قصص عراقية حقيقية بقلم ابو بغداد سائق التكسي

ابو المطعم

حلمي جان السفر … و خصوصا ورى سالفة الشهادة الي جنت اتمنى اتخرج حتى اخذها و اتعين .. متعينت و كرهت شكو يوم درست بي .. اني اعرف هالشي مصار بس وياي صار وي هواي طلاب بوقتي … هواي جانو مخلين املهم عالشهادة و عالتعيين بس مرهمت … من شفت روحي وجودي و عدمي واحد قررت اسافر .. خلص قفلت عالسفر .. أمي و اخوتي جانو رافضين الفكرة و يكولون ابقى هنا و اكو شغل … بالبداية كلت خلي اجرب اشتغل أي شغلة بس علمود أعيش و اشوف حظي … اشتغلت بمحل مال جملة (غذائية) ابو المحل جان يحسب روحه رب مو أنسان .. يتعامل وي الكل بفوقية و كل كلمتين و الثالثة يهدد بحجي مبطن بالطرد … و اخر شي متحملت و طكيت بوجهه و رأسا بطلني … وراها خلص كلت اسافر يجوز الكي روحي بغير دولة و خصوصا العمر يمشي وميوكف .. و اني عمري عبر ال٢٨ سنة و كلشي ممسوي لروحي … طلعت من العراق و سافرت تهريب من تركيا لليونان ومن اليونان طيران لكولن و استقريت بميونخ .. ميونخ المانيا .. محافظة جبيرة و بيها شغل بكل شبر … و طبعا سالفة لجوئي انتهت بالرفض حالي حال هواي عراقيين هنا بميونخ … تعرفت على ولد من اهالي كربلاء صار صديقي كلش .. الولد خباز .. يخبز خبز عربي و عراقي … و اهل المطاعم يركضون وراه و طبعا هو هم مرفوض بس القانون الي بالمانيا يكول الي يشتغل ابيض و رسمي ٣ سنوات و يدفع ضرايب و ماعنده مشاكل ياخذ اقامة .. و الولد جان ماشي بالموضوع  …
من صار صديقي كلش و اكثر من اخويه ..
حجيتله قصتي و هو الولد ممتخرج و مدارس اصلا … وكالي شوف اني راح اهديك هدية بدون مقابل و اخلي الشغل هو يركض وراك مو انته تركض وراه .. كلتله شنو ؟؟؟
كال اعلمك تخبز .. و شغلني وياه بنفس المكان و علمني شلون اخبز و طبعا بالبداية هواي تعبته لان مجنت اعرف اسوي الخبزة عدل و هواي جان عندي عجين يوكع .. لحد ما تعلمت الخبز عالمضبوط وهو ابد ما تعاجز مني و ابد مكال مترهم سالفتك .. جنت مرات اتشاقى وياه .. اكله انته تشبه استاذ فلان .. يكلي منو استاذ فلان ..
اكله استاذ فلان جان الوحيد بين التدريسيين يعيد المادة اكثر من مرة اذا ممفتهمها واحد من الطلبة … و جان ابد ميتعاجز من عدنا .. انته مثله .. بس الفرق هو يدرسني احصاء و انته تدرسني كيفية انشاء الشنكه و كيفية لصقها في داخل التنور هههههه جان يضحك .. و تعلمت الخبز و صرت خباز درجة اولى .. و طبعا بهل الحجي جنا اني وياه ساكنين سوى بنفس الشقة و ويانا ولد هم عراقي من اهل الموصل .. الولد هم طيب وابن اوادم و يشتغل بالملعب مال طوبة الي بميونخ يشتغل بالتنظيفات و الولد جان مقيم ...
الوحيد بينا هو مقيم .. و جان قوي باللغة و يساعدنا بتعليم اللغة بالمضبوط .. لان لغتنا جانت على كدنا و خصوصا احنا شغلنا مو مثل شغله .. شغلنا و اختلاطنا بس بالعرب مو بالالمان ..
الحاصل .. بيوم من الايام ثلج و دنيا باردة كلش و بالشارع تزحلكت .. ايدي اليسرى انكسرت … لان بالوكعة مالتي وكعت على عكسي و رأسا طك العظم .. كعدت من الشغل لان ماكدر اشتغل بسبب ايدي .. بقيت بالشقة .. جوارينا الي بالعمارة عراقي بس متجنس … فد يوم كالي تروح وياي لمدرسة بنتي لان طالبيني بموعد .. كلتله يله ماعندي شي و ايدي مجبسه جانت و ماعندي شغل اصلا … رحت وياه عالواهس و بقيت واكف برى ادخن .. وهو فات جوى … خلص موعدة و رجعنا و عزمني عالغدى يمهم بالبيت .. رحت و زوجته الله يستر عليها جانت طابخه طبخ يخبل … و من يومها علاقتي صارت بيهم قوية .. كمت دائما اروح يم الرجل و نسهر نسولف و نحجي .. فد يوم كالي اكو سفرة كل فترة نسويها نروح بيها عوائل عراقية شنو رأيك تجي ويانا مدام انته معطل من الشغل بسبب ايدك .. كلتله يله علواه .. ورحت وياهم للسفرة .. بالسفرة تعرفت على بنية عراقية .. البنية قديمة بالمانيا و متجنسة و هي وامها جانو جايين للسفرة … صار بيني وبين البنية حجي و هي عرضت عليا اذا احتاج مساعدة بالترجمة لو بأي شي ثاني قانوني لان هي قديمة و تعرف هواي امور بهل الخصوص .. بديت احجي وي البنية و طبعا للامانة هي ساعدتني بهواي تفاصيل علمتني عليها … و حسيت هي صار عدها ميول الي … البنية متتعيب ابد … حلوة و مثقفة و حبابة .. جنت وي البنية كلش صادق و حجيتلها اني تخرجت بالعراق وملكيت تعيين و اني اريد اكون نفسي و اتزوج لذلك طلعت لأوربا .. البنية بديت احجي وياها هواي على موضوع الزواج .. و الله العظيم جنت رايد اتزوجها لان حسيت روحي رايدها … بس حسيت و احساسي جان بمكانه ورى مرحت للرجال الي اصلا هو عرفني بيها و حجيتله كلشي ..
حسيت هي بالبداية مجان عدها اعتراض على موضوع الارتباط بس من عرفت اني ماعندي اوراق حسيت بيها مثل الي ثكلت عليا و كامت قليل تتواصل وياي .. و رحت للرجال كلتله و حجيتله كالي شوف خلي اكون واقعي وياك حقها ترى .. لان البنية هي متجنسة و انته ماعندك اوراق و هي ترى خلي ببالك كايله لزوجتي هو يريد ياخذني علمود يطلع اقامة براسي .. وهالحجي حجي امها للبنية لان زوجة الرجال جوارينا صديقتها كلش … اني بيومها كلش كرهت روحي … كلش .. حسيت هي عبالها اني اريد استغلها بس والله العظيم اني مجنت هيج .. واصعب شي عالبشر من يحس روحه مظلوم و ميعرف يطلع نفسه من الموقف … اتصلت بيها و حاولت اتواصل وياها و اسوي موعد … تواعدت وياها وطلعنا .. كالت شوف انته انسان متتعيب و ابن اوادم و طيب … بس تدري صح احنا باوروبا بس اني من النوع الي اسمع كلام امي … اني اكثر واحد تقدم عليا .. و كلهم مقتنعت بيهم لان حسيت بيهم داخلين على طمع .. ثنين تقدمولي من العراق حتى يجون لاوربا عن طريقي لان اني متجنسة .. و هنا تلاثه ماعدهم اقامة هم تقدمولي .. كلتلها دقيقة يعني حجي فلان صح و انتي عبالج اني متقدملج لان ماعندي اوراق .. كالت لا حشاك بس هذا تفكير امي و اني ادري بيك انته غير شكل و انته رايد تتأهل من صدك … بس شسوي هذا تفكير امي و شي ثاني انته ستوك جاي هنا ماعندك مصدر رزق ثابت و فوكاها اوراق ماعندك .. كلتلها زين انسي الموضوع كله و اعتبري تسرع مني .. و اهم شي شفت وجهج الطيب يا وردة .. و اتمنى يبقى تواصلنه و اعرف اخبارج الحلوة و اني اتمنالج كل خير … و افترقنا .. هي رجعت لحياتها و اني رجعت لحياتي .. بيومها حسيت روحي مختنك لان ماعرف شسوي .. اني حبيت البنية بسرعة .. و مادري ليش هيج اندفعت عليها .. و بنفس الوقت انطيتها العذر مع العلم كل الي يعرفوني يكولون اذا هي شافتك خوش ولد مابيها شي اذا تساعدك بالاوراق .. و اني الله شاهد مو علمود الاوراق ردتها .. عالعموم .. من يومها ابد بعد مفتت بعلاقات وهي الوحيدة جانت بحياتي .. صح اني بالخارج بس اني مو واهسي هالامور … و بنفس الوقت حسيت الي ماعنده اوراق هنا الناس تباوعله بفوقية و عبالك بي نقص .. و رجعت للشغل ورى مطابت ايدي .. ذبيت روحي عالشغل و رتبت عن طريق المحامي سالفة الاقامة .. لان القانون يكول اذا واحد يشتغل ٣ سنوات ياخذ اوراق بس اهم شي يكون مستوفي كل الشروط ….
و البنية بعد ابد ملتقيت بيها … بس للأمانة جنت اسأل عنها من بعيد لبعيد و عرفت انو هي دخلت علاقة حب و انتهت لان الي دخلت وياه بالعلاقة متجنس و عراقي وعنده محلين حلاقة بميونخ بس ابو نسوان و علاقات … و جنت بيني و بين نفسي ادعيلها انو تجيها قسمة زينة و تستقر … عالعموم … الولد ابو كربلاء اخذ الاقامة و قرر يفتح مطعم .. بس متكفي فلوسه … اني جنت ماشي بسالفة الاقامة بس بعدها مطالعه .. كلتله اني ادخل وياك شريك … طبعا بذاك الوكت جنت مجمع خوش فلوس بسبب شغلي بالخبز و كل هالشي بفضل الولد .. و فتحنا المطعم و سبحان الله ورى ما فتحنا المطعم بكم شهر جتني الاقامة … بس للاسف مو كل شي حلو يكمل على خير … اخوية و صديقي و صاحب الفضل عليا الولد ابو كربلاء ابوه توفى بالعراق … و قرر يعوف كلشي و يرجع للعراق … و كالي المطعم كله راح اسجله بأسمك و اانته انطيني حصتي و حتى اذا ماعندك حاليا بعدين حولها اليا للعراق … و اتفقت وياه و رتبنا بس بنفس الوقت اني جنت مخلي عيني على مطعم ثاني بمكان احسن بهواي من المطعم القديم … و قبل ميصفي كلشي صديقي و يرجع للعراق .. اخذت المطعم الجديد و رتبته و سويت دعوات لكل معارفنا بس مكتبت منو صاحب المطعم .. من ضمن الدعوات قررت ادز دعوة للبنية و امها … بحجة مطعم عراقي جديد مفتح و اول يوم مجانا … و دزيت الدعوة عن طريق جواريني القديم الي هو عرفني بيها للبنيه ... و حلفته انو ابد ميكول منو صاحب المطعم .. و صار يوم الافتتاح و جوي الناس … اني جنت استقبلهم و جتي هي وامها .. من شافتني اني استقبل الناس انصدمت …  و طبعا جنت جايب فرقة مال عزف عراقي يعزفون و كلهم اصدقائي … بنص العزف و الناس ملتهية عافت امها وجتني ..
باركتلي و كالت هاي المطعم الك صدك ؟؟؟
كلتلها اي الحمدلله  … كالت شسويت عالاوراق ؟؟
كلتلها خلصت ٣ سنوات شغل ابيض و ضرايب و حصلت الاقامة ..
كالت اي زين عالخير و متزوجت ؟؟؟؟
كلتلها اي همزين سألتيني ..
كالت خير … كلتلها مدام انتي بنية و حبابة و طيبة ..
كالت اي؟؟؟
كلتلها فدوة متشوفيلي بنية عراقية عن طريقج بس اهم شي تكون مو مقيمة و ماعدها اوراق و ياريت لو تكون بالكمب بعدها حتى هم اتزوجها و هم اساعدها تاخذ الاوراق لان هسه عندي شغل الحمدلله و عندي اوراق .. و تعرفين اني ماعندي وقت اروح و ادور و انتي لان بنية اكيد عندج علاقات وي عوائل هواي … حتى هم استقر و هم اساعد الي راح اتزوجها … و ياريت امج هم تساعدني بهل الشي …
البنية سكتت طبعا .. و كالت اوك و عافتني وراحت … بس بقيت اباوع عليها من بعيد لبعيد … و حسيت بيها كرهتني بس اني والله مجنت رايد هالشي .. يابه والله العظيم لو بذاك الوكت كايلتي يابه من تحصل اقامة عود تقدملي جان عادي عندي .. بس سالفة اني رايح اتقدملها علمود احصل اقامة براسها هاي جانت صعبة عليا … عالعموم .. ورى مفتحت المطعم بسنة ونص اتزوجت و صدك اخذت بنية ماعدها اوراق هي واهلها .. و سويت عقد لابوها مال شغل بالمطعم و طلعلته اقامة و الحمدلله الله وفقني و هسه اغلبية العراقيين بميونخ يعرفوني و ماكو واحد بيوم دك بابي و رجعته مكسور خاطر … لان ببساطة احنا هنا واحد للثاني مو واحد ضد الثاني … و البنية الي حبيتها و ردتها من كل كلبي .. لليوم ممتزوجه لان تشوف الكل رايديها علمود جنسيتها (لو) الي تلكاه كامل مكمل من ناحية الوضع الاجتماعي و المادي و الاوراق يطلع بي عيب ثاني و تنتهي علاقتها بي .. و شاهد الله ما اتشمت بيها واتمنالها ان تنرزق بأبن اوادم الي يصونها و يرعاها … و بنفس الوقت الله يحفظلي زوجتي و اهلها و اهلي و يحفظ كل الناس يارب و يرزقنا رزق خير و يرزقكم ..
(ابو المطعم)
انتهى
اخوكم ابو بغداد سايق التكسي
#ابوـبغداد