ننشر لكم مجموعة من القصص العراقية الحقيقية والواقعية بقلم الكاتب المبدع ابو بغداد سائق التكسي وهي قصص قصيرة ولكن بها معاني اخلاقية وتربوية كبيرة ومؤثرة
اقرأوها فعلا تستحق القراءة
جنت يوميا تقريبا بذاك الوقت اصعد اني واخوية فوك السطح نلعب … امي جانت تخاف علينا نطلع بره .. لان بصراحة واحجيها جنا اني واخويه كلش وكح .. نتعارك وي جهال المنطقة هواي .. و منخاف .. وصارت مشاكل هواي وي الجوارين من ورانه .. ابوية حلف منطلع بعد بره .. حدنا بس نروح للمدرسة و نرجع نبقى جوى بالبيت … بيتنا جبير كلش .. و ابوية ما قصر ويانه بسالفة الالعاب .. عدنا كلشي .. و مثل مكلت كل لعبنا فوك السطح .. جان حتى الحر ميأثر بينا .. و شمس الصيف ولا يم تفكيرنا .. المهم بس نلعب .. مره نطير طيارة نايلون .. مره نلعب بالبايسكلات فوك بالسطح .. مره نلعب دعابل .. مره طوبه هم فوك السطح .. تعلمنا و حاولنا نأقلم نفسنا وي السطح .. بس رغم كل شي جانت حلوة و حتى بعدين ابويه قبل نلعب بره بس احنا حبينا السطح … و ماكو شي ماجنه نلعب بي .. حتى مره انتلت لان حاولت العب بالكهرباء .. و بيوم من الايام امي جانت نايمة و اني جنت اباوع تلفزيون .. شفت اخوية اجه شايل وصلة قماش (خاولي) و يأشرلي الحكه .. لحكته صعدنا فوك … كلتله شنو هاي .. كالي باوع شطلعت من فوك الكنتور .. و فتح الخاولي فد شي اسود يلمع (مسدس مال ابويه) ضحكت اني و كلتله خلي الزمه .. لزمته و بقيت اسوي مثل الافلام بي حركات .. هو جره مني كالي انطيني دوري هسه اني العب .. انطيته الى .. بقينا ندوس بي و احنا منفتهم اصلا شي بي .. هو يدوس شغله واني ادوس شغله .. و بقيت اجره منه و هو يجره مني .. لحد ما طلعت منه طلقه و جتي بوجهي .. الدم تطشر بكل مكان واني ماعرف حسيت احساس ماعرف اوصفه بذاك اليوم .. خربت لان فقدت دم هواي .. وامي صعدت عالصوت و كامت تصيح و نزلتني للشارع و جوارينه على صياح امي طلعو .. اخذوني بسيارتهم للمستشفى و الحمدلله عالجوني بس ….. الفك السفلي عندي خرب و اضافه لهل الشي وجهي كله خرب .. الحنج عندي شكله تغير .. و هالامور الشكليه كلها محسيت بيها بذاك الوقت .. لان تشافيت الحمدلله و رجعت العب طبيعي بس جان اكو نظره من جهال المنطقة و حتى الجهال بالمدرسة ممفهومه .. و بديت كل ما اكبر المرايات بالبيت تفهمني شنو جانت نظرات الجهال و الناس اليا .. ابوية عنده امكانيه و حاول يشوف حل بس كلهم جانو ينصحونه نسافر .. و ابوية بذاك الوقت جان ميكدر يسافر … و سنه ورى سنه اكبر و قلت نظرة الناس لوجهي و الداير مدايري (سواء اهلي او عائلتي او معارفنه او اصدقائنه) تعلمو على شكلي .. صار شي طبيعي بالنسبه الهم .. بس اني ثقتي بنفسي صفر صارت .. خصوصا من كمت اشوف كل الداير مدايري يدخلون بعلاقات و يحبون و ينحبون واني وحدي .. جنت مرات اقنع روحي اكول الي يحب يحب الجوهر .. بس هالشي جذب و حجي افلام .. لان جربت اكثر من مره و حتى اكو بنيه حاولت تنهزم من شافتني اريد احاجيها .. طبعا هالحجي اني بالكلية جنت … و اخر شي كلت بيني و بين نفسي احسن شي اروح للكلية اكمل محاضراتي و اكمل شغلاتي و حتى ما التقي بأي بشر .. لان حتى مرات الشباب نفسهم احس يضحكون عليا و يجوز هالشي بس بداخلي .. يعني يجوز هالشي مموجود بس لأن عندي هالسالفة بوجهي احس بنقص و لحد يكلي لازم تثق بنفسك … لان كل الي بيهم امور (شكليه) يحسون احساسي بس يكابرون عالحقيقه المره .. حقيقة ذاك الصوت الي جوى بجسمك .. الصوت الي يكلك باع هذا شلون يباوع عليك .. باع ذيج شلون تباوع عليك .. باع ذولاك شلون يتهامسون بيناتهم و كلهم يباوعون عليك .. حتى بالفواتح لو بالاعراس لو من يجون كرايبنا يمنا للبيت كمت اخجل اطلع اباوسهم .. يجوز كل الي احجي حاليا هو حاله نفسيه لا اكثر .. و كملت كلية و تخرجت و توظفت و بالوظيفة مالتي جان لازم اتواجه وي المراجعين .. يعني وظيفتي تحتم عليا انو اتعامل مباشر و اكون على تماس و احتكاك مباشر بالمراجعين … فتت للمدير و هو رجال جبير بالعمر وكلش محترم … كلتله استاذ عندي موضوع ماعرف شلون اطرحه عليك … كالي كول .. كلتله والله خجلان .. كال اخذ وقتك واحجي على كيفك ..كلتله زين يصير اكتبلكياه بورقة لان والله مداكدر احجي .. هو من شافني هيج حس الموضوع مهم .. كالي اكو احد متعرضلك .. كلتله لا لا بعيده السالفة .. كالي زين دقيقة .. و دز على جايات اليا و اله … و كالي اشرب الجاي على راحتك و احجيلي .. كلتله استاذ اني ماريد هالمكان ممكن تنقلني بنفس الدائرة بس لغير مكان .. كالي كلي سبب .. كلتله استاذ يعني السبب واضح ترى وجهي .. كالي شوف اني راح انقلك بس اذا راح تبقى هيج تفكر عمرك راح يخلص قبل وقته .. كلتله استاذ والله مو قضية تفكير بس يعني اني ماريد احتك بالمراجعين .. و نقلني الرجل بمكان ثاني بنفس الدائرة و طبعا من ضمن عملي .. و بديت اداوم .. و سنه جرت سنه و اني الحمدلله اموري المادية زينه و اصلا من ولادتي امور اهلي زينه .. بس اني هم صار عندي قطعة كاع و سيارة و وظيفتي راتبها كلش زين .. بس اكو نقص بحياتي .. النقص هو الزوجة .. يعني عمري صار ٤٤ سنه واني بدون زواج و اخاف افكر بالارتباط اصلا … اخوية تزوج وكل الي اعرفهم من عمري تزوجو و صار عدهم جهال .. بس اني بقيت على وضعي .. امي و ابوية ملو من سالفة يفتحون وياي موضوع الزواج .. لان يعرفون اني عندي عقده من سالفة وجهي .. و بيوم من الايام اجاني ابن خالي .. هو قريب مني و اعتبره صديق مو ابن خالي .. كالي اكلك عندك فلوس جوى ايدك .. كلتله اي حبي تدلل شكد تريد .. كال مو الي .. كلتله المن .. كال الك .. كلتله شنو هاي حزورة .. كال دكوم وياي .. ورحت وياه لدكتور تجميل .. سوالي اشعات و تحاليل و كالي حرفيا شغلتك صعبة بس نحاول .. سوالي اربع عمليات .. منطقة الحنج رجعت طبيعية بس خاليه من الشعر و الاثر واضح .. طبعا هالحجي اني ذبيت ملايين على العمليات .. صح تعدل شوية وجهي بس هم مو كلش .. المنطقة الي سويت بيها عمليات ميطلع بيها شعر بسبب الضربة القديمة .. اني صرت لوتي .. كلت خلي اروح لتركيا ازرع شعر لهل المنطقة .. و مدام حنجي تعدل اربي لحيه و تضيع السالفة لان هالحجي كله سويت بأخر سنوات .. قبل مجانت اكو سوالف تجميل مضبوطه ولا حتى سوالف زرع شرع .. و رحت لتركيا زرعت المنطقة و ربيت لحيه .. غير وجهي تغير ٣٠٠ درجة … غير الثقة رجعت فول .. غير الفرحه رجعتني واحد عمره ٢٠ سنه … كمت اروح واجي اباوع عالمرايات مال البيت الي جانو قبل يمثلولي رعب .. والله العظيم جنت اخاف اباوع على روحي بالمرايات و اتهرب منهم … مو بس هيج .. كمت اسوي تسريحات مال شعر و اعتني بروحي .. حتى لبسي صار عالموديل و كبل مباشرة كلت لأمي اريد اتزوج … و الحمدلله تزوجت .. هسه من نطلع اني وزوجتي للمول لو لسوك .. اكو بنات يباوعون عليا .. هي من تشوفهم يباوعون حتى لو نظرتهم جانت بريئة بس مرتي غيورة كلش .. تكلي غير لو يشوفوك بدون لحيه … خلف الله عاللحيه مغطيه الجريمة .. طبعا هي تحجيها بطريقة تضحك .. واني اعرف من غيرتها تحجي هيج .. رئسا اكلها ماكو غيرج بالكلب .. و الحمدلله هسه وضعي النفسي كلش زين و عندي بنوته تخبل .. و عايش مرتاح بخير .. بس اتمنى شي واحد .. اتمنى اكو فد علاج لو فد حبوب تمسح ذاكرتي و خصوصا ايام الكليه .. لان والله العظيم ولو عيب احجيها .. بس جنت مرات ابجي بغرفتي .. و جنت اغار و هم عيب اكول اغار .. بس جنت اغار حتى من اخويه من اسمعه يحجي وي حبيته .. بس الحمدلله على كل حال .. هسه اني احس روحي طاير بالهوى ..و اخيرا اكول .. الله يبعد عنكم التايهات .. لان الي صار وياي صار صدفه و خطا ممقصود .. بس خسرني احلى سنين عمري .. (سنين عمري) انتهى اخوكم ابو بغداد سايق التكسي #ابوـبغداد
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
