قصص عراقية حقيقية بقلم ابو بغداد سائق التكسي

سوي الصح

ابو الشغل الي اشتغل يمه رجال جبير بالعمر … بدون ذكر اسماء طبعا .. الرجال هذا قوي جسمه قوي .. و طبعا الشغل مالتنه ميحتاج مجهود لان هو مكتب صيرفه .. يعني شغلنه بالفلوس .. بس مرات هو يساعد اهل المحلات الي داير مدايرنه .. مثلا ينزلون غراض لو ديسوون شغله … يساعدهم .. و بي شغله كلش حلوه .. الكل اصدقائه … صغير بالعمر و جبير بالعمر اصدقائه .. و كلش متواضع وياي … و يحجي وياي بصيغة اصدقاء .. طبعا هو عنده ولد ثنين و بنيه … ولده ثنينهم يدرسون كليات و كلش مثقفين و اكو اختلاف جبير بين لهجتهم و لهجته هو … يعني هو لسانه مال واحد ابن سوك بس ولده لهجتهم كلش مثقفه ههههه يعني يحجون بطرف لسانهم و ميفتحون مواضيع هواي من يجون يمنا مرات … و كلش يحترمون ابوهم مع العلم الي يشوف تعامل ابوهم وياهم يغار .. والله العظيم يعاملهم مثل الاصدقاء ولا عبالك ولده … طبعا هو دائما يسألني عن حياتي و مرات يسألني اذا محتاج فلوس .. و من يشوفني ضايج يبقى يسألني كومة لحد ميعرف شنو الي مضوجني … و طبعا احنا اربع اشخاص بداخل الصيرفه نشتغل .. هو مرات يجي متأخر بس شلون نعرف هو موجود حتى لو يكون طالع يشتري جكاير لو رايح لأصدقائه اهل المحلات الداير مدايرنه .. نعرف من اغنية هو يعيدها بالشاشه مال التلفزيون الي بالمكتب .. اغنية لقاسم السلطان اسمها (على خدي) … يعيدها كومه … و طبعا من يسمعها ينطلق و يضحك .. مع العلم الاغنية بيها شوية حزن ..
عالعموم .. بيوم من الايام اخوية الجبير تعارك وياي علمود زوجته … اخويه تعامله وي زوجته مو زين .. واني طبكت وياها ضده … هي ستوها جايبه و مناك عدها جهال ثنين وهو يريد كلشي جاهز بالبيت … و خطية بس هي و امي بالبيت وهي شايله البيت على ظهرها وامي المسكينه مريضه مابيها  حيل تمشي .. تعاركت وياه وهو غلط عليا و اخر شي كالي ما اقبل تتدخل بعد بيني و بينها … بيومها الدنيا اسودت بوجهي و رحت للشغل .. اني مجنت مسوي شي غلط بالعكس انقهرت عليها شلون يغلط عليها والمصيبه يسمعها كلمات محلوه على شكلها مقابيلي و مقابيل امي .. و زوجته ساكته تخاف منه و الله العظيم الدمعه بعينها ..
الحاصل جيت للشغل .. هو شافني ضايج بقى يسألني .. جاوبته و كلتله اني ممسوي شي غلط ترى و لزمتني العبره و بجيت .. هو حضني و كال للشباب الي بالصيرفه راح نطلع فد ساعة ساعتين ونرجع .. اخذني وياه و بقينا نفتر بالسيارة و بعدينا طبينا بكافتريا .. كالي شوف انت مثل ابني … بس راح اعلمك شي .. كلتله شنو ..كال اذا تسوي شي زين و ينكلب الزين ضدك لا تنقهر ابد .. بالعكس اقبل و عيش يومك و يكفي ورى مينتهي كل شي انته بينك و بين نفسك تعرف انته صح .. وصدكني راح ترتاح بدنيتك .. شفت هذا اخوك الي غلط عليك و زعلك و نزل دموعك و غلط على زوجته .. والله العظيم راح يجي بنفسه يعتذر منك و راح يجي يوم يتغير و يعرف نفسه غلط .. كال راح احجيلك سالفة بس اول شي تسوي تلفونك خلي صامت .. اريدك تسمع كل كلمه راح اكولها .. كلتله يله و سويت تلفوني صامت .. كال اني انولدت بعائلة وضعهم المادي خارط .. اخوتي بالتدريج واحد يشغل الثاني .. يعني الجبير اول واحد جان يشتغل بينا .. و وراه الي كبر بس شوية كبر اخذه وياه للشغل و هيج .. يعني كل واحد من عدنا بس شوية جسمه يكبر ياخذوه للشغل حتى يعرف يعيش بهل الدنيا .. اني بديت اشتغل اول شغله الي ابيع حليب و شكر و مواد غذائية ببسطية وي اخويه .. هالحجي بالتسعينات .. جنا نروح للجمعيات التعاونية و للاورزدي نشتري حصص الناس الي ممحتاجتها .. لان بذاك الوكت اكو ناس عدها دفاتر مال حصص و همه اصلا ميحتاجوها .. بس يستلموها يبيعوها .. اني واخويه جنا نشتريها و نبسط بيها بسوق شعبي بمنطقتنه .. جنت مراهق بذاك الوكت و طالب اعداديه بنفس الوكت .. بس ماعرف ليش جنت عدل .. عدل بتعاملي وي الناس .. حتى مرات ابيع شغلات و اربح بيها قليل كلش و اخويه يرزلني لان اخويه يريد ربح وبس .. جانت من تجيني حجية جبيرة و تكلي ماعندي والله ابيعلها لو اعرف اخلي من جيبي ..
وهالشي جان يسببلي مشاكل وي اخويه بس عادي جنت ارتاح من اسوي هالشي .. و مو بس هيج .. مره وكعت روحي بمصيبه اكبر من ميتصور اي واحد بهل الدنيا .. مصيبه من ورى بنيه لا اعرفها ولا تعرفني و اصلا مشفتها بعد بحياتي كلها بس بيوم المصيبه ..
كلتله شنو المصيبه ؟؟؟
كال بيوم من الايام جنت بالبسطية واخويه رايح يشتري حليب طوز  كمية جبيرة .. عافني وحدي و راح .. السوك جان ازدحام كلش .. و اكو شباب من ذوله اهل الذيول و الحاجب الطبك .. لان بذيج الفترة جانت الموده ذيول بالشعر يقلدون ممثل مال مسلسله اسمه الفريدو ههههه … الحاصل .. اكو مريه جبيرة بالعمر وياها بنية شكلها طالبة اعدادية لان لابسه صدرية رصاصيه .. بس مشايله كتب .. جايه وي بيبيتها لو امها ماعرف بالضبط شنو صلة القرابة بين الحجية و البنيه بس همه سوى .. لحكها واحد من ذولة المخربطين و بنص الهوسة سوى حركة كلش حقيرة وي البنيه .. بنص الازدحام .. طبعا اني الوحيد الي انتبهت لان اني كاعد بمكاني والناس مقابيلي اشوفهم … متحملت الموقف و شكل البنية شلون فزت .. كمت من بين الناس جان اجره و ضربته .. والله العظيم حتى البسطية نسيتها و نسيت اني هنا عندي بسطية و غراض ..جريته نومته بالكاع و دك ضرب على وجهه .. ما حسيت الا ثنين يضربون بيا .. و جروني نوموني بالكاع .. جماعته طلعو .. من حلاة روحي اكو قلم جاف بجيبي ماعرف شلون طلعته و ضربته بكل قوتي بوجه واحد منهم .. طبعا زرفت خده و القلم اخترق خده و الدم صار بكل مكان .. صياح صار بالسوك و طبعا بوقتها اني انحبست بمركز بنفس المنطقة .. و اهل الولد جوي علينا للبيت و صار بينا و بينهم فصل .. اني اهل الولد تنازلو عن القضية و طبعا بالفلوس و بالمعارف و منا و مناك طلعوني و اهل الولد كالو احنا اصلا منريد حقنا بالقانون .. نريد حقنا عشاير .. اني بوقتها حجيت الصار بس محد مصدكني .. لان ماعندي احد يشهد وياي .. و محد انتبه عالموقف غيري اني .. و اصلا اني ماعرف البنيه و حتى لو اعرفها شلون اجيبها تشهد كدام اهلي و اهل الولد بهل الشي … اني اصلا ولد و من وصف الموقف خجلت .. البنيه لعد شتكول …
المهم .. كلشي صار ضدي بوقتها و حتى اخوتي و ابوية جان عايش شككو بكلامي .. و فوكاها الولد من سالو ليش لعد .. كال ماعرف هو ابنكم يكرهني كل ميشوفني بالسوك يباوع عليا بحقد .. و طبعا حلف عالقرأن بوقتها على حالحجي واني هم حلفت بس للأسف .. هو صدكوه و اني لا و اخذو فصل من عدنا مع العلم اني جنت ابو الحق .. سمعت بذيج الفترة انواع الكلام من اخوتي و عمامي و ولد عمامي .. حتى ابوية سمعني حجي .. كالو احنا بس نريد نعيش و انته تسوي مشاكل .. و احنا نلزك حياتنه تلزيك و انته خليت هالناس تاخذ من عدنا كومة فلوس وفوكاها ذبينه كومة فلوس هم على طلعتك من المركز .. بوقتها جان جوابي للكل هو (الصمت) جنت اسكت و بس اباوع بعيونهم .. ماعرف شجاوبهم و ماعرف شكول .. بس جنت من اصفن بيني و بين نفسي ابتسم .. ابتسم لان اني صح حتى لو الكل عباله اني غلط .. و بطلت من شغلي وي اخويه ورى فترة و اشتغلت بحدادة … و كل هالحجي و اني ادرس .. و بيوم من الايام اجانه واحد مبين امكانيته زينه .. هالواحد راد مرجوحه و راد زحليكه لان عنده جهال … و راد نسويله بواب حلوه بالبيت و نسويله شغلات عالشبابيك .. طبعا ابو الحداده (الحداد) الي اشتغل يمه شغله كلش حلو  بس قفاص .. اني جنت اعرف الاسعار و اعرف شكد تكلفه .. هو خلى سعر ممعقول ابد … طبعا هو يعرف ابويه و يعرف اخوتي … بيومها اني كلتله خالي مو هواي السعر (طبعا ورى مراح الرجال) كالي شنو هواي … كلتله السعر يعني هي كلها تكلف هلكد .. كال اكلك انته عامل هنا شدخلك بالسعر وانته اصلا اخر واحد يحجي بهل الموضوع و انته اصلا منو .. كلتله علكيفك قابل شكلتلك .. كال تعال هاك هاي حسابك و روح .. طردني من الشغل و من حجيت السالفة لاخوتي كالو طبك ستين الف مرض انته شعليك .. كلتلهم مخلي ربح ضعفين .. كالو اي شعليك انته عامل قابل هو محلك .. بوقتها كلت معقولة اني الي غلط و اخوتي و المجتمع كله صح ؟؟؟
معقوله البوك و التعدي على اعراض الناس شي عادي و اني مكبر الموضوع ؟؟
سكتت و اشتغلت كومة شغلات بحياتي لحد موصلت للي اني بي و طبعا ما اكول بمجهودي وحدي .. اخوتي هم ساعدوني واني ساعدتهم .. بس والله العظيم ابد ما قبلت عالغلط بحياتي و بقيت اساعد بس ما احجي لأي بشر .. اقرب الناس مني زوجتي متعرف اني شنو اساعد و شنو اسوي … ولدي صح شوية يختلفون عني من ناحية التعليم لان اني صح متعلم بس تعليمي على كد حالي .. بس هم يحبون يساعدون الناس و هم ميقبلون عالغلط .. زرعت هالشي بيهم من الصغر و جنت دائما ابعدهم عن ولد اخوتي لان اعرف ولد اخوتي طالعين على اخوتي هم اهم شي عدهم الربح و ميفكرون بأحد غير نفسهم … هسه افتهمت ابني .. سوي الشي الصح حتى لو يشوفك كل الناس غلط .. والله العظيم تعيش مرتاح .. ولا تسولف عالشي السويته .. بس بينك و بين نفسك .. و راح تبتسم و تضحك ..
كلتله زين عمي سوال ولو مو من حقي اسأل بس شنو سالفة على خدي ؟؟؟
ضحك .. كال عادي باوعت فوك و محسيت روحي الا واني على بطني نايم بالكاع .. دخلت بعلاقة حب ٣ سنوات .. و جانت اول حب بحياتي .. و شفتها تروح كبال عيني و تنخطب واني مكدرت اسوي شي لان ماعندي امكانية اروح اخطب و اتزوج … كبال عيني تزوجت .. كبال عيني انزفت .. و مو بس هيج .. رحت للقاعة الي تزوجت بيها شفتها من طلعت بنهاية الحفله و هي مشافتني .. بيومها ما رجعت للبيت .. بقيت بالشارع لحد ساعة خمسة الفجر .. كاعد اتذكر صوتها بالتلفون .. اتذكر سوالفنا الي جنا نضحك عليها سوى .. اتذكر صوتها من جانت معصبه و تحجي على طالبه وياها مضوجتها … جنت احبها اكثر من روحي .. بس بذاك الوكت و هالوكت الحب وحده ميفتح بيت .. و اني جنت صغير ماعرف هالشي .. وكل لحظة بحياتي متندم بيها لان حبيتها .. ولو يرجع بيا الزمن .. ما احبـــ …..

شبيك سكتت عمي كمل …
ولو يرجع بيا الزمن ما .. ما احب غيرها .. شوف هالحجي مو معناته اني ما احب زوجتي و عائلتي و جهالي .. و مو معناته اني اسوي شي غلط .. بس اكو اشياء تبقى عايشة بداخل البشر مستحيل تموت الا بموته هو .. و هي متموت الا بموتي .. اني مشفتها ورى متزوجت ابد .. بس اني هسه من داحجيلك اتذكرها بشكلها ذاك الصغير .. شكلها وهي طالبة .. و ما اريد اصلا اشوفها و لا التقي بيها حتى لو صدفه .. لان راح تخرب صورتها براسي .. علمود هالشي اني اسمع هالاغنية والله لا يشوف بشر الي شفته .. صعب واحد يحب وحده مدة و فجاءة تختفي من حياته و ينام ليله و يعرف ثاني يوم هي مموجوده بحياته بعد .. صعب .. المهم عوف هالموضوع و ارجع اكلك .. سوي الصح حتى لو الكل يشوفك انته غلط .. و صدكني راح ترتاح ..
و انتهى كلامي بينه و بيني و صدك والله ورى يومين اخويه اعتذر مني و كلتله ما اقبل اعتذارك اذا متعتذر من زوجتك .. و صاح زوجته و اعتذر منها كبالي و كبال امي و كالها ما اكرر هالشي و حلف بس بيناتنه الحجي ما اثق بحلفانه هههههه لان قبل هم حالف و كاسر حلفانه ..
(سوي الصح)
انتهى
اخوكم ابو بغداد سايق التكسي
#ابوـبغداد