قصص عراقية حقيقية بقلم ابو بغداد سائق التكسي

حبي الاول والاخير

جنت اكبر واحد بالطلاب
... لان راسب اكثر من تلث سنوات ... و فوك كلشي طويل ... و دائما انظار الطلاب عليا ... و حتى الكوادر التدريسية هم انظارهم عليا ... جنت اكعد اخر رحلة دائما .. ومن يبدي الدوام لحد مينتهي بس ساكت .. اروح بدربي و ارجع بدربي و اي علاقات بداخل الاعدادية ما اسوي .. لان ملتهي بغير امور .. جنت اشتغل صباغ و اسوي سقوف ثانوية و نقوش و حتى بناء هم اشتغل .. دوامي جان بس علمود اخلص من الجيش ... لان الطالب بذاك الوكت اذا مستمر بالدوام و ممترقن قيده ميلبس جيش ... جان شغلي كلش زين و مرتاح ماديا .. اخوتي كلهم متزوجين و اني اصغر واحد بيهم ..
علاقات حب جانت ماعندي بس جنت رومانسي عالريحة .. هههههه يعني اذا اسمع اغنية لكاظم لو لمهند محسن لو لهيثم يوسف اتخيل روحي عندي حبيبة و عايش كل كلمة و كل حرف يكولة المطرب ...
اصدقائي جانو معدودين عالاصابع ..
اهلي بالبيت ماعدهم مشاكل مع العلم بيتنا بي تلث عوائل ..
يعني حياتي معتدلة و طبيعية و عايش على حب الهل و حب الناس ..
لان بالمنطقة سمعتنا حلوة و الناس اذا تنخانه بسالفة نركضلهم ركض اني واخوتي .. كلشي جان هادئ و طبيعي و حاله حال الهدوء و السكون الي يصير ورى ساعة ٣ بليل من نكوم نسمع صوت جكات ميل الساعة و صوت الحشرات من تصفر .. بس فجأة هالهدوء تغير بلحظة و صار كلشي بحياتي مخربط .. و حياتي انكلبت هوسة حالها حال باب الشرجي و سوك الغزل (بيوم الجمعه) و السبب شي اسمه صغير بس يسوى الكون كله و تنعمي و تتطرش و تخرس كباله ..
شنو هو ؟؟؟
شنو الي كلب حياتي ..
الحب ...
شلون صار و شلون تعرفت عليها ؟؟
عدنا المدير مالتنا مال الاعدادية رجال جبير و مخيف .. مرعب الى درجة من واحد يباع بعيونه و يشوف حواجبه الي تشبه حواجب (قائد اكسا) رئيس سرب البط الي بكارتون نيلز .. حواجبة جانت تبين عصيبته لان من يتعصب حواجبه تنطي ايعازات تبين ضوجته و المصيبة و الكارثة الكبرى اقل شغلة عنده فصل ٣ ايام و استدعاء ولي امر الطالب .. وكلش طبيعي عنده يطلعك بالاصطفاف كبال كل الطلبة و المدرسين و يطبق عليك خطبة كاملة .. يعني من الاخير شخص كلش عصبي و الطلاب تخاف منه ..
المهم ..
فد يوم عدنا مدرسة مال انكليزي اسمها ست فريال ... قبل مدة طويلة اخوها اخذ مشتمل و من محاسن الصدف بيومها اني جنت طالع اشتغل ببيت اخوها .. و هيه و رجلها جويي يشوفون اخوها و شافتني صدفة .. وعرفت بيومها شغلي حلو و رايحه حاجية للمدرسين وياها و واحد من المدرسين حاجي للمدير .. المدير ابنه جبير و راد يتزوج و ابوه (المدير يعني) راد يفصل الطابق الثاني لأبنه و يلغي الدرج الداخلي .. و يسوي درج خارجي من الحديقة ..
دز عليا المدير و بيومها خفت لان قبل كم يوم صار شد بالحجي بيني و بين استاذ جاسم ابو الرياضيات .. كلت بس لا فصل ..
من رحت كام يحجيلي عالبيت و عالشغل و راد ادبرله احد لو اني اسويي ..
طبعا الشغلة سهله بس صار اختلاف عالسعر و طلع المدير فوك ما هو مخيف و مرعب طلع فوكاها (جلف وبخيل) و ميطلع منه الدينار الا بشهادة وفاة ..
اني قبلت عالسعر لان فكرت لبعيد و كلت بلكي يداريني لان راح اشتغل ببيته ..
و طلعت شفت البيت و حاجيت الي اشتغل وياهم وقبلو بس بالكوه .. لان السعر تقريبا سد بسد بس علمودي قبلو ..
و طلعنا بدينا نشتغل .. جوى بالحديقة اكو بوري مال مي و مشكلين بالبوري صوندة .. اني دائما اجر الصوندة فوك للطابق الثاني لان نحتاج مي فوك .. و فد يوم الصوندة جانت فوك يمي و بدت تنسحب الصوندة .. واني جنت مسوي خبطة مال سمنت و محتاج المي كلش .. اني رأسا لزمت الصوندة و طلعت راسي من السياج مال الطابق الثاني .. جان اشوف بنية ماريد اوصف شكلها لان شراح اكول راح اظلمها .. البنية من شفتها خنكتني العبرة و كلامي طلع مكسر عبالك واحد ستوى متعلم الحجي .. كلتلها بس المي عفية نريده .. رفعت راسها و شافتني و عيني جتي بنص عينها ..
اووووووف شكد جنت تعبان بذيج اللحظة من الحر و من الشغل .. بس من عينها صارت بعيني نسيت كلشي .. نسيت كل التعب .. ابتسمت هيه جان تكول بس اسكي السنادين بسرعة ... كلتلها زين و بنفس الوكت ردت ادير ظهري واروح اكمل غير شغل بين متكمل سكي الزرع .. جان تكول انت شسمك ؟؟
كلتلها ليش ؟ وماعرف شنو الي خلاني اكول ليش ؟
جان تكول حتى اصيحك تنزل تاخذ الصوندة .. كلتلها عماد .. جان تكول زين ..
غير وراها نسيت شريد اسوي وبقيت كاعد بالكاع وخليت ظهري عالحايط وبنص الحر و الشمس و انتظر تصيحيني .. و صاحتني ورى شوية ..
نزلت ركض و اخذت الصوندة جان تكول انته مو طالب يم بابا ؟
كلتلها ليش انتي بنت استاذ فلان ؟
جان تكول اي استاذ فلان يصير بابا ..
الفرق بينها و بين ابوها مثل الفرق بين الطوبة النايلون القديمة الي اذا تضربها قوي ينكسر اصبع رجلك و الطوبة الثانية مال كاس العالم الملمسها انعم من الحرير ..
الحاصل ..
كلتلها اي و بنفس الوكت جنت داسحب الصوندة .. جان تكول تدري حلو واحد يدرس و يشتغل .. كلتلها اي .. جان تكول اني هم ادرس و اساعد والدتي بالعيادة ..
كلتلها ليش شدرسين و شنو ماما دكتورة ؟؟؟
كالت اي اني ادرس بمعهد معلمات و امي دكتورة اسنان ..
كلتلها اكلج شي و متزعلين .. جان تكول تفضل ؟؟
كلتلها ولا اكو ربط بين شخصيتج و شخصية استاذ فلان (ابوها) .. جان تبتسم و كالت حتى بالبيت هو هيج ويانا ترى ..
جان يصيحني بنفس الوكت واحد من جماعتي الي ديشتغلون فوك .. المييييييي يمعووووووووود ..
كلتلها انكر الاصوات ههههههههه جان تضحك و ترخصت منها و رجعت فوك اشتغل .. بس بقت البنية براسي .. وكملنا شغل و مشفتها بعد .. بس اندل وين تداوم لان بمنطقتهم اكو معهد معلمات و اعرفه وين صاير ..
وعرفت شوكت يبدي و شوكت ينتهي دوامهم .. واحد من اخوتي عنده سيارة .. اخذت سيارته و رحت يم المعهد انتظرها .. وبدو الطالبات يطلعون .. لكفتها طالعة .. اول مرة مخليتها تشوفني بس ثاني مرة لحكتها بالفروع .. جانو تلث بنات يمشون سوية .. وبالطريق لبيوتهم يتفرقون .. هيه جانت اخر وحدة .. صرت قريب منها بالسيارة جان اخفف و كلتلها هاي شنو يامحاسن الصدف .. جان تكولي لابله هههههه .. ضحكت هيه واني ضحكت ...و صدقه لضحكتها تكعد حتى الورود النايمة .. ومن ذاك اليوم بدت علاقتي بيها .. كمت يوميا اروح اشوفها و طبعا اخوية بذاك الوكت كيف لان كل ما اطلع بسيارته يكلي اريد ترجعلي السيارة مفولة بانزين و اني لازم ورى كل طلعه بسيارته ارجعها مفولة فوووول ...
المهم ..
البنية فرق بينها و بين ابوها من السما للكاع .. حبابة و ارق من خيط الحرير .. وصلت بينا المرحلة بالحب اعلى درجاته .. بحيث يومي و يومها ميكمل اذا منسولف لو نحجي سوية .. و طبعا هالشي خربطلي حياتي كلها بس خربطة حبيتها وعشقتها .. كمت انسى هواي و كمت بشغلي ما اركز .. وحتى بالبيت تغيرت شخصيتي .. بس سالفة الصفنة جانت ابد مو طبيعية .. كمت اشوف وجهها لحبيبتي بوجوه كل الناس .. صارت الماضي والحاضر وحتى المستقبل مالتي ..بدينا نخطط لكلشي و للمستقبل .. وفد يوم رحت للدوام كالعادة و جنت قبلها بيوم مسولف وياها بالتلفون و متواعد ثاني يوم اشوفها ..
وصلت للاعدادية جان الكه المدير (ابوها) واكف ينتظرني بره .. جرني من ياختي للادارة .. شبعني راجديات و بوكسيات و جلاليق .. و جان يضربني قوي بحيث اجوي الاساتذة عالصياح و الضرب .. حاولو يجروني من ايده .. و جروني بس خشمي طك دم من الضرب و قميصي صار وصلة حمرة من الدم .. سحبوني منه وهو يصيح عليا يكول الا اضيعك ياجلب (مكرم القارئ) .... اني عرفت انكشفت علاقتي ببنته .. بس شلون ماعرف ؟؟
من الاخير انفصلت من الاعدادية لان المدرسين طبكو وياه واتفقو وياه كلهم و رتبولي فلم وترقن قيدي واصلا اني جان يحقلي بس سنة وحدة و البس جيش ..
طبعا البنية اختفت بس وحدة من البنات الي جانت تمشي وياهم تعرف علاقتي بيها ... شافتني واكف برى بالسيارة و طبعا من يوم انفصلت لحد ورى فترة يوميا اروح لمعهد معلمات انتظرها .. البنية شافتني و جتني ..
كالتلي بعد لاتجي هنا لان مراح تجي و حتى اذا جتي متكدر تحجي وياك ..
كلتلها شكو شصار ؟؟
كالت ابوها بطلها و عرف هيه مصادقتك لان اخوها سامعها تحجي وياك بالتلفون و كايل لابوها و ابوها مشبعها كتل وبسط و هيه معترفه بكلشي ..
اني بيومها رجعت للبيت قنعت ابوية وامي يخطبوها اليا .. و بوكتها اني عندي المقدرة افتح بيت واعيشها لان مثل كلت بالبداية شغلي كلش زين ... و رحنا لبيتهم بس انطردنا من الباب حتى ملحكنها نفوت جوى .. و جربنا ورى فترة وهم نفس السالفة ابوها قافل علينا جان و ميقبل اصلا يسولف وي ابوية ...
و كل هالحجي اني جانت حياتي جحيم لان انام و اصحى افكر بيها .. ابوية لزمني كالي يابه رجاءا رجاءا رجاءا ابني بعد لاتخجلنا لان عيب اني وامك بهل العمر و نروح وننطرد جبيرة بحقنا ..
كلتله خلص يابه ..
و طبعا ورى فصلي من الدوام لبست عسكرية ..
بس ابد مكطعت الامل وكل مرة انزل بيها مجاز من الجيش اروح يم بيتهم افتر لو اروح يم المعهد .. بس مشفتها بعد ابد ..
و بيوم من الايام رجعت مجاز .. امي جتني كالت خابرت البنية و حاجتني ..
كلتلها جذب ..
كالت والله ..
كلتلها شكالت يمه الله يخليج احجي ؟
كالت والله يمه ماعرف شكلك بس عوفها للبنية وانساها و هذا جان طلبها و بلسانها لان صديقتها شايفتك وكايلتلها انت بعدك تروح يم المعهد ..
كلتلها ليش يمه اكطع الامل ؟
كالت البنية خلص مو من قسمتك وراح تتزوج ابن عمها ..
كلتلها جذب عفيه يمه لاتكولين هيج ..
جان تكول والله هيه كالتلي هالحجي ..
ورى هالحجي دخلت بحالة نفسيه سخيفة لان جان عندي امل بس هالامل تقريبا انعدم ورى اتصالها بأمي ..
و هلكد مجانت حالتي مو زينة دخلت هروب و مرحت للجيش بقيت ست اشهر تقريبا هارب من العسكرية و كل هالاشهر اني يوميا اروح يم بيتهم .. جنت بس اريد اشوفها ..
وفد يوم رحت وجانت هوسة كبال بيتهم .. وسالت بالمنطقة وعرفت هاي جانت الحنه مالتها .. يوم الحنه مالتها جانت طلقة الرحمة الي .. انطلقت هالطلقة و طشرت كل الي جوايي ..
بيومها رحت اني برجليا سلمت نفسي للفرقة الحزبية و رحلوني للمعسكر ..
انحبست بالوحدة العسكرية مالتي و جان مقرها بالكوت ..
مهتميت للسجن ومجنت احس بي بس الي اتذكرة جنت اتكلب يمنه و يسرى و اتذكر سوالفها وياي واتذكر كل الشوارع الي مرينا بيها اني وياها سويه ..
طلعت من السجن و كملت خدمتي العسكرية وتسرحت .. طبعا جانت متعتي بالحياة اروح اتمشى بنفس الشوارع الي فتنا بيها اني وياها سويه ..
شكد حاولت انساها مكدرت ولا راح اكدر ..
و اشتغلت و سويت محل خاص بيا مال ديكورات ونقوش مغربيه و سقوف ثانوية و كمت الزم شغل قوي و طبعا سميت المحل على اسمها .. و منسيتها ..
يجوز لان جانت اول حب بحياتي ماعرف ..
و مشت السنين و مثل مكلت ابد منسيتها و تزوجت .. وكل ما اضوج لو اختنك لو تصير عندي مشاكل بالشغل او حتى بالبيت اروح بسيارتي الشخصية اوكف السيارة بمكان و انزل افتر بنفس الشوارع الي جنت امشي وياها بيها .. جنت حتى الكافتريا الي جنا نكعد بيها اروحلها واختار نفس المكان الي نكعد بي و اذا المكان مشغول ابقى انتظر من يفرغ واروح اكعد ..
حبي جان نوع من الخبال و الجنون الها لذلك منسيتها ..
و مشى العمر ..
وفد يوم جنت لازم شغل مال قاعة اعراس بالكرادة .. تلفوني المبايل دك ..
جاوبت ..
الو ..
الو ؟
انت فلان .. كلتلها اي منو حضرتج ؟
طبعا الاتصال جان دولي ..
كالت شوف انت متعرفني بس اني اعرفك كلش زين .. كلتلها منو حضرتج غير افتهم ؟
جان تكول شوف اول شي لازم تفرغ نفسك حتى احجي وياك لان حجي طويل .. كلتلها والله اني حاليا بالشغل .. كالت زين راح ادزلك رسالة عالوتساب و اتصل بيك بعدين لان داتصل دولي ..
كلتلها دقيقة غير افتهم انتي منو ؟
كالت اني من طرف فلانة ..
طبعا من كالت فلانة كلبي وكف و عفت كلشي وطلعت بره كلتلها اوكفي دقيقة يمعودة اوكفي ماعندي شي و رحت كعدت بره و غلقت الاتصال العادي واتصلت عليها بالوتساب لان مجاني ..
اول مجاوبت كلتلها كولي شنو السالفة ؟
كالت اول شي اني بيت خالي يمكم بالمنطقة و عن طريقهم جبت رقمك لان اصلا الرقم مكتوب على محلك .. محلك الي مسمي على اسمها .. مو بله ؟
كلتلها اي صح اني مسمي على اسمها ..
كالت اني داتصل بيك من المانيا .. كلتلها اي ؟
كالت فلانة اقرب صديقه اليا بحياتي و جانت بكل كعدة تحجيلي جزء من علاقتكم و جانت تحبك لاخر نفس .. كلتلها اي ؟
كالت هيه ورجلها و جهالها هنا عايشين و تعرفت عليها بمعهد مال تعليم انكليزي جنا اني وياها نشتغل بالمعهد نعلم الاعمار الصغيره اللغة الانكليزية و الاغلبية جانو لاجئين  يعني اضافة للالماني انكليزي .. و يوم ورى يوم علاقتنا كبرت وصرنا قريبات الى درجة منفترق .. ومن صارت ثقة بيناتنا كامت تحجيلي كلشي عن حياتها .. طبعا هيه مجانت سعيدة بزواجها بس ابوها فرض عليها هالشي .. وهيه جانت تكدر تتصل بيك لان بوكتها كلتلها اني عندي اقربائي بنفس منطقتكم واكدر اجيب رقمك بعد ما انلغى الارضي ونزل بمكانه مبايل ..
بس جانت تخاف لاتنحسب عليها خيانه وهيه تكول حتى لو ما احب زوجي بس ما اخونه ..
كلتلها اي كملي ..
كالت من كثر محجتلي عنك وعن كل التفاصيل حفظت كلشي اني .. كلتلها اي ؟
كالت المهم .. جتي فترة عليها تجي للدوام وتصير عدها دوخة و وجع بكل مكان بجسمها .. كلتلها اي ؟
كالت راحت كشفت طلع عدها ذاك المرض ياستار ياربي .. كلتلها يمعودة كولي غيرها ورأسا بجيت ..
كالت المهم يوم ورى يوم كامت تنتهي البنية والعلاج ميفيد و لا فادها اصلا و توفت قبل فترة ..
من كالت توفت اني متت من البجي .. كلتلها الله يخليج كولي غيرها ..
كالت خلي ايمانك قوي و هاي قسمتها وقدرك انته .. وطبعا بذيج اللحظات لزمتني العبرة و بس ابجي .. كالت المهم البقاء في حياتك و هيه ترى اندفنت بالعراق و زوجها رجع هو والاطفال عاشو بالعراق ... واني طبعا جنت مترددة اتصل بيك لان عرفت راح تتاذى بس لان اعرف كلشي عن قصتكم وعلاقتكم عرفت بداخلي انت لحد هاللحظة مكاطع الامل وعبالك تشوفها بيوم لذلك كلت لازم اخابرك وادور على رقمك وافهمك ..
كلتلها زين شوكت صار هالحجي بس اني طبعا ابجي ابجي ابجي ..
كالت بفلان تاريخ ..
عفت كلشي بثاني يوم و رحت للمقبرة .. سالت على اسمها و طبعا اني اعرف اسم ابوها و اعرف تقريبا التاريخ الي اندفنت بي .. واندليت وين مدفونه ..
رحت وكفت كبالها حجيتلها كلشي صار وياي ورى ما ابوها كشفنا و فصلني ..
حجيتلها التعب الي تعبته بغيابها ..
حجيتلها شلون تزوجت ..
حجيتلها عالمحل شلون فتحته و شلون سميته بأسمها ..
حجيتلها على سجني ..
حجيتلها على المكانات الي امشي بيها وحدي وهيه مموجودة مثل قبل و نمشي بيها سوى ..
حجيتلها عالكافتريا و صارت بيها تغييرات وبدلو القنفات الي جانت تضوج منها وتكول عليها تاذي الظهر ..
و كمت كل فترة اروح هم ازور اهلي وازورها بالمقبرة .. بس اخر مرة شفت شي دمرني .
بالعيد هالحجي ..
رحت زرت ابوية وامي و رحت اشوفها ..
شفت زوجها و جهالها هناك وشفت بنتها .. اوف الله بنتها نسخة طبق الاصل منها ..
و تقدمت سويت نفسي جاي عالكبر الي بصف كبرها اقرى الفاتحة ..
و جانت عيوني على بنتها وابجي ..
البنية جانت تباوع عليا وهم تبجي على امها ..
بذاك اليوم ..
انجمعت اني وياها و زوجها وجهالها بمكان واحد وكلنا يربطنا نفس الشخص ..
بس اكو خلل بجمعتنا ..
كلنا عالكاع واكفين .. بس الي جايين عليه جواها ..
(حبي الاول والاخير)
انتهى
اخوكم ابو بغداد سايق التكسي
#ابوـبغداد