قصص عراقية حقيقية بقلم ابو بغداد سائق التكسي

🤔🤔🤔

مرات اتخيل احنا الي باقيين على افكار قديمة يرادلنه تحديث (اب ديت)حالنه حال التلفونات القديمة … بس ارجع و افكر بالموضوع اكول لا عمي خلي نبقى على حالنا هواي احسن .. بالبداية جنت اكول يجوز اني غلط .. و حتى مرات التقي بناس (واصللهم التحديث) يكولولي يابه انطلق اكتب براحتك مدام انته عندك هواي ناس تقرالك و تعرف تعبر بكتابة القصص و المواضيع و اكتب على كل شي وعوفك من سالفة (مكرم القارئ) و سالفة تبتعد عن المواضيع الي بيها غزل بالقلم العريض … اكتب  قصص على هيج شي الناس تحب هيج شي .. و شوف الانترنت طك بطك يحجون و كلهم عدهم ناس تقرالهم و اكثر منك هم  و اصلا يزيدون يوم ورى يوم … و جرب تكلب بالانترنت حتى تشوف شنو الرائج بهل الوقت ..
جربت اكلب مع العلم اني كلش قليل استخدم الانترنت و الناس الي تعرفني معرفه شخصية يعرفون هالشي .. حتى المكان الي اكتب بي القصص هنا .. اكتب قصة بين فترة و فترة و اختار صورة تتناسب وي القصة و انزلها …
و بس .. هذا استخدامي للنت ..
جربت اشوف الانترنت و شبي … بصراحة احجيها و بدون خجل و انتو خواتي و اخوتي … لكيت شغلات هي تضحك بنفس الوقت و تبجي .. شفت واحد و وحدة اعمارهم متوسطة و جبيرة  و طالعين بكل وضوح بالكامره يحجون بشهادتهم و نجاحهم و معلكين وراهم صور لشهايدهم .. يحجون على موضوع تبييض المناطق الحساسه ؟؟؟؟؟؟ !!!!!!!! ؟؟؟؟؟؟؟؟ !!!!!!!! ؟؟؟؟؟
اني من يمي خجلت و روح اهلي .. مع العلم اني شايل تلفون وكاعد وحدي ماكو احد يمي .. ضحكت .. تذكرت روحي بصف ثالث متوسط لو ثاني متوسط .. من المدرس وصل للجزء الي يتكلم عن مواضيع الجسم بهل المناطق ((عبره ما قراه)) …
عبره و احنا الطلاب جنا كلنا ولد .. لان متوسطتنه للبنين … المدرس استحى و احنا استحينا … و حتى بالامتحان النهائي مجابولنه اسأله عالموضوع  … تذكرت من جنا نكعد بالبيت و التلفزيون مشتغل و التلفزيون جان بي بس قناتين (قناة العراق و قناة الشباب) … من جان يطلع برنامج اسمه الرياضة في اسبوع .. بنهاية البرنامج يطلع شي اسمه التزحلق مادري التزلج عالجليد .. بنات لابسات شي شفاف مال رياضة يتزحلكون عالثلج .. قبل ما تبدي الفقرة ابوية (الله يرحمه و يرحم والديكم) جان يكلب القناة قبلها بشوية .. و احنا تعلمنه هالشي .. يعني اذا ابوية مجان كاعد ويانه عالتلفزيون تعلمنه اول متوصل السالفة لهل الفقرة نكلب القناة .. زين ..
و طبعا اني ارجع و اكول اني لا ملاك و لا رجل دين و لا يم الدين اصلا و لا حتى اني ماعندي اخطاء .. اني رجل متروس اخطاء .. و هالحجي مو معناته اني كاعد انظر براس الناس و اسوي نفسي الحمل الوديع .. بالعكس اني عندي اخطاء بس متوصل لدرجة احجي طك بطك بهيج مواضيع (((((( حساسه)))))) و احجي علني مقابيل الناس (ياعيبة العيبه) ..
و الي يكلي لا حياء في العلم .. من انعل ابو العلم الي يخلي الواحد يحجي بتبييض المناطق الحساسه .. اني بس اريد افتهم هو و هي الي يطلعون يحجون بهيج مواضيع شلون ميخجلون ؟؟؟؟
و شفت شغلات ثانية توكف شعر الراس .. بثوث مباشرة بيها غلط و سب بالقلم العريض ..
و بالنهاية .. كلت بيني و بين نفسي خلي ابقى على وضعي و ما انزل تحديث لراسي هواي اشرفلي من احجي بهيج مواضيع (مكرم القارئ) … و اشكر كل واحد و كل وحدة لحد هسه ممسوي اب ديت و باقي على وضعه .. و اشكر روحي رغم اخطائي اني باقي على هالوضع ..
#ابوـبغداد