قصص عراقية حقيقية بقلم ابو بغداد سائق التكسي

دكتور الاسنان

ساعه ثنتين بليل تقريبا الشوارع و الدرابين سنطه اذا واحد شمر ابره يسمع صوتها … احنا نايمين و جانت الدنيا نهاية الشتاء .. يعني ممشغلين صوبه لان الجو طيب .. و بنفس الوقت اكو نسمة هوى باردة  .. اني و ماما و اختي الاصغر مني جنا ننام بغرفة وحدة .. و اخوتي الاثنين ينامون بالصالة لان يسهرون عالتلفزيون .. و ابوية ينام وحدة بغرفه … فزيت على صوت دك باب حديد .. بس مو باب البرى .. و لا باب المطبخ .. باب السطح .. الصوت مال الدك من فوك جاي .. اخوتي و ابوية فزو و رأسا ركضو عالدرج اني فزيت و كمت ابجي و حضنت امي من الخوف .. امي جانت تصيح ديربالكم اخذو شي وياكم (تقصد على خشبة لو سجينة لان ماعدنا سلاح بالبيت) .. اختي الصغيرة هم فزت من النوم و البيت كله كعد … صعدو فوك تلاثتهم و مسمعنا بعد صياح و لا حتى سمعنا صوت عركة .. نزلو اخوتي و ابوية و وياهم ولد .. طبو للصالة و الولد جان يبجي .. ابوية بقى يسكت بالولد و يحجي وياه و امي صاحت على واحد من اخوتي اجه للغرفة .. كالتله شكو يمه ؟؟
كالها يمه خطية هذا سيف .. امي كالتله ياسيف و شكو طافر على بيتنا .. اخوية كالها على كيفج يمه صوتج لا يسمع الولد .. كالتله دفهمني و ضربت اخوية ضربة خفيفه على راسه لان اخوية من النوع الي يجر بالحجي جر و بالكوه يطلع السالفة .. كالها يمه هذا سيف ابن ام علاء .. امي كالتله ابن هذا المخربط .. كالها بالضبط .. كالتله خلص افتهمت لعد .. طبعا سيف بيتهم بصف بيتنا .. عنده اخ واحد اسمه علاء و اصلا اخوه مساكن بالبيت و عايش ببيت خاله و كل هالشي من ورى ابوهم الي وصفته امي (بالمخربط) .. ابوهم يشرب و يسوي مشاكل دائما بالمنطقة و بالبيت .. و حتى مشاكل وي نسوان المنطقة و دائما ينكتل .. وخطية يضرب ولده دائما و يضرب حتى مرته .. سيف ابوه كتله و راد ينهزم من ابوه و مكدر يطلع برى لان باب المطبخ و باب الصالة مقفولة .. لاحكه ابوه يريد يضربه بنطاق عسكري مادري منين جايبه و دائما جان يكتل جهاله بي .. هو صاعد فوك و فاتح باب السطح و طافر علينا .. بنفس ذيج الليلة ابوه دك بابنه و كام يغلط على ابوية و على اخوتي و يكلهم انطوني ابني انتو بكتو مني … ابوية و اخوتي طالعين يهدئون بي و هو غالط عليهم بكلام محلو … ابوية و اخوتي كتلوه .. و انهزم راح لبيته .. ثاني يوم من الصبح سيف كعد من النوم و طلب من ابوية يودي لبيت خاله .. و راح سيف ابويه وداه و بعد ابد مسمعت شي عنه بس دائما من اسمع طكطكه فوك السطح اتذكر الموقف و اخاف واكعد امي .. طبعا سنين العمر مشت و اني كبرت و دخلت متوسطة و بقى ابو علاء على نفس وضعه و دائما عركات و مشاكل بالمنطقة .. اخر شي اخوة ام علاء من شافو ماكو أمل يتعدل هالرجال جوي تعاركو وياه و اخذو مرته و طلكوها منه و هو بقى فترة بالبيت بعدين باعه للبيت و راح .. المنطقة كلها ارتاحت منه .. و نسيناه ولا نعرف اخباره .. و مرت سنين العمر و كملت متوسطة و دخلت كلية اني و تخرجت و توظفت هم .. اخوتي تزوجو و عزلو من البيت بس كلهم قريبين من بيتنا يعني بنفس المنطقة .. و فد يوم اخوية هو و مرته جانو يمنه بالبيت .. و اني وامي و زوجة اخوية و اختي بالمطبخ دنشتغل .. اخوية دائما يعجبه يجي يباوع بالجدوره لو يتشاقى وي أمي و يبقى يمنه بالمطبخ يسولف بس ميفوت للمطبخ يبقى برى بالباب واكف لان ماكو مجال بالمطبخ كلنه نفوت .. ديحجي جان يكول يمه تدرين اليوم منو شفت .. كالتله مو يمه .. كالها واحد متصدكين اذا اكلج منو .. كالتله دحجي منو؟؟
كالها سيف ابن ابو العرك .. كالتله ياااا خطية وين صفى بي الدهر المسكين .. كالها هنا مفتح عيادة .. كالتله عيادة !!
كالها اي مو صار دكتور مال اسنان و هنا فتح عيادة و اني صدفه عرفته لان هو بعده يحجي وي مروان و فراس ولد ام الحصه و باقيه علاقته بيهم .. فتت سلمت شفتهم واكفين سوى و كالولي تعرفه كلتلهم و لا صغرا بي ماعرفه .. هو ضحك كالي اني الي نقذتوني من ابويه .. كلتله مفتهمت .. جان يكلي شبيك سيف اخو علاء .. كلتله سيف حبيبي و حضنته بس متغير كلش و سمنان مو مثل قبل عوده ..
امي كالتله المسكين اني كلت خطية هسه ينلعب بيهم طوبه بس الظاهر خوالهم زينين و هيج طلع الولد .. كال اي والله و هو يريد يجي يشوف ابوية و عزمته على غده بس فدوه انتي طبخي لان تدرين سجا اكلها على كد حالها هههههه (طبعا يقصد على مرته اسمها سجا) مرته رأسا كلبت خلقتها و كلنالها يتشاقى يتشاقى .. امي كالتله ياريت اشوفه والله و امه شلونها ..و ابوه وين صفى بي الدهر .. اخويه كالها والله مسألته يمه استحيت اسأله .. و عزمه و اجى يمنا .. اني بيومها مشفته .. بس امي راحت كعدت وياه هي وابوية و اخوتي و امي مرية جبيرة يعجبها تسأل هواي .. هو الولد حاجيلها كلشي .. طبعا امه بعدها موجودة بس ابوه ورى مطلك امه تزوج و يكولون بطل كلشي .. بس ميحجون وياه لان هو ميريد هالشي مو الولد .. و امي حلفته لدكتور سيف يجيب امه و يجون .. طبعا امي مجان عدها علاقة وي ام علاء غير بس سلام لان المرية مجانت تطلع هواي و تستحي من الجوارين و دائما خاتله بالبيت من ورى سوالف رجلها (الله يسامحه) .. و ورى فترة جاب امه ذبها يمنا و هو راح لشغله وبليل اجه اخذها ورى مكمل دوامه بالعيادة .. و راها بكم يوم امي عدها سنونها مو زينه .. كالت لاخوية يوديها لسيف .. اخوتي جان عندهم شغل و ابوية هم عنده شغل .. امي كالت امشي اني وياج نتمشى لان سنونها كلش تأذيها .. رحنا و كعدنا ننتظر و فتنا اني وياها .. سيف من شافني و هاي جانت اول مرة يشوفني بيها .. طبعا هو اكبر مني ب١٢ سنة .. عثر برجل الكرسي مال العلاج .. هو مو عثر لان اني حلوه اني شكلي كلش طبيعي بس هو خجل مني .. لان امي كايلتله من ورى طفرتك على سطحنه بناتي لهذا يوم الله يخافون كل ميسمعون طكطكه بالسطح يتذكروك .. هو خجل المسكين .. و اني لزمتني الضحكه .. وبدى يشتغل بسنون امي وجانت عينه عليا .. كلتله دكتور اني راح اطلع برى انتظر و امي امانه بيدك .. كال هاي امي لاتوصيني عليها .. و طلعت برى .. ما تعده شهر عالموقف جان امه تجي يمنا و طلبت ايدي لسيف .. ابوية و امي قبلو و اخوتي قبلو و اني هم وافقت لان الرجل جدا محترم و ميتعيب .. و تزوجنه .. و من تزوجنه اكتشفت انو سيف مو بس دكتور اسنان .. سيف كل شي يعرف يسوي حتى سيارة هو يصلحها .. و حجالي هو اكثر من  شغله اشتغل و جان يجمع الفلس على الفلس حتى بس مياخذ مصرف من خواله لان جان يستحي منهم مع العلم امانة لله خواله ابد ممقصرين و جانو ميقبلون يشتغل و يريدوه بس يكمل دراسه هو و علاء .. بس هو جان يعجبه يشتغل ..
مرات يسولفلي على ابوه شلون جان ماذيهم .. و هو من طلع من المنطقة و راح سكن يم بيت خاله جان يتمنى يرجع لنفس المنطقة الي جانو اصدقائه و مدرسته بيها .. و علمود هالشي هو اخذ العيادة هنا بس الله وفقه .. يكول من رحت لبيت خالي و عشت يمهم .. اني وعلاء جنا نستحي هواي .. حتى من ينزل الاكل بالصينية جنا مناكل هواي لان نخجل .. و همه يتوسلون بينا ناكل نحلفلهم جذب انو احنا شبعنا بس مجنا نشبع .. وحجالي شلون جانو يخجلون من يريدون يفوتون للحمام لو للتواليت (مكرم القارئ) و مرات جان يدمع حبيبي من يتذكر تفاصيل .. و حجالي اول مره من اشتغل بمحل مال حلاقة ينظف .. و بعدين اشتغل عامل يم مصلح مال تلفزيونات ومسجلات .. و بعدين اشتغل بمكتبة مال قرطاسية و اشتغل يم واحد يسوي تأسيس مال صحيات .. و كل هالشغل اشتغله وجان يدرس بنفس الوقت .. و اخر شي اشتغل بأسواق غذائية بمنطقة بيت خاله و ابو الاسواق صديق خاله .. يستلم الاسواق من العصر لنص الليل يعزل .. يكول هاي اكثر شغلة ارتاحيت بيها لان الوقت كله اني كاعد و بس من يجي زبون اكوم ابيع و ارجع اكعد .. و دائما الكتاب بيدي و اقرا .. يكول اني ما اكره ابوية و هو يبقى ابوية .. رغم اخطائة و رغم ما طلعنه من البيت و احنا اعمارنه صغيرة وانهزمنه منه بس يبقى ابوية ..  كالي تدرين جنت كل ليله انامها ببيت خالي (قبل طلاك امي) جنت هواي افز من النوم .. افز مو لان خايف من شي .. بس جنت افز اتخيل هو وامي جوي ثنينهم ياخذونه يرجعونه للبيت .. بس ما جوي ثنينهم .. اجتي امي وحدها و من جتي و تطلكت .. بعد ابد ما فزيت لان عرفت ابوية مراح يجي ابدا .. من جان يحجيلي هالحجي ابوسه من راسه لان كلش ينقهر .. و الحمدلله كدرت انسي هواي امور و دائما احاول اضحكه و هو يضحك بس اعرفه ميضحك من كل كلبه رغم ما هو هسه تزوجني و عنده شهادة و دكتور و عيادته معروفه بالمنطقة و الناس تحبه بس للاسف .. وجع الطفوله بعده بي و دائما يحس ناقصه شي .. و هالشي تاكدت منه من صار عندي اطفال من سيف .. يجيب اللعاب كومة و شغلات هواي ميحتاجوها جهالنه .. و دائما يجيب طوبه و ابني الاول ستوى بده يمشي و هو جايبله طوبه .. كلتله سيف هو كله بكد الطوبة يكلي مو ما اريده يحتاج شي .. وعرفت هو جان يحب يلعب طوبه هواي بس ابوه مجان يجيبله طوبه .. و من وراها كمت ابد ما احجي اعوفه براحته .. و هو يجيب و يكوم و الجهال ميلعبون اصلا بالملاعيب ههههه بس ميخالف المهم هو مرتاح ..
(دكتور الاسنان)
انتهى
اخوكم ابو بغداد سايق التكسي
#ابوـبغداد