قصص عراقية حقيقية بقلم ابو بغداد سائق التكسي

حياتي بسطور

القصة الي راح احجيها مالها دخل بهل الحياة ...  لان الشغلة الي صارت وياي ماعرف المن انسبها و شلون اسولف بيها بس الي اعرفة اني ضاعت سنين من عمري بسبب ماعرفه اصلا شنو هو و ليش هيج صار وياي .... بسنة ١٩٩٧ جنت طالب صناعة ... بذاك الوكت جنت اداوم بالصناعة لان اريد اخلص من الجيش و بنفس الوقت تصير عندي صنعة استفاد منها ... طالب و عايش حالي حال غيري ... اشتغل وي والدي بالاسواق الغذائية و جانت نفس الاسواق وكالة مال حصة تموينية ... و عادي احب الدنيا و عندي بنية اريد اتزوجها و هيه بصراحة اقربائي ... و بيتهم قريب من عدنا .. يعني نكدر نكول حياتي طبيعية الى ابعد الحدود و حاط شوية احلام و خطوط عريضة للمستقبل الي علساس راح اعيشه مثل ما مخططله ... جنت احب الملابس بشكل ميوصف و البس عالموديل ... يعني اذا كاظم الساهر لو حاتم العراقي لو هيثم يوسف يطلع باغنية جديدة و لابس قميص حلو رئسا بدون تفكير اطلع لخياط بالمنطقة انطي مقدمة و اطلب نفس التفصال بالضبط ... عندي اصدقاء طيبين و حبابين و ولد اوادم بيهم الخريج و بيهم الي مخلص جيش و بيهم الي بعده بالجيش .. يعني اكدر اكول جنت متونس ...
و بيوم من الايام اجانا مدرس جديد للصناعة .. المدرس هذا جان كلش كلش مكروه .. كام يرسب بالطلاب بدون سبب ... نص الطلاب لبسو جيش من وراه ...و اني واحد من هالطلاب ... لبست عسكرية من وراه لان رسبني سنتين وحدة ورى الثانية ... لبست بالجيش و جانت الوحدة العسكرية مالتي بالبصرة ... واني من سكنة بغداد ... يعني ما احجي شلون جان الطريق تعب و حتى الاجازه جانت  مابيها طعم ... لان طريق طويل و لعبان نفس ... بس بقيت اداوم و كلت خلص هذا حظي و خلي اخلص العسكرية و اتزوج مباشرة لان ابوية بوقتها علساس يفتحلي محل مال كهربائي و طبعا هالشي تعلمته و ضبطته من ورى الصناعة ... كلت افتح المحل و يصير عندي باب رزق ثابت و اتزوج الي احبها ... و صدك والله اجه اليوم و كملت جيش و حددنا موعد نروح نطلب ايد البنية بس صار عدهم حالة وفاة و اجلنا السالفة سنة .. بهل السنة اني اشتغلت بمحل كهربائي و كلت لابوية خلي بعد اضبط السالفة و بعدين نفتح المحل حتى تصيرلي خبرة شوية ... و فد يوم صار عدنا شغل بالسيدية واني بيتنا بالشهداء مال الامين الثانية ... ركبنا كوستر من الشهداء لبغداد الجديدة حتى مناك نركب كوستر ثانية .. بالطريق و تحديدا يم مدرسة الجمهورية اجتي سيارة لاندكروز فاتت بينا بالسيارة ... الضربة صارت بصفحتي مباشرة ... بوقتها جنت بصف الشباك ... الكزاز مال شباك فات بوجهي و براسي بس جنت بحيلي وحتى من طلعوني وكفت على رجلي و جنت اهدأ الاسطة الي اني اصلا طالع وياه واكله مابيا شي والله مع العلم الناس كلها مضروبة بس اني الوحيد بيهم انزف من راسي ومن ركبتي و من جتوفي ... بس عندي حيل ..
بذيج اللحظات جانت تنكطع عندي الصورة مال الدنيا .. وصارت الحياة عندي عبارة عن تنقلات صورية ... يعني الموقف مال الحادث اتذكرة زين .. بس من الحادث كبل صحيت ببيتنا و اهلي يمي و فوكاها اسمعهم يحجون وياي واجاوبهم و اضحك وياهم و كلشي طبيعي .. و لهنااااك تنكطع الصورة و ارجع اشوف نفسي بنصهم بس الحالة تغيرت و اني صاير زين ... اكلهم يابه اني مابيا شي همه يكيفون و عادي اروح اطلع ملابسي و علساس اريد اروح للشغل و هم تنكطع عندي الصورة و تجي بغير يوم وهم اشوفهم بس بغير لبس و غير تاريخ ... الدكتور الي جان يشرف على حالتي و على حسب كلام اهلي طبعا .. يكول العقل يوكف عن التفكير و ابقى بس جسد وروح بنصهم بس صافن و همه لازم يوكلوني واني هالشي ما احسه من ارجع للواقع ... بس الي احسه انو الاشياء دتتغير و الزمن ديمشي ... و بقيت على هالحال اكثر من ٨ سنوات واخر مرة صحيت بيها صحيان كامل جنت بالشماعية .... الدكتور الجان مشرف على حالتي تغير و اجه غيره وغيره وغيره لحد موصلت لدكتور عمار ... من صحيت اخر مرة شفت وضعي و شفت الوجوه الداير مدايري كلها غريبة و كمت اصيح ... و طلعوني من المستشفى بعد مابقيت اكثر من شهر اني صاحي واعرف الواقع كلش زين ... يعني كام يوميا يلتقي بيا واجاوبة واحجي وياه طبيعي ... و اني بوقتها مصدكت شلون اهلي يجيبوني هنا اصلا ... زين حبيبتي وينها ؟؟
و المحل شصار منه ؟؟
جنت اسأل اسأله مالها اجوبة و الدكتور نفسه ميعرف يجاوبني و كلتله شلون جابوني هنا وليش ؟؟
كال لان فقدو بيك الامل و جتك فترة تطلع تمشي بالشارع حافي و اكثر من مرة جنت تضيع و يلكونك  نايم عالشارع العام لو الشرطة الي بالمنطقة يعرفوك و يعرفون اهلك يجيبوك للبيت ... و مرات الجهال جانو يركضون وراك وتنهزم و تفوت ببيوت ناس متعرفهم اصلا و المنطقة كامت تخاف منك ..
جنت اضحك من يحجي هيج و ممصدك هالحجي ... وهو يحلفلي على هالشي .. كمت ابجي ..
بس بجي بحركة كلب لان حسيت اني ضيعت اشياء من حياتي بهل الحادث .. بس الي ريحني ابوية وامي واخوتي وخواتي كلهم بخير ...
و اني من نفسي كلتله للدكتور اذا صدك جانت هيج حالتي فانطيهم الحق يجيبوني هنا ...
كالي عالعموم احنا متصلنا باهلك لان انت قبل هم صحيت بس مطولت هلكد بس هسه اني متاكد انت رجعت لطبيعتك وراح اتصل بيهم يجون يستلموك بس تبقى تتواصل وياي و لازم تبقى تاخذ العلاج بدون متعوفه ابد ..
كلتله ماشي بس رجاء ماريد ادخل جوى يم المرضى لان بصراحة تعبت وماكدر انام ... كال ماشي و اتصل بأهلي و اجوي كلهم استلموني ..
و طبعا الدكتور اكدلهم انو اني صرت زين ورجعت لطبعي ..
رجعت للمنطقة طبعا متغيره الدنيا و اصدقائي جانو ينتظروني بس بيهم خوفة مني و الكل جان يباوع عليا .. شلون وحدة بدون ملابس و تمشي بباب الشرجي ... بالضبط هيج اكدر اوصف الحالة ... الكل عينه عليا و محد متخيل اني صدك طبت مع العلم اني رتبت نفسي و اهلي اخذولي ملابس جديدة و جنت من اباع عالهدوم الي بالجنطة تلعب نفسي.. ماعرف شلون جنت البسها لهل الهدوم ريحتها بول (مكرم القارئ) و عرفت اني جنت دائما اتبول على نفسي ... و مو بس هيج امور ثانية هواي .. بس المصيبة ما اتذكر غير بس الطفرات الزمنية الي جنت اصحى بيها ...
عالعموم رجعت طبيعي بس مجنت اتحمل نظرة الناس اليا بالمنطقة ... بقت نظرتهم اليا مخوفتني ... يحسسوني اني مخبل لو بيا عيب خلقي ... يتعاملون وياي على هالاساس رغم ماصرت زين اصلا و رجعت اشتغل ... البنية الي جنت احبها لكيتها متزوجة طبعا ... و ماريد احجي بيها لان خلص صارت بعصمة رجال والله يستر عليها ...
وفد يوم قفلت لو اسافر لو نشيل من المنطقة لان لعبت نفسي من نظرة الناس ... الجهال مال منطقة من اطلع يباعون عليا و يتختلون ورى الحياطين يطلعون روسهم وينهزمون ... لعبت نفسي من الواقع ..
ابوية كالي خلص شتريد اسويلك بس اريدك ترتاح ...
و صدك والله سافرت و طلعت لتركيا .. بتركيا قدمت على الامم متحدة بذيج الفترة  و كعدت بشقة وي ولد شباب عراقيين و الحمدلله محد يعرف الماضي مالتي و ميعرفون شي عني غير بس اسمي .. حتى منطقتي جنت مانطيها صح و اخاف لا احد يسال و يكولوله هذا مخبل ...
و بقيت سنتين بدون جواب و اخر شي ولد وياي بالشقة طرح عليا فكرة نسافر تهريب و قبلت و صدك والله طلعنا للدنمارك واستقرينا هناك ...
نسيت كل حياتي القديمة باستثناء اهلي منسيتهم ... و كدرت اشتغل شغلة زينة وتعلمت لغة و انفتحت ابواب حلوة كدامي .. و تعرفت على بنية عراقية بنت اوادم ... طبعا هالبنية لان ردت اتزوجها كلت احجيلها كلشي لان حقها هالشي ..
وحجيتلها كلشي و الحلو بالموضوع متغيرت نظرتها اليا ورى محجيتلها هالشي و قبلت بيا لان صدك تحبني ... و تزوجتها الحمدلله و صار عندي جهال منها وعشت مرتاح بس ...
مرات اخاف ... ماعرف ليش تجيني ساعات اخاف لا فد يوم اني وكاعد بنصهم و هم عقلي يرجع يوكف ههههههه بس الحمدلله لحد هاللحظة ماكو شي و اتمنى ميصير وياي شي و جهالي يضيعون مني ...
انتهى
(حياتي بسطور)
اخوكم ابو بغداد سايق التكسي
#ابوـبغداد