ننشر لكم مجموعة من القصص العراقية الحقيقية والواقعية بقلم الكاتب المبدع ابو بغداد سائق التكسي وهي قصص قصيرة ولكن بها معاني اخلاقية وتربوية كبيرة ومؤثرة
اقرأوها فعلا تستحق القراءة
اكثر الي اعرفهم بذاك الوكت من صديقات و موظفات وياي بنفس الدائرة نصحوني بطريقة مباشرة و غير مباشرة انو اكو فرق جبير بيني و بينه … بس الكلب من يدك لشخص ميعرف هالشي و يلغي شي اسمه تفكير … كمت ما اشوف غيره بهل الدنيا .. حتى اهلي الي همه اهلي كمت اشوفه هو بمكانهم … جنت ستوني متخرجة و متوظفة جديد .. صغيرة بالعمر والدنيا فاتحتلي صدرها .. رغم ما الراتب جان مو كلش زين بس جنت احس نفسي محققة كل احلامي الي جنت احلم بيهم .. شهادة و وظيفة .. اتعرفت عليه صدفة حالي حال اغلب العلاقات الي تنتهي بزواج او اصلا مينكتبلها تنتهي (صدفة) … اجى للدائرة و جان عنده معاملة .. سمعني كلام حلو و انشديتله .. مع العلم هو اصلا مدارس و ماعنده شهادة .. بس خبرته كلها بالسوك و بالشغل … حبيته ومحسيت اكو فارق بالعقل بيني و بينه و ما شفت اي فرق بيني و بينه رغم حجي كل الداير مدايري .. ردته الي و ماحسيت بوكت علاقتي بي غيره راح يصيرلي زوج .. وكفت بوجه اهلي و الي اعرفهم و قبلته غصبا عن الكل .. و اخر شي اهلي كالو هذا اختيارج ولاتجين باجر عكبة تكولين غلطت .. لان هالشي مصيري .. قبلت و اتزوجت … جانت احلى ايام وياه و دللني دلال مشايفته حتى وي اهلي … و صار عدنا اطفال و عايشين مرتاحين .. اني بقيت بوظيفتي رغم هو مجان قابل بهل الشي بس قنعته .. و هو بقى بعمله … و بدو يكبرون الجهال و دخلو مدارس … جهالي جانو مدللين كلش .. و ارتباطهم بيا كلش قوي … بس مدللين مثل مكلت .. اي شي يريدو اجيبلهمياه .. حتى لو اقصر على نفسي في سبيلهم عادي .. المهم همه يرتاحون .. و بده عصر الانترنت و الفيس بوك و الالعاب الالكترونية … العائلة كلها ومن ضمنهم اني صار عدنا حسابات عالانترنت و الفيس بوك … نضحك عالصور المضحكه .. نبتسم عالمقاطع مال كامرة خفية … يعني حالنا حال كل المستخدمين .. بس شوية شوية الجهال بدو يكبرون و كامو يختلون بغرفهم اكثر من اللازم .. يعني البنية تطلع بس تاكل لو تسوي شغل البيت بسرعة بسرعة وترجع ركض لغرفتها … ابني نفس الحالة هم قليل يطلع من غرفته و من ادزه على شي يشوفني الظيم و صوتي يروح لحد ميسوي الشي الي طلبته منه لو اني اضطر اسوي ولا اتعب نفسي من الصياح .. الاب الي هو رجلي وحبيبي هم كام هواي يقضي وقت عالانترنت … جنت احس اكو شي ديسوي رجلي بس جنت اجذب احساسي و اكول مستحيل هذا الي حبني يخوني لو يسوي شي غلط … و كشفته مرة مرتين يحجي وي بنات عالانترنت بس حلف هو مجرد حجي و جان يحذف الرسائل دائما … تعاركت وياه مرة مرتين تلاثة و خلص كال بطلت و صدك بطل (كبالي) بس الي اكتشتفه بعدين هو مسوي حساب و يحجي بي بالشغل مالته و من اكون بالوظيفة .. و صارت مشاكل جبيرة و المصيبة من اشهد جهالي عالموضوع الي همه اصلا كبار صارو … ماعرف ماخذين كلشي بهل الدنيا ببرود اعصاب و احس بيهم باردين من ورى الانترنت و يريدون بس الحجي مالتي يخلص حتى يرجعون يكعدون كبال شاشات تلفوناتهم و يكملون يومهم عالانترنت .. محد موكف وياي وجنت اخاف ادخل اهلي بالموضوع لان اكيد راح يكولون جهالج بطولج صارو و هذا اختيارج انتي واحنا اذا تذكرين نصحناج بالبداية .. يعني من الاخير كمت ادافع وحدي كبال تلث اشخاص الي همه عائلتي .. زوجي وابني وبنتي .. واكثر شي جان ياكلني اكل … وظيفتي حساسة يعني اي غلط بيها بي مصيبة .. واني بالدوام تفكيري كله بالبيت و برجلي شديسوي .. ماعرف شسوي والله متت من التفكير و الخوف على عائلتي والمصيبة الاب عايش بطريقته و الجهال بطريقتهم بس اني الي احاول الم هالتفكك الاسري الي صار … و شوية شوية جهالي كامو يلاسنوني بالحجي و يعيطون عليا و هو علاقته بيا صارت شبه روتينية و كل مرة يكلي انتي مخبله و شكاكه و اذا غلطت مرتين مو معناها راح اغلط دائما و اعتذرتلج و كلتلج ماكو واحد ميغلط و انتي ام جهالي بالاول والاخير .. الى ان وصل بيا الامر استسلمت … لان عقلي حسيته راح يروح مني … كمت اشوف الغلط واسكت … ويوم ورى يوم كمت اكعد بالصالة وحدي و ابجي مرات .. لان اشوف وحدي نفسي و اذا اصيحهم واجمعهم دايري مدايري لو يكعدون وتلفوناتهم بيدهم ويتمضحكون وي تلفوناتهم لو شوية و يتطشرون .. و فد يوم انفجرت بيهم … الى درجة شلت جنطتي و رحت لبيت اهلي … اهلي لاموني طبعا و حجو وي ابوهم بس ابوهم ذكي .. كالهم هيه شكاكة و ذب الصوج كله براسي .. و صدك صار الي صار … كالو رجعي لبيتج و جهالهج مراهقين و عمرهم حرج ميصيرون ينعافون وحدهم … و رجلج ملتهي بدوامه … اقتنعت و رجعت للبيت … و المشاكل شوية شوية كامت تتطور و وصلت للضرب … ضربني مرة مرتين .. و مرة ماعرف شلون طلعت من لسانه .. لسانه الي جان يكلي قبل كل كلمات الحب .. لسانه الي جان يحجيلي بي شعر مخربط بس جنت رغم خربطة هالشعر احبه لان من لسانه طالع .. لسانه الي جان يغازلني بي و يخليني اطير وي كل كلمة لسابع سما … لسانه الي جان يحجي عالبيت و الاطفال و الاستقرار ورى الزواج .. وتاليها نفس اللسان تطلع منه كلمة اطلكج ؟؟؟؟ كالها و بصياح.. بيومها حسيت هو صدك عنده شي و سالته عندك غيري انته .. كال هااا الخبالات طلعت و بدينا بهل القوانة مال عندك .. بابا انتي تخبلتي انتي شكاكه عيب عليج انتي جبيرة مو صغيرة و عيب جهالج كبار كافي .. راح تخبليني اني والجهال .. و فوكاها الجهال طبكو وياه .. و اخر مرة لكفته بالجرم المشهود و شفت كلشي بالتلفون طلع مصادق و يتواعد و يصرف على وحدة .. يصرف على وحدة في وقت اني جنت اتمنى يجيني بهدية لو شغلة حلوة .. و كال و اعترف اي و كال خلص احنا منكمل سوى و صدك تطلكنا .. و هو الي طلع من البيت و راح عاش وحدة .. و جهالي ولا عبالك امهم تطلكت … عايشين يومهم مثل ميريدون وبس .. و هم كمت اتعارك وياهم و همه يلاسنون و يعيطون و مرة كالو حقه ابونه عافج وطلكج لان انتي صدك بيج خيط … و بدو يحجون وي ابوهم و قررو يروحون يم ابوهم و يعوفوني وحدي … و صدك والله راحو و عافوني وحدي … كمت اسوي كلشي وحدي .. اكتبلهم و اتصل بيهم ميردون … و تاليها هو كام يكتبلي يكلي شفتي خبالج وين وصلج حتى جهالج عافوج وجوي يمي … و كل الي صار من ايدج … و هسه اني وحدي عايشة اروح للوظيفة وارجع اخلي راسي عالمخدة ابجي .. ابجي على كل لحظة جنا متجمعين على ميز واحد .. ابجي على ذكرياتي من جنت حامل باول طفل .. ابجي على حظي .. و المصيبة عرفت نفسي غلط .. لان الصوج طلع بيا اني .. اخخخخخ والف اخ لو مغلسة على كلشي و بس مخليه السفينة تمشي .. اي اي كمت احس اني الغلط .. لان من احجي للموظفات وياي كالو ترى الخلل مو برجلج .. و الخلل مو بالفارق الاجتماعي الي جنا قبل نكلج عليه .. لان اغلب الرياجيل هيج صايرين الي عدهم شهادة و الي ماعدهم شهادة …و جهالنا هم نفس الشي .. يصيحون و يلاسنون اذا نمنعهم عن الانترنت … والحل بس واحد ينزل راسه عن الغلط حتى يمشي عيشته .. صوجي … والله ماعرف اذا اني صح لو الدنيا صح لو اني غلط لو الدنيا غلط .. بس والله احب جهالي واحب رجلي اني … والله الي سويته مجان بي قصد .. (احبهم واريدهم داير مدايري) انتهى اخوكم ابو بغداد سايق التكسي #ابوـبغداد
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
