قصص عراقية حقيقية بقلم ابو بغداد سائق التكسي

صباح فيلق

بنهاية سنة ٩٩ .. اني جنت متخرج اداب انكليزي .. بس ما توظفت بذاك الوكت … اهلي امكانيتهم زينه و جان اكو مشروع براسي ردت بس ادبرله مكان بي خير حتى افتحه .. لان المشروع جان مكوي .. غسل و كوي ملابس … المكان جان مشكلتي لان سالفة المكوي متنفتح بأي مكان .. يراد مكان حيوي بي ناس .. لكيت محل هو اصلا مال مكوي مال واحد مصري يريد يرجع لمصر .. مكان المحل ببغداد الجديد … اني جان بيتنا بذاك الوقت بالبلديات … يعني (شمرة عصا على كولة اهلنه) … رحت و اخذت ابويه وياي و اتفقنه وي المصري عالسعر و اخذنه المحل … اني ليش اختاريت هالشغلة .. لان بوقت الاعدادية جتني فترة اشتغلت وي رجال عنده نفس الشغله و تعلمت الشغلة .. الشغلة بذاك الوقت رزقها خير من الله بس مثل مكلت اهم شي المكان … اخذت المحل و فتحته .. طبعا المحل مكانه بشارع مو كلش جبير .. بس متروس بشر .. ناس تروح و ناس تجي و بسطيات بكل شبر بالمكان .. و صارت عندي علاقات وي الناس القريبة من المحل … وبديت اشتغل رأسا .. جبت ولد يشتغل وياي و الولد صديقي .. و طبعا اني الي جنت اشتغل بالمحل بيدي .. لان مثل مكلت اشتغلت فترة و اعرف كل شي ..
الحاصل .. بيوم من الايام جوي بنات ثنين جايبين بدلات (مال حفله) يريدون يغسلوهم .. اخذت البدلتين و طبعا البنات عبالهم اني عامل لان اني الي اشتغل بيدي .. وحده من هالبنات جان شكلها كلش حلو .. طبعا هي نقطة مكياج ممخليه بوجهها .. و وجها منور مثل الكمر .. عيني بقت عليها حتى صديقتها حست .. البنيه جبيره مو صغيرة يعني مو مراهقة .. هي هم حست اني اباوع عليها دارت وجهها و سوت نفسها تحجي وي صديقتها .. طبعا دخت بيها اني .. و هاي جانت اول مره اشوفها بيها … عافو البدلات و راحو .. و طبعا هالشي عادي كومة يجون بنات و نسوان هم يجيبون بدلات مال حفلات .. لان البنات من يروحون للاعراس يلبسون بدلات (فساتين) .. شكد جاييني بنات بس مثل هالبنيه مشايف .. بقت براسي .. و طبعا كمت انتظر يوم تسليم البدله مالتها ساعه ساعه .. بس للأسف بيوم الاستلام جتي صديقتها وحدها .. حتى ردت اسألها اكلها وين صديقتج بس استحيت ..
المهم .. اكو مطعم اني اروح اكل بي بس بعيد شويه عن محلي … و بنفس الوقت صديقي الي يشتغل وياي ياكل هم بهذا المطعم ..
بس نجي منفصلين .. يعني اني اجي اول شي و ارجع ابقى بالمحل … بعدين صديقي يروح للمطعم (حتى المحل مينعاف وحده)  ..
فد يوم رحت  جان المطعم ازدحام .. كلت خلي اوكف برى اكل لان المحل متروس ناس .. اخذت لفاتي و وكفت برى اكل .. و عادي اكل و اباوع عالناس .. شفت كوستر وكفت عالشارع بس مجانت كوستر مال نفرات .. لان المكان الي اني داكل بي متفوت منه اي كوسترات الي تروح من منطقه لمنطقه .. بس الكوستر الي وكفت جانت مبينه مال خط موظفين .. نزلت البنيه نفسها الي جابتلي البدله مال الحفله .. اني اطلعها من مليون بشر لان شكلها براسي .. بقيت اباوع عليها وكلت خلي الحكها اشوف وين بيتهم .. عفت اني جنت ماخذ لفتين لفه عالميز و لفه داكل بيها .. عفت اللفه الي عالميز لصاحب النصيب و بلعت الباقي مال من اول لفه و ركضت وراها .. بس مخليتها تحس بيا و هي اصلا مراح تحس لان المنطقة بيها بشر رايحين و جايين يعني مو منطقة هادئه .. هي و دتمشي وكفت يم ابو بسطية جكاير .. ابو البسطية على عربانة (يعني من ذوي الاحتياجات الخاصة) رجال جبير بالعمر .. بقت تسولف وياه و تضحك .. اني كلت هذا حي عالصلاة ابوها لان طريقة حجيها وياه و ضحكهم ثنينهم مبينين عائله .. و سلمت عليه و طبطبت على جتفه و راحت .. اني وراها بقيت امشي .. وصلنه لشوارع ما بيها ناس هواي و فاتت لبيت .. اندليت البيت و عرفت اكو ربط بين هالرجال و بينها .. رجعت لنفس الرجال اشتريت منه باكيت جكاير و طبعا اني ما ادخن بس اخذته لصديقي الي يشتغل وياي لان يدخن .. رجعت للمحل مكيف و افكر بيها و بمشيتها و بضحكتها من ضحكت وي ابو البسطيه .. مكييييف طاير من الفرح خصوصا اندل بيتهم .. و طبعا عرفت الوقت الي تجي بي للبيت لان موظفه .. كعدت و خليت باكيت الجكاير عالميز نسيت حتى اني مشتري لصديقي .. اجه صديقي كالي هاي شنو صاير تدخن .. كلتله الك هذا .. شكرني و راح هو هم يتغدى .. ثاني يوم بنفس الوقت رحت انتظرها … و هم جتي بس تقريبا ورى ساعة من الانتظار .. و هم من نزلت سلمت عالرجال (ابو البسطية) وشويه حجت وياه مطولت مثل اول مره و راحت .. وهم لحكتها و هم اشتريت باكيت جكاير من نفس الرجال … ومن رجعت للمحل صديقي كالي اكلك سالفتك مو خاليه .. صار يومين تجيبلي جكاير .. حجيتله الي صار .. كالي روح اوكف سولف وي ابو البسطية بنفس وقت جيتها .. كلتله ليش ؟؟؟
كال حتى تشوفك واكف يمه .. كلتله والله انت ذكي و كمت بسته .. جان يكول بس مو تنسى باكيت الجكاير مال باجر ترى اني بفضلك عفت المفرد و تعلمت عالبواكيت .. ضحكت هههههه (هو قصده بذاك الوكت اغلب الشباب ميشترون باكيت .. جانو يشترون جكاير مفرد .. يعني خمس جكاير .. عشر جكاير .. حتى جكارتين و جكاره هم عادي) .. و ثاني يوم رحت عالرجال وطبعا مجان صعب عليا افتح موضوع وياه .. وهو هم ابن سوك يعني ياخذ و ينطي بالحجي .. وكفت يمه قبل ميصير وقت جيتها بنص ساعة .. طبعا اشتريت منه و كلتله عمي ماكو محل بهل المكان للايجار (طبعا جذب الموضوع بس ردت احجي وياه و امشي وقت بين متجي) .. كالي اكو هواي محلات و اكو دلال هناك بذاك الشارع اسمه ابو عقيل .. يكدر يشوفلك الي تريده .. كلتله اعرف اكو دلال ترى اني محلي هناك بفلان مكان بس تعرف دلال معناها لازم انطي دلاليه .. و اني كلت اسألك لان انته مبين قديم هنا و تعرف المنطقة زين واكيد ابن المنطقة … كالي اني هنا من الخمسينات .. و هاي المنطقة اعرفها واندلها شبر شبر .. كلتله والله اريدلي محل .. كالي شتفتحه .. كلتله مكوى مال ملابس .. كالي اكو مكوى هناك .. كلتله هو هذا مالتي بس اريد انقله لهنا لان هناك الشغل مو قوي .. كالي اها انته ابو المكوى بس انته عراقي اني الي اعرفه ابو المكوى مصري .. كلتله اي فلان المصري ..هو باعلي المحل بغراضه و رجع لمصر .. كالي ايباخ فلان رجع لمصر .. كلتله اي والله .. وبقى يسولفلي عالمنطقة .. و بنص الحجي طبكت سيارة الخط و نزلت هي .. شافتني واكف يمه .. جان تسلم عليه بس مسلمت عليا .. اني مبتسم بوجهها و هي ولا خلت عينها بعيني .. بس الي جان براسي طلع غلط .. اني عبالي هاي بنته بس هي تكله شلونك عمو فلان و سالته عن صحته و كالتله ممحتاج شي .. كالها لا سلامتج بنيتي و سلمت عليه  .. و راحت .. و رجع هو لموضوعه وياي .. اني ردت اسأله عليها بس هو شكله و اسلوبه مو مال واحد غبي .. يعني ذكي اذا اسأله مباشره اخاف تطلع بنت اخوه لو كرايبه و عيني غير السوك كله يلتم عليا لان هو الرايح و الجاي يسلم عليه بالاسم .. كلها تعرفه .. يمكن يسووني چوب من الكتل .. بقيت اسولف وياه و رحت .. ثاني يوم اخذت لفتين وياي و رحت يمه .. هم اشتريت باكيت جكاير و هم بقيت اسولف وياه .. هو كيف من شافني مهتم بي .. و طبعا هم فتحت وياه نفس الموضوع مال المحل .. هو اسمه عمو صباح … كالي اكعد .. كعدت على رصيف المحلات الي بظهره وهو تقرب مني بالكرسي مالته .. كالي لكيتلك محل .. كلتله قبل المحل اريد اسألك سوال ..
كالي كول .. كلتله انته بالحرب متصوب لو حادث (اقصد على رجله وهو ليش على كرسي) .. كالي لا والله مرض و دعاء الناس .. كلتله شنو مفتهمت .. كالي تمرضت و الناس جانت تدعي عليا .. ضحكت كلتله هاي شلون دبرتها ..
كالي قصه طويله … كلتله احجيلي .. كال ابني اني ماكو واحد بهل المنطقة مجان يحسبلي الف حساب .. جنت مكروه و ابو مشاكل و اندك بالكاع .. شرب و نسوان و سجون .. حتى اختي الي هي اختي متزوجت من وراي وهم دعت عليا .. وهسه بقينه بس اني وياها بالبيت .. حتى ابويه وامي ماتو قبل وقتهم من وراي و من ورى القهر .. ماكو شي قذر مسويته بحياتي .. و السبب لحد هاللحظة ماعرفه .. جان الشهر الي ميجون الشرطة لو الحزب لبيتنا اهلي يتوقعون اني بيا شي .. لان ممعقوله صباح فيلق هالشهر ما سواله مشكله .. جان لقبي فيلق .. صباح فيلق .. و الفيلق معروف شنو معناته .. معناته عدد مال محاربين مو (واحد) اني جنت واحد بس مشاكلي مال فيلق .. حتى من كبرت و ردت اتزوج ولا وحده قبلت بيا بسبب وضعي .. اختي المسكينه نفس الشي .. جانت حلوه و طالبه محد ما تقدملها بسبب اسمي و وضعي بالمنطقة و مشاكلي .. وكبرت اختي و بقت بدون زواج بسببي .. هواي ناس دعت عليا .. و هواي ناس جانت تكرهني .. و تمرضت صار بيا سكر .. و ضعفت و جسمي الي جنت اتعارك و اتفاخر بي صار جلد وعظم .. وبترولي رجلي بسبب مضاعفات السكر .. وصرت صباح عربانه .. بطلت كل شي و فتحت هالبسطية .. اكو ناس نست صباح فيلق بمرور الزمن .. و اكو ناس عرفتني بهل الهيئه الي تشوفها كبالك .. يعطفون عليا و يسألون عليا .. و يساعدوني مثل ما انته جبتلي لفات و ساعدتني .. و اكو ناس متشتري جكايرها الا مني .. حتى لو يخلصون جكاير .. لان ينقهرون عليا .. و هسه بيتنا بي بس اني واختي.. اختي تشتغل بمحل مال معجنات .. واني اشتغل هنا .. و عايش و احسب ايام لحد ما اقابل وجه الكريم .. كلتله عمي صباح انته سالفتك سالفة .. و جان اسأله كلتله لعد البارحة جتي بنيه سلمت عليك من جنت واكف يمك عبالي هاي بنت اخوك ..
كال حبيبتي هاي سالفتها سالفة .. كلتله خير شبيها .. كال هاي ملحكه عليا من جنت بحيلي و جانو الكل يخافون مني .. كلتله هااا عمي صباح شعجب مكرهتك لعد لو دعت عليك شفت يعني اكو ناس تحبك .. كال دسمع ابني ..
كلتله كول .. كال هاي امها منفصله عن ابوها .. اني جنت التقي وي ولد توفى هسه الله يرحمه بنفس شارع بيت (اهل امها) .. امها من انفصلت جتي رجعت لبيت اهلها وعدها بس هالبنيه الوحيدة من طليقها .. البنيه جانت صغيرونه و يعجبها تلعب حالها حال الجهال بالشارع .. جانو الجهال ميلعبوها وياهم و مرات يضربوها لان تلزك تريد تلعب وياهم .. اني جنت اكتل الجهال و همه اصلا يخافون مني .. وهي جانت من تريد تلعب وياهم و اني مموجود تهددهم .. تكلهم اذا متلعبوني اكول لعمو صباح .. همه يخافون و يلعبوها وياهم .. حتى مره بالمتوسطة واحد لحكها .. خافت تكول لعمها لا يكتلها .. مع العلم عمها جان صديقي بس مو كلش .. كالتلي الي .. لزمته للولد الي جان لاحكها كلتله اذا ثاني مره تلحكها … اسويك مخلمه و اگلي عليك بيضتين .. هو المسكين بعد ولا لحكها .. وهي وين متشوفني تسلم عليا .. لحد ماكبرت و توظفت و هسه هم خطية ماكو يوم متسلم عليا بي و تسأل عن صحتي .. حتى مرات من يسوون اكل طيب بالبيت تجيبلي حصتي لهنا .. من حجالي قصتها اخاف جنت معجب بيها .. حبيتها والله العظيم ..وحبيته حتى هو .. رغم ما جان (يجلد ذاته) بكلامه .. و رغم ما صدك جان هو مأذي ناس هواي .. و حتى كالي جتي فتره هو جان يبوگ .. بس تاب و بطل من كل شي .. حبيته والله .. يكول غلطت بس حتى من جيت اندم على الي سويته .. الندم مفادني لان اباوع يمنه (ابويه وامي ماتو بحسرتهم عليا) اباوع يسرى (اختي جبيره و متزوجت بسببي) .. اباوع علي روحي لا زوجه لا اطفال و مقعد بسبب المرض .. ميفيد الندم .. طبعا رجعت حجيت هالحجي كله لابويه .. ابويه شويه من النوع المتحفظ زايد عن اللزوم .. كالي كل الحجي حلو ابني .. و اذا تريد باجر نتقدم للبنيه .. بس قبل كل شي .. لازم تسأل عليها اخاف مخطوبه مرتبطة .. اسأل هالرجال نفسه .. و مراح يسمعك كلام مو زين لان هالشغلة رسميه وانته نيتك واضحه .. و رحت سألت عمو صباح .. كالي يعني انته تجي يمي و تشتري مني جكاير و جايبلي لفات بس علمود هالشغلة لا يا …………. هههههه بس ميخالف مدام نيتك شريفة و انته مبين ابن اوادم راح امشيها بس والله لو نيتك سوء جان هم سويتك مخلمه .. بس اكو مشكله وحده .. كلتله شنو عمو خير .. كال البنيه تعبانه على نفسها بالدراسه وانته لا ماعندك شهادة .. كلتله اوكف يمعود اني خريج اداب انكليزي .. كالي يعني مؤدب بس بالانكليزي ههههههههه ..
كلتله بالضبط … كالي زين انطيني منا لباجر و يصير خير بس لا تسويلي سوالف مراهقين و تجي توكف يمي من تجي .. خلي اسألها و يصير خير .. و ثاني يوم رحتله ورى ما راح وقت نهاية دوامها .. و كالي اخذ اهلك و توكل بألله هي ماعدها اعتراض بس طلعت تعرفك .. وهم عبالها ماعندك شهادة .. و كلتلها هو خريج بس متوظف و فتح هالمشروع .. و رحت وي اهلي و صارت من قسمتي .. الي هي هسه ام صفاء و سعودي و زهراء .. زوجتي .. هالحجي طبعا اني حجيته لأبني سعد لان سألني سوال كل واحد يكبر يسأله لأبوه لو لأمه .. شلون تعرفت على ماما .. و طبعا ورى مكملته القصة قرينا الفاتحه لعمو صباح .. لان توفى المسكين من ورى السكر .. واخته ما زالت حيه ترزق و مرات نروحله اني و ام الجهال نسأل عن حالها ونحاول نساعدها بأي شي .. و طبعا ام صفاء حبيبتي سألها ابني سوال (هالزمن هواي صايرين يسألون جيل الموبايلات) كالها من كالج عمو صباح (الله يرحمه) على بابا ليش قبلتي بسرعه وكلتي خلي يجيب اهله و يجون لبيتكم ..
كالتله لان الي يعوف شغله و يروح يدور تفاصيل على وحده شافها صدفه .. و فوك التفاصيل كبل يطلب ايدها (هذا مبين شريف ومو يدور سوالف مو حلوه) هالسبب الي خلاني اقبل و هم عرفت عنده شهادة .. يعني مقبلت بي علمود شكله لان لو ادور شكل جان ابوكم اخر واحد بالدنيا افكر بي هو وخشمه هذا ههههههه .. طبعا هي جانت تتشاقى كبال الجهال لان ادري بيها جانت ميته عليا والدليل من جابت البدلات هي وصديقتها ثاني مره بالاستلام هي مجتي هههههه .. همزين شفتها صدفه من نزلت من خط الوظيفه جان صارت ذكرى اذكرها و اتحسر .. الحمدلله على كل حال والله يحفظ الجميع و الاهم من كل شي … ينطيهم الصحه والعافية ..
(صباح فيلق)
انتهى
اخوكم ابو بغداد سايق التكسي
#ابوـبغداد