ننشر لكم مجموعة من القصص العراقية الحقيقية والواقعية بقلم الكاتب المبدع ابو بغداد سائق التكسي وهي قصص قصيرة ولكن بها معاني اخلاقية وتربوية كبيرة ومؤثرة
اقرأوها فعلا تستحق القراءة
اطلع لكط رزقك مثل فلان ابن ام فلانه … اطلع جمعلك كم فلس تفيدك باجر عكبة … هالجملة و غيرها بس بكلمات ثانية جانت تنكال لواحد عمرة ١١ سنة … اي اي دعش سنة عمري ومجنت اسمع غير بس هيج نوع من الكلام .. مسمعت فد يوم جملة روح ادرس .. محد مكالي باجر عندك املاء ؟؟؟ محد مكالي اليوم شسويت بالمدرسة … محد مدور جنطتي شاف شبيها و كالي تريد اجيبلك دفاتر لو اقلام … جنت احب كلمة قرطاسية هواي احسها بيها ربط بالمدرسة وماعرف اصلا ليش احب هالكلمة تحديدا … ماعرف شحجي و شكول بس الي بالكلب من يطلع يشك الروح شك و خاصة اذا بي ذكريات حقيرة و تعبانة … من عمر دعش سنة واني اطارد بنص الشوارع والفروع و اطبق حرفيا كلام امي و رحت الكط رزقي .. من علوة الشعلة للمصلخ لسوق المخضر مال الرحمانية … جنت اتعارك وي الجهال بالسوك وارجع للبيت ابجي و فوك ما مضروب و متأذي امي تذب الصوج بيا … غيري يبجي علمود بايسكل لو طوبة واني ابجي لان جنت ابيع بالسوك علاليك و اجه واحد ثاني كالي لاتبيع هنا هذا مكانا و لان مسمعت كلامة ضربني هو وجماعته … غيري يبجي لان يريد يروح سفرة للجزيرة السياحية لو لمدينة الالعاب واني ابجي لان اعرف ابوية وامي ميريدون منا شي غير بس نشتغل اني واخوتي … و تحملت و اشتغلت و بطلت من المدرسة … خسرت المدرسة و جنت ذكي ذكي ذكي لدرجة المعلمات من جانو يشوفوني بالسوك يسالوني ليش بطلت انت شاطر … جنت اجاوبهم مرات ومرات اتهرب من عيونهم حتى لا يشوفوني و يذكروني … و لكطت رزقي و كبرت واني مبرمج على شي واحد بس … شغل شغل شغل … اشتغلت كومة شغلات لحد مفتحت محل لنفسي … و المحل شغلة جان كلش زين … و سنين سحبت سنين ودخلت عسكرية و تسرحت بالفلوس طبعا والرشاوي … و طبعا هالحجي اني صار عمري تقريبا ٢٩ سنة … ماعندي تجربة بالحب و لا اعرف شلون احب اصلا … حتى تلفزيون و مسلسلات مشايف بعمري .. جنت اكثر شي اسوي اشغل راديو بالمحل مالتي و اسمع اغاني ومرات اخبار ومجنت اركز اصلا عالاخبار … بذاك الوكت جنت اطلع ساعة اربعة لو خمسة الصبح للعلوة اجيب زرع (يعني مخضر بانواعه) وارجع للمحل افتح لحد متكول ساعة تسعة لو عشرة بليل و اعزل … و جنت مجمع فلوس زينة و اصلا ماعرف ليش مجمعها … المهم .. فد يوم اجه ولد شاب من نفس منطقتنا راد يشتغل يمي بس راد شغلة ورى ساعة وحدة … بصراحة اني جنت محتاج واحد يساعدني و قبلت اشغلة و سالته ليش الا ورى ١ ؟؟؟ كال مو اني اداوم اعدادية واريد اكمل دراستي … قبلت بسرعة مع العلم اني محتاج واحد الصبح هم بس ماعرف شنو الي خلاني اقبل … و اشتغل وياي … جان يجيب كتبه وياه يقرا من ماكو شغل … وبديت احجي وياه واسمع اشياء عن الدوام .. حتى مرات هو جان يستغرب هلكد ما اكعد استجوبة و اسأله شسوون هناك بالاعدادية و شلون تداومون و شتحجون بيناتكم .. هو جان يحب وحدة و مرات يطلب مني يروح يشوفها .. جنت اضحك اضحك هواي واخلي يروح حتى من يرجع يحجيلي شسوى هو وشسولف وياها و شلون التقى بيها و شلون كامو يتمشون وايده لازمه ايدها .. جنت اتخيل كلشي واني داير مدايري سلال المخضر و الفواكه .. جنت اتمنى احب و انحب واعيش هيج تجربة .. بس ماعرف شلون اسوي هالشي .. واخجل مصيبتي اخجل وماعرف احجي وي بنية … الحاصل … بصف السوك الي محلي بي اكو مدرسة ابتدائية … مديرة المدرسة مرية جبيرة بالعمر و عدها سيارة و مرات تطبك تتسوك مني و تروح و جانت تحبني لان تشوفني اسلوبي حلو و محترم و دائما تكلي ابني … جنت اني هم احبها و دائما اني اختارلها المسواك و انطيها الشي الزين بس … فد يوم جتي وكفت بالسيارة و نزلت بس اكو بنية بقت بالسيارة كاعده … البنية هلكد محلوة حتى الغراض من جنت اشيلهم و احطهم بالجياسة مال المديرة يوكعون هههههه .. دخت بيها للبنية و يومي كله تخربط … حتى الولد الي يشتغل وياي حس بالموضوع … و سالني شبيك ؟؟؟ كلتله ماكو شي …. يعني لهل الدرجة جنت اخجل حتى احجيله عليها للولد و اني اصلا بعدني ماعرف منو هالبنية و شنو هيه يجوز متزوجه يجوز مخطوبة يجوز اي شي بس مجبت طاريها كباله للولد … و ورى يومين تقريبا جتي المديرة تتسوك مني عاد سالتها بطريقة غير مباشرة .. كلتلها ست انتي شعجب متخلين ولدج بناتج يتسوكون ليش انتي تتسوكين ؟ كالت يمعود ميعرفون … هو جيل هالوكت مال مسواك اصلا بنتي من اوصل للسوك تبقى بالسيارة و ميعجبها هالشي ههههههه …. كلتلها الله يخليلج ولدج وبناتج …. صدك انتي كم ولد عندج و كم بنية … كالت ابني اني عندي ولد ثنين وبنية الولد ثنينهم متزوجين و البنية بعدها تداوم كليه .. بس مكالت ياكلية و مردت اسألها ياكليه حتى لاتحس بشي … سكتت بس ارتاحيت لان عرفت هالبنية بنتها هههههه لان صدك بنتها منزلت وياها من جتي تتسوك … اني بذاك الوكت جان عندي فلوس سيارة بس مأخر سالفة شرائها لان ممحتاجها كلش .. بس ثاني يوم قررت اشتري سيارة و ورى اسبوع اخذت سيارة نظيفة كلش .. و قررت الحك المديرة حتى اندل بيتهم … بس حسيت اني طايش بيومها و جنت اخاطب نفسي واكول انته مناقصك شي و تكدر تتزوج وتفتح احسن بيت (يعني جنت اقنع نفسي هالشي صح ) … و قبل ماروح والحكها الي سوالي عزيمة و دفعني اكثر على فعل هالشي هو الولد الي يشتغل وياي … سالته كلتله اكلك اذا واحد ماعنده شهادة مثلي ومدارس و راح تقدم على وحدة دارسة ومتعلمة شتتوقع تقبل ؟ كال جوابي عبارة عن جواب بي شقين .. كلتله دحجي يمعود شقين شنو هههه ركية هيه … كلتله احجي بأسلوبنه لاتكعد تصير براسي برفسور مادري شيصحولة … كالي زين باع .. اذا البنية تحبك و تريدك توكف وياك كبال اهلها وتحاول تقنعهم مرة ومرتين والف لحد متاخذها .. بس اذا البنية متعرفك و متحبك لاتحاول اصلا هههه … كلتله ماشي … و كلت خلص اخليها تحبني ههههه و جنت واثق من هالشي وعبالك سبحان الله اكو شي غريب يدفعني اسوي هالاشياء كلها … شي خفي يدفعني للطيشان الي بعمري ممسوي اني بحياتي …. حياتي كلها مداخل هيج دخلة والله .. و رحت لحكتها و اندليت بيتهم جانو كاعدين بالغزالية بشارع المشجر … ببداية شارع المشجر والحلو المديرة متسوق سريع يعني كلش سهل لحكتها … اندليت البيت و بديت اسأل الولد الي يشتغل وياي الكليات ساعة بيش تداوم و ساعة بيش تنتهي … لان صدك ماعرف … و بديت اراقبها للبنية لدرجة لحكت ابو الخط الي ماخذها و طلع دوامها بالجادرية … كمت يوميا بنهاية دوامها اروح اوكف اشوفها نفسي بس ما احجي وياها … وجنت اتقصد اخلي نفسي كدامها بس قبل هالحجي خطوات هواي سويت … حلاقة و ملابس درجة اولى و حتى بوقتها اشتريت قميص ابيض و بنطرون رصاصي لان جان بذيج الفترة شي اسمه زي موحد … وحتى يبين شكلي شكل طالب حالي حال الطلبة الي هناك … و كمت يوميا اروح … لحد ما هيه جتي برجلها عليا وكالت انت شتريد ؟؟؟ اني بذاك اليوم لزمتني العبرة وانعكد لساني هههه عفتها ومشيت بحيث هيه خجلت لان ماعرف شحجي هههههههههه والله العظيم من الرهبة عفتها ومشيت … وثاني يوم هم رحت بس هالمرة شافتني وخنزرت بعيونها عليا … و طبعا هالحجي كله اني جنت اسال الولد الي يشتغل وياي اسأله بطريقة غير مباشرة عن الحب وعن شلون واحد يسوي علاقة و شلون و شلون و شلون … واخر مرة و ورى فترة قررت اني اروحلها … ورحتلها جان هيه تعوفني ومشت .. بس لحكتها هالحجي قبل نهاية الدوام لان اني هلكد متخشخشت بالموضوع دبرت طريقة ادخل بيها جوى للكليه … و لحكتها كلتلها بس ثواني اريد احجي وياج … جان تندار عليا كالت شتريد .. كلتلها ماريد شي بس احجي وياج .. كالت اكلك انت ويانا هنا ؟ كلتلها لا .. جان تكول مو اني هم سالت نفسي يوميا اشوفك برى بس جوى ماشوفك … انت وين تداوم؟؟؟ بذاك اليوم معرفت شنو الي خلاني اكلها طب ههههه كالت اوكي وجاي مناك لهنا علمودي ؟ كلتلها اي والله و شتكول جنت اجاوبها بكلمة اي والله …. هيه ضحكت وعرفت اني ماعندي سوابق بالعلاقات لان حتى حجي ماعرف احجي وماعرف افتح مواضيع …. وبده فصل جديد بحياتي جان كلشي بي حلو الي هو فصل نور … اسمها نور وهيه نور والله … حلوة وحبابة وصوتها حلو وكلشي بيها بسيط … جانت تسالني مرات عالكلية و دوامي واني احاول انهزم من اسالتها وافتح مواضيع ثانية … و طبعا مع الاسف جنت اجذب ومستمر بالجذب لدرجة حتى اختاريت منطقة سكني منطقة غير منطقتني الحقيقية … و اجه اليوم الي اعترفتلها بحبي وهيه اعترفتلي بحبها و ورى فترة من علاقتنا الي طولت اكثر من سبع اشهر قررت اعترفلها بكلشي عن نفسي وعن حقيقتي واكلها اني اريد اتزوجها و خلص بعد لازم تعرف هالشي … و جيت وجه لوجه وحجيتلها كلشي و كلتلها اني شفتج وي امج بيوم الي جيتو تسوكتو من عندي وكل الي سويته علمود بس اتقرب منج وحتى الجذب الي جذبته جان علمود اوصلج .. زعلت مني كلش و كالت الجذب يبقى جذب و كالت شكو بيها لو جاي بشخصك و بحقيقتك و محاجي هالحجي كله … بصراحة بيومها بجيت وحجيتلها كلشي عن حياتي وكلتلها اني بعمري محاب و بعمري ممسوي علاقة و كظيت عمري كله اشتغل و اركض على خبزتي لان اهلي هيج علمونا و يجوز هالشي جان لصالحنا و يجوز مو لصالحنا بس شسوي مكدرت اختار اهلي … وجيت للدنيا لكيت نفسي هيج .. ولو بيدي وهالشي ميصير جان اختاريت عائلة مثلكم دارسة ومثقفة حتى بس تقبلين بيا .. حضنتني بيومها وهيه هم كامت تبجي بس جاوبت جواب صريح (اهلي) اهلي مراح يقبلون و اني راح ابقى احبك بس خلي ننهي كلشي منا لان راح تتعب انته و اني هم اتعب وبالاخير راح نوصل لطريق مغلق .. كلتلها اني مراح اتخلى عنج و راح ابقى اجي اباع عليج من بعيد لبعيد و عافتني وانطتني ظهرها وراحت … و ذيج اللحظة جانت بمثابة طلقة الرحمة عالعلاقة و عالحب .. طلقة الرحمة على الشي الحلو الوحيد الصار بحياتي .. طلقة الرحمة للضحكة والبسمة الي عرفتها بسببها و بسبب حبها … وراحت و اني مبطلت اروح هناك اباع عليها بس بعكس المرات القديمة من جنت اشوفها نفسي .. هالمرة كمت اتهرب من عيونها شلون من جنت اتهرب من المعلمات بالابتدائية من يشوفوني بالسوك …… لحد ما انتهى الدوام مالتهم و جتي العطلة وقررت بيني و بين نفسي ان ابتعد عنها لان شفت نفسي هالك .. وراح اهلك بعد .. تعبت كلش لدرجة بكلشي ممركز و بكل مكان اشوفها كبالي … و اخر مرة شفتها وعرفت هيه مكايله لأمها بيوم الي جتي تتسوك امها وهيه كاعدة بالسيارة … طبعا امها متعرف بشي ابد … جتي امها وهيه بالسيارة و صارت عيونها بعيوني .. ا ني صحت الولد الي يشتغل وياي بعكس كل المرات الي اني اختار المسواك لأمها .. صحته هو كام يخلي المخضر لأمها واني فتت للمحل جوى بحجة داسوي شي … بس بجيت بجيت من كل كلبي بحيث خليت راسي عالحايط و ابجي بس ابجي عالصامت حتى لحد يحس لا الولد الي يشتغل وياي ولا امها .. وجانت ذيج اصعب لحظة بحياتي … وراحت البنية و اني هم بعت السيارة و بعت المحل وتحولت لمنطقة ثانية فتحت محل ثاني حتى بس اهرب من الذكريات … و شوية شوية تعافيت من نور و تزوجت زواج تقليدي و صار عندي اطفال و اطفالي مدللهم و زوجتي هم مدللها بس ما اكدر انسى نور … و اعرف هالشي غلط لان اني اكو مرية مسكينة متعرف شي عن الي صار و لا حاجيلها اصلا .. بس ماعرف هو هذا الي صار و هذا الي جرى … عالعموم الله يوفقها و الله يوفقني … (طلقة الرحمه) انتهى اخوكم ابو بغداد سايق التكسي #ابوـبغداد
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
