قصص عراقية حقيقية بقلم ابو بغداد سائق التكسي

كصايب

منطقتنا شعبية و يغلب على طابعها الطابع العشائري رغم ما هي ببغداد … سكنة المنطقة ناس من كل الطبقات الاجتماعية .. غني .. فقير .. متوسط المعيشه … يعني نكدر نكول كوكتيل … بس كلهم يحبون المساعدة و دائما الي عنده ينطي للماعنده و يوكفله … اني ستوني فتحت عيوني عالدنيا بذاك الوقت و اكدر اكول كمت اكدر اروح للمدرسة و ارجع وحدي و بنفس الوقت صار عندي اصدقاء من نفس الشارع اطلع اكعد يمهم و نلعب سوى … المنطقة لأن شعبية نسمع القاب هواي للشباب .. يعني اني عمري تقريبا ١٠ سنوات .. الي اكبر مني مثلا الي عمره ١٨ لو ١٧ لو عشرين اغلبهم عدهم القاب .. بيهم الي يصيحلوه بأسم امه و بيهم الي عنده لقب مخيف و بيهم الي عنده لقب مضحك و بيهم الي يلقب بأسم عشيرته .. بس جان اكثر لقب يخليني اصير فضولي هو لقب (حسن كصايب ) اني الي اعرفه الكصايب للبنات .. زين هاذا شلون حسن ولد و عنده كصايب .. جنت اسمع هالاسم هواي يتردد بشوارعنه .. و صار عندي فضول اشوف حسن و اشوف كصايبه .. هو جان عمره بذاك الوقت ١٩ سنه تقريبا .. بس كل المنطقة تعرفه بسبب العركات و المشاكل و يوميا شايلي الفرقة الحزبية و مطلعي .. حتى الجهال الي بعمري جانو يخافون منه .. بس اني جان دكي و مدكوكي اشوف كصايب حسن .. و فد يوم اكو سوك شعبي قريب من عدنا جنا اني و الجهال الي من عمري نروح نشتري مناك لفات حب لو ابو الجيس .. رحنا و صارت عركه بنص الشارع و سمعنا على اساس ابو كصايب كاعد يتعارك .. اني ركضت و اصدقائي كلهم رجعو للبيت بس اني مرجعت .. اني ركضت لنص السوك حتى اشوف ابو كصايب .. من وصلت طبعا همه الناس جانو لازمي و يجرون بي و يكلوله حسن كافي عيب متسوى و من هالحجي حتى يسدون العركة .. اشو حسن شكله عادي و حتى شعره كصير و ماكو كصايب عنده .. و رجعت حجيت لاصدقائي كلتلهم اكلكم حسن ماعنده كصايب .. الكل ضحك و الفضول الي بداخلي انتهى … مرت سنين على الموقف و اني كبرت و طبعا التقيت بحسن اكثر من مرة بالمنطقة بمرور السنين بس جنت اشوفه من بعيد لبعيد .. و حتى مرات اذا هو يفوت بشارعنه يسلم و اني اذا افوت من يمه اذا بشارعهم او بغير مكان هم اسلم عليه بس مجرد سلام .. يعني ماعندي بي معرفه شخصية .. سلام و هالشي معروف ومتداول بين العراقيين سواء تعرفهم او متعرفهم نسلم .. السلام لله …
عالعموم … مثل مكلت مرت سنين و اني داومت اعدادية و كمت اشتغل .. مره صدفه جنت رايح يم صديق بنفس منطقتنا و هو بيتهم بنفس شارع بيت ابو كصايب .. حجيتله الموقف مال الطفوله ضحك .. كالي ترى الولد يدرس كليه .. كلتله مستحيل والله .. كال والله و راح يتخرج .. كلتله يمعود جان مشاكل و طلايب و يوميا شايلي الحزب .. كالي بابا هاي فترة مراهقة و راحت .. كلتله يمعود ولا مره شفته يم فيصل شنونه (فيصل شنونه صاحب كشك جكاير و نيشان للمكان الي كل منطقتنا يركبون منه الكوسترات .. يعني من يم الكشك كلنا نلتم الصبح حتى نتوكل لدراستنه لو لشغلنه) كالي مو هو يداوم مسائي لان يشتغل .. كلتله اها … كلتله متدري يا كليه يداوم .. كالي قانون .. كلتله اضررررب خربت ههههههههه .. ضحك كالي بابا الولد فقير و ابن اوادم .. جتي فترة بحياته خربط حاله حال هواي من الناس بس الولد كلش محترم .. كلتله ماشي .. و انسد الموضوع .. و طبعا بيومها سالته ليش يصيحوله حسن كصايب كالي ماعرف .. و ورى سنتين تقريبا عندي اختي الاكبر مني موظفة .. تداوم بالطابو .. منو تقدملها ؟؟؟
بالضبط  حسن كصايب تقدملها … طبعا هو عنده مراجعات بالطابو و شايفها و اصلا هو اكثر من مرة شايفها بالمنطقة بحكم احنا كلنه بنفس المنطقة .. عاجبته و متقدملها .. اني من سمعت هالشي تعاركت وي ابوية و ابوية رزلني .. كالي انته صح اخوها بس مو انته الي تقبل لو ترفض .. اني مدام عايش و نفسي بالدنيا اني الي اكول اي لو لا .. كلتله يابه هاذا عليه لقب و جان يوميا بالسجن .. كالي هواي ناس غلطت بفترة مراهقتها و اني وعمامك سألنا عالرجال الرجال محامي (طبعا جان متخرج هو و بادي ستوى يشتغل) .. كالي الولد محامي و اهله ناس طيبين .. كلتله يابه يصيحوله كصايب .. كالي هو منو بمنطقتنا ما مطلعين عليه لقب .. رحت لأختي حجيتلها كلتلها هيج و هيج .. كالت بس ابوية و عمامي سألو عليه وكل الناس تمدح بي .. كلتلها اشو حجيج عبالك موافقة .. كالت اي موافقة .. و صدك والله جان يتزوج اختي .. طبعا الرجل ما عنده شي وياي و محاجي وياي كلمه غير بس السلام .. بس ماعرف ليش اكرهه و مالي واهس احجي وياه .. يعني حتى ورى متزوجت اختي من جان يجي يجيبها لبيتنا لو اشوفها برى وياه مثلا يفوتون يتمشون .. اسلم بسرعه و اعبرهم .. وحتى من يجي يم بيتنا هم اسلم كبل و اعوفه .. اكرهه من الله .. هسه لو يجون كل الناس يكولون عليه خوش ولد و صح هو مشفت منه شي بس ماعرف ليش اكرهه ..
عالعموم .. اختي صار عدها طفله و بيوم من الايام امي جبرتني اروحلها للبيت و كالتلي حسن مموجود روح .. لان اختي ما بيها حيل تجينا .. رحت و طبعا بيتهم بس هو حسن و امه و اختي عايشين بي … رحت دكيت الباب امه فتحتلي واني اعرفها و هي تعرفني و للامانة كلش طيبه و حبابه .. فتت جوى انطيت غراض لاختي  و ماعرف شلون عيوني صارت على شعر اختي … شفتها مسويه كصيبه طويله و هاي اول مره تسويها لان اختي دائما اشوفها ببيتنا بدون ربطه بس ورى الزواج لان قليل تجينا ممنتبه على هالشي .. كلتلها و عود ردت اضوجها لان اصلا اضوج من رجلها … كلتلها هاي شنو مسويه كصيبه تريدين تقلدين رجلج .. كالتي هاي بعدك تكرهه .. ترى هو سوالياها .. كلتلها شنو .. كالت هو حسن دائما يسويلي شعري كصيبة بيده .. كلتلها هاي شنو صدك تحجين .. كالت والله .. و بنفس الوقت اجه حسن للبيت و شافني و جلب بيا اكعد واكعد .. كعدت جان يفتح الموضوع وياي .. كالي انته ليش تكرهني بصراحه احجيلي .. ترى اختك كايلتلي انته مقبلت بالبداية من تقدمتلها و كالتلي حتى تعاركت وي ابوك و اني كل هالوقت مسألتك بس هسه على الاقل بمناسبة انته صرت خال احجيلي .. كلتله شحجيلك .. كالي ليش تكرهني .. كلتله اني ماكرهك .. كالي تكرهني .. كلتله ما اكرهك بس سالفة اللقب و العركات قبل و السجن و جنت يوميا مشكله .. كالي الك واهس تسمع سالفة .. كلتله اي اسمع ليش لا … كالي اني الوحيد رجال على اربع بنات و امي وابوية .. البنات هسه كلهم تزوجو الحمدلله .. بس الاصغر مني بسنه توفت و يمكن انته متعرف هالسالفة .. كلتله لا والله .. كالي اني جنت كلش متعلق بأختي الاصغر مني .. لدرجة جنت كلشي اسويلها و جنا نلعب سوى دائما .. و كبرنا سوى .. من دون كل خواتي هالاخت جانت بالنسبة اليا مو بس اخت .. جنت اتخيلها بنتي .. لدرجة مرات جنت اسأل امي يمه شلون تسوين كصايب لخواتي اريد اتعلم اني اسوي كصايب .. امي جانت ترزلني و تكلي عيب ابني انته رجال روح تعلم غير شي ..  جانت امي تسوي كصايب لخواتي بالطرمة .. تكعد على حصيره مقابيل شباك الصاله .. و خواتي يكعدن يمها .. و وحدة وحدة تسويلهن كصايب .. جنت اختل ورى البردة و اباوع على ايد امي .. شلون تسوي الكصيبة و تعلمت ..
و اختي الي اني متعلق بيها الوحيدة بيهم قبلت اجرب بشعرها اسوي كصيبة .. و ضبطتها من اول مره .. و من ذاك اليوم كمت اني اسوي بس الها كصيبة .. جنت احبها و حتى بالدراسة جانت هي تسمعلي واني اسمعلها .. و بيوم من الايام وكعت بالمطبخ و وديناها للمستشفى و الطريق كله اني و امي نبجي .. وابويه يسكت بينا (بذاك الوقت ابويه عايش) .. من وصلنه للمستشفى هي مجان بيها شي .. بس من سوينا فحوصات طلع عدها مشاكل بالقلب .. و بدت تاخذ علاج و جنت اخاف عليها من الهوى .. و كبرت اني وهي هم كبرت .. دخلت اني اعدادية و هي متوسطة .. و هم مرات جنت اسويلها كصايب .. بس هي كلشي مابيها .. وكلنه بالبيت مداريها و نخاف عليها .. و بيوم من الايام صبحنا الصبح نريد نروح للمدرسة .. اني اروح لدوامي وخواتي لدوامهن .. بس هي ما صبحت .. ماتت .. طبعا الموقف اذا اريد اوصفه مينوصف .. لان شراح احجي مراح اوصلك الحزن الي ركبنا كلنا .. خواتي يبجون واني ابجي و امي وابويه .. صغيره بعدها حبيبتي .. و دفناها .. صح هي بنظر اهلي و نظر الناس و نظر معارفنه ميته و حتى بنظر الحكومة و بالاوراق الثبوتيه هم ميته .. بس جانت عايشه بداخلي .. بذيج الفترة اني بطلت سنتين من الاعدادية و هي هالسنتين مشيت بيهن مشي محلو .. شربت و جنت ادور المشاكل والعركات وي الكل .. حتى توقع كمت اضرب مواسه وهاك شوف (طبعا رفع التيشرت بطنه مشخطه بس مبينه الشخوط قديمه صارلها سنين) و ابويه بذيج الفترة جان عايش .. راح للفرقة الحزبية و راح حتى لكرايبنه كالهم اني تبريت منه لان كلش طلع من الطريق .. جنت ما انام بفراشي .. جانت وحدة من خواتي تفرشلي يوميا المغربية فراش فوك السطح .. لان ابوية ميقبل ادخل للبيت .. جنت اجي و اطفر من بيت ام عايد على بيتنا .. خطيه عايد جان يفوتني من بيتهم و يصعدني بالسطح و اكمز على سطحنا انام و الصبح ابوية من يروح للشغل انزل .. و على سالفة اللقب .. فد يوم جنا بالساحة نشرب .. اني و كم واحد تعرفهم هسه هم بطلو و صارو اصحاب عوائل .. سالوني كالولي شتحب اكثر شي بالدنيا .. اني جنت سكران .. كلتلهم احب اسوي كصايب للبنات .. خربو من الضحك و كامو يصيحولي حسن كصايب .. ومن يومها مشى اللقب عليا .. بس قليلين يعرفون شنو و ليش يصيحولي هيج .. و طبعا ورى سنتين من المشاكل و السكر خسرت نفسي و خسرت سمعتي الجانت حلوة بالمنطقة .. و كلت الي داسوي ميرجعلي مريومه .. اختي الله يرحمها جان اسمها مريم .. و صحيت على روحي كلت كافي .. و رجعت لدوامي و صح خسرت سنتين من عمري بس عوضتهم .. و تركت اصدقائي و توجهت بس للدراسه ..
بذيج الفترة انته جنت صغير .. و سمعت هالاشياء عني .. و هاي حجيتلك كل الي صار و تكدر تسأل امي على كل حرف كلته .. طبعا هو يحجي واني اريد ابجي بس ماعرف شلون لزمت روحي .. لان اني انسان خو مو كومة صخر كاعد كباله .. هو يحجي بحرقة دم خصوصا من يذكر مريم .. اخر شي متحملت كمت حضنته كلتله والله ماكرهم و جان تلزمني العبره .. انوب هو يريد يوخرني اني بقيت حاضنه ههههه .. بس هو افتهم اني اريد ابجي .. جان اكله و عاد راح تسوي لبنتك كصايب من تكبر .. كالي امي دشوف امي مو شعرها ابيض كطن .. لو تقبل اسويلها هم اسويلها هههههههه .. كلتله ادري شفت اختي انته مسويلها كصايب .. كالي يا اخي مدمن كصايب مو بيدي هههههه .. و ضحكنا بس اني مختنك .. و طلعت  امشي بس فرحان و مقهور بنفس الوقت .. كلت ايباخ الدنيا هاي صدك بيها العجايب .. يعني سبحان الله شكد جنت ما اطيقه بس مسكين هالولد .. و الحمدلله هو كلش يحب اختي و يحب بناته و ابنه لان هالحجي قديم هسه صار عنده بنات ثنين و ولد ههههه وصار اكثر من زوج اختي .. صار صديقي واخويه و ماعرف اسوي شي اذا ما اخذ رأيه .. ابو كصايب  .. يعني صدك الدنيا عبارة عن قصص .. الحمدلله على كل حال والف رحمه على روح الراحو و الصحة و السلامة للجميع .. (كصايب)
انتهى
اخوكم ابو بغداد سايق التكسي
#ابوـبغداد