قصص عراقية حقيقية بقلم ابو بغداد سائق التكسي

(فاتن)

اختنكت من سمعت راح تتزوج واني ما بيدي شي …. و كمت ركبت الدراجة الي اشتغل بيها توصيل … و طلعت بالشارع افتر و ابجي … الدموع ترست عيني و اني جنت لابس خوذة … ردت اطبك الدراجة حتى امسح وجهي … افترت بيدي و انكلبت … ايدي انكسرت و العظم راح انتهى … شالوني مثل الجثه …
و ودوني للمستشفى … عالجوني و امي خطية اجتي و خالي هم اجه … و بقيت فترة بالبيت و صلحولي الدراجة الي هي مصدر رزقي الوحيد … تخيلت روحي راح تخلص حياتي … لان هاي اول حب بحياتي و راحت من ايدي … هي جانت تتصل بيا حتى ورى ما كل شي انتهي و صارت للولد … بس اني ما قبلت احجي وياها بعد … غبي اني غبي .. ما اعرف الومها ما اعرف الوم روحي لان الزواج يرادله فلوس واني بعدني صغير … امي تكلي بعدك صغير باجر عكبة تكبر و تخلص دراسة و تتوظف و ازوج احلى وحده … اني اكلها ماكو مثل فلانه … تكلي اكو … و بقيت مقهور لحد ما التقيت بجد ولد صديقي …
راح احجي الصدك و ما اجذب بكل حرف … الرجال هذا الجبير بالعمر اني اضوج منه لان يحجي هواي … وسوالفه كلها قديمة … بس بذاك اليوم حبيته و من يومها كمت يوميا اذا ماعندي شي اروح اخلي يسولفلي قصص … حت الولد ابن ابنه (حفيده) صديقي يضحك عليا من يشوفني كاعد يم جده … بيومها جنت انتظر صديقي يم باب بيتهم … هو كاعد على كرسي صغيروني بصف الباب و بيده صونده يرش بيها الكاع و الحايط و الزرع الي يم حايطهم … شافني شكلي مكلوب كالي شبيك .. كلتله ماكو شي حجي … كال احجي شبيك .. كلتله جنت احب وحده و راح تتزوج …. كال عادي ابني بعدك صغير و راح تجي غيرها و احتمال هم متتزوجها بس بالنهاية راح تتزوج و تتذكر كل هالشي و تتذكر حجايتي هم بعد عمر طويل و اريدك تترحملي لان اكون مسافر من هالدنيا … كلتله لا حجي عمرك طويل … كال شوف راح احجيلك شغله … تعال فوت جوى .. فوتني جوى كعدني بالحديقة عالكراسي … و من اجه صديقي كعد يمنا و بقى يسمع القصة … كال انته حبيت وحده  و الماده الي فرقت بيناتكم لان انته بعدك صغير و كل شي ماعندك غير يوميتك من التوصيل صح .. كلتله صح … كال الماده مو وحدها الي تفرق بين الناس … مرات السياسة و المشاكل العشائرية و الطائفية و اختلاف الاديان و حتى القومية تفرق … كال شنو رأيك بقصة بطلها اني الكدامك حاليا … كلتله شنو يعني … كال اني تزوجت بسنة ١٩٦٨ … الله رزقني بعلي الجبير و صفاء الاصغر منه … تزوجت بعد قصة حب .. حبيت بنية جوارينا اسمها فاتن … حبيت فاتن لدرجة الخبال .. و تزوجتها و مكدرت اكعدها وي بيت اهلي لان صغير .. اجرت غرفة صغيرونه بساحة الاندلس … و كعدنا بيها … غرفة وحدة ...
هالغرفة جان بيها حمام .. هو حمام و هو تواليت (مكرم القارئ)  و الطبخ جان بنفس الغرفة .. تعرف شنو معناها تنام بغرفة بيها ريحة مسواك و دهن محروك … جنت بوقتها اشتغل و بالقليل الي يدخلي عشنا اني وياها … و ورى فترة ما طولت سنة كدرت اطلع من الغرفة و اخذ مكان ثاني احسن بهواي من هالغرفة … و فرحانين .. فرحانين لدرجة ماكو شي بهل الدنيا يضوجنه … امشي وايدي بأيدها بكل مكان … عبالك نريد نشوف الناس كلها احنا متزوجين … و مثل مكلتلك اجاني علي و صفاء … و كبرو الجهال شويونه … والسياسة فرقتنا … انته فرقتك المادة … اني السياسة .. انته احمد ربك متزوجتها و بعدك عالبر … احمد ربك يوميا على هالنعمة … تعرف شنو معناها من انته متزوج شخص تحبه و يجون ياخذو منك علمود سياسة بلد ؟؟؟؟
تعرف شنو معناها انو انته تربي اطفال ثنين و امهم ياخذوها ينزلوها عالحدود لان اصلها ايراني و هي اصلا متعرف شنو ايران غير بس انو بلد بصفنا و متعرف و لا كلمة ايرانية !!!
اخذو فاتن مني … وعافولي علي و صفاء … الجهال متعلقين بأمهم كلش لان اطفال …. بيومها بجيت … و نعلت ابو حكومة العراق على ابو حكومة ايران … يعني من ورى حكومتين وحده انكس من الثانية اني هيج يصير بجهالي …. بس خوووووف .. خوف جان يسيطر عليا و ميخليني احجي … اذا احجي اروح بالرجلين و هالجهال منو الهم … بلعتها و سكتت و حاولت اربي جهالي بس مكدرت .. ليل و صبح جنت ابجي .. ابجي على حبي الاول و الاخير … و ابجي على جهالي … و مشت السنين و امي زوجتني … تزوجت وحده هم مالها ذنب .. ما جنت احبها اصلا … بس مسكينه مالها ذنب .. قابل اعدم حياتها بسبب وضعي … و سنه تجر سنة … و حرب تجر حرب …. و جهالي كبرو وهمه يعرفون اكو شي نقص بس يحسون هاي امهم … لان جهال … ربتهم ايمان تربيه حلوه … و صار عندي من ايمان ولد و بنيه … الولد حسن ابو صديقك هذا الكاعد بصفك … و نغم حاليا متزوجه و كاعده وي زوجها بالامارات ….
المهم … ورى ٢٠٠٣ جتي فاتن بعد ما سوت اعلان عالقنوات و جانت مخليه بالاعلان صورة صفاء و علاوي من جانو صغار و كاتبه تفاصيل عن بيتنا قبل وين جان … و احد اقربائي شاف الاعلان و بلغني و طبعا ايمان تعرف كل شي … و رحت التقيت بيها .. جايبه وياها ابنها .. ابنها ايراني و ميعرف ولا كلمة عربي … جايبته تعرفه على اخوته … شوف المشاعر جانت موجوده … بس مو مشاعر ولدي وي امهم … المشاعر جانت بيني و بين فاتن … جنت اباع بعيونها و تباع بعيوني بس ايمان كاعده و ابنها لفاتن كاعد … وهو ابوه حي يرزق موجود … جهالي الي همه زلم طبعا … متعلقين بأيمان و صح بجو و نزلت دمعتهم بس جنت احس اللقاء جان لقاء شكلي او رمزي … بس اللقاء الحقيقي بيني و بين فاتن .. حسيت كلبي يريد ينفجر و جنت اتمنى احضنها … بس مكدرت … مو على ذمتي المريه … بيومها بجيت .. وهي بجت .. اني لكيت سبب لدموعي انو حزنت على اولادي و هي هم لكت نفس السبب بس ثنينا بجينا على وضعنا … طبعا هي تمرمرت و شافت الويل من ذبوها عالحدود .. و حتى هناك هم مرتاحت و من شغل لشغل و بالاخير هذا ابو ابنها التقى بيها و تزوجها …
الحاصل ورى اسبوع من جيتها هنا للعراق … راحت رجعت لحياتها ..
و بقت تتصل بالولد بين فترة و فترة .. و مرات بين سنه و سنتين يلتقون لو هنا لو همه ولدي يروحون لأيران …
انته همزين بعدك برقم صفر … بعدك بالبداية حبيبي … لا تنقهر … و اريدك ترجع تتذكر كلمتي .. مو بس المادة هي الي تفرق … طائفية و سياسة و فلوس و دين و قبلية و قومية و هواي امور ثانية هي تفرق … و اريدك دائما تتذكر شي … الشعوب مالها دخل ابد بسياسة الحكومة الي تحكم … يعني ابد لا تسب شعب بي الفقير و الغني و البسيط و العامل و بي اليتيم .. بس الك كل الحق ان تشتم حكومة .. عربية او اجنبية (يعني مو عرب) …. ليش .. لان الحكومات ميمثلون الشعب …
وانته نهاية قصتك و نهاية حبك هم الها ربط بالحكومة لان لو الحكومة منطيتك حقك چان كدرت تتزوج بس حظنا ولا شريف لزم هالبلد من ولادتي لليوم ...
هسه بعدك حزين ؟؟؟
كلتله لا عمي ياحزين قصتي متجي شي يم قصتك .. و كمت بسته و كلتله الله يكون بعونك .. كالي انسى حبيبي و عيش عمرك و راح تجي باجر عكبه الي تنسيك كل شي … و طلعت فرحان و مكيف و صدك نسيت … و كمت يوميا امر عليه … وادعي من الله ان يطول بعمره لهل الرجال … صدك لو كالو الناس صناديق مقفله … ولا جنت اعرف جد صديقي الي يجلب بالواحد حتى يسولف وراه هالقصة … وبس ..
(فاتن)
انتهى
اخوكم ابو بغداد سايق التكسي
#ابوـبغداد

روابط صفحات قصص ابو بغداد سايق التكسي

صفحة الانستغرام للقصص المصورة و القصص القديمة  …
‏https://www.instagram.com/iraq.txei/
صفحة اليتيوب للقصص المسموعة لذوي الهمم و للاخوة و الاخوات الي نظرهم قليل …
‏https://www.youtube.com/channel/UCER9QkmohGeDKgFFQ8WNAxA

و صفحة السناب بالصورة الشخصية للصفحة و شكرا لكم ..