و حتى اخوتي تزوجو و اني على وضعي … و طبعا ورى دخول الانترنت و تطور الدنيا مساحيق البشرة و المكياج اختلفت و صار عندي ادمان على مقاطع المكياج و لكيت انواع و كمت اضيع كل الموجود بوجهي بهل الشي .. نظرة الناس الي اختلفت و كمت اسمع كلام من المراجعين ههههههههههه .. حتى من جنت اروح للدوام بسيارتي الخاصة هم جنت اسمع كلام .. جنت اضحك و ابتسم .. و رجعت ثقتي لنفسي بس بنفس الوكت اكو خوفة .. لأن هالشي الي مسويته هو موقت يعني اذا اتزوج ممعقولة مراح يشوف وجهي الحقيقي زوجي .. زين اني المشكلة مو بس بوجهي جسمي بي هم طكع هواي .. و جانت اكو خوفة بداخلي انو الي يريد يتزوجني راح يفكر الاطفال هم راح يطلعون مثلي ؟؟ لان مو كل الناس تعرف حقيقة هالمرض الجلدي .. مو كل الناس عدها خبرة .. يعني شلون قابل اكعد اشرح للي يجي يتقدملي على هالامور .. مجرد التفكير بهل الشي جان يزيد عدد ضربات كلبي و يصير عندي خفقان من الموضوع .. وراح احجيها بصراحة و بدون كذب حاولت اسوي صداقة عن طريق الانترنت .. و تعرفت على رجال مودب و محترم هو هم موظف بس ممتزوج .. بالبداية جنا نحجي طبيعي و يوم ورى يوم كامت تزيد علاقتنا و الحجي صار ازيد .. كام يسألني عالصغيرة و الجبيرة بحياتي .. و اني نفس الشي .. كام ينصحني و مرات ياخذ رأيي بمواضيع عامة مختلفة .. حتى اللبس مرات جان من يروح يشتري لبس يطلب رأيي .. لحد مصار عدنا ثقة جبيرة واحد بالثاني و قررنا نلتقي .. (بمكان عام طبعا) .. و التقينا و جنت ناوية احجيله بأول لقاء بيناتنا على الشي الي ضامته ورى المكياج .. بس المواضيع و الضحك منطاني فرصة احجي ..اللقاء جان كلش حلو بالنسبة الي لأن الرجل محترم و كلامه موزون بس عنده نوع من الفكاهية الي بس كبالي طلعها ههههه .. كال ترى اني مو هيج بس عاجبني اضحكج و اشوف ضحكتج .. و طبعا شخصيته تخبل ..
من رجعت للبيت كلت بله لو حاجيتله مو احسن .. و قررت احجيله بس مو وجه لوجه لان ماعندي جراءة .. و اتصلت بي و كلتله اكو شي ضامته عليك و اريد احجي .. كال كلشي عندي عادي بس اهم شي ممتزوجة لو مخطوبة تطلعين .. كلتله لا والله مو هيج .. كال شنو لعد .. كلتله راح احجيلك قصتي من البداية و بديت احجيلة من اول مرة صار البهاق بأصعبي .. لحد موصلت ليوم الي تعرفت عليه بي .. الرجال تفهم الموضوع و كال عادي و الله و طلب يشوفني بدون مكياج .. و رحت و التقيت بي و شافني و جان اللقاء عادي وهم الرجال نفس اول لقاء بقى يتعامل وياي .. بداخلي جانت اكو دوامة مال اسأله بس اكو سوال واحد ينعاد بمخيليتي الي هو (معقولة هو ديسوي هيج لان انقهر عليا وميريد يكسر كلبي و هسه ورى ميروح يعوفني) هالسوال جان ينعاد براسي .. لحد مرجعت للبيت وعيوني عالتلفون و اكول كل شوية (اشو تاخر مدزلي شي .. اشو مو مثل قبل جان كل شوية يدزلي شغلة تضحك .. يمكن خلص مسحني من حياته ) عيوني عالتلفون جتني رسالة اي اي جتني رسالة .. هو والله .. كاتبلي ها وصلتي للبيت .. كتبتله رأسا اي و انته .. كال اتصل .. خفت من كال اتصل .. طبعا هو للامانة دائما يسألني اتصل قبل ميتصل لان يعرف اني عايشة وي ابوية و امي .. كلتله اتصل .. اتصل كال اكلج شوكت نكمل البدينا بي  ترى العمر ديمشي و ثنينا كبار خلي نلحك ؟؟
كلتله شنو مفتهمتك .. كال شوكت اجي اخطبج اخذيلي موعد من اهلج ههههههههههههههههههههه ما اريد اكول ردت اموت من الفرحه .. و انخطبت و تزوجت و عندي همسة هسه و قبل يومين جان عيدميلادها حبيبيتي عمرها صار سنتين بس دائما اكلب جسمها رغم ما هي ما بيها شي بس اخاف يجيها البهاق و تعيش اللحظات الي عشتها .. والحمدلله هسه حياتي طبيعية و اداوم بس اكيد بعدني استخدم نفس المساحيق الي تضيع كل البهاق الي بخدودي و بكصتي .. الثقة بالنفس كلش مهمة .. و اني جانت ثقتي بنفسي صفر بس الحمدلله .. رجعت ثقتي بنفسي صح بمساعدة امور معينة .. بس المهم الحمدلله هالخوف كله راح وهسه ماعندي اي مشاكل نفسية بحياتي و ابو همسة ابد ممهتم لهل الموضوع و نظرته الي مختلفت بعد مشافني بدون مكياج .. الله يحفظلي ابو همسة و همسة و يحفظ ابوية و امي الي هم جان الهم دور جبير بكسر حاجز الخوف .. و الله يحفظكم
(الوسواس القهري)
انتهى
اخوكم ابو بغداد سايق التكسي
#ابوـبغداد