قصص عراقية حقيقية بقلم ابو بغداد سائق التكسي

هم نزل وهم يدبج

ثمن سنوات عمري جان .. ثمن سنوات طفلة يعني متفتهم بالضبط الداير مدايرها .. يجوز اتذكر شغلات بس اكيد مو كلها .. و اغلب الاشياء الي اتذكرها هي الاشياء الي تقهر .. لأن مصيبة الانسان هي الذكريات الحزينة .. و هسه اي واحد نسأله و نطلب منه يحجيلنه شغلات فرايحيه .. راح يتذكر شغلات قليلة بس اذا نكله احجيلنا شي انته بجيت بي لو انقهرت بي يطلع قائمة من الذكريات الي بقت محفورة براسه .. أني بدت رحلتي وي هالقائمة من عمر ٨ سنوات .. جنت صغيرة .. صغيرة لدرجة جنت اختل ورى الدواشك لو ورى البردة من يصير صياح على أمي .. أمي الي ما سوت شي غلط بحياتها غير تزوجت و تطلكت .. معقولة الي تطلك هيج تنظلم .. معقولة الي تنجبر تتزوج واحد هو اصلا مو اختيارها هو اختيار (خالي) و يطلع الاختيار غلط و يصير انفصال هيج تتعذب أمي ؟؟
أمي اصلا ماتت ناقصة عمر .. و صح كل واحد ويومه بس القهر و الاهانة تنقص عمر الانسان الضعف .. امي توفت بعمر ٣٣ سنه .. صغيرة .. مشافت شي من الدنيا و مفرحت بشي من الدنيا غير بس بيا و بأخوية .. اخوية الصغير اني جنت المسوولة عنه من عمري صغير .. بس شنو جانت مسووليتي .. مسووليتي ابعده عن بنات خالي و عن ابن خالي الجبير .. شغلتي اركض وراه من الغرفة الي محصورين بيها اني وامي واخوية و اجيبه من الصالة لو من الطابق الثاني انزله جوى هم ارجع احصره بالغرفة .. طفل جان واني هم طفلة .. نحب نلعب حالنا حال هالجهال ..
بس شلون نلعب … شلون نضوج جهال خوالي .. شلون مو احنا جهال المطلكه .. جهال الجايه نزل عدهم وهمه اصلا بيتهم متروس بشر .. شلون نلعب و نتونس و احنا دناخذ اللكمة من حلوكهم و نخليها بحلوكنا (على كولة زوجة خالي) شلووون اريد افتهم .. جملة هم نزل و هم يدبج بقت محفورة بالقائمة لهذا يومنا .. و الله العظيم وروح امي الي يكول هالجملة بعد كل هالعمر اضوج منه .. اكرهه حتى لو قريب مني .. حتى لو صديق مقرب لو صديقة مقربة .. اكرهه .. لأن هالجملة جنت اسمعها تقريبا كل اسبوع اربع مرات .. بس تعودنا و تأقلمنا يصير لعبنا اني واخوية بهل الغرفة .. كمت اخترع شغلات لأخوية حتى بس يفرح و يتونس .. جنت ابوك الجاكوج من المخزن و ابوك وياه بسامير صغار .. واجيبهم للغرفة ادكهم بالحايط و اربط سيارات اخوية بخيط و اخلي السيارات هو يجر الخيط و يشوف السيارة شلون تمشي عالحايط يكيف حبيبي .. و حتى بالمدرسة جنت اني الي اودي و اجيبه وياي .. جنت برى البيت اصير سباعية .. الي يأذي اخوية اروح اتعارك وياه ..
بس ببيت خوالي لا والله ليش الجذب .. اخاف .. لان الاذية تصير مباشرة على أمي و يسمعوها حجي محلو .. و بدينا نكبر و خوالي بدو يكرهون سالفة بقائنا هناك .. شالونا و ذبونا ببيت ابوية و امي بقت يمهم .. كالوله انته اصرف عليهم احنا خلص ماعدنا وهذولة عدهم مدارس مترهم بعد ..
واختنا احنا نتكفل بيها .. اذا هسه اوصف تعابير وجه امي بيوم الي هي بيدها تلم هدومنا و شلون دموعها توكع عالهدوم و تشمشم بهدومنا .. احس كلبي يريد يوكف .. المنظر جان كلش حقير .. خوالي غصب علينا ياخذونا من امي .. وغصب على امي تقبل طبعا ..
و يذبونا ببيت جدي الي همه اصلا ميريدونا .. يعني هسه اني واخوية بالابتداية .. كبرنا شوية و كمنا نفتهم .. هسه عدنا مهمة جديدة .. مهمتنا نحاول نتأقلم من جديد وي ناس جدد منعرف شيحبون و شيكرهون ..
يعني نطلع من نكره نروح لحفره جديدة .. و رحنا .. امي المسكينة توصينا بالطرمة مال بيت خالي قبل مياخذنا خالي .. تكول لا تضوجوهم و صيرو عقال .. اني ابجي و اكلها صار ماما .. المسكينة متعرف شتحجي من القهر .. و اخذنا خالي و الطريق كله بالتكسي اني اباوع عالناس و العوائل شلون محتضنه جهالها و يتمشون واني واخوية رايحين لعالم جديد علينا .. حالنا حال المتزوجة أول يوم من تنتقل من بيت اهلها لبيت عمها ابو زوجها (اذا جان غريب) .. متعرف غير بس رجلها و لازم تكعد تتعرف عالكل .. بس حال المتزوجه جديد هوووواي احسن من حالنا .. لان احنا اصلا ماعدنا احد نعرفه .. حتى هالاب الي احنا من صلبه واحد مو محترم و ماعرف ليش اصلا تزوج امي .. و صلنا و من الباب استلمنا جدي ابو ابوية .. الشخص الوحيد الي بالبيت دارانا .. ابوية يجي للبيت بس عالنوم .. و بالاخير من يجي يسألنا ها شلونكم بالمدرسة ههههههههه .. علساس يعني هو اب و مهتم .. طبعا الشغلة الوحيدة الي جانت مصبرتني على هالعيشة هي الدراسة .. ماعرف شلون طلعت شاطرة بعكس اخوية جان كسلان كلش .. جدي جان ميخلي احد يطخنا و ينومنا بغرفته لان بيبيتي متوفيه .. مصرفنا كله من جدي .. وهو ياخذنا يشتريلنه هدوم .. و سبحان الله طول بعمره كلش يمكن علمودنا .. بالمناسبة ابوية ورى سنتين من جيتنا لبيت جدي سافر للخارج .. و عافنا امانة يم جدي .. بس للأمانة و لازم احجيها جان يدز فلوس أول بأول النا و بصراحة البيت كله تعدل بسبب سفره .. يعني وضعية بيت جدي تحسنت .. و صار اتفاق بين جدي و بين ابوية انو ياخذلنا مشتمل صغير بأسم جدي و نتحول بي اني و اخوية وجدي .. و صدك والله ما جذب ابوية و اخذ المشتمل و اني جنت احسب ساعة ساعة حتى بس يكمل البيت و نتحول بي و تجي امي يمنا .. بس للأسف امي توفت مثل مكلت صغيرة بالعمر و قبل ميخلص المشتمل .. ورى وفاة امي بشهرين يله عرفنا اني واخوية .. أمي جانت الوسيلة الوحيدة الي نتصل بيها لو التلفون لو بالشهر مرة يودينا جدي لبيت خوالي نكعد شوية و ياخذنا يرجعنا .. من تأخر الموعد كالونا امكم مريضة شوية و مالها خلك .. بس بالاخير عرفنا و جدي هو الي كالنا .. و راحت المسكينة و حقها البسيط الي هو نعيش كلنا سوى ما رهم ..
و مشت السنين و الحياة استمرت و اني واخوية كبرنا .. اني دخلت كلية و اخوية دخل كلية .. اني نجحت و تخرجت و حاليا دكتورة اسنان و اخوية مكدر يكمل لأن ماله واهس .. و جدي انطاكم عمره .. و ابوية تزوج بالدنمارك و صار عنده اطفال من زوجته الاجنبية … و اطفاله كبرو و هو يتصل بيا مرات بس اخوية ميقبل يحجي  وياه .. و كل ميتصل يشكي و تلزمه العبره يكول الظلم الي ظلمته لأمج هسه طلعت حوبتها بيا .. بنتي من زوجتي الاجنبية معذبتني و ماعرف شسوي و وصلت بيا المرحلة عمرها صغير و تدخن و كل ما اريد اضربها اخاف لا تبلغ عني الشرطة .. وهسه مجبور اشوف الغلط واسكت و كل ما اشوف شي غلط اكول هاي حوبة امج  ..
طبعا احنا كبرنا و امورنا المادية اختلفت و اني حاليا عندي سيارة و اخوية هم عنده سيارة .. بس المشكلة اخوية بده يسوي مشاكل اكثر من اللازم .. يعني بصراحة ما اعرف شحجي عليه بالضبط .. بس هو يدور صداقات هواي .. واني هالشي سببلي مشاكل مو بس بالبيت .. حتى بالشغل و بالعيادة مرة اجه رجال لا اعرفه و لا يعرفني كام يصيح كبال المراجعين و ردت اتصل بالشرطة بس تلافيت السالفة لان عرفت اخوية مسويلة مكسورة .. و اخر المواصيل وصلت بأخوية يغلط عليا و يسبني لان يوميا اتعارك وياه علمود سالفة البنات .. يكلي انتي مو لأن محد يكلبج و عانس تذبين خبالاتج عليا ؟؟
اني اخته الربيته و الكبرته .. اني الي جنت اروح اتعارك وي الولد اذا يطخوه بالمدرسة .. اني الي جنت اسويله ملاعيب من لاشيء حتى بس يتونس و يفرح .. اني الي غسلت هدومة و اعتنيت بلبسة و وكلته و شربته كل هالسنين من جان طفل لليوم و صرتله ام واني عمري صغير يكلي هيج ؟؟
ليش .. ليش ياقطعة مني انته .. اني والله العظيم متزوجت مو علمودك و حتى اذب الصوج بيك .. اني متزوجت لان بيا خوفة من الرجال لا يسوي بيا مثل ما سوى ابونا بأمنا .. ما احب الرياجيل و ماعندي ثقة بيهم .. و انته نفسك تعرف وحتى اجوك رادو يخطبوني منك انته شخصيا و جيت سألتني و رفضت اني .. تاليها تطلعني مريضة نفسيا .. بس والله مكذبت انته .. اني مريضة نفسيا .. صح و اعترف .. الي شفته من صغري خلاني اتعقد من شي اسمه رجال .. لأن كل الي اذونه واحنا صغار همه رياجيل من عده (جدو) .. خوالي الي جانو يكفخون بينا رياجيل .. خوالي الي ذبونا ببيت منعرف بي احد و اللكمة الي جانو يوكلوها النا عيرونا بيها رياجيل  .. ابونا الي عاف امنا و ماتت من ورى القهر رجال .. عمامك الي جانو يريدون فرصة جدو يعوفنا حتى يستعبدونا هم رياجيل .. اني مريضة لأن مصادقت مو .. اني مريضة لان معشت المراهقة .. اني مريضة لان محبيت بالكلية و ردت بس اتخرج حتى اخاف باجر عكبة يصير شي عندي وظيفة وعندي مهنة اكدر اطلع منها فلوس و اعيشك .. بس اريد اعرف شنو الي قصرت بي اني وياك .. تسبني و تغلط عليا و تحجي عليا كبال صديقتك .. سمعت كلشي ترى اني بس سكتت و حبست هالشي بداخلي .. اني ما طلبت شي منك غير بس تبطل سوالفك و كلتلك بس أشر على احسن بنية بهل الدنيا ازوجكياها .. الله يصلح حالك .. تبقى قطعتي الصغيرة الي ربيتها .. تبقى جزء مني ..
و ابقى احبك و اتمنالك الخير و ما اطلب منك بس شي واحد .. تذكر وين جنا و وين صرنا .. و اخيرا اتمنى الخير للكل و محد يشوف الي شفته … ماعرف شوكت ارتاح لا قبل ارتاحيت من جانت لا شيء ولا حتى هسه من صرت شيء شكلي راح ارتاح ..
( هم نزل وهم يدبج )
انتهى
اخوكم ابو بغداد سايق التكسي
#ابوـبغداد