قصص عراقية حقيقية بقلم ابو بغداد سائق التكسي

اسيل و سارة

جانت اكثر من صديقتي و اختي ... علاقتنا مجانت علاقة عادية .. جانت علاقة فوك العادية بمليون مرة .. تعرفت عليها من جتنا نقل من غير مدرسة ...
عرفت بيوم الي طلعنا من الدوام انو هيه بيتها بالشارع الورانا .. لان ثنينا طلعنا من نفس الطريق  .. طلعو نازلين جدد بالمنطقة ...
و بدت علاقتي بيها من ثاني يوم ..
حبيتها لدرجة جبيرة .. مجنت اكمل يومي بدونها .. لازم اخابرها و لازم اشوفها ..
كل البنات بالمدرسة يعرفون شنو سارة و شنو اسيل ..
اكثر من الخوات والله ...
ندرس سوى .. ناكل سوى .. نلبس سوى .. نطلع سوى ..
كلشي نسوي سويا .. حتى الهدوم جنا مرات نلبس نفس الالوان ...
ابوية جان اذا يروح بسفرة خارج العراق و يجيب هدوم لازم يجيب قطعتين وحدة الها و وحدة الي .. و هي هم نفس الشي ..
محابس و طاكات و سوارات و كل الاكسسوارات مالتي و مالتها وحدة .. يعني الشي الي يمي اعتبره الها و الشي الي يمها اعتبره الي ..
كبرنا اني وياها و خلصنا متوسطة و دخلنا اعدادية هم سوى ..
حتى الكلية هم سوى ..
تخرجنا و توظفنا بس هي بمكان واني بمكان ...
تزوجت هي و اني متزوجت .. الي تزوجها يصير ابن خالتها ..
صارت حامل و طبعا اني وياها اروح واجي بالفحوصات و متروح لأي دكتور اذا اني مو وياها .. وحتى قبل متتزوج هم نفس الشي .. لازم اني وياها بكلشي ولازم هي وياي بكلشي  ..
دكتور الاسنان ما اروحله اذا متجي هي وياي و تبقى واكفة بصفي والزم ايدها من اتأذى ...
الحاصل ..
بولادتها اني وياها سويه .. مقبلت تجيب اذا ما اروح وياها و بوقتها اهلي ما قبلو ابات برى بس علمودها بتت ..
ابنها ربيناه اني وياها سوية .. حتى من بده شوية يحجي جان يكول اليا ماما و الها هم ماما ..
جان يخربط حبيبي بيناتنا هلكد ميشوفنا دائما سوية ..
و بيوم من الايام زوجها اندك بيا ..
و فوكاها يكلي مستعد اتزوجج ..
كلتله انت مخبل لو صاحي .. مو اني اكثر من اخت لزوجتك ..
يكلي اني حبيتج مو بيدي و انتي بعدج ممتزوجة شكو بيها فكري بالموضوع ..
ابتعدت عنهم .. بس المشكلة هي متكدر بدوني و خصوصا علاقة سنين و سنين يعني اذا شوية اضوج لو شوية ابتعد تبين الشغلة ..
هي متعودة يوميا اخابرها و يوميا اروحلها واني نفس الشي ..
زين اني ما اكدر اكلها ..
هي تحبه لرجلها تموت عليه بس بنفس الوقت هيج شغلة ما اكدر اضمن نتائجها اذا اروح احجيلها ..
يومين و الثالث جان تجيني للبيت ..
كالت شبيج شكو اشو صار تلث ايام بس تلفونات و متجيني و حتى من نحجي متكولين تعالي ؟
مو من عوايدج هيج تسوين ؟
كلتلها ماكو شي بس مريضة ..
كالت وحدة من الاثنين لو كاعدة دتجذبين عليا لو دتمثلين .. لج شنو اني جديدة عليج مو اني حافظتج اكثر من روحي احجي شبيج ..
طبعا بيومها تحججت و بقيت مصرة على سالفة المرض بس هي طلعت زعلانة ..
بوقتها كلت همزين جتي منها و لا تجي مني .. و خلي تبقى زعلانة احسن ميخرب بيتها من ورايا ..
و كطعت وياها فد كطعة .. والله العظيم تأذيت كلش لان متعودة عليها و احبها والله .. بس شسوي مجبورة اسوي هالشي حتى لا اصير سبب رئيسي لهدم بيتها و عائلتها ..
و هم اسبوعين و رجعت جتي و حضنتني وتبجي ..
كالت شبيج لج شكد حاولت ابقى زعلانة مكدرت احجي شبيج ..
طكيتها ببجية اني هم و كلتلها ماكو شي ..
كالت والله اكو شي و ضامته و خايفة تحجي ..
و رجعت علاقتي بيها بس ما اروحلها و كل متكلي تعالي اكلها لا انتي تعالي ..
زين هي مو غبية (مكرم القارئ) .. عرفت اني ما اريد اروح لبيتها ..
اجتى مرة كالت السالفة وي فلان (تقصد رجلها) ..
كلتلها لا ..
كالت احجي رجلي مسمعج حجاية مو زينة .. مسوي شي كدامج مو حلو ..
كلتلها لا ..
حلفتني حلفان جبير .. كلتلها زين اني هم اريدج تحلفين متسوين شي حتى احجيلج ...
حلفت هي هم ..
حجيتلها الي صار ... صفنت بالبداية بعدين كامت شالت ابنها و رادت تطلع ..
كلتلها انتي حلفتي ..
هزت راسها يعني أي أي و طلعت ..
بنفس اليوم بليل اجه رجلها لبيتنا و تعارك وي ابوية و يكله بنتك تخرب عليا اني و مرتي و يحرم بيتنا عليها بعد ..
ابوية رجال جبير بس مو ابو مشاكل ..
كالي بنتي هذا الرجال مو زين و رجاء رجاء بعد لا تروحين هناك ما بينا حيل عركات و هالسوالف ..
و انتهت علاقتي بيها نهائيا ..
ما اعرف لحد هسة شصار بينها و بين رجلها بيوم الي حجيتلها .. و ما اعرف ليش هي انسحبت هم ..
وما اعرف رجلها شكالها بالضبط ..
بس الي اعرفه اني احبها و متأكدة هي تحبني لحد هاي اللحظة ..
و اصعب لحظات تمر عليا و تمر عليها من نلتقي صدفة اني وياها بالسوك و تمر مقابيلي وامر مقابيلها و تصير عين بعين ..
بس
لا هي تكدر تسلم عليا ولا اني اكدر اسلم عليها ..
و الاصعب بعد ..
الموقف الاخير ..
بالسوك جنا اني وأمي و هي و رجلها و ابنها واكفين يعاملون على شحاطات (مكرم القارئ) ..
ابنها مو شافني ركض عليا لان حبيبي يعرفني و متعود عليا ..
و هي و رجلها منتبهو عليه .. اني هلكد ما احبه دنجت شلته و بسته عالسريع .. و رجعته خليته بالكاع ..
عاد رجلها انتبه ابنه ماكو و شافه يمي و يم امي واكف .. اجه عالسريع اخذه و جان يضربه السخيف .. غص من البجي حبيبي و الله بوقتها لو بيدي الا اخنكه خنك  ..
و هي خطية باوعت عليا و معرفت شتسوي ..
عاد أمي كالت ثاني مرة لا تعيديها .. و رجعتني للبيت ..
والله مجنت اريد توصل علاقتي بيها لهل الشي .. والله ردتها اخت اليا طول العمر ..
بس شسوي مو بيدي الي صار ..
و مرات اكول بيني و بين نفسي .. حتى لو محاجية الها هم جان اجه
يوم وعرفت ..
( اسيل و سارة)

ملاحظة : اسيل حجت لموظفة وياها السالفة و السالفة نقلها اليا احد اصدقائي الي يصير زوج الموظفة .. و حتى بوقتها سألني كالي شتكول تصرفها صحيح من حجت لو غلطانة ؟ كلتله والله ياخوية ماعرف شكلك ... بالحالتين هي خربانة خربانة .. اذا حجت و اذا محجت خربانة السالفة .. و الي فرق اسيل و سارة الرجال بصراحة .. هسة ابن الاوادم مو متصخم و متزوج و عندك طفل .. دكعد راحة ..
انتهى
اخوكم ابو بغداد سايق التكسي
#ابو_بغداد