قصص عراقية حقيقية بقلم ابو بغداد سائق التكسي

سمس

اول شغلة اشتغلتها بحياتي جانت بنادي … النادي جان بالمنصور تقريبا قريب على معرض بغداد الدولي .. هو خاص بنقابة اطباء الاسنان .. جنت بوقتها شاب بالعشرينات .. الدنيا ستوها بدت وياي .. جان شغلي متفرق .. بس اكثر شي جنت احبه بهل الشغل هو الاعراس الخاصة بالاطباء .. جنت اشتغل بداخل القاعة ارتب الميوزه و انصب الاكل .. و حتى بالتنظيف هم جنت اشتغل .. الشغلة حصلتها عن طريق معارفنه هو اصلا دكتور اسنان .. والدي يعرفه و طلب منه يشغلني .. جنت بالعرس اتونس لان ناس و هوسه و عزف و موسيقى .. و باقي الايام هم جنت متونس لان العمال الي يشتغلون وياي يتشاقون و سوالفهم حلوه .. جنت مرتاح بهل الشغلة .. بس متوقعت بيوم راح تصادفني شغلات ابقى اتذكرها طول عمري .. اكو مشكلة ببعض الناس (واني منهم) اكو نوع من البشر يعيش حياتين بنفس الوقت .. حياته الطبيعية الي يعيشها يوميا .. وحياة ثانية الي هي حياة الذكريات و الامور الي عاشها قبل .. يعني اني من عمر صغير حتى امنياتي جانت تختلف من امنيات الجهال الي بعمري .. مثلا .. اكو هواي جهال جانو يتمنون يعيشون بمحل مال غذائية .. علمود ياكلون بكيفهم جبس ابو النسر و نساتل فرندو و بسك و موطه الي بنهايتها دعبله (علج) و يشربون شربت رنا و و و و .. اني جنت اتمنى نفس الامنية بس مختلفة .. جنت اتمنى اعيش بالمحل صح .. بس  اعيش حتى الم شكو اكل و مواد غذائية انطيها لأهلي .. لان دائما بالبيت اسمع امي وابوية يحجون على المسواك .. و دائما اسمع الجمل الي هي جمل عادية لكل واحد يسمعها بس الي جانت مو عادية .. مثلا (خلصنا شكر .. خلصنا دهن .. خلص التمن .. خلص الجاي) و دائما جان ابوية يكول لأمي حاولي تقتصدين بالطبخ .. مجنت احب هالشي .. جنت اتمنى امي تطبخ بكيفها و متقتصد .. جنت اريد اشك اللحاف الي يكولون عليه المثل المعروف (كل واحد يمد رجليه على كد لحافه) جنت اتمنى اشك و احرك هاللحاف الي اسمع عنه و ما شفته و نعيش بدون منحتاج شي .. عالعموم هاي الامور كلها راحت و صارت سوالف (تنذكر ما تنعاد) .. بس الي ينذكر و ياريت ينعاد .. هي بشر مو حالة مادية ولا لحاف و لا اسواق غذائية .. بشر عشته وياه احلى ايام حياتي ..

بيوم من الايام صار عدنا عرس … اني كالعادة بديت بالشغل و رتبنا القاعة و بدو يجون الناس .. اكو ناس جوي قبل العروس والعروسة .. الناس ذولة ما راحو للزفة مال العرسان .. يعني مباشرة جوي للقاعة .. و بعدين جوي كل المعازيم الي راحو للزفه .. هوسة و طبل و موسيقى .. و بدو العازفين مال الفرقة يعزفون .. و اشتغلت الاغاني .. اني جنت افتر من ميز لميز … و جنت مرات انهزم من الشغل اروح ادخن جكارة بس بعيد مو يم الناس .. و صدفه شفت جاهل بعمر ٨ سنوات تقريبا ديتعارك وي جهال و اكو بنية لابسه بدله حلوه جانت تجره من نص العركة و هو ينهزم منها يروح يركض يضرب واحد من الجهال .. شمرت الجكارة و رحت ركض جريته .. لان البنيه مكدرت عليه .. طبعا هو اخوها الصغير .. تشكرت مني البنيه و كلتلها مصار شي .. و راحت بنص المعازيم .. اخوها مبطل وكاحه و هم رجع لنفس المكان يتعارك .. رحت لزمته و كلتله كافي حبيبي و بديت احجي وياه كله عيني و حبيبي .. بس هو لسانه محلو و مبين مدلل اكثر من اللازم .. اخر شي خوفته كلتله لك اذا متتوب و تبطل ترى اعصرك عصر .. خاف مني و رجع لمكانه .. ورى مرجع بعشر دقايق اجاني رجال لابس قاط … رزلني و كالي ديربالك ثاني مره تكرر هالشي .. طبعا هو ابو الجاهل .. اني خفت على رزقي لان اقل ما بيها يبطلوني .. بقيت اشتغل بس احاول ما اتقرب على الميز الي الرجال و عائلته كاعدين عليه .. و خلصت الحفله و بدو الناس يروحون .. جان تجيني نفس البنية .. كالتلي اني ابوية حجالنه الي سواه وياك و طبعا اخويه من سالته منو سوى وياك هيج كالي نفس الولد الي حجيتي وياه … ابويه سألني منو هالولد كلتله بابا ولد يشتغل هنا و ترى الصوج مو منه الصوج من حمودي (اخويه الصغير) بس ابوية مدلله كلش و ميقبل احد يحجي وياه .. هسه عوفك من هالحجي كله لان جيت اعتذر منك عفيه لا تضوج احسبها عليا .. كلتلها لا عيني مصار شي بس اني بداخلي ضايج كلش من تصرف ابوها … سكتت و بلعتها و راحت البنية … بس الي خلاني انسى تصرف الاب وياي و رزالته و كلامه المو حلو ابد .. بنته .. لان البنيه عافت كل شي و جتي تعتذر مني … و مشت الايام و ورى فترة شهرين قريبا .. هم صار عرس .. جنت ارتب شغلات بالنادي و حسيت اكو واحد طبطب على ظهري .. انداريت و رأسا ردت اكول تفضل .. لان هالامور هواي تصير يعني اني شغلي هناك و مرات هواي ناس تصيحني او تطلب مني شي (بحكم شغلي يعني) .. انداريت جان اشوفها هي … ضحكت هي و اني ضحكت كالت شلونك .. كلتلها يا اهلا و سهلا شلونج عيني اخبارج .. كالت تذكرتني ؟؟
كلتلها طبعا انتي اخت الوكح ههههه … كالت اي .. كلتلها شنو خير .. كالت هم معزومين عرس .. كلتلها شنو عدكم وكاله مال اعراس .. ضحكت كالت لا بس اني ماما دكتورة اسنان و بابا هم دكتور اسنان و كل معارفهم دكاترة و هنا يسوون اعراسهم للكرايب او الهم .. و احنا اصلا عدنا اشتراك بالنادي .. يعني مرات نجي هنا .. كلتلها الف هلا بيج و بأهلج و بأبوج هم الي ما احبه .. جان تضحك كالت بابا مجاي اليوم عنده شغل بس اني وماما و حمودي .. كلتلها على راسي .. و كمت اني واشتغل اباوع عليها من جوى لجوى .. الي حسيت بي هي هم تباوع عليا و كل متصير عيني بعينها تبتسم .. حسيت بروحي رغم ما المكان متروس بشر وصوت المطرب وعزف الفرقة بس حسيت اني وياها بس بهل المكان وحدنا … حتى كمت اخربط بالتوزيع .. و طلعت لنفس المكان الي ادخن بي … هي لحكتني بس سوت نفسها صدفه طالعه على اساس تشوف حمودي وينه .. جتي من يمي كالت هاا واكف هنا … كلتلها اي داشرب جكارة و ارجع .. جان تكلي انته صارلك هواي تشتغل هنا .. كلتلها اي .. كالت اها …. حسيت بيها تريد تفتح موضوع .. المصيبة اني شوية فطير بالتعامل وي هيج مواقف .. غير المفروض افتح موضوع .. كل مواضيع الدنيا طارت من راسي .. كلتلها اكلج انتي شكد عمرج .. جان تكول ٢٠ اني بوقتها ٢٣ .. كلتلها اني اكبر منج .. جان تكول اي .. طبعا اني بداخلي كلت هاي شدا اخربط اني .. كلتلها انتي شسمج .. جان تكول شمس .. كلتلها والله اسم على مسمى .. انتي شمس صدك .. جان تكول وانته شسمك .. كلتلها مصطفى .. كالت شلونك مصطفى .. ضحكت كلتلها هسه زين لان شمس هنا .. هي هم ضحكت كالت انته تدرس .. كلتلها لا والله مبطل .. جان تكول عادي .. كلتلها اي بس ناوي اكمل دراستي بس مو هسه … كالت اي اهم شي الشهادة .. و سالتها وين بيتكم كالت باليرموك .. و اني بذاك الوكت جان بيتنا جان بالرحمانية .. طبعا ردت انطيها رقمي … بس كلت خلي اطلب هالطلب منها بطريقة صداقة وبس يعني مو حب و هالسوالف .. كلتلها شمس اني عجبني شي بس مستحي اكوله .. كالت كول بسرعه لان لازم اروح يم ماما .. كلتلها يصير نصير اصدقاء ..
كالت اي شكو بيها .. كلتلها زين اكدر انطيج رقمي مرات نحجي سوى .. كالت هااا .. كلتلها اصدقاء والله مو اكثر .. كالت ماشي .. كلتلها زين هسه اروح اكتبه .. كالت باع اني حروح يم ماما و انته ارجع لشغلك و من الناس يبدون يروحون اجي اخذه منك زين .. كلتلها زين .. وركضت دبرت قلم و كتبته و خليته بجيبي .. طبعا الدنيا بذيج اللحظة كلها تضحكلي حتى الميوزة و المواعين و الكراسي كلشي بالمكان اشوفه يضحكلي هلكد ما مكيف اني .. و بدت تنتهي الحفله و الناس تروح جان تجي .. سلمت عليا وانطيتها الرقم و راحت .. قبل متروح كلتلها شوكت تخابرين ؟؟
كالت يجوز اليوم بليل .. كلتلها زين .. كملت شغلي بسرعه و رجعت للبيت .. و صار اول اتصال بينا .. والله العظيم للصبح اني احجي وياها .. لان حضرت كومة حجي براسي و كلت كله اسأله عليها .. و كمنا تقريبا يوميا نسولف بليل .. كل شي حجتلي عن حياتها و اني هم حجيتلها كل شي .. اني حبيتها للبنيه بس مفكرت نهاية هالحب شنو عبالي كل حب (بذاك الوقت) نهايته زواج … بس جنت فطير مثل مكلت ..
عالعموم .. يوم ورى يوم كمنا نحجي بمواضيع هواي و هي تسألني على شغلي و كل مرة اكلها ماكو احد راح يتزوجج حتى اشوفج .. هي تضحك تكلي لا حاليا ماكو .. و قررنه نلتقي برى لان مدترهم سالفة النادي … اللقاء جان بالمنصور يم الرواد و نتمشى هناك بالفروع الورى .. حتى اخاف كل شي يصير يعني ابوها يفوت يشوفها لو معارف ابوها .. حتى البنية ميصير عليها شي لان بركبتي .. و رحت و التقينا .. ذاك اليوم جان يوم تاريخي بالنسبة اليا .. لان كلتلها احبج وهي هم كالتلي اني احبك و اول مره بحياتي الزم ايدها او بالاحرى اول مره بحياتي الزم ايد بنيه .. من لزمت ايدها حسيت اني املك الكون كله .. حسيتها صارت مني وبيا و قطعه مني .. و كملنه اللقاء و وصلتها لليرموك بتكسي ذبيتها عالشارع و رحت .. طبعا طريق الرجعه لبيتنا كل شوية اشتم ايدي لان بيدي ريحة عطرها .. وصلت للبيت و بليل تحاجينه .. و بقينا سنتين سوى .. و هم التقينا ورى هاللقاء بنفس المكان اكثر من مره .. حبيتها كلش لشمس .. طبعا هي بذيج الفترة تداوم كليه .. و هي اول متعرفت عليها جانت طالبة كلية بس جنت احسها طيلة فترة علاقتي كلها تبتعد عن هالمواضيع حتى لا تخجلني ..
لان تعرف اني مبطل من الدراسة .. بس ولا مرة كالتلي تعال نلتقي يم كليتي و اني هالشي جنت راضي بي .. لان جنت اخاف على سمعتها كلش و بيني و بين نفسي كلت حقها البنية لان مجتمعنا البنية اهم شي بيها سمعتها … طبعا طيلة كل هالفترة اني عندي رقمها الارضي بس ابد ما اتصل من كيفي .. لان ماعرف ظرف بيتهم شنو .. انتظر هي تتصل …
المهم …بيوم من الايام اتصلت هي و حسيتها مو ملهوفه عالسوالف وياي مثل كل يوم .. حسيت عدها برود و عبالك مرغمة عالحجي وياي .. جانت يوميا من تحجي وياي تسألني الف سوال عن يومي و طبعا هي تعرف اسماء اصدقائي بالمنطقة و حتى تسألني عنهم .. و حتى تسألني عن اخوتي .. و هواي يعجبها اسولفلها على العركات الي تصير بمنطقتنه و جانت تضحك هواي .. يعني تحب هيج امور .. بس الاتصال ذاك جان مو طبيعي .. برود .. و الاتصال انتهى بسرعه مو مثل كل مره نبقى ساعات نحجي … كالت نعسانه و تعبانه .. و ثاني يوم هم تكررت الحالة .. ثالث يوم كالت باجر ماكدر اتصل بيك لان راح نروح لبيت عمتي نبات .. و شوية شوية العلاقة كامت تبرد (من طرفها) .. اني كمت اطلب منها نلتقي جانت تكول ماكدر و تطلع اعذار .. و كامت تجي ايام متتصل اصلا .. لحد ما اختفت … طبعا ذيج الفترة الله لا يراويها لبشر .. العصبية عندي صارت فول و كمت ادور عركة حتى وي اهلي .. اي واحد يسألني على شي حتى لو اعرفه اكله مادري .. بديت اتاذى .. و كل ما اتصل على رقمها امها تجاوب لو اخوها .. و طبعا كبل اسده .. وصلت بيا الدرجة اروح ادور باليرموك عليها واني اصلا ما اندل بيتهم بس اعرف هي باليرموك .. كمت امشي وادور بالوجوه .. اني اعرف هي كليتها شنو و رحت لكليتها و هم ما لكيتها ..
و حجيت هالشي لصديق مقرب مني .. كالي انساها لان هاي صار وياها شي و مكدرت تكلك عليه .. يجوز حبت غيرك يجوز اهلها جبروها تتزوج يجوز هواي احتمالات بس انساها .. كلتله سنتين اني وياها واحبها .. كالي انساها خوية ..
كلتله ماكدر والله احبها .. كال بابا راح تخسر روحك انته بهل الشي .. وشي ثاني انته مفكرت بوضعك و وضعها .. هي اهلها وين واهلك وين .. كلتله شنو هالحجي .. كال بابا ابوها دكتور وامها دكتورة و ابوك حارس بعمارة و انته عامل بنادي .. كلتله دروح تفكيرك مال افلام مصرية .. كالي هذا واقع .. هاي تعرفت عليك لان عجبها شكلك وانت حلو و شاب وسيم منختلف على هالشي .. طول و ضخمامة .. بس الواقع انته لا شيء بالنسبة الها و كالي اذا انته هيج دايخ خلي اي بنيه تتصل على رقمها و تطلبها بالاسم و من تجاوب حاجيها شبيك أغم .. طبعا بيومها تعاركت وي صاحبي بس هو كلامه صح .. اني يمكن جنت بالنسبة الها بس شكل و اعجاب و تطورت العلاقة بس ليشششش .. اذا هي تعرف علاقتنه متكمل ليش علقتني بيها .. و هلكد مو فطير اني ما فكرت بكلام صاحبي انو اخلي بنيه تتصل و تطلبها بالاسم .. و خليت بنت عمي تسوي هالشي و لو مطالب هالشي هواي احسن الي .. طبعا علمتها تكول هي صديقتها و صار فترة محاجيه وياها … و حجت وي امها و عرفت انو هي متزوجة طالب وياها بالكلية … من سمعت هيج بجيت و عمت عيني على كل دمعة نزلت من عيني بذاك اليوم لان اصلا هي متستاهل .. ليش مكالتلي .. ليش .. ليش خلتني احبها اصلا .. ليش طلعتلي بالعرس و وكفت يمي .. ليش اخذت رقمي .. ليش كالتلي احبك .. و بديت انساها لان العمر يمشي و طبعا اني بطلت من النادي و اشتغلت كومة شغلات بس دائما اتذكرها .. دائما تجي على بالي .. و مرت سنين و طبعا اني مكملت دراستي بس اشتغلت شغل زين و كدرت اخذت محل بمول معروف و تزوجت و صار عندي جهال ..
الي فتح هالجرح القديم و خلاني اتذكره بكل تفاصيله هي بنتي الصغيرة … بنتي الصغيرة متلفظ حرف الشين  .. تكول سمس متكدر تكول شمس .. جنا طالعين اني وياها و امها و رادت تكول الدنيا حاره كالت السمس حاره و امها المصيبة بقت تضحك على كلمة سمس و تكلها شنو شسمها و هي تعيد الاسم .. عادت الاسم اكثر من خمسين مرة و امها تضحك .. و اني اضحك بوجه امها و اضحك وي بنتي بس بداخلي صوت شمس و ريحة الاكل عالميوزة مال العرس و شكل حمودي من ديتعارك اول مرة و البدله الي لابستها شمس اول مره شفتها بيها .. و حتى بطريقة سريعه اني و كاعد وي زوجتي و بنتي اشتميت جف ايدي .. بس ماكو ريحتها .. عالعموم اني الي اكول مو معناته اني ما احب زوجتي وجهالي .. بس هي تبقى ذكريات عشتها و راح تبقى بداخلي و جذب اي انسان يكدر يكول تكدر تنسى .. لان (احنا عبارة عن ذكريات الماضي و حياته بالحاضر)وبس .. وارجع واكول .. ياريت الي يعرف نفسه ميكدر يكمل علاقة لا يدخل بيها اصلا .. و بس ..
(سمس)
انتهى
اخوكم ابو بغداد سايق التكسي
#ابوـبغداد