قصص عراقية حقيقية بقلم ابو بغداد سائق التكسي

ورجعتلي

بيت جدي جان كلش جبير … مساحته جبيرة و بي غرف هواي اكثر من ست غرف … و احنا كلنا الي بالبيت الساكنين جان عددنا مو كلش جبير … يعني جدي و ولده ثنينهم (ابويه وعمي) و امي و زوجة عمي … و احنا الجهال اربعه بس .. اني و اختي و بنات عمي ثنين .. كلنا اعمارنه صغيرة (الجهال يعني) … جانت حياتنه ببيت جدي مثل حياة ابطال افلام الكارتون .. ابطال الكارتون يوميا يعيشون قصة جديدة .. احنا هم جنا يوميا نخلق النا قصة جديدة نعيشها و نضحك بيها … جانت الضحكه تارسه البيت و جدي جان يشاركنه بكل شي .. اخر ايامه جان احلى وقت عنده يطلع الكرسي بالحديقة ويراقبنه شلون نلعب و شلون نضحك .. جدي امكانيته كلش زينه جان ينطينا مصرف كلش جبير .. يعني بكل روحه نروح لابو الاسواق نحير هلكد منشتري شغلات و بالاخير نرجع وهم عدنا فلوس .. جنت كلش احب بنت عمي الي اصغر مني بسنه تقريبا …  جنت مرات اخسر روحي كبالها بالالعاب .. اني اكدر اغلبها بكل شي بس جنت اخسر روحي متقصد حتى هي تفرح … جانت متعرف اني اخسر روحي متقصد و عبالها صدك هي فازت عليا … وطبعا ما اكول هالشي كبالها ولا كبال باقي الجهال حتى لا تنقهر .. حتى من نلعب ختيلان وهي تدور جنت احاول ابين نفسي كبالها حتى تكشف مكاني و مو بس بالختيلان حتى من نتسابق بالركض هم اخفف الركض مالتي حتى هي تغلبني .. حبيتها واني بعمر طفل ميعرف اصلا شنو حب .. حبيتها بس مجنت اعرف الي ديصير و ليش و شنو و شلون … جان اكو شي داير مدايري هالشي ميحجي وياي ولا يكلي شي .. هالشي جان احساس يدفعني اسوي هالاشياء حتى بس افوز بشغلة وحده (ضحكتها) … جنت احب شكلها من تضحك و احب اشوف الفتحه الي بنص سنونها البيض … الفتحه الي انغلقت من كبر عمرها .. جنت احب اشوف عيونها شلون تسدها من تضحك و خدودها شلون تصير ورديات … بس كل هالشي واني ماعرف اني داحبها و متعلق بيها … و بيوم من الايام .. جدي الي جان بنصنا انشال الكرسي مالته و اختفى … اختفى و انصب برى البيت قريب من الحايط فد شي اسود جبير … خيمه جبيرة و بيها كومة رياجيل .. وصوت ايات دينيه مشتغل بصوت عالي … و الحديقة الي جنا نلعب بيها انترست جدوره كبارة و رياجيل .. و البيت انترس نسوان و صوت البجي بكل زاويه موجود .. و الكل لابس اسود .. احنا الجهال صعدنا فوك السطح نلعب و بنفس الوقت نباوع من الحايط على الي ديصير جوى بالحديقه و بالشارع … عرفنا جدو مات … ما بجينا بوقتها لان جهال و منفتهم الي صار و احساس الفقدان جان مواصلنه بصوره كامله … و ورى كم يوم انشالت الخيمه (الجادر يعني) و الجدوره انشالت و كل الناس الي جانو يمنا بالبيت اختفو و رجعنا نفس العدد بس ناقص واحد .. جدي الله يرحمه ماكو …
و ما عبرت سنه عالموضوع كامت تصير مشاكل بالبيت … احنا جنا نلعب برى مثل العادة بس نسمع مرات صياح و جان هالشي جديد علينا .. بالبداية جنا نروح نشوف الي ديصير بس من الموضوع زاد عن حده كمنا من نسمع صياح ولا عبالك دنسمع شي .. نكمل لعبنا و ضحكنه و بس .. و فد يوم جوي ناس منعرفهم و فاتو شافو البيت .. و وراها بكم يوم نفس الشي .. و وراها هم صار نفس الشي .. و بعدين فجاءة .. ابوية و امي اخذونا لبيت ثاني و عرفنا انو احنا تحولنه .. جنت يوميا اسال ابويه شوكت يجون بيت عمي و شوكت تجي نور و زينه (بنات عمي يعني) .. جان يكول بعدين .. و يوم يجر يوم و شهر يجر شهر و سنه تجر سنه و ما جوي لا نور و لا زينه و مشفتهم بعد … من كبرت عرفت ان الورث تقسم و ابويه كطع علاقته بعمي نهائيا بسبب مشاكل هواي … مو مشاكل الورث وبس .. الي افتهمته اكو مشاكل بيناتهم من همه و صغار و جان واحد متحمل الثاني بالكوه بس لان جدي عايش … و ورى وفاة جدي كل واحد بيهم طلع المضموم .. و حسب علمي ابويه جان يحب وحده قبل أمي و عمي لان هو الجبير ما قبل يتزوجها و قنع جدي انو يرفض ارتباط ابويه بيها بسبب مشاكل جانت بين عمي و بين اخوه البنيه الي يحبها ابويه .. و هالحجي من طلع صارت مشاكل بين امي و ابويه لان زوجة عمي نقلته لأمي بطريقه ثانيه … و النقل جان بتوجيه من عمي … يعني عمي علم زوجته تطرق الموضوع كبال امي (بعد وفاة جدي بفتره) .. من الاخير عمي وابويه ولا عبالك اخوه .. جانو اعداء بس واحد متحمل الثاني غصب بسبب وجود جدي .. و جانو ينتظرون أي فرصه حتى واحد يطلع حقده عالثاني .. الي وكع و تأذى بهل الشي بس اني .. لان نور اختفت من حياتي … طبعا بعد ما تحولنه لبيت ثاني و كبرت اني ما اعرف اصلا وين ساكنين بيت عمي .. لان خلص علاقتنه بيهم انكطعت نهائيا … زين اصلا احنا كرايبنه كلهم لا يجونه ولا نروحلهم بس بالمناسبات .. يعني اصلا ماعندي علاقه بيهم حتى اسألهم وين ساكنين بيت عمي .. من الاخير نور مو الي ابد .. بس ذكريات طفولتي وياها عايشه بداخلي ..
و بديت اكبر و ادرس و طبعا ابوية وضعه المادي جيد جدا و ما طلب مني بيوم اروح اشتغل وياه ..
و توفى والدي الف رحمه على روحه ورى مدخلت كليه بسنتين …. طبعا الشغل مالته بقى ماشي بس مو اني الي امشي لان ما افتهم بي شي .. بس واحد من اصدقاءه هو الي جان يشتغل وياه و صديقه كلش هو الي ساعدني و هو لزم الشغل و جنت اخذ منه الارباح صافيه ..
طبعا اني دخلت اعلام ورى الاعدادية … بالكلية مصار عندي اي علاقة حب بس عندي علاقات صداقة .. صداقة مو اكثر .. و قبل التخرج بفترة صار عندي تطبيق بوحدة من الجرايد .. يعني نروح هناك نداوم فترة ناخذ معلومات و تصير عدنا خبره .. بالجريدة الي طبقت بيها تعرفت على صحفي كلش تقربت منه … الصحفي معروف جان و عمره جبير .. ارتاحلي كلش و جان دائما يكلي اذا تريد تصير صحفي ناجح احتك بالناس مباشره و حاول تحتك بكل الفئات (عسكري .. موظف .. طالب .. كاس .. دكتور .. ممرض .. عامل بناء .. صاحب عربانة نفط و و و و ) كالي من تصير عندك احتكاك بكل هالفئات راح تنجح اذا حاولت تسوي تحقيق صحفي او تكتب موضوع … و اني اصلا هالعلاقات جانت عندي من ضمن اطار المنطقة و الجوارين .. و كمت اتقدم بشغلي و تخرجت و بديت اكتب شغلات و الحمدلله اسمي انعرف .. بس جنت احس اكو شي ناقص بحياتي هو الحب ..
حاولت احب بس مرهمت دائما افشل … الفشل جان مرة يجيني على شكل خجل و مره يجيني على شكل عدم تفاهم و مره يجيني على شكل هي عصبيه واني عصبي .. دخلت بحياتي باربع علاقات و الاربعه علاقات نهايتهم جانت فشل .. و بيوم من الايام اني بالدوام و اجاني موظف ويانه كالي اكو وحدة تسأل عنك وتريد تشوفك ادخلها .. كلتله خير كال يمكن معجبه بمقال و هالشي جان وارد طبعا انو يجون معجبات يحبون كتابة كاتبها لو فد موضوع عام .. و مرات توصلنه هدايا من معجبين مو بس لهواي يشتغلون نفس شغلتي .. كلتله خلي تتفضل و فاتت البنية .. طبعا سلمت عليا وكعدت و اني بين الي اعرفها وبين الي ما اعرفها .. نور هي نور .. كالت كبران كلتلها لج معرفتج .. كالت اي متغيره هههههههه .. كلتلها شوكت رجعتو ؟
كالت امي هسه يم امك بالبيت و سالتها انته وين تداوم و بس انطتني العنوان كبل اجيتك اسويلك مفاجاة .. كلتلها لا بربج .. كالت والله .. كلتلها شنو ابوج وينه .. كالت ابويه انفصل عن امي و تزوج هناك و عاش بغير مكان و احنا درسنا و تخرجنا و اني هم تزوجت بس مكمل زواجي على خير وعندي سماء و حسن .. كلتلها اوف شنو هالاخبار .. كالت اي والله الدنيا و السنين ركضت بينا ركض .. كلتلها و شنو رجعتو تستقرون هنا لو هم تسافرون .. كالت لا نستقر اني شغلي بالتصاميم مال الالبسه و تعرفت على بنيه عراقية عايشة بالخليج بس تجي لاوربا هواي و جان سالفة التصميم مجرد هوايه عندي بس من شافت شغلي كالت انتي محترفه مو مال هوايه وبس و الحمدلله فتحت وياها شغل و هسه راح استقر هنا بالعراق .. وامي هم راح تستقر هنا بس زينه شغلها وعملها هناك و ما تكدر ترجع وهي هم تزوجت و عدها اطفال .. كلتلها اي بيها الخير .. كلتلها دمشي خلي نتغده و نرجع للبيت .. كالت يله و رحنا لمطعم كعدنا و طبعا الطريق كله اني احس روحي وياها رجعت لوكت الطفوله و سبحان الله بعدها نفس الضحكة .. صح هي كبرت بالعمر واني هم كبرت بس عبالك رجعنا جهال من نسولف و نتذكر سوالف طفولتنه ثنينا .. كعدنا بالمطعم و بدت تحجيلي شلون جانت تسال ابوها عني و عن اختي وابوها مينطيها جواب .. كلتلها نفس الشي صار وياي والله جنت من اساله هم مينطيني جواب عدل و جنت دائما انتظر يوم اشوفكم بي بس للأسف مجنتو تجون و بعدين عرفت انتو سافرتو … كلتلها زين شلون اندليتو بيتنا و رحتو لأمي .. كالت خاله فلانه امي تعرف رقمها وحتى من جنا بالخارج جانت امي تتصل بيها (طبعا خاله فلانه هي وحده من جوارينه يم بيت جدي القديم و جانت امي و زوجة عمي يحبوها و هي تحبهم) وكملنه اكل و رجعنا لبيتنا و شفت امها و شفت جهالها طبعا كبار شويه ..
و لغتهم العربية على كد الحال مو قوية .. و من يومها بديت بحياة جديدة حياة بيها نور و جهالها .. امها لنور (زوجة عمي) اجرت بيت بمنطقتنا حتى تصير قريبة من عدنا .. و طبعا هالاقتراح اني قدمته علمود تكون عيني عليهم و اساعدهم .. و نور طلبت مني اعلم الجهال عربي يعني اقوي لغتهم لان اكيد اني كوني صحفي لغتي العربية قويه .. و الجهال يوم ورى يوم كامو يتعلقون بيا و نور بدت بشغلها الجديد طبعا و جانت ناجحه كلش .. و كامت تشترك بمعارض مال البسه .. و اني جنت تقريبا يوميا اشوفها .. جنت اريد بس تجيني الفرصه حتى احجيلها مشاعري تجاهها بالطفوله بس جنت اخاف .. اخاف تطلع هي متبدالني نفس المشاعر … و بيوم من الايام حجيت هالحجي لأمي و امي كالت ابني حاجيها من شنو تستحي و من شنو تخاف هي منفصله و بركبتها اطفال ثنين والله هسه تكيف .. و الحلو بالموضوع الجهال كلش تعلقو بأمي و جانو دائما ببيتنا … و قويت كلبي و طلبت منها نروح مطعم بحجة (اني كاتب مقال و عاجب الناس كلش) و رحنا لمطعم .. كلتلها نور اريد احجي فد شغله بس اذا معجبج كلامي اريد منج تنسي بنفس اللحظة و ابد متفتحين موضوعه بيناتنه و اريد تحلفيلي انو راح تسوين هالشي في حالة معجبج كلامي ماشي .. كالت ماشي وحلفت … كلتلها تذكرين من جنا جهال .. جان تكول اي .. كلتلها اني جنت احس بأحساس ماعرفه شنو من جنت اكون قريب منج .. و جنت احس انتي جزء مني و جنت هواي اركز بتفاصيل وجهج و احفظها هواي و حتى الفتحه مال سنونج الي هسه انسدت جنت احبها كلش و جانت هالفتحه تطلع بس من تضحكين .. و خلي انطيج سر صغير .. جنت اخسر روحي كبالج باللعب علمود تفرحين و تضحكين و اشوف الفتحه مال سنونج .. جان تكول الله عليك واني عبالي افوز عليك لان اقوى منك هههههههههه .. كلتلها لا جنت اني اتقصد اسوي هيج …. كالت اي .. كلتلها اريد اسالج سوال ليش جنت اسوي هيج … تعرفين الاجابه .. كالت زين اني راح اكلك شي قبل ما اجاوبك ..
كلتلها شنو  … كالت بس نكدر نأجل الجواب لباجر لان اكو شي مرتبط بالجواب اريد اجيبه و اشوفكياه باجر .. كلتلها ليش باجر خوب من نرجع للبيت انطينياه قابل انتي ساكنه بمحافظة واني بمحافظة اشوي يوميا وجوهنه واحد كبال الثاني والفرق بين بيتنا وبيتكم كلها شارعين و هيج هيج هسه جهالج يمنا بالبيت …  كالت لاااا باجر وهنا بنفس المكان و بنفس الوقت .. كلتلها ماشي متفقين .. ثاني يوم التقينا بنفس المكان و جان تكعد .. كالت شوف راح انطيك دفتر هالدفتر لحد يومين قبل ما اتزوج جان يمي و اكتب بي .. بس ورى متزوجت ضميته يم اختي و من قررنا نسافر و نرجع للعراق نستقر اخذت الدفتر من اختي و رجعته وياي للعراق … كلتله زين .. كالت من تقرا اقرا بكلبك مو تقرا بصوت ماشي .. كلتلها ماشي .. اخذته و فتحته .. طبعا الدفتر هو دفتر بي رسومات مال تصاميم و بنفس الوقت بي ذكريات هي كاتبتها و تفاصيل هواي كاتبتها عن طفولتها و ذاكره تواريخ كتباتها لهل الاشياء .. الدفتر مذكور بي اسمي اكثر من اسمها .. و كاتبه عني ذكريات كلش هواي و كاتبه امنيات هم .. من ضمن الامنيات انو تلتقي بيا و نتزوج و يصيرون عدنا جهال و نعلم جهالنه يلعبون نفس الالعاب الي جنا نلعبها اني وياها من جنا صغار … من قريت هالسالفة بجيت اني و لزمت ايدها وهي هم بجت … كالت هسه راح اجاوبك اني على سوال البارحه .. انته جنت تخسر روحك لان جنت تحبني واني هم جنت احبك بس ماعرفت شنو ذاك الاحساس الا من افترقنه و كبرنا .. كلتلها اني هم احبج بس الله يرحم الجان السبب اذا ابوج و اذا ابويه … الرحمه تجوز عالعايش (ابوج) و عالميت (ابويه) جانو سبب يفرقونا كل هالسنين بس سبحان الله الدنيا غصبا ما على الكل خلتنه نرجع نلتقي و نلتم …. جان تكول تدري شكد حاولت اعرف اخبارك و شكد حاولت اتواصل وياك بس امي جانت تخاف من ردة فعل ابويه اذا عرف .. امي جانت تكدر تخابر صديقتها و تجيب رقمكم بس جانت تخاف .. و اني مراح اكلك الي تزوجته مجنت احبه .. الي تزوجته حبيته لان جان مثلك مهتم بيا بالبداية ….
جان يحاول يضحكني و يفرحني دائما و من تزوجته ابد مخنته لا بتفكيري ولا حتى بذاكرتي .. و الدفتر انطيته لاختي تضمه لان خفت لا يشوفه .. بس للأسف هو خاني و كشفت جان مصادق وحدة اجنبيه و عنده علاقه بيها و انفصلنه .. و من انفصلت منه مكدرت ابقى هناك بعد لان كل مكان يذكرني بي و بجذبه و بالتمثيل الي مثله عليا .. شلون جان يحبني لهيج درجة و كدر يخوني .. عالعموم ماريد اتذكره .. بس والله لو مو السالفة مال سفرنا و سالفة مشاكل ابويه و ابوك (الله يرحمه) جان ما اخذت غيرك .. اني حتى احلامي من انام جنت احلمها بيك مرات .. كلتلها والله حتى اني اكثر من مره حلمت بيج … و بقينا كاعدين نسولف و نسينا نفسنا و الوقت مشى ركض بذاك اليوم … و قررت اتزوجها و تزوجتها حبيبتي … و جهالها اني ربيتهم و اصلا اني جنت اربيهم و انضافلهم اخ من عندي .. و الحمدلله القدر رجع جمعنا … و هسه عايش وياها مو عبالك زوج و زوجه وبس .. عايش وياها قصة حب متنتهي و لا تخلص تفاصيلها .. اسعد ايام حياتي حاليا اني اعيشها … اطفالنه (طبعا اطفالها ولو كبرو بس هم يبقون اطفال بنظرنا) اطفالنه مرتاحين بنصنا و سعيدين لاقصى حد .. ماكو تفرقه .. ماكو مشاكل .. حياتي رجعت تضحك من جديد .. و هي هم حياتها رجعت تضحك بوجودي .. و الحمدلله تأخري بالزواج جاب نتيجه .. عبالك جنت منتظر ترجعلي بيوم من الايام بعد ما فقدتها …. و رجعت ….
(و رجعتلي)
انتهى اخوكم ابو بغداد سايق التكسي
#ابوـبغداد