قصص عراقية حقيقية بقلم ابو بغداد سائق التكسي

إنتهى

افكاري جانت صغيرة الى درجة اكول بيني و بين نفسي معقولة باجر عكبة عدنان يعوف لينا و يصادق غيرها ؟
معقولة عبسي يتعارك وي عدنان فد يوم و تخرب علاقتهم  و (يتزاعلون) ؟
مستحيل لينا تصادق غير عدنان و تحب واحد غيره ؟
زين كابتن نامق ليش شواربه منبلات ؟
و جنت اذا اريد اعصر افكاري و اسوي نفسي فهيم اكعد اسفط احداث الحلقة الجاية ..
جنت احس ابطال المسلسلات الكارتونية حقيقين و فد يوم بالشارع التقي بيهم ..
يعني ما اجذب هسه اذا اكول جنت اخاف على طيارتي النايلون لا يجي كرندايزر بسرعة و يكطع الخيط مالتها بس بدون قصد لان كرندايزر جوى ببطنه دوق فليد ومستحيل دوق فليد تطلع منه العيبه ..
و من طلع نيلز ... كمت اخاف ااذي الحيوانات و حتى البزازين الي جنت اركض وراهم بالشارع من دربونه لدربونه بطلت اتقرب عليهم اخاف لا يطلعلي القزم و ينتقم مني و يحولني مثل نيلز و ابقى مهزوم على ظهر بطه و ادعي من الله ارجع لجسمي الحقيقي ..
جان عندي هوس احفظ اسماء الابطال ببرنامج افتح يا سم سم .. و باليوم الي ميطلع بي ميسون لو انيس لو بدر ابقى ادور عليهم و اروح اسأل الاكبر مني بالبيت اكله وين بدر اشو مطلع اليوم بس لا صار بي شي ؟
جنت جاهل .. و كلمة جاهل بيها الف معنى ..
جنت جاهل وماعرف الي يصير برى باب بيتنا ...
جنت جاهل و ماعرف اوجاع الناس الي كاعدين ورى الحياطين ببيوتهم ..
جنت جاهل وما افتهم شي عن الامور السياسية و الي ديصير بالبلدان ..
جنت جاهل و ماعرف الوكت شضاملي و شضام للناس ..
جنت جاهل و ماعرف ابوية شلون يجيب مصرف للبيت و شلون امي تقسم ميزانية الايجار و ميزانية المشتريات ؟

جنت اشوف الرجال الي يفتر بالعربانة بالظهر الاحمر مجرد واحد اشتري منه ازبري لو موطه و ماعرف هالرجال شلون متحمل هالحر الي اني اصلا اتحمله بس على كد مسافة باب البيت وارجع افوت ركض جوى كبال المبردة اكعد اكل الازبري لو ابو الجيس الي اشتريته منه ...
مفكرت بيوم هالرجال ليش يفتر بالشارع بهل الحر و ليش يبيع ابو الجيس لو ازبري؟
مفكرت ام الدكان الي اروح اشتري منها القناع الورق مال ساسوكي ليش لابسة اسود دائما؟

مفكرت راح اكبر و اعرف كلشي ..
عبالي راح ابقى صغير و كل حياتي عبارة عن كارتون و دعابل و طيارة و بايسكل و ابو الجيس ..

و كبرت و شفت الدنيا على حقيقتها ..
شفت الف علاقة حب اكبر من علاقة حب عدنان و لينا انتهت بلحظة غضب و كل واحد من الطرفين راح بحال سبيله ... شفت كلوب انكسرت و تفطرت بلا سبب ... شفت اصدقاء علاقتهم جانت تنضرب بيها المثل و اقوى من علاقة عبسي بعدنان تهدمت بلحظة وصار الحقد بين الاثنين اكبر و اعظم من حقد قوات كوكب فيكا على الارض وعلى دوق فليد  ..

شفت اقنعه هواي بس مو ذيج الاقنعة النشتريها بفلوس مال ساسوكي الورقية ... شفت اقنعة تنلبس بنفس الوجه .. تبتسم و تضحك للعنده فلوس و تدلغم و تنزل الجينكو عالفقير العايش على كد حاله ..

واليوم ..
كبرت و صرت قوي .. صرت قوي لدرجة ما اخاف من القزم ولا اخاف عالطيارة مالتي لا يكطع خيطها كرندايزر ولا حتى اخاف اذا ما اشوف انيس لو بدر لان كلهم ما عليهم شي .. 

بس حرامات ..
حرامات صرت قوي و ما اخاف ..
لو باقي على ذاك الخوف و مكبران و مشايف الحقيقة هواي احسن الي ..
لان ببساطة .. الحقيقة الي جنا منعرفها و جنا خاتلين ورى شاشة صغيرة نباع عليها ..
جانت هواي اسهل و ابسط من الحقيقة الي ورى السياج و بعيد عن الشاشة ... عفنا الشاشة و نزلنا لواعيب اساسين بهل العالم ..
عالم ميرحم ولا يخلي رحمة الله تنزل ..
عالم بي النفاق ذكاء ..
عالم بي الكذب فن و ترتيب و دهاء ..
عالم بي اللعب بالمشاعر صنعة و بيها استفادة ..
عالم بي النصب والاحتيال تحت اي مسمى هو حرفة و خوش استفادة ..
عالم بي الفلوس اهم شي ..
عالم بي كلشي معكوس ..
من الاخير و من النهاية ... اتمنى ارجع اكابل التلفزيون و بيدي ابو الجيس و ابقى مركز شلون نيلز راح ينهزم من ركس .. و خلص .. ماريد اكثر من هالشي ..
ماريد اعبر باب البيت .. ماريد ..
انتهى
اخوكم ابو بغداد سايق التكسي
#ابوـبغداد