قصص عراقية حقيقية بقلم ابو بغداد سائق التكسي

جربت حظي

كل واحد بينا ينولد ميكدر يختار دينه لو اسمه لو حتى الدولة الي ينولد بيها  … اني هم انولدت مختاريت شكلي … من بديت اكبر و دخلت بالمدرسة عرفت اني شكلي الكل يباوع عليه … حتى بالصور مال الصف ..
جانت المعلمة تخليني بالنص … شكلي حلو و محبوبه كلش لان فقيرة … من دخلت المتوسطة واني عمري صغير يعني مو مال زواج .. تقدمولي ثنين و بوكتها ابوية مقبل لان بعدني صغيرة …
و ما احجي على الي يلحكوني … يوميا يلحكني واحد … يوميا … البنات بالمدرسة يغارون مني … بس من يتقربون مني يعرفوني اني فطيرة و فقيرة بنفس الوكت يحبوني كلش  …
مع الاسف مرات الناس تاخذ الصورة الخارجية للبشر و حتى اكو بيهم ميحاول يتقرب و يعرف هالبشر شنو و منو … و المصيبة اكثر الناس يتوقعون البنية الحلوة مغرورة ..
على شنو وليش ؟؟ ماعرف ..
و بديت اكبر و دخلت اعدادية … تقدمولي من المنطقة ولد ثنين بس امي حالفة متزوجني الا لأبن خالتي … أبن خالتي شخصيته كلش محلوة و بصريح العبارة ماعنده شخصية اصلا … و شفت هالشي هواي … و سمعت هم … اخوتي ميحترموه ابد … هاي عالصعيد العائلي .. و عالصعيد الشخصي الخاص بي … اصدقاءه نفس الشي .. الولد ماعنده شخصية ابد … يضحك على كلشي .. و ماعنده مبدأ بهل الدنيا واصعب شي عالبنية ترتبط بواحد ماعنده مبدأ .. اني مجنت رايدته .. بس امي الله يسامحها لعبت بعقل ابوية رغم ما ابوية هم ميحبه بس قنعته وخلته ياخذني  لأن امكانية ابوه المادية كلش زينة و بذاك الوكت جان حصار واحنا بمنطقة شعبية و حالتنا المادية مو كلش زينة … اني بصف خامس اعدادي جنت بوقتها … بطلني من المدرسة و ابوه اشتراله مشتمل بنفس المنطقة .. الي جنت اشوفة ماعنده شخصية كبال اخوتي و جنت اسمع اصدقاءه شلون يحاجوه بالتلفون لو برى يم الباب لو بالصالة و ميحترموه طلع غير شكل .. طلع اسد وانكلب وحش عليا … وخصوصا ورى ما بده يمل مني .. لان مدلل .. الي يريده ياخذة و شوية شوية يمل منه ..  اصدقاءه نايمين براسه .. ومن جنت اكله هالشي يغلط عليا و يكلي انتي مو رجال حتى تدخلين نفسج … بداها بشغلات الغلط و نهاها بالضرب … بالبداية جان يغلط .. و حتى اني وصلت مرحلة كلت ليش ادخل نفسي .. اذا هو مكيف اصدقاءه نايمين براسه اني شعليه .. بس من وصلت يطلع يبات برى و يعوفني وحدي بالبيت وفوكاها يكلي اذا امي لو ابوية خابرو عليا (عالتلفون الارضي يعني) كوليلهم نايم … يعني يخاف من امه ومن ابوه بس مني ميخاف .. و صح رغم شخصيته المو حلوة اصلا و رغم عدم اقتناعي بي بس يبقى زوجي شسوي لازم اغار عليه … مجان يصرفله هالحجي و بده يضربني …
و يهددني بالطلاك و بصراحة اني اخاف من هالشي … لان هو شخصيته سخيفة و اخاف من لسانه شراح يطلع حجي عليا و المصيبة بمجتمعنا الرجال ينسمع صوته اكثر من المرية … خفت و سكتت … وبديت ابلع المر … طبعا ولا مرة طلعت وياه برى اذا مصارت مشكلة … و هو بالسنة حسنة يطلعني مرة و مرات ميطلعني اصلا … جنت اخاف اخلف منه بس شسوي خلفت لان مو بيدي … و مثل مكلت بكل طلعه عركة لان اكو شباب يباعون عليا .. ومرة بسوك طالعين و السوك مزدحم .. هو لازم ابني و اني دامشي بصفة … و وكفت يم بياع مال ملابس اطفال .. هو وكف بصفي بس ابني انهزم منه و راح جابه .. بالرجعة مالته اكو ولد مراهق واكف مقابيل البسطية .. كام يأشرلي برقم تلفونه كاتبه بورقة صغيرة .. رجلي برجعته شاف الموقف .. كالي امشي .. اني انتبهت عالولد المراهق بس ولا عبالك شفته لان من هالمواقف شايفة كومة حتى قبل ما اتزوج … اني مشيت وياه .. و بالطريق كفخني على راسي كالي امشي سريع .. و هو اصلا اني جنت امشي على كيفي لان اكو خيسة و ترسبات مالي مي بالكاع (مكرم القارئ) يعني ممتقصدة والله … و رجعنا للبيت .. خلى ابني بالصالة و طلعله ملاعيب يلعب بيهم وشغل التلفزيون و عله الصوت .. و طببني للغرفة نزع الحزام و ضربني ضرب .. اوف ياربي شكد بجيت بيومها .. يكلي مليون مرة كايلج لاتخلين مكياج بنت الهيج و بنت الهيج .. والله العظيم اني مجنت مخليه مكياج قوي بس حواجبي خفيفة واثخنها بقلم كحله وبس .. متت من البجي بس ابني مسمع شي لان صوت التلفزيون عالي .. بعدين طلع وعافني ابجي … سكتت ورحت حضنت ابني و كعدت بالصالة …
خابرت امي بيومها حجيتلها … امي سكتتني و كالت يمه سمعي كلامه رجلج هذا وانتي هم بعد لاتخلين كحله …  انلصمت من شفت امي هيج .. و بديت اسكت على كلشي ..بس بيوم من الايام … مكدرت اتحمل … و انفجرت بوجهه … كلتله انت اصدقائك يغلطون عليك و يسبوك و تجي عليا تصير رجال .. بصراحة ردته يطلكني لان خلص كرهت كلشي .. كرهت كلشي .. انهانيت هواية و كافي … كافي يوميا غلط و عدم احترام .. اني مو حيوان اني بشر انسان … من كلتله هيج بيومها … بقى يدفر بيا و مو احاول انهزم منه .. يرجع يدفرني يوكعني .. جرني من شعري بيومها و حتى شعري شوية اتكطع بيده .. و ضربني بنفاضة مال جكاير بيدي بكل قوته بحيث من قوة الضربة رأسا طك العظم انكسر … اني من انكسرت ايدي خربت … هو خاف .. لان السالفة كبرت واني خلص تخربطت … وداني للمستشفى بس اني متخربطة و دم بحلكي من الضرب .. صحيت بالمستشفى بس صار بيا صدمة عصبية بيومها … هو خاف يكول لأهلي و لأهله الجبان عديم الشخصية … بقى يتوسل بيا بس ما احجي … بس اني بس جنت منتظرة فرصة و عفته براحته بس اريد اصير زينة و يرجعني للبيت .. و بس فتت للبيت .. هو بوقتها حصر روحه بالبيت حتى بس ما اتصل بأهلي .. اني مشيت وياه و خليته يأمن … و جان اتصل بأهلي بس شفت الفرصة مناسبة … حجيت كلشي و بيومها اول مرة امي طبكت وياي … و جتي هيه وابوية .. واخوتي هم جوي .. طبعا اخوتي مجانو اصلا يعرفون الي يصير ودائما امي متوصللهم الي يصير .. اخوية الاكبر مني بس حجيتله الي صار .. تخبل و امي شكد حاولت تهدئة ما سكت .. و كام يحجي على امي و يصيح يكلها بعتيها كله من وراج و ابوية اول مرة بذاك اليوم اشوفه ساكت و ميحاول يكول لأخوية اسكت لاتصيح ..
بقى ابوية كاعد يمي بالبيت و مخلي ايده على راسه .. و اجه رجلي صدفة و بس فات اخوية تلكاه من الباب … و اخوية الثاني هم ركض شبعو بسط … و ركض اخوية الجبير جاب القنينة مال غاز جان يكله لاخوية الاصغر مني الزم ايده  قوي و اخوية الصغير من كل عقلة لزم ايده يريدون يكسروها بالقنينة مال الغاز  … عاد اني ركضت بس اصيح لا و امي تصيح وابوية جرهم بالكوى و كام يضرب بأخوتي … بس اخوتي ولا يهمهم ضرب ابوية ولا حتى صياحي و صياح امي … و ماعافوه بس عافو سالفة القنينة مال الغاز … و هو يبجي و يعيط مثل النسوان … جرو فوتو جوى لان صياح قوي و اخوتي مرادو يلتمون الجوارين … حصرو جوى و هو يبجي .. عافوه و كامو يكولوه لك انت مو رجال والله مو رجال و يصيحون على امي هو هذا الي انطيته روى اله .. هو هذا الرجال الي راح يدلل اختكم … مو كنالج هذا زعطوط ديله شبعي بي … و كامو يصيحون طلكها … طلكها .. ابوية متدخل و اني جنت اباع على ابوية ردت اشوف ردة فعله بس شفته موافق على حجي اخوتي لان ماحجى شي .. و الجبان هلكد مو جبان و بلا شخصية رأسا طلكني …
حتى ما فكر من الخوف … رجعت لبيت اهلي بس رجعت راسي مرفوع و ما فكرت بسالفة حجي الناس .. و رجعت وابني يمي … حاول هواي يرجعني بس اخوتي مقبلو و كالو عيشتها علينا و طبعا شوية شوية اخوتي شغلهم صار زين و امكانيتنا صارت زينة .. و ابني كبر بس كبر يكره ابوه كلش … ميحبه .. مع العلم هو يدزله فلوس هواي بيد امه (خالتي يعني) و كل ميلتقي بي يشتريله كومة ..
و اقسم بالله العظيم اني مربيته هيج يعني مربيته يكره ابوه بس هو ميجرعه يحب خواله اكثر بهواي …. و بقيت يم اهلي معززة مكرمه و توفى ابوية و اخوتي تزوجو و هسه كلنا عايشين ببيت واحد بس والله العظيم كلوبنا كلنا على بعض .. حتى سالفة الجناين و العركات الي نسمعها مرات من الناس لو نقراها عالانترنت نكعد نضحك عليها لان صدك احنا ماعدنا مشاكل .. و اذا اخوتي مرات يتعاركون وي نسوانهم اني وامي نطبك وي النسوان على اخوتي .. و طبعا اني حالفة ما اتزوج ولا راح اتزوج لان ابني كبر و هسه يداوم اعدادية و مرتاحين و مناقصنا شي .. بس مع الاسف .. تجربتي بالحياة جانت محلوة و مرات انقهر من اشوف ابني بدون اب .. و انقهر اكثر من اشوف شلون لو اسمع النسوان مدلليهم رياجيلهم و اتذكر الي صار وياي .. حرامات اني مجان ناقصني شي و لحد اليوم مناقصني شي .. بس مع الاسف هيه قسمة و قدر .. وهذا جان قدري من هالدنيا ….
( جربت حظي )
انتهى
اخوكم ابو بغداد سايق التكسي
#ابوـبغداد