قصص عراقية حقيقية بقلم ابو بغداد سائق التكسي

صديقة الطفولة

من الابتدائية لحد متزوجت ما عندي صديقة مقربة اليا غير بس وحدة …
زينة
… زينة جانت احلى شي بالدنيا بحياتي .. جنت اذا انقهر اول شخص يجي على بالي زينة .. اروح اشكيلها همي واسولفلها وابد ما افكر اتصل بخواتي لو بأمي ..
لان الي بيني و بينها اكبر حتى من علاقة الخوات .. اسرارنا سوى حجينا سوى اكلنا سوى حتى الاشياء الي نحبها نفس الشي … صديقة طفولتي واختي و حبيبتي بهل الدنيا .. جنت حتى اذا اكل شي و اشوفه طيب رأسا اعزل حصتها على صفحة حتى من تجي تضوكها … احبها لدرجة جبيرة و حتى لبسنا مرات يكون نفس اللون …
زوجي جان يضوج منها و اصلا مو بس من صديقتي يضوج هو تركيبته يضوج من كلشي … و بمرور سنتين بعد زواجي صارت مشاكل جبيرة بيني و بينه و اني توقعت ورى ميصير عنده جاهل يتغير ..
صار عندي الجاهل (بنية) وهو متغير ..
يضرب و يسب على اتفه الاسباب .. و جنت بالبداية اضم هالشي حتى احافظ على (بيتي و زوجي) مثل ما هواي من النساء يسوون هالشي بس في سبيل يحافظون على انو همه متزوجات و عدهم عائلة .. بس يوم ورى يوم الشي زاد عن حده لحد موصلت وياه لطريق مغلق و انفصلنا ورجعت لبيت اهلي .. مراح اكول اهلي معجبهم الوضع بس تحملوني و دللو بنتي …
ورى فتره تقدملي ولد كرايبنا من بعيد و رفضت لان جنت صدك ناويه انذر روحي لبنتي وبس .. بس طلب يحجي وياي و قنعني بكلامه انو هو اصلا جان مخلي عينه عليا قبل ما اتزوج بس ظروفه جانت تعبانة و هسه هو وضعه تغير و توظف و عنده شغل زين …
قبلت و الولد شكله كلش مقبول و اسلوبه بالحجي بعد احلى من شكله ..
مثقف و رومانسي يعني ورى مقبلت و حددنا فترة نتزوج بيها جان معيشني مثل الافلام ..
حب حب حب .. اني جان شيصير وياي كلشي اروح احجي لصديقتي زينة ..
زينة جانت متأخرة قسمتها و السبب بصراحة شكلها …
شكلها جان مو كلش حلو .. بس هيه بالاول و الاخير خلقة الله … اني جنت احبها كوني بنية يعني و اموت عليها .. بس جنت دائما احاول اسرحلها شعرها و امكيجها من نطلع ..
جانت هيه تحجي السالفة بحجة شقى ..
تكول اشو من نطلع لحد منرجع الشباب بس الج يصجموج اني محد يسمعني كلمه ..  اكلها بابا همه جانو يسمعونا حجي ثنينا مو بس اني … مع العلم اني اعرف كلش زين السبب وين … بس انقهر عليها و ما ابينلها هالشي …. اني حلوة و شكلي طفولي … يعني رغم مصار عندي بنية و تزوجت و تعبت كلش بفترة الزواج بس بقى شكلي هو هو …
المهم …
  وافقت عالزواج و الولد طلع صدك يحبني … و حددنا موعد للزواج بس شوية بعيد لان هو عنده شغل و يريد يرتب كلشي قبل الزواج …
هو جان يسمع اسم زينة بس مشايفها .. جنت احجيله عليها هواي ..
و مرات حتى هو يكلي اني اغار منها لان هواي تحجين بيها … زينة ابوها امكانيته المادية فوق العادي … اني نصحتها بشغلة كلتلها ليش منسوي اني وياج سوالف مال تجميل لان هسه بالعراق كلشي توفر …
اقتنعت بالفكرة بس جانت خايفة ..
اني جنت محتاجة شغلات بسيطة كلش ..
بس هيه صار عدها هوووس مو طبيعي بموضوع التجميل … البنية انكلبت مية و ثمانين درجة …
شكلها صار اجنبي … مخلت شي مسوته بوجهها ..
وكامت تلعب رياضة وتسوي شد .. بحيث الثقة الي صارت عدها بنفسها خلتها تصير انسانة ثانية …
بالشارع من تمشي الكل صغير وجبير يباوع عليها … بس هيه متباوع على احد و جنت احسها فرحانة بهل الشي ..
فرحانة انو تمشي وهي محط انظار الكل … وفد يوم سويت كروب عالوتساب ..
بي اختي و خطيبي و زينة .. ندز سوالف تضحك و ندز مقاطع اغاني و ندز صور … بذاك الوكت الي سويت الكروب خطيبي جان طالع ايفاد بتركيا … هو هم يدز صور …  و ورى فترة حسيت زينة متغيره ..
قليل تتصل بيا ..
ادزلها شي لو اتصل ورى ساعة ساعتين ترجع تتصل بيا لو تكتبلي … حتى سالتها كلتلها صاير شي ؟
كالت لا حبيبتي شصاير قابل اني شوية مشغولة بالبيت وي اهلي وابوية هالفترة مريض ..
كلتلها زين وقنعت نفسي انو كلامها صح بس اني اعرف جذب لان اني وياها سنين علاقتنا مو هسه هيه صديقتي .. كلت بيني و بين نفسي اخاف مصادقة ومتريد تحجي … و حاولت ارسملها تبرير لان ماريد اكرهها هلكد ما احبها و متعلقة بيها ..
و يوم ورى يوم العلاقة صارت شبه منقطعه الى ان اجه يوم طلعت من الكروب الي جنا مسوي ..
و خطيبي رجع من تركيا و هم اتصاله بيا صار قليل .. حسيت بشي بس جنت استغفر ربي واكول مستحيل .. و بدت الغيره تشتغل وياي .. كمت اخابر خطيبي مرات الكاه مشغول ومن يجاوبني يكلي عادي جنت احجي وي اصدقائي .. و يطلع اعذار يمين و يسار ..
اخر شي كالي اكلج ترى سالفة الشك عندج زادت واني ماكدر اكمل وياج هيج ..
كلتله شنووووو ..كالي انتي مدتغارين انتي دتشكين ..
كلتله زين اريد التقي بيك ممكن .. كالي عادي .. واجه و طلعنا اني وياه …
الكعده كلها هو يتهرب من عيوني و يسوي نفسه ملتهي بالتلفون لو ملتهي بسويج سيارته يكلب بي ..
واني ابجي .. اخر شي كالي اني اريد انهي كلشي .. كلتله زين ليش مو احنا مرتبين كلشي واني احبك ..
كالي بصراحة اكو انسانة ثانية بحياتي وانتي لازم تعرفين هالشي لان اول وتالي راح ينعرف كبال الكل …
كلتله منو اعرفها و جنت لأخر لحظة ممخليه براسي انو زينة هيه هالانسان مع العلم اني جنت شاكة .. جان يكول زينة صديقتج اني حبيتها .. كمت بنص الكافتريا وكفت كلتله انت صدك تحجي ..
كال رجاءا رجاءا احترمي نفسج وكعدي ولا تفرجين علينا العالم ..
كلتله كوم رجعني لا افضحك هسه واني ابجي .. جان يرجعني للبيت و صدك والله انتهي كلشي بينا و زينة هم حضرتني من كل البرامج و انتهت علاقتي بيها .. و راحت ايام جتي ايام اني هم نذرت روحي لبنتي و اشتغلت بمدرسة اهليه بمنطقتنا … و فد يوم رجعت للبيت اختي كالت تعالي شوفي هاي المكموعة شمسوية … كلتلها منو ؟؟
كالت ام خشم .. كلتلها شبيها (على زينة تقصد) كالت هاج شوفي ..
اخذت تلفونها و شفت زينة مسوية صفحة عالانستغرام و عدها متابعين كومة و تحجي عالمكياج … و عالجسم و عالرياضة بحيث من شفت الفديو هههههه ابتسمت و ضربت خدي كلت يمه صخام هاي شنو ..
حتى اختي كالت هاي رجلها شلون قابل مع العلم اختي تعرف كرايبي الي جان خطيبي تزوجها .. كلتلها والله ماعرف .. كالت لعد بس وياج جان يحجي بالغيرة و ميقبل تخلين صورتج عالفيس بوك اشو هاي مرته كاعدة تنزل فديوات دك و مفاتح حلكة ..
كلتلها عفيه شعلينه و رحت لغرفتي سديت بابي عليا و بجيت ..
تذكرت علاقتي بيها بالابتدائية و تذكرت خطيبي و تذكرت صدك شلون جان ميقبل عليا انزل صورتي … بجيت هواي و فتت سويت حساب وهمي وكمت اتابعها .. جماله الي يخبلني يسألوها بالتعليقات انتي مسويه عمليات وهيه ترد لا ..
مسويت مثل الجهال و نزلت صورها قبل العمليات ولا حتى حاربتها لان اني مو من هالنوع اصلا …
بس جنت اراقبها من بعيد لبعيد ..
الى ان جتي فترة انقطعت عن الموقع مالتها ..
جان اكو هواي بنات متابعتها حتى جنت اقرى بالتعليقات اكو بنات يتركولها مجموعة من الاستفسارات عن الريجيم و الدايت و هيج شي .. و كلهم يسألون ليش مدتفتحين .. بالمناسبة هيه جانت مسميه نفسها غير اسم مو زينة …
و فد يوم اني بالشغل جان انصدم زينة جتي بوجهي … رادت تحضني اني وخرتها ..
و كامت تبجي و كالت بسس اريد احجي وياج  كلتلها هنا مكان شغل زينة …
كالت برى .. كلتلها زين ورحت صعدت وياها بسيارتها و طلعنا …
ودتني لمكان اني وياها جنا كلش كلش نحبه …
كالت تذكرين اني ابتسمت كلتلها شتذكر المكان لو الي سويتي ؟؟ هيه طكت من البجي و كالت اني من وراج ضعت والله و جنتي تنامين وتكعدين وياي .. كلتلها جذابه كولي ليش جيتي … كالت اني تطلكت قبل فترة ..
كلتلها اهااااا هسه عرفت ليش جيتي …
كالت كله من وراج كلشي صار وياي من وراج انتي و كامت تبجي و تحجي بصوت عالي طبعا هالحجي احنا بالسيارة ..
بس مسدودة الشبابيك و شكو واحد يفوت يباوع عليها لان مبين عليها منهاره …
كالت كلشي صار من وراج ….
جنتي تجين وتحجيلي على فلان (تقصد خطيبي الي عافني وتزوجها) وتحجيلي عالحب الي اني اتمنى اعيشه و جنتي تشرحيلي كل تصرفاته وياج و حتى تحجيلي على ريحته شلون تبقى بأيدج من يسلم عليج وفوكاها تشمميني الريحة و جنتي حتى صوركم تشوفينياها وتأشريلي على جتفه تكوليلي اكثر مكان احس بي بالامان هو هالمكان ..
بوكت اني جنت امشي بالشارع وكلشي تتذكرين محد يباوع عليا ومحد يعبرني و الكل يباوع عليج بس انتي و يريد يتقرب منج ….. كل هالاشياء زرعت بيا مرض اسمه الحب … بس حبيت الولد نفسه لان انتي خليتيني احبه بطريقة حجيج لأدق التفاصيل عنه .. و اذا تذكرين ورى العمليات جنت اني ما اباوع على احد لان محد ترس عيني غيره و بسببج هالشي .. خليتيني اني افوتله عالوتساب و اني اعترفله وهو رأسا وبدون حتى تفكير كالي اني هم معجب بيج مع العلم اني متاكدة هو لو شايفني قبل العمليات مجان عبرني …
و كالي اني استعجلت بسالفة ارتباطي بفلانة (عليج يعني) … و طلب يلتقي بيا و كام يسوي نفس الي يسوي وياج و ازيد … حبيته من وراج … عشقته .. كمت ابرر لنفسي كلشي و ما اكلج اني ما انغريت من صار شكلي هيج …
انغريت عالكل بس عليه منغريت لان حبيته من وراج …
و تزوجته و عشت وياه بسعادة بس جان اكو تأنيب للضمير كل ما اتذكرج بس جنت ابرر هالشي بجملة (انتي سوكج ماشي) تذكرين هالجملة الي جنتي انتي نفسج تكوليها اليا بوكت اني جنت حالي حال الرجال من امشي بالشارع ومحد ميعبرني …
نسيتي هالجملة موووو ..
جنت اكول هيه سوكها ماشي وهم حلوة و عادي شنو اخذت حبيبها منها ولو هو صدك يحبها مجان هيج بسرعه عافها وصار اليا

………
عاد بهل الحديث سكتتها اني وكلتلها كافي صياح لعد اذا هيج هو حبج وعافني علمودج ليش تطلكتي منه ؟؟؟
كالت اني قنعته اسوي صفحة عالانترنت احجي بيها عالمكياج و الميكاب وهالسوالف  .. وهو اقتنع و جان يراقب كل التعليقات و جانت اغلبها للبنات حتى الرسايل جانت تجي من بنات بس … و بدأ هالشي ياخذ وقت هواي مني و اني يوم ورى يوم اعترف كل ميزيد عدد الناس الي عندي انغر اكثر واحس روحي وصلت شي معين …. و هو كام يضوج و طلب مني اغلق الصفحة لان هالشي صار ممل بالنسبة اله .. اني مقبلت و كام يتعارك لحد ما اجه يوم كسر التلفون والكامرة و المكان الي اصور بي و تخبل عليا ..
انفجر عليا و طلكني .. …
كلتلها زين هسه اني شعليا بكل هالحجي ؟؟
كالت اريد نرجع مثل كبل … كلتلها دروحي بابا انتي مخبله …
انتي من يوم فكرتي تسوين هيج المفروض تفكرين للمستقبل … انو الانسانة الي جانت اعز صديقة الج و ساعدتج حتى بسالفة وجهج الي صار هسه هيج …
تاخذين خطيبها منها هههههههههههههههه و من تتعاوفون ترجعيلها مستحيلة انتي مستحيلة …
وعفتها و نزلت من السيارة واخذت تكسي و رجعت للبيت …. بقت تتصل عليا و حاولت تضيفني عالانترنت اني جنت ما اقبل …
و رجعت للموقع مالتها و رجعت تنشر … بس علاقتي بيها انتهت نهائيا … و طبعا المضحك المبكي حتى هو الي عافني و تزوجها رجع عليا هههههههههههههه حاول و طردته …
و هسه اني عايشه لبنتي و رغم عمري الي اصلا مو جبير بس صدك كرهت موضوع الزواج والارتباط و صرت اخاف حتى اقوي علاقتي بأي انسانة .. صارت بيا خوفة من ورى زينة …
وهسه شغلي زين الحمدلله و بنتي بمدرسة زينة و اهلي ممقصرين وياي …
وعايشة ممحتاجة اي شي غير بس بنتي تصير احسن وحدة بالكون والله يبعد عنها كل شر …….
(صديقة الطفولة)
انتهى
اخوكم ابو بغداد سايق التكسي
#ابوـبغداد