قصص عراقية حقيقية بقلم ابو بغداد سائق التكسي

المحاسب

من كثر الخوف الي جان عندي من عمي .. حتى كمت اذا اشوف شي غلط ما اروح احجي .. و هالشي صار من ورى موقف ..  مره من المرات ابنه الي اصغر مني جان كاتله ابوه (عمي) .. مشبعه كتل و هو لسانه كلش زفر (مكرم القارئ) ..
حتى على امه يغلط .. و حتى يغلط على ابوه مرات و من يركض وراه ابوه ينهزم .. مدلل كلش .. لان الولد الوحيد على ٤ بنات .. مره ابوه جان كاتله و كاله جيبلي مي .. يكرم الله يكرم الله الف مره شفته يتفل (مكرم القارئ) بالكلاص مال المي .. و رحت كلت لعمي .. طبعا حلف ابن عمي اني داجذب و اني حلفت هو سوى هيج .. امه اكيد طبكت وياه لان ((ابنها)) واني محد ماعندي يطبك وياي .. و عمي شرب المي و وفوكاها كتلني يكلي انته تكرهه .. من يومها كمت اشوف الغلط بعيني و اسكت .. حتى مرة عمي ولو مينحجي هالحجي لان عود عرض و شرف ..زوجة عمي جانت تحجي بالتلفون الارضي ساعات من عمي يروح للشغل ...
و حتى صوتها جان مبين مال وحده تحاجي رجال .. لان مو نفس الصوت الي تحجي ويانه بي بالبيت .. جانت تنعم صوتها .. و هم جنت اشوف و اسكت و اكول شعليه اني .. كبرت بهل البيت و جنت اتمنى تجيني (ربع فرصه) حتى بس اهج .. ابويه متوفي اني و امي بعد وفاة ابوية غصبوها اهلها تتزوج لان عمرها صغير .. و رجلها ما قبل اني اتحول يمهم بالبيت ..  امي ورده مال الله .. و مراح اكول عليها غلطانه .. لان كل شي صار مو بيدها و غصبا ما عليها .. لان اهل امي ناس كلش ملتزمين بسالفة العشاير و حتى بسالفة الامور الدينيه .. و كالو تعال اسكن يمنه و رادوني اروح بس اني مرحت لان اخاف منهم .. كلت على الاقل هالبيت بس عمي بي .. واذا انكتل انكتل من واحد .. بس بيت جدي ابو امي بي اربع زلم .. و مجرب ايديناتهم ابد مترحم .. اذا هي امي جانت تحجيلي قبل متزوج شلون يكتلوها .. اني اروح بنصهم شسوي .. مشت السنين و كبرت ببيت عمي .. ببيت عمي من كبرت كبر وياي حب لبنت عمي الي هي اكبر مني بسنتين .. جانت اكثر وحدة تدافع عني من الطفوله .. حتى من يضربني عمي جانت هي تبجي عليا قبل ما اني ابجي من وجع الكتل … و للامانة احجيها من كبرت اختلف تعامل عمي وياي .. لان ابنه ميعتمد عليه ابد ..بس هم مجنت مرتاح يمهم و جنت ادور على فرصة .. و سبحان الله صار موقف بحياتي غيرلي حياتي كلها .. اني اول شي اشكر عمي رغم كل شي .. لان لو مو فلوسه و صرفه عليا .. جان ما وصلت للكليه .. بالمناسبة هو طلك مرته .. و طلاقه جان بنفس السبب الي حجيته بالبداية .. كشف عدها علاقة و طلكها .. وتزوج ورى فتره ..
بس مرته الجديدة جانت كلش تحترمني و تحترم الكل .. اني جانت غرفتي فوك وحدي .. لان شمهما يكون البنات هم كبرو .. و هو متزوج .. حتى جنت رغم ما همه بيت عمي .. من اريد انزل من الدرج اصيح بصوت مسموع راح انزل .. عمي جان يحس اكو شي بيني و بين بنته الي اكبر مني .. بس مجان يبين هالشي لان هو اصلا يريدني اتزوجها .. بس اني جنت ممرتاح رغم كلشي .. لان ابنه ميحبني ابد .. من الطفوله هو ميحبني .. و جنت كلش اخاف ادخل وياه بأي موضوع .. يعني ابتعد منه ..
المهم ..
ورى متخرجت جانت الوظيفة الحكومية بذاك الوقت متوكل خبز … و اني اصلا شغلتي و شهادتي ادارية و بالحاسبات .. كمت ادور شركات اهلية حتى اشتغل بيها .. جنت كلش اهتم بمظهري .. وهالشي مو لوحدي سويته .. بنت عمي جانت تجمع من مصروفها المسكينه و تشتريلي قطعة ملابس حلوه .. و تخليها بغرفتي بين فترة و فترة .. يعني والله العظيم اذا اكول دارتني مثل امي بكل السنين الي عشتها ببيت عمي .. راح اكون مقصر .. يجوز بالبداية من جنا جهال جانت تحبني حب واحد من العائله و تنقهر عليا لان ابويه مات و امي تزوجت و تهجولت اني و اخر المطاف كعدت ببيتهم .. بس بمرور السنين الحب تحول .. صار حب ثاني ..
عالعموم .. الموقف الي صار و حجيت عليه و كلت غير حياتي هو بشركة اهليه .. هالشركه جانت محتاجة اربع محاسبين .. بذاك الوقت جانت هالشركة كلش معروفة حتى جان عليها دعايات على اساس تابعه بالباطن لواحد من الدولة .. اني كلت شعليه لواحد من الدوله لواحد من الشارع .. اني جنت بس اريد فرصه اشتغل بيها بشهادتي .. طبعا رحت للموعد مال التقديم .. و جانو اكثر من عشرين واحد موجودين .. الشركه مكانها بالعرصات الهنديه .. رتبت نفسي كلش و دعتلي بنت عمي ان احصل الوظيفة .. رحت و وكفت ماعرف احد و اول مره امر بهيج موقف .. شغله جديدة عليا .. جانت هوسه السالفة .. يعني الشباب الواكفين ديحجون بيناتهم و يضحكون .. طلع واحد من باب مسدود .. جان يعيط بالكل .. حتى الموظفين الي بداخل الشركة شفتهم خافو .. اني جنت شايل فايلي بوقتها و واكف بنصهم .. هالرجال جبير بالعمر .. صوته خشن كلش .. كام يسب و يغلط بالمباشر .. و مبين عليه ابد ميخاف .. كال شنو جهال انتو احترمو المكان الي جايين بي كاعدين تتمضحكون و صوتكم عالي .. و بعد حجي كومه .. صار هدوء بالمكان .. و هو واكف بنصنا .. و صوته الوحيد مسموع .. جان عيونه تصير عليا .. كال هاي شنو اموري و طبعا اني مو اسمي امير اصلا .. جان ييبتسم بوجهي و كالي تعال حبيبي تعال فوت جوى .. اني صرت مثل بلاع الموس .. خفت اكله اني مو امير لان ستوى جان يصيح و هو اصلا شكله يخوف .. مشى هو و مشيت وراه بس اريد اكله اني مو امير .. جان يفوت للمكتب و طلع هو الكل بالكل بداخل هالشركة .. يعني مثل متوقعت لان الي سواه مستحيل شخص عادي او موظف عادي يسوي .. دخلت وياه و جان يكلي عمو ليش وكفت برى مو بابا كالك كبل فوت .. اني كلت خلي اعترف كبل لا تكبر السالفة بس كلت هسه اذا اكله اني مو امير يمكن يطلعني جلاليق … كلتله استاذ ممكن اكلك شي بس الله يخليك اعصابك .. جان يكول اعرف الي تريد تكوله … كلتله شنو … جان يكول انته مو امير و اصلا ماكو احد اسمه امير جايني و انته مقبول مقدما بالوظيفة بس الي صار هسه بيني و بينك ديربالك يطلع برى هالغرفه .. كمت ردت ابوسه من الفرحه .. جان يضحك كالي اكعد احجيلي انته شنو و منو ..هو الظاهر جان عاجبه يسولف .. حجيتله شويه تفاصيل عني و طبعا قبل ما اروح كالي تدري اني ليش سويت هيج .. كلتله ليش .. كال حتى الي راح يشتغلون جديد هنا يعرفون ويامن ديتعاملون .. و بنفس الوقت يعرفون اني الوحيد هنا منو اقبل يشتغل و منو ما اقبل يشتغل … و الدليل انته انقبلت .. طبعا هو حبني .. و طلع جذب لا عنده ارتباطات بالحكومة ولا شي .. بس الرجل كلش غني ..
يوم ورى يوم هلكد ما حبيت الشغل وياه كمت اثبت روحي .. وطبعا بذاك الوقت الي بعمري جان يحلم يصعد سيارة شخصيه بأسمه .. اني اشتريت برازيلي تخبل .. و اول شي سويته اجرت شقة بعمارة بنفس منطقة بيت عمي .. و طبعا مجنت اكدر ااجر مشتمل لان اني عازب و صعب اهل البيوت الي بداخل المناطق السكنيه يأجرون مشتمل ارضي لو مشتمل طابق ثاني لشخص اعزب و صغير بعمري .. بس اهل العمارات عادي عدهم .. و الحمدلله و الشكر الموقف هذا جان بداية خير عليا و تحويله جذرية بحياتي .. و ماكو شخص اعرفه ميعرف هالموقف الي غير وضعي المادي تغيير جبير .. طبعا بمرور الوقت كام هو صاحب الشركة يستشيرني بالسوالف المالية .. و حتى مرة اخذ شغل بعمان و قبل ميفوت عليه لو مو اني مجان اخذه .. شغله جان اكثر شي بمواد البناء و بالاليات الثقيلة و حتى بالعقارات .. يعني حتى اكو مشاريع تابعة للدولة جان هو ياخذها من الصفر لحد التسليم .. و الله رحم بحالي و خلاني اكدر اطلع من بيت عمي .. و ردت اتقدم لبنت عمي بس كلت خلي انتظر اجمعلي مبلغ زين حتى اخذلي فد ١٠٠ متره ببغداد .. حتى ابنيها .. و كلت بس اشتري الكاع اطلب ايدها .. بهل الفترة عمي توفى .. و صار ابن عمي هو المسوول عن البيت و طبعا زوجة عمي الجديدة ما خلفت من عمي .. كبل رجعت لبيت اهلها لان اصلا تعرف ابن عمي ميحبها .. و رجعت زوجة عمي الي جان مطلكها للبيت .. ابنها رجعها  .. زين اني شسوي بهل الحالة .. كلت خلي اتقدملها و شيصير خلي يصير .. رحت اتقدملها و طبعا انرفضت ..
لان الي قابلوني هم زوجة عمي القديمة و هم ابنها و ثنينهم يموتون مني .. حاجيت بنت عمي لان هي جانت موظفة و دائما التقي بيها برى .. كالت نتزوج و شيصير خلي يصير قابل جهال احنه .. اني خفت بصراحة .. ما خفت على روحي .. بس خفت عليها لان هذا اخوها مخبل كلت اخاف يضربها اخاف يسوي بيها شي .. و كلتلها لا .. خلي اجرب اتقدم بعد مره .. كالت بابا ميقبلون بيك امي و اخويه و اعرفهم .. وانته هم تعرفهم شنو دتشغم روحك عنهم .. كلتلها زين اكو حل ثاني .. ندخل ناس كبار من المنطقة .. و رحت اخذت رياجيل كبار من المنطقة و هم ماقبلو كالو يابه هي متريده و هي كالتلنه هالشي قابل نغصب بنتنه عالزواج ..و طبعا هالحجي جذب بس شلون افهم هالرياجيل جذب قابل اجيب بنت عمي تكول كبالهم جذب .. شفت ماكو حل غير نتزوج بدون موافقتهم و شيصير خلي يصير .. طبعا هو مهددها لاخته لان هو مو طفل .. كايللها اخاف باجر عكبه تروحين تتزوجين من وارنه .. اموتج والله .. و بالمناسبه اني رحتله حتى برى البيت حاولت وياه بس هم قافل .. و جان اسلوبه وياي كلش سخيف ولو مو شغلتي يمه و الله العظيم انظف بي الشارع و اسحله سحل .. بس شغلتي يمه و اخاف عليها لبنت عمي .. و طبعا هالشي جان مبين عليا بالشغل لان نفسيتي كلش زفت .. الرجال ابو الشركه حس بهل الشي و شافني متغير .. كالي اموري شبيك .. ضحكت اني .. كالي اي اضحك ابني متسوى الدنيا .. كلتله والله استاذ عندي حالة و مأثرة عليا كلش .. و حجيتله كل شي .. كالي يمعود اسهل منها ماكو .. كلتله شنو .. جان يكول اني اروح اخطبلكياها بس اول شي انطيني عنوان اهل زوجة عمك ..
انطيته العنوان و هو عنده معارف هواي بكل مكان .. طبعا داز ناس لبيت اهل زوجة عمي بس ناس معروفين كلش .. و حاجين وي اخوة زوجة عمي .. و همه رايحين لزوجة عمي كايليها قبلي .. وبنت عمي اتصلت بيا كالتلي لك انته شمسوي؟؟
كلتلها شكو .. كالت امي كالتلي خابري لهذا خلي يجي احنا موافقين اني و اخوج ههههههههههههه .. و رحت بس هالمره رحت لبيت امي .. كلتلها اريدج تجين وياي و رجلها ما حجى شي كال اذا تريد اني هم اجي .. كلتله تعال و طبعا بهل الموقف و من ورى طلعته وياي (رجل امي) ماعرف ليش حبيته رغم ما جنت اسمع اسم الشيطان ولا اسمع اسمه .. و حتى قويت علاقتي وي اخوتي الي من امي … و جوي و الحمدلله خطبتها و ورى فترة تزوجتها .. و شفت كل الخير من وراها .. كدرت ابنيلي مشتمل و صارت حياتي قصة و كل الي مريت بي تعدل من سيء الى احسن .. وهالشي بفضل الله و بفضل بنت عمي الي جانت ساندتني بكلشي .. و بفضل عمي هم رغم مجان قاسي عليا و يكتلني ماشي مو مشكله .. بس الرجل روحه حاضره ما قصر وياي من ناحية المصاريف الدراسية ابد … و هسه اني كبرت و صار عندي جهال كبار و بنتي الجبيرة هم متقدملها واحد .. سنين عمري ركضت ركض لدرجة هسه بنتي راح تتزوج .. و الحمدلله و الشكر علاقتي بكل اقربائي زينه و اخوتي هم من أمي ممقصر وياهم ابد .. بس زوجة عمي و ابنها ابد علاقتي بيهم مو زينه ورى كل الي صار و ورى هالسنين كلها بعدهم يكرهوني .. و طبعا ابو الشركه صاحب الفضل عليا هم .. توفى و اني دائما اترحمله لان هو هم جان جزء رئيسي بنجاحي بهل الحياة .. و اخيرا الحمدلله على كل حال ..
(المحاسب)
انتهى
اخوكم ابو بغداد سايق التكسي
#ابوـبغداد